පාර්ලිමේන්තුව වහා කැඳවන්න වසර අවසානය දක්වා මැතිවරණය පැවැත්විය නොහැකියි : එම්.ඒ. සුමන්තිරන්

පවතින වසංගත තත්වය හමුවේ වහා පාර්ලිමේන්තුව කැඳවිය යුතු බව දෙමළ ජාතික සන්ධානයේ ලේකම්, හිටපු පාර්ලිමේන්තු මන්ත‍්‍රී නීතිඥ එම්.ඒ. සුමන්තිරන් ප‍්‍රකාශ කරයි.

අපේ‍්‍රල් 01 වැනිදා යූටියුබ් වෙබ් අඩවියට වීඩියෝවක් එකතු කරමින් ඔහු මේ බව පවසා තිබේ.
හදිසි තත්වයක් යටතේ, විසුරුවා හරින ලද පාර්ලිමේන්තුව යළි කැඳවීමේ හැකියාව ජනාධිපතිවරයාට තිබෙන බව එම්.ඒ. සුමන්තිරන් මහතා එහිදී පෙන්වාදුන්නේය. හදිසි තත්වය ඉවත්වන තුරු පාර්ලිමේන්තුව රැුස් කළ හැකි බවද ඔහු සඳහන් කළේය.

බොහෝ රටවල් මේ හදිසි අවස්ථාවේ පාර්ලිමේන්තුව රැුස් කරවා අත්‍යවශ්‍ය නීතිරීති සම්මත කරගත් බව ඔහු කියයි. මෙය ඉතා වැදගත් තත්වයක් බවත්, මෙය පෙර අපේක්ෂා නොකළ තත්වයක් බවත්, මෙවැනි තත්වයක් යටතේ නීති සකස් කළ යුත්තේ පාර්ලිමේන්තුව බවත් ඔහු කියයි.

‘පාර්ලිමේන්තු මන්ත‍්‍රීවරුන් 225 දෙනාම එකම ශාලාවකට කැඳවන ලෙස මා ඉල්ලා සිටින්නේ නැහැ. අනිවාර්යයෙන්ම එය මූලික යෝජනාව නොවෙයි. මාලදිවයින් පාර්ලිමේන්තුවේ මන්ත‍්‍රීවරුන් නොපැමිණ, අන්තර්ජාලය හරහා පාර්ලිමේන්තුව රැුස්වුණා.’

‘අවශ්‍ය නම් පාර්ලිමේන්තු පරිශ‍්‍රයේදී රැුස්වීම් වාරයක් සංවිධානය කළ හැකියි. මන්ත‍්‍රීවරුන් 225 දෙනාම නොපැමිණ දේශපාලන පක්ෂ නායකයන් සාකච්ඡුා කොට අත්‍යවශ්‍ය මන්ත‍්‍රීවරුන් 20ක් වැනි ප‍්‍රමාණයක සහභාගිත්වයෙන් පාර්ලිමේන්තුව රැුස් කළ හැකියි. ඒ අනුව ස්ථාවර නියෝග සම්මත කරවාගෙන පාර්ලිමේන්තුවට කටයුතු කළ හැකියි. ඒ අනුව හදිසි තත්වයට මුහුණදීම සඳහා නීතිරීතිද සකස් කළ හැකියි.’

මේ වන විට පාර්ලිමේන්තුවෙහි සම්මත වී ඇත්තේ අපේ‍්‍රල් 13 වැනිදා දක්වා වන අතුරු අයවැයක් පමණක් බවද සුමන්තිරන් මහතා පැහැදිලි කරයි. ඒ අනුව දැනට රට පවත්වාගෙන යෑම සඳහා මුදල් නොමැත.

අපේ‍්‍රල් 13 වැනිදායින් පසුව ජනාධිපතිවරයාට ඒකාබද්ධ අරමුදලින් මුදල් ලබාගත නොහැකි බවද හිටපු මන්ත‍්‍රීවරයාගේ අදහසයි. භාණ්ඩාගාර ලේකම්වරයා එයට අදාළව නිකුත් කර ඇති චක‍්‍රලේඛය ව්‍යවස්ථා විරෝධී බවද ඔහු වැඩිදුරටත් පෙන්වාදෙයි. ‘ඒවා සිදුවිය නොහැකියි. ඒ ගැන නීතිය අනුව කටයුතු කළ හැකියි.’ සුමන්තිරන් මහතා කියයි.

ජනාධිපතිවරයා පාර්ලිමේන්තුව විසුරුවා හැරියේ නැතිනම් පාර්ලිමේන්තුව රැුස්විය හැකිව තිබුණු බවත්, මෙම තත්වයට සුදුසු ලෙස නීති සකස් කළ හැකිව තිබුණු බව ඔහු සඳහන් කරයි.
තත්වය පිළිබඳව වැඩිදුරටත් අදහස් දක්වමින් ඔහු මෙසේද කියයි.

‘මේ වසරේ ජනවාරි මාසය වන විට මේ පිළිබඳව පාර්ලිමේන්තුවේදී විමසුවා. ඒ වන විට පිළිතුරු ලැබුණේ වසංගතය පැතිර යෑමට එරෙහිව පියවර ගනිමින් සිටින බව. ඒ වන විටත්, මෙම වෛරසය වේගයෙන් පැතිර යන බව පැහැදිලිව පෙනෙන්නට තිබුණා.

එවැනි පසුබිමක මාර්තු 02 වැනිදා පාර්ලිමේන්තුව විසුරුවාහැරීම සඳහා ජනාධිපතිවරයා ගත් තීන්දුව නොගත යුතුව තිබුණා. ජනාධිපතිවරයා නියමිත කාලයට පෙර පාර්ලිමේන්තුව විසුරුවීමෙන් පසුව ඔහු මීළඟ මැතිවරණය පවත්වන දිනය හා ඊළඟ පාර්ලිමේන්තුව රැුස්වන දිනය සඳහන් කළ යුතුයි. ඒ අනුව ජනාධිපතිවරයා පාර්ලිමේන්තුව විසුරුවන විට අපේ‍්‍රල් 25 වැනිදා මැතිවරණය පවත්වන දිනය ලෙසත් මැයි 14 වැනිදා නැවත පාර්ලිමේන්තුව රැුස්වන දිනය ලෙසත් සඳහන් කළා.

මාර්තු 01 වැනිදා වන විට ජනාධිපතිවරයා දැනගත යුතුව තිබුණා පාර්ලිමේන්තු මැතිවරණය නිදහස් හා සාධාරණ ලෙස එම දිනය වන විට පැවැත්විය නොහැකි බව. එසේ තිබියදී ඔහු පාර්ලිමේන්තුව විසුරුවාහැරියා.

ඉන්පසුව ශ‍්‍රී ලංකාවේ කොවිඞ්-19 රෝගීන් වාර්තා වුණා. ඒ වන විට දෙමළ ජාතික සන්ධානය ඇතුළු කණ්ඩායම් පාර්ලිමේන්තු මැතිවරණය කල් දමන ලෙස ඉල්ලා සිටියා. එය කළේත් නැහැ. මාර්තු 19 වැනිදා නාමයෝජනා බාරදීමටත් සිදුවුණා. ඊට දින කිහිපයකට පෙර සාක් කලාපයේ නායකයන් වීඩියෝ මගින් මුණගැසුණා. ඒ මොහොතේත් ජනාධිපතිවරයා විශ්වාසයෙන් කියා තිබුණා මැතිවරණය අපේ‍්‍රල් 25 පැවැත්විය හැකි බව. අප සියලූදෙනා දැනසිටියා එය කළ නොහැකි බව.

අනෙක් කරුණු කෙසේ වෙතත්, සාධාරණ මැතිවරණ ප‍්‍රචාරක ව්‍යාපාරයක් පවා පැවැත්විය නොහැකි බව අප දැනසිටියා. සාධාරණ මැතිවරණ ප‍්‍රචාරණ ව්‍යාපාරයක් නිදහස් හා සාධාරණ මැතිවරණයක් සඳහා අත්‍යවශ්‍යයි.

මැතිවරණ කොමිසම තමන් සතු බලය අනුව, මාර්තු 19 වැනිදායින් පසුව මැතිවරණය කල්දැමුවා.
ඒ අතරේ ජනාධිපතිවරයා ජනාධිපති කාර්ය සාධක බලකායක් හා මිලිටරි කණ්ඩායම් මගින් වසංගතයට මුහුණදෙමින් සිටියා. විවිධ පාර්ශ්වයන්ගෙන් උපදෙස් ලබාගත්තා. අප එම ක‍්‍රියාවලිය සඳහා සහයෝගය ලබාදුන්නා. ගත් බොහෝ පියවර ගැන අප සෑහීමට පත් වන බව ප‍්‍රකාශ කළා.
කෙසේ වෙතත් කනගාටුදායක කරුණක් කිව යුතුයි. පෙබරවාරි මාසය අවසාන වන විට හෝ මාර්තු මුල වන විට නිසි කලට ක‍්‍රියාමාර්ග ගත්තා නම් මෙය මේ තරම් දුරට පැතිර යෑම වැළැක්වීමේ හැකියාව තිබුණා. එහෙත් ජනාධිපතිවරයාට දේශපාලන වාසිය වෙනුවෙන් මහ මැතිවරණය ඉක්මනින් පැවැත්වීමේ දැඩි වුවමනාවක් තිබුණු නිසා රටේ සෞඛ්‍යය අඩපණ වුණා. නාමයෝජනා කාලසීමාවේ විවිධ ක‍්‍රියාකාරකම් සිද්ධවුණා. දේශපාලන පක්ෂ නිලධාරීන් අතර විවිධ දිස්ත‍්‍රික්කවල කටයුතු සිද්ධවුණා. ඒ සියල්ල අනවශ්‍ය අවදානමක් වුණා.’

දැන් පවතින වසංගත තත්වය අවසන් කිරීමේ හැකියාවක් අපට ලැබුණත්, සාමාන්‍ය එදිනෙදා කටයුතු සඳහා අඩු තරමේ මාස හයක් පමණ ගතවෙනු ඇති බවත් ඔහු කියයි. ඒ අනුව මැතිවරණය මේ වසරේ අවසාන භාගය දක්වා පැවැත්විය නොහැකි බවද ඔහු පෙන්වාදුන්නේය. වෛරසය සම්පූර්ණයෙන්ම ඉවත් වන තුරු මැතිවරණය පැවැත්විය නොහැකි බවත්, එසේ වුවහොත් රෝගය නැවත මතුවීමේ අවදානමක් ඇතිවිය හැකි බවත් ඔහු පෙන්වාදුන්නේය. එහිදී සමාජ දුරස්ථකරණය පිළිබඳ සංකල්පයට සම්පූර්ණයෙන්ම ප‍්‍රතිවිරුද්ධ තත්වයක් ඇතිවිය හැකි බවත් ඔහු සඳහන් කළේය.

ඇඳිරි නීතිය නීත්‍යනුකූල නැහැ

ආණ්ඩුව මේ වන විට පනවා ඇති ඇඳිරි නීතිය විධිමත් නීත්‍යනුකූල ක‍්‍රමවේදය අනුව පනවා නොමැති බවද ඔහු අවධාරණය කරයි.

මෙම ඇඳිරි නීතිය දණ්ඩ නීති සංග‍්‍රහයේ 262 සහ 264 දක්වා වගන්ති යටතේ පනවා ඇති බවත්, මෙවැනි මොහොතක එම වගන්ති යටතේ ඇඳිරි නීතිය පැනවීමට නීත්‍යනුකූල අයිතියක් නොමැති බවත් ඔහු පෙන්වාදෙයි. එම වගන්ති කියවා බලන කල මෙම තත්වයට එම වගන්ති කිසිසේත්ම නොගැළපෙන බවද ඔහු කියයි.

ජනාධිපති නීතිඥ සුමන්තිරන් වැඩිදුරටත් ප‍්‍රකාශ කරන්නේ, එම කාරණාව ගැන මෙතෙක් ප‍්‍රකාශ නොකළේ සාමාන්‍ය පුරවැසියන් ඇඳිරි නීතිය නොසලකමින් පාරට බැසීමේ අවදානමක් නොතිබුණු නිසා බවය. මේ මොහොතේ පුරවැසියන් නිවසේ රැුඳී සිටිමින් වෛරසය හුවමාරු වීම නැවැත්වීම වැදගත් නිසා ඒ පිළිබඳව කතා නොකළ නමුත්, ආණ්ඩුවට පවතින තත්වය අවභාවිත කරමින් ප‍්‍රජාතන්ත‍්‍රවාදයට හානි වන ආකාරයට නීතිය අවභාවිත කිරීමේ හැකියාවක් තිබෙන බව එයින් කියැවෙන්නේ නැතැයිද ඔහු පවසයි.

සුමන්තිරන් මහතා වැඩිදුරටත් මෙසේ ප‍්‍රකාශ කරයි.
‘හදිසියේ රෝගය පැතිර යා හැකි නිසා පොලිස් ඇඳිරි නීතිය වැදගත්. එහෙත් මේක ඊට වඩා දීර්ඝකාලීන ප‍්‍රශ්නයක්. සතියකින් හෝ මාසයකින් පවා මෙය විසඳීමට අසීරු විය හැකියි. ඒ නිසා අපට විධිමත් හා නීත්‍යනුකූල ක‍්‍රියාමාර්ග ගන්නට සිදුවෙනවා. එසේ නොවුණොත් පාලනයට අදාළවත්, ආණ්ඩුකරණයට අදාළවත් වැරදි භාවිතාවන් ඇතිවිය හැකියි.

ජනාධිපතිවරයාට මහජන ආරක්ෂාව පිළිබඳ ආඥා පනත යටතේ හදිසි තත්වයක් ප‍්‍රකාශයට පත් කළ හැකියි. ඒ යටතේ ඇඳිරි නීතිය පැනවිය හැකියි. එහෙත් ජනාධිපතිවරයා එය කළේ නැහැ. හදිසි තත්වයක් ප‍්‍රකාශ නොකළත්, මහජන ආරක්ෂාව පිළිබඳ ආඥා පනතේ 16 වැනි වගන්තිය යටතේ ගැසට් පත‍්‍රයක් ප‍්‍රකාශයට පත් කොට ඇඳිරි නීතිය පැනවීමේ හැකියාව තිබෙනවා. ඒ යටතේ කුමන ප‍්‍රදේශවලට ඇඳිරි නීතිය පනවනවාද, කුමන පුද්ගලයන්ට පිටට යෑමට හැකියාව ලැබෙනවාද වැනි කාරණා නීත්‍යනුකූලව සඳහන් කළ හැකියි. එය සිද්ධවුණේත් නැහැ.’