මිරුසුවිල් සංහාරයේ වැරදිකරු සුනිල් රත්නායකට ජනාධිපති සමාව ලබා දීමට අදාළ සියලූ ලේඛන ප‍්‍රසිද්ධියට පත් කරන මෙන් ඉල්ලමින් ට‍්‍රාන්ස්පේරන්සි ශ‍්‍රී ලංකා ආයතනය ජනාධිපති ලේකම් කාර්යාලය වෙත තොරතුරු දැනගැනීමේ ඉල්ලූම්පතක් ඉදිරිපත් කර තිබේ.
ආණ්ඩුක‍්‍රම ව්‍යවස්ථාවේ සහ තොරතුරු දැනගැනීමේ පනතේ විධිවිධානවලට අනුකූලව, නඩුව විභාග කළ විනිසුරුවරයාගේ වාර්තාව, නීතිපතිවරයාගේ උපදෙස් සහ අධිකරණ අමාත්‍යවරයාගේ නිර්දේශය ප‍්‍රසිද්ධියට පත් කරන මෙන් ට‍්‍රාන්ස්පේරන්සි ඉන්ටනැෂනල් ආයතනය ජනාධිපති ලේකම් පී.බී.ජයසුන්දරගෙන් ඉල්ලා ඇති බව 2020 අපේ‍්‍රල් 01 වන දින නිකුත් එම ආයතනය නිකුත් කරන ලද නිවේදනයක සඳහන් වෙයි.
ට‍්‍රාන්ස්පේරන්සි ඉන්ටර්නැෂනල් ශ‍්‍රී ලංකා ආයතනය පෙන්වාදෙන ආකාරයට ආණ්ඩුක‍්‍රම ව්‍යවස්ථාවේ 34 වන වගන්තිය මඟින්, ඕනෑම වරදකරුවෙකුට සමාව ප‍්‍රදානය කිරීමට ජනාධිපතිවරයාට බලය පවරා ඇත. කෙසේ වෙතත් එම වගන්තිය තුළම උක්ත බලයට යම් සීමා පනවමින්, එසේ වූ යම් වරදකරුවෙකුට අධිකරණයකින් මරණ දඬුවම නියම වූ විටක ජනාධිපතිවරයා ඒ නඩුව විභාග කළ විනිශ්චයකාරවරයාගෙන් වාර්තාවක් ලබා ගැනීමට සැලැස්විය යුතු බව සඳහන් කර ඇතැයිද එම ආයතනය පෙන්වාදෙයි.
වාර්තාව ජනාධිපතිවරයා වෙත ලැබුණු පසු, එම වාර්තාව පිළිබඳව නීතිපතිවරයාගේ උපදෙස් ලබා ගැනීමෙන් පසුව, නීතිපතිවරයාගේ ඒ උපදෙස් සමඟ එය අධිකරණ විෂය භාර අමාත්‍යවරයා වෙත යැවිය යුතු බවත් ඉන්පසු අධිකරණ අමාත්‍යවරයා සිය නිර්දේශද සමඟ එම වාර්තාව ජනාධිපතිවරයා වෙත යැවිය යුතු බවත් එම ආයතනය පෙන්වාදෙයි.
මිරුසුවිල් අට පුද්ගල ඝාතනයට අදාළව සුනිල් රත්නායක මහතාට මරණ දඬුවම නියම කරමින්, 2015 දී මහාධිකරණය තීන්දුව ලබාදී තිබුණු අතර, ඒ පිළිබඳව විත්තිකරු කළ අභියාචනය විභාග කළ බුවනෙක අලූවිහාරේ, නලින් පෙරේරා, සිසිර ද ආබෘ, ප‍්‍රියන්ත ජයවර්ධන හා මුර්දු ප‍්‍රනාන්දු යන පංච පුද්ගල ශ්‍රේෂ්ඨාධිකරණ විනිසුරු මඬුල්ල, ත‍්‍රිපුද්ගල මහාධිකරණ තීන්දුව ස්ථිර කරමින් 2019 වර්ෂයේ අපේ‍්‍රල් මසදී සිය තීන්දුව ලබා දී ඇත.
