දැන් දිවයින පුරා ක‍්‍රියාත්මක කරන පොලිස් ඇඳිරි නීතිය නීත්‍යනුකූල නැති බවත්, ඒ නිසා ඇඳිරි නීතිය කඩ කළ බව කියමින් අත්අඩංගුවට ගැනීම් කළ නොහැකි බවත් සමාජ මාධ්‍යවල අදහසක් හුවමාරු වෙයි. ඇතැම් අය ලියුම්කරුගෙන්ද පෞද්ගලිකව ඒ ගැන විමසා තිබුණි.
මේ මොහොතේ මහමඟ හැසිරෙන පුද්ගලයන් අත්අඩංගුවට ගත නොහැකි බවට ඇතැම් අය පළකරන අදහස් වැරදි සහගත බව මුලින් පැහැදිලි කළ යුතුය. මේ මොහොතේ නිරෝධායන නීතිරීති පිළිගත යුතු අතර පුද්ගලයන් නිවසේ රැුඳී සිටිය යුතුය.
කෙසේ වෙතත් ඇඳිරි නීතිය කඩ කරමින් පොලිස් අත්අඩංගුවට ගත් පුද්ගලයන් පිළිබඳව මාධ්‍යවලින් දිනපතා පුවත් වාර්තා කර තිබුණි. බොහෝ අය පොලිස් ඇඳිරි නීතිය කඩකිරීම නමින් අපරාධ වරදක් නැතැයි පෙන්වාදෙන්නේ එම පුවත් වාර්තාවල ඇති අඩුවක් නිසාය.
අප කළ විමසීමකදී පොලිස් මාධ්‍ය ප‍්‍රකාශක පොලිස් අධිකාරී ජාලිය සෙනෙවිරත්න පෙන්වාදුන්නේ ‘ඇඳිරි නීතිය කඩ කළ’ යන යෙදුම මාධ්‍යවලින් වැරදි ලෙස පාවිච්චි කරමින් සිටින බවත්, පොලිස් නිලධාරීන්ද එම යෙදුම පහසුවට පාවිච්චි කරමින් සිටින බවත්ය.
එහෙත් දැනට පුද්ගලයන් අත්අඩංගුවට ගන්නේ ඇඳිරි නීතිය කඩකිරීමේ චෝදනාව මත නොව, 1987 රෝග නිරෝධායන හා වැළැක්වීමේ සංශෝධිත පනත යටතේ නිරෝධායන නීතිවලට අකීකරු වීමේ වරද යටතේ බව ඔහු පෙන්වාදුන්නේය. ඒ අනුව දණ්ඩ නීති සංග‍්‍රහයේ 262, 263 හා 264 යන වගන්ති යටතේ නීතිය ක‍්‍රියාත්මක කරනු ලබයි.
‘පොලිස් ඇඳිරි නීතිය කඩකිරීම’ යනුවෙන් නීතිමය වරදක් නැතැයි පොලිස් මාධ්‍ය ප‍්‍රකාශකවරයා පැවසීය. එහෙත් ඇතැම් පුද්ගලයන් පහසුවට එම යෙදුම පාවිච්චි කරන බවත්, නීති ක්ෂේත‍්‍රයේ නිලධාරීන් පවා මෙම වැරදි වචන භාවිතාව ගැන තමා සමඟ කතාබහ කළ බවත් ඔහු කීය.
ඒ අනුව පැහැදිලි වන කාරණාව වන්නේ මේ මොහොතේ නිවසෙන් පිටව වගකීම් විරහිතව කටයුතු කරන පුද්ගලයන් අත්අඩංගුවට ගැනීමේ හැකියාව පොලීසියට ඇති බවය.
ඒ බව සිහිපත් කරමින් වෙනත් කාරණාවක් පෙන්වාදිය යුතුය. මේ මොහොතේ ඇඳිරි නීතිය පැනවීමටත්, එයට අදාළව නීතිය ක‍්‍රියාත්මක කිරීමටත් මහජන ආරක්ෂක ආඥා පනත පාවිච්චි කළ හැකිය.
නීති ක්ෂේත‍්‍රයේ ප‍්‍රවීණයන් පෙන්වාදෙන්නේ එම කාරණාව ගැනය. හිටපු පාර්ලිමේන්තු මන්ත්රී, ජනාධිපති නීතිඥ එම්.ඒ. සුමන්තිරන්ද පෙන්වාදී තිබුණේ එම කරුණය. සුමන්තිරන් මහතා කියා තිබුණේ මෙසේය.
‘ජනාධිපතිවරයාට මහජන ආරක්ෂාව පිළිබඳ ආඥා පනත යටතේ හදිසි තත්වයක් ප‍්‍රකාශයට පත් කළ හැකියි. ඒ යටතේ ඇඳිරි නීතියට පැනවිය හැකියි. එහෙත් ජනාධිපතිවරයා එය කළේ නැහැ. හදිසි තත්වයක් ප‍්‍රකාශ නොකළත්, මහජන ආරක්ෂාව පිළිබඳ ආඥා පනතේ 16 වැනි වගන්තිය යටතේ ගැසට් පත‍්‍රයක් ප‍්‍රකාශයට පත් කොට ඇඳිරි නීතිය පැනවීමේ හැකියාව තිබෙනවා. ඒ යටතේ කුමන ප‍්‍රදේශවලට ඇඳිරි නීතිය පනවනවාද, කුමන පුද්ගලයන්ට පිටට යෑමට හැකියාව ලැබෙනවාද වැනි කාරණා නීත්‍යනුකූලව සඳහක් කළ හැකියි. එය සිද්ධවුණේ නැහැ.’
ඇත්තෙන්ම මහජන ආරක්ෂාව පිළිබඳ ආඥා පනත යටතේ හදිසි තත්වයක් ප‍්‍රකාශයට පත්කිරීම වඩා කාර්යක්ෂමව කටයුතු කිරීමට උදව් වනු ඇත. කෙසේ වෙතත් ආණ්ඩුවට දැන් ඇති බාධාව වන්නේ එලෙස හදිසි තත්වයක් ප‍්‍රකාශයට පත් කරමින් ගැසට් පත‍්‍රයක් නිකුත් කළහොත් එය පාර්ලිමේන්තුවෙන් අනුමත කළ යුතු වීමය. ඒ සඳහා පාර්ලිමේන්තුව කැඳවිය යුතුය. ජනාධිපතිවරයා පාර්ලිමේන්තුව කැඳවීමට මැලිකමක් දැක්වීම මහජන ආරක්ෂක පනත යටතේ ක‍්‍රියාත්මක වීම සඳහා දැනට ඇති බාධාව බව පෙනේ.
