කොතලාවල ආරක්ෂක විශ්වවිද්‍යාලයේ වෛද්‍ය පීඨයට අයත් ශික්ෂණ රෝහල පිළිබඳව තහවුරු කර නොගත් කරුණු වාර්තා කළ පුද්ගලයෙකු අපේ‍්‍රල් 01 වැනිදා පොලීසිය අත්අඩංගුවට ගෙන තිබුණි. ඒ අසත්‍ය තොරතුරු වාර්තා කළ බව සඳහන් කරමින්ය. ඒ පිළිබඳව කළ විමසීමකදී පොලිස් මාධ්‍ය ප‍්‍රකාශක ජාලිය සෙනෙවිරත්න කීවේ කොතලාවල රෝහල ඉහළ පැළැන්තියේ රෝගීන් සඳහා වෙන්කර ඇති බවට වැරදි කරුණක් සඳහන් කරමින් ලියා ඇති සටහනක් නිසා එම පුද්ගලයා පරිගණක අපරාධ පනත යටතේ අත්අඩංගුවට ගත් බවය.
කොතලාවල ආරක්ෂක විශ්වවිද්‍යාලයේ රෝහල මේ වන විට රෝගීන්ට පැමිණෙන්නට ඉඩ නොදී වෙන්කර ඇති බව හෝ එය කොවිඞ්-19 රෝගීන්ට ප‍්‍රතිකාර කිරීමට ලබා නොදෙන බවට සිදුවෙන ප‍්‍රචාර සත්‍ය නොවේ. එම රෝහලේ පහසුකම් මේ වන විට කොවිඞ් 19 රෝගීන් සඳහා ලබාදී ඇත.
කෙසේ වෙතත් මේ වන විට සමාජ මාධ්‍ය හා විවිධ කණ්ඩායම් කොවිඞ්-19 රෝගීන් සංඛ්‍යාව වර්ධනය වුවහොත්, එයට අදාළව පහසුකම් තිබේද යන මූලික සැකයෙන් කටයුතු කරන බව පෙනේ. බොහෝ අය කොතලාවල ආරක්ෂක විශ්වවිද්‍යාලයේ ශික්ෂණ රෝහල ගැන වැඩි අවධානයක් යොමු කරන්නේ එම රෝහල සෞඛ්‍ය අමාත්‍යාංශයේ ඇති රෝහල්වලට වඩා වෙනස් එකක් වන නිසාය. එය පාලනය කරනු ලබන්නේ සෞඛ්‍ය අමාත්‍යාංශය යටතේ නොව ආරක්ෂක අමාත්‍යාංශය යටතේය.
මෙම සටහන කොතලාවල රෝහල ඇතුළු දිවයිනේ ඇති රෝහල් පහසුකම් කොවිඞ්-19 වසංගත තත්වයෙන් ආරක්ෂා වීම සඳහා කොතෙක් දුරට සූදානම් කර ඇතිදැයි සොයා බැලීම සඳහාය.
කොවිඞ්-19 රෝගයට මුහුණදෙන රටවල් අවධානය යොමුකර ඇති ප‍්‍රධාන කාරණාවක් වන්නේ වෛරසය ශරීරගත වීමෙන් පසුව, දැඩි නිව්මෝනියා තත්වයට පත්වන රෝගීන් සඳහා ප‍්‍රතිකාර කිරීමට අවශ්‍ය දැඩි සත්කාර ඒකක හෙවත් අයිසීයූ ඒකක සහ ඒවායේ ඇඳන් කොපමණ තිබේද යන්නය. වෛරසය වැළඳෙන රෝගීන් සියලූදෙනාටම අවශ්‍ය නොවුණත් රෝගීන් සංඛ්‍යාව වැඩි වන විට රෝගීන්ගෙන් යම් ප‍්‍රතිශතයක් දැඩි සත්කාර ඒකක සඳහා යොමු කිරීමට අවශ්‍ය වෙයි. ඒ අනුව වසංගත තත්වය හමුවේ රෝගීන් තත්වය වැඩි වුවහොත් ප‍්‍රතිචාර දැක්වීම සඳහා දැඩි සත්කාර ඒකක සූදානම් කරගත යුතුය.
කෙසේ වෙතත් දිවයිනේ ඇති අයිසීයූ ඇඳන් සියල්ලම කොවිඞ්-19 සඳහා වෙන්කළ නොහැකි බවත් අවබෝධ කරගත යුතුය. වෙනත් රෝග නිසා රෝහල්ගත වෙන රෝගීහුද රට පුරා රෝහල් වල සිටිති.
කොවිඞ්-19 තත්වය යටතේ මූලික වශයෙන් රෝහල්වල ඇති ඇඳන් වර්ග දෙකක් ගැන අවධානය යොමුකළ හැකිය. අයිසීයූ හෙවත් දැඩි සත්කාර ඒකක එක් ඇඳන් වර්ගයකි. එච්.ඞී.යූ. හෙවත් ඉංග‍්‍රීසි බසින් හයි ඩිපෙන්ඩන්සි යුනිට් යන්න අනෙක් ඇඳන් වර්ගයයි. එච්.ඞී.යූ. ඇඳක අයිසීයූ මට්ටමේ පහසුකම් නොමැත. මෙම ඇඳන් වර්ග දෙක අතර ප‍්‍රධාන වෙනසක් වන්නේ රෝගීන් සංඛ්‍යාව හා හෙද නිලධාරීන් සංඛ්‍යාව අතර වෙනසය. අයිසීයූ අංශයක එක් ඇඳකට එක් හෙද නිලධාරියෙකු බැගින් අවශ්‍ය වෙයි. එච්.ඞී.යූ. ඇඳක එසේ නොවේ. ඊට අමතරව විවිධ යන්ත‍්‍ර ඇතුළු පහසුකම් අතින් මෙම ඇඳන් වර්ග දෙක වෙනස් වෙයි. අවශ්‍ය නම් හෙද නිලධාරීන් සහ යන්ත‍්‍ර පහසුකම් සැපයීමෙන් එච්ඞීයූ ඇඳන් අයිසීයූ තත්වයට සකස් කළ හැකිය. ඒ අනුව ඉදිරි තත්වයන් සඳහා මුහුණදීමට රෝහල්වල අයිසීයූ ඇඳන් සූදානම් කරගත යුතුය.
ප කළ විමසීමකදී සෞඛ්‍ය සේවා අධ්‍යක්ෂ ජෙනරාල් අනිල් ජාසිංහ ප‍්‍රකාශ කළේ සෞඛ්‍ය අමාත්‍යාංශය මේ වන විට කොවිඞ්-19 රෝගීන් සංඛ්‍යාව 2000ක් දක්වා ප‍්‍රතිකාර කිරීමට ඇඳන් පහසුකම් සූදානම් කර හමාර බවය. එම අවස්ථාව වන විට රෝගීන් 200ක් වත් ඉක්මවා නැති බවද ඔහු පෙන්වා දුන්නේය.
මේ වන විට සූදානම් කර ඇති දැඩි සත්කාර ඇඳන් සංඛ්‍යාව පිළිබඳව විමසීමේදී ඔහු පෙන්වාදුන්නේ අයිසීයූ ඇඳන් සංඛ්‍යාව වැඩි කිරීමට ගෙවුණු සතියේදී කටයුතු කළ බවය. ඒ අනුව ජාතික මට්ටමෙන් රෝගීන් 2000ක් අවශ්‍ය වුවහොත්, ඉන් ප‍්‍රතිශතයක් ලෙස අවශ්‍ය අයිසීයූ ඇඳන් සංඛ්‍යාව වර්ධනය කර ඇත.
නට කොවිඞ්-19 අයි.ඞී.එච්. රෝහලේ අයිසීයූ ඇඳන් සංඛ්‍යාව 10 දක්වාත්, මුල්ලේරියාව රෝහලේ ඇඳන් සංඛ්‍යාව 7 දක්වාත්, කොතලාවල ආරක්ෂක විශ්වවිද්‍යාලයේ ශික්ෂණ රෝහලේ අයිසීයූ ඇඳන් සංඛ්‍යාව 20 දක්වාත් වැඩි කළ බව ඔහු කීය. ඒ අනුව එම රෝහල් තුනේ ඇති අයිසීයූ ඇඳන් සංඛ්‍යාව 37කි.
ඊට අමතරව වැලිකන්ද, හෝමාගම, අනුරාධපුර මෙත්සිරි සෙවණ, ශ‍්‍රී ජයවර්ධනපුර යන රෝහල්වලද අයිසීයූ ඇඳන් සූදානම් කර ඇතැයි වාර්තා වේ. ඒ ගැන විමසීමේදී අනිල් ජාසිංහ මහතා එය තහවුරු කළ අතර, එම ඇඳන් සංඛ්‍යාව නිශ්චිතව ප‍්‍රකාශ කළේ නැත. කෙසේ වෙතත් ඔහු තහවුරු කළේ කොවිඞ්-19 රෝගීන් 2000 දක්වා වැඩි වීමේ අවදානමකට සූදානම් බවයි.
එවැනි සංඛ්‍යාවකට සූදානම් වූ පමණින්, රෝගීන් සංඛ්‍යාව 2000ක් දක්වා වැඩිවනු ඇතැයි කියැවෙන්නේ නැත. රෝගීන් සංඛ්‍යාව 2000 දක්වා වැඩි වෙන්නට ඉඩ නොදීම රටේ පුරවැසියන්ගේ සහ රජය යන දෙපාර්ශ්වයේම වගකීමකි.
අධ්‍යක්ෂ ජෙනරාල්ගේ ඉල්ලීම
සෞඛ්‍ය සේවා අධ්‍යක්ෂ ජෙනරාල් අනිල් ජාසිංහ මාර්තු 25 වැනිදා කොතලාවල ආරක්ෂක විද්‍යාලයේ උපකුලපති මේජර් ජෙනරාල් එම්.පී. පීරිස් වෙත ඞී.ජී.එච්.එස්./කොවිඞ්19/ 2020/347 අංකය යටතේ ලිපියක් යවා ඇත. එම ලිපියෙන් කොතලාවල රෝහලේ මේ වන විට සිටින සේවක සංඛ්‍යාව සමඟ අයිසීයූ ඇඳන් 24ක් කොවිඞ් 19 රෝගය මර්දනය කිරීමේ ක‍්‍රියාවලිය සඳහා ලබාදෙන ලෙස ඉල්ලා ඇත. කෙසේ වෙතත් කොතලාවල රෝහලේ ඇති එච්ඞීයු ඇඳන් ඒ වන විට රෝගීන් සඳහා ලබාදීමට සකස් කර තිබුණි. ඒ අනුව සෞඛ්‍ය අමාත්‍යාංශයට ලබාදී තිබුණේ එම අලූතින් සකස් කළ ඇඳන් අතරින් 20කි.
මාර්තු 25 වැනිදා ලිපියෙන් ඉල්ලා සිටි දැඩි සත්කාර ඒකකයේ ඇඳන් 24 නොලැබුණේ මන්දැයි විමසූ විට එයට පිළිතුරු ලබාදීම සෞඛ්‍ය සේවා අධ්‍යක්ෂ ජෙනරාල් අනිල් ජාසිංහ ප‍්‍රතික්ෂේප කළේය.
වෙන් කිරීමට කොතලාවල
මේ අතර විශේෂඥ වෛද්‍යවරුන් අට දෙනෙකුගේ මැදිහත්වීමෙන් කොවිඞ්- 19 රෝගයට මුහුණදෙන ආකාරය පිළිබඳව වාර්තාවක් සකස් කොට සෞඛ්‍ය සේවා අධ්‍යක්ෂ ජෙනරාල් අනිල් ජාසිංහ වෙත ලබාදී තිබුණි. එම වෛද්‍යවරුන් වන්නේ නිල්මිණි විජේසූරිය, අනෝමා පෙරේරා, බිමල් කුඩාවිදානගේ, චමලි අළුවිහාරේ, චමිල් පෙරේරා, චන්දන කරුණාරත්න, මනෝජ් එදිරිසූරිය, සංකල්ප විතානගේය.
එම වාර්තාවෙහි විවිධ රෝහල්වල ඇති අයිසීයූ ඇඳන් සහ අයිසීයූ ඇඳන් බවට පත්කළ හැකි ඇඳන් සංඛ්‍යාව ගැන කරුණු සඳහන් කර තිබුණි. යම් ලෙසකින් ඉදිරියේදි තවදුරටත් රෝගය වර්ධනය වුවහොත්, එයට මුහුණදීම සඳහා අපට ඇති ශක්තිය තේරුම් ගැනීමට ඒ කරුණු වැදගත්ය.
ඉහත කී වාර්තාවෙන් පෙන්වාදෙන ආකාරයට කොතලාවල ආරක්ෂක විද්‍යාලයට අයත් ශික්ෂණ රෝහලේ ඇති අයිසීයූ ඇඳන් සංඛ්‍යාව 30කි. ඊට අමතරව අයිසීයූ ඇඳන් බවට පත්කළ හැකි ඇඳන් සංඛ්‍යාව 30කි. ඒ අනුව සම්පූර්ණයෙන් ඇඳන් 60ක් දක්වා එම රෝහල සකස් කළ හැකිය.
(කොතලාවල ආරක්ෂක විශ්වවිද්‍යාලයේ නිල වෙබ් අඩවියෙහිද එම රෝහලෙහි ඇති පහසුකම් ගැන සඳහන් වෙයි. එහි සඳහන් වෙන්නේ එම රෝහලේ අයිසීයූ සහ එච්ඞීයූ ඇඳන් 70ක් තිබෙන බවය. ඉහත කී වෛද්‍යවරුන්ගේ වාර්තාවෙහි එම සංඛ්‍යාව වෙනස් වන්නේ දැන් පවතින තත්වය අනුව සම්පූර්ණ පහසුකම් සහිතව මේ වන විට ක‍්‍රියාකාරී මට්ටමේ ඇති ඇඳන් සලකා බැලීමේදීය.)
එම වාර්තාවෙහි සඳහන් කර ඇති ආකාරයට කොතලාවල ආරක්ෂක විද්‍යාලයට අයත් රෝහලේ ඇති සම්පූර්ණ ඇඳන් සංඛ්‍යාව 700කි. (ජනාධිපති නිල පුවත් වෙබ් අඩවිය වන පීඑම්ඞී නිව්ස් වෙබ් අඩවියෙහිද එම රෝහලේ සම්පූර්ණ ඇඳන් 700ක් ඇති බව සඳහන් කර ඇත.)
එම වාර්තාවෙන් වෛද්‍යවරුන් පෙන්වාදෙන්නේ කොතලාවල රෝහලේ දැනට සිටින රෝගීන් වෙනත් රෝහල්වලට මාරු කොට, එම රෝහලට විශේෂඥයන් එකතු කොට රෝගීන් එම රෝහලෙහි වෙන් කිරීමට කටයුතු කළ යුතු බවය. වේරහැර ප‍්‍රදේශයෙහි, පොදු ජනතාවගෙන් ඈත් වූ ප‍්‍රදේශයක ඇති එම රෝහලට ඇති පහසුකම් නිසා, රෝගීන් සංඛ්‍යාව වෙන් කර තබාගැනීමට එම රෝහල වඩා සුදුසු බව එම වෛද්‍යවරුන් පෙන්වාදී ඇත. ඒ අනුව දිවයිනේ ඇති ඉහළම විශේෂඥයන්ගේ සහ කාර්ය මණ්ඩලවල සේවය එකම තැනකදී කොවිඞ්-19 රෝගීන්ට සැපයිය හැකිය. කෙසේ වෙතත් ඉහත යෝජනාව තවම ක‍්‍රියාත්මක වී නැත.
