කොරෝනා නැතිනම් කොවිඞ් 19 වෛරසය චීනයේ වූහාන් ප‍්‍රදේශයෙන් මිනිසුන්ට ආසාදනය වී දැන් එය ලෝක මට්ටමෙන් ව්‍යාප්ත වෙමින් තිබෙයි. පසුගිය මාර්තු 11වෙනිදා විශේෂ ප‍්‍රකාශයක් කරමින් ලෝක සෞඛ්‍යය සංවිධානයේ ප‍්‍රධානී වෛද්‍ය ටෙඞ්රොස් අධනොම් කියා සිටියේ පසුගිය සති දෙක ඇතුළත චීනයෙන් පිටත කොරෝනා වෛරස ආසාදිතයින් සංඛ්‍යාව 13 ගුණයකින් ඉහළ ගොස් ඇති බවය. ඒ අනුව ඔහු ප‍්‍රකාශ කළේ මෙම වෛරසය මේ වනවිට පැතිරයාම ලෝක ව්‍යාප්ත වසංගතයක් බවට පත්ව ඇතිබව, තම සංවිධානය නිවේදනය කරන බවය. ඔහු රටවල නායකයින්ගෙන් ඉල්ලා සිටින්නේ, මෙම වෛරසයේ ව්‍යාප්තිය පාලනය සඳහා ඉක්මන් සහ සාධනීය ක‍්‍රියාමාර්ග ගන්නා ලෙසය. මෙම වෛරසය ව්‍යාප්තවීම පාලනය කළ රටවල් පවතින බවද ඔහු එහිදී ප‍්‍රකාශ කිරීම සැනසෙන්නට කාරණයක් ය.
පසුගිය මාර්තු 10වෙනිදා ලංකාවේ ප‍්‍රථම රෝගියා වාර්තා විය. ඔහු ඉතාලියේ සිට මෙරටට පැමිණි සංචාරකයින් කණ්ඩායමකට මගපෙන්නූ පුද්ගලයෙක් ය. ඔහු මේ වනවිට උණ රෝහලේ ප‍්‍රතිකාර ලබාගනිමින් සිටී. පසුගිය මාර්තු 11 වැනි දිනයේදී ද නිළ නොවන වාර්තාවකින් කියවුණේ මෙම වෛරසය ආසාදනය වූ තවත් රෝගියෙක් හලාවත ප‍්‍රදේශයෙන් සොයාගෙන ඇති බවය. ඔහු ඉතාලියේ සේවය කර පැමිණි අයෙක් බව දැනගන්නට ලැබේ. එදිනම නැවත තොරතුරු වාර්තා වුණේ අනුරාධපුරයේ හෝටලයක ලැඟුම් ගෙන සිටි විදේශිකයන් යුවලකටද කොරෝනා බවය. මෙවැනි තොරතුරුවලට තටු ලැබීම සැනසීම නැතිවීමට කාරණයක් ය!.
මෙම ලිපිය ලියන පසුගිය මාර්තු 12වැනි දින වනවිට ලැබෙන තොරතුරු එතරම් සුබ නැත. ඉතාලි ජාතික සංචාරකයින් මණ්ඩායමක් සමග ඔවුන්ගේ මගපෙන්වන්නා සේ ගොස් දැනට කොරෝනා ආසාදනයවී රෝහල් ගතකර සිටින පුද්ගලයාගේ දරුවෙක් කොළඹ ආනන්ද විද්‍යාලයේ ප‍්‍රාථමික අංශයේ අධ්‍යාපනය ලබන බැවින් එම විද්‍යාලයේ දෙමාපියන් අතර යම් නොසන්සුන්කාරී වාතාවරණයක් ඇතිවී ඇති බව වාර්තා විය. ලංකාවේ මාධ්‍යද එකයි දෙකයි ආකාරයට බ්‍රේකින් නිව්ස් ගසමින් හෝටල් තුළට කඩාපනිමින් කොරෝනා වාර්තා කරන්නට බලාගෙන සිටින නිසා, වෙන්නට නියමිත හානිය වැඩිබව පෙනෙයි. එනිසා අපි සියලූ දෙනාම මෙම අවස්ථාවේ බුද්ධිමත්ව කටයුතු කිරීම හොඳය.
දේශපාලන සංදර්ශන ඉවරයි
චීනයේ වූහාන් පළාතේ මෙම වෛරසය ව්‍යාප්ත වනවිට චීනය එම ප‍්‍රදේශය තහනම් ප‍්‍රදේශයක් බවට ප‍්‍රකාශය පත් කළේය. ඒ සමගම ශ‍්‍රී ලංකා රජය විශේෂ ගුවන් යානයක් යවා එම නගරයේ සිරවී සිටි මෙරටෙන් එරටට උසස් අධ්‍යාපනය සඳහා ගිය සිසුන් පිරිසක් ගෙන්වාගෙන දියතලාව හමුදා කඳවුරට යවා ඔවුන් නිරෝධායනය කළ බව උත්සව පවත්වමින් පවසා, සිය නිවෙස්වලට පිටත් කළේය. එහිදී බොහෝ දෙනෙක් කීවෝ ආණ්ඩුව මෙලෙස හදිස්සියෙන් මෙම පිරිස ගෙන්වා ගත්තේ ආණ්ඩුවේ ප‍්‍රබලයෙකුගේ පුතෙක් වූහාන් නගරයේ සිටි නිසා බවය. මෙම චෝදනාව ගැන ආණ්ඩුව පාර්ශවයෙන් කියවුණේ, විදෙස්ගත ශ‍්‍රී ලාංකියන් පිළිබඳව වර්තමාන රජය බෙහෙවින් සිතන බවය. ඒ අනුව එම ගෙන්වා ගැනීම කළ බවය. එහෙත් එම කියුම් කෙරුම් බොරු බවට පත්වුණේ දකුණු කොරියාවේ සහ ඉතාලියේ මෙම රෝගය විනාශකාරී ලෙස ව්‍යාප්තවන්නට පටන්ගත් විටය. ඉතාලිය මුලූ රටම තහනම් කලාපයක් කරනවිට ආණ්ඩුවේ කිසිවෙක් ගුවන් යානා යවා අපේ මිනිසුන් ගෙන එන්නට කතා කළේ නැත. මේ අතර කාලයේ චීනයෙන් පැමිණි කාන්තාවක් කොරෝනා යැයි සැක කරමින් මුල්ලේරියාව උණ රෝහලට ඇතුලත් කළ අතර එම රෝහලේ නේවාසිකව ප‍්‍රතිකාර ලැබූ කාන්තාව පසුව සුවවී රෝහලෙන් පිටවුණේ සෞඛ්‍ය අමාත්‍ය පවිත‍්‍රා වන්නිආරච්චි මහත්මියගේ සිප සමාචාර උත්සව මධ්‍යයේ ය. මෙම කාන්තාවට රෝගය හරියටම කොරෝනා වැළඳී තිබිණේ දැයි සැකබව දැන් වටින්ගොඩින් ආරංචි වෙමින් තිබෙයි. මේ පිළිබඳව අදහස් දැක්වූ නිදහස් සෞඛ්‍ය සේවාවක් සඳහා ජනතා ව්‍යාපාරයේ කැඳවුම්කරු වෛද්‍ය නිලාන් ප‍්‍රනාන්දු මහතා ප‍්‍රකාශ කළේ මෙම සිදුවීම සැකසහිත බවය. මේවායින් පෙනෙන්නේ කොරෝනා ව්‍යාප්තිය වැළක්වීමට ආණ්ඩුවට කිසිඳු වැඩපිළිවෙළක් නොමැතිවුණත්, කොරෝනා වලින් දේශපාලන වාසි ලබාගැනීමට උත්සාහ කිරීමයි. දැන් එහි ප‍්‍රථිපල ලැබෙන්නට නියමිතය. දැන් ආණ්ඩුව සහ සෞඛ්‍යය බලධාරීන් තක්බීරිවී කටයුතු කරමින් සිටී.
කොරෝනා මර්දනය කළ හැකිද?
‘ ඇත්තටම ආණ්ඩුවට දැනටනම් කිසිම වැඩපිළිවෙළක් නැති බව තමයි පේන්නේ. උෂ්ණත්වය කියන සාධකය නිසා අපේ රට තුළ මේ රෝගය ව්‍යාප්ත වෙන්නේ නැහැ කියන දේ ඔවුන් විශ්වාස කළාද දන්නේ නැහැ. මේ වෙලාවේ ලංකාවේ රෝහල් තුළ විශාල ඖෂධ හිඟයක් තිබෙනවා. අනෙක් පැත්තෙන් අපිට තවම මේ රෝගයට ආරක්ෂිතව මුහුන දෙන්න අවශ්‍යකරන භෞතික සම්පත්වල විශාල හිඟයක් තිබෙනවා. සමහර රෝහල් තුළ අත්‍යාවශ්‍ය මාස්ක් පවා නෑ‘ වෛද්‍ය නිලාන් ප‍්‍රනාන්දු ප‍්‍රකාශ කරන ලෙස ආණ්ඩුවේ සහ සෞඛ්‍ය බළධාරීන්ගේ මැදිහත් වීමේ ප‍්‍රමානය ගැටලූකාරීය.
මේ වනවිට ගුවන්තොටුපළ පරීශ‍්‍රයේ පැමිණීමේ ගේට්ටු තුන කේන්ද්‍රගත කරමින් ස්ථාපනය කර තිබෙන ස්කෑනර් මැෂින් ක‍්‍රියාත්මක කිරීම සඳහා කොළඹ සහ ගම්පහ දිස්ත‍්‍රික්ක දෙක තුළ රාජකාරි කරන මහජන සෞඛ්‍යය පරීක්ෂකවරුන් මාරුවෙන් මාරුවට යොදවා ඇත. මේ අනුව දිනකට මහජන සෞඛ්‍ය පරීක්ෂකවරුන් 13දෙනෙකු පමණ සේවයේ නිරත වේ. එක් නිළධාරියෙක් පැය 24ක් එක දිගට රාජකාරි කළ යුතුබව වාර්තා වේ. මෙම ස්කෑනර් යන්ත‍්‍රවලින් ගුවන් යානාවලින් පැමිණෙන පුද්ගලයින්ගේ ශරීර උෂ්ණත්වය මැණෙන අතර එහිදී උණ තත්ත්වයක් තිබෙන පුද්ගලයෙක් හඳුනාගත හොත් මීගමුව රෝහල වෙත යොමු කිරීම සඳහා කටයුතු සලසා ඇත. මෙම ස්ථානයේ සේවය කරන මහජන සෞඛ්‍ය පරීක්ෂකවරයෙක් මේ ලියුම්කරු හා පැවසුවේ ඉතාලිය, දකුණු කොරියාව, චීනය යන රටවලින් දෙනිකව ගුවන් මගීන් 300ත් 350ත් අතර පැමිණෙන බවය. මුලදී ඔවුන්ගේ ශරීර උෂ්ණත්වය බලා උණ තත්ත්වයක් පමණක් තිබුණොත් රෝහල් ගතකළ බවත් මේ වනවිට උණ තත්ත්වය කෙසේ වුණත් පොදුවේ රට තුළට එන සියළු මගීන් නිරෝධායනය සඳහා මුලතිව් කන්දකාඩු සහ පූනානි වෙත යොමුකරන බවය.
නිරෝධායනය
නිරෝධායනය සඳහා ආණ්ඩුව මුලින්ම යෝජනා කළේ හැඳල ලාඳුරු රෝහලයි. නමුත් ජනතා උද්ඝෝෂණ හමුවේ එම ස්ථානය නිරෝධායනය සඳහා යොදාගන්නේ නැති බව පසුව ආණ්ඩුව ප‍්‍රකාශ කළේය. ඉන්පසුව නිරෝධායනය සඳහා මඩකලපුව ශරියා විශ්ව විද්‍යාලය නමින් කුප‍්‍රකට ස්ථානය යොදාගන්නා බව ආණ්ඩුව ප‍්‍රකාශ කළේය. උද්ඝෝෂණය කළ සිංහල ජනතාවට සැනසුමක් ලැබිණි!. ආණ්ඩුවේ දේශපාලන බලාපොරොත්තුවත් එය විය. පසුගිය මාර්තු 10වෙනිදා සිට රජය ක‍්‍රියාත්මක වුණේ දකුණු කොරියාවේ සිට සහ ඉතාලියේ සිට පැමිණෙන ශ‍්‍රීලාංකියන් මෙම නිරෝධායනය මධ්‍යස්ථාන දෙක වෙත යොමුකරන්නට ය. එහිදී ඉතාලියේ සහ දකුණු කොරියාවේ සිට පැමිණි ශ‍්‍රමිකයින් විරෝධතා දක්වමින් ප‍්‍රකාශ කළේ තමන්ට අඩු පහසුකම් තිබෙන මෙම මධ්‍යස්ථාන වෙත යා නොහැකි බවය. මෙරටට පැමිණෙන චීන ජාතිකයන් මෙම නිරෝධායන මධ්‍යස්ථාන වෙත යොමු නොකරන්නේ මන්දැයි එහිදී එම ජනතාව ප‍්‍රශ්න කළෝය. ගුවන්තොටුපළ පරීශ‍්‍රයේ සේවයේ නියුතු එක් මහජන සෞඛ්‍යය පරීක්ෂකවරයෙක් ප‍්‍රකාශ කළේ විදේශිකයන් නිරෝධායනය සඳහා යොමු නොකිරීම ගැටලූ සහගත බවය. ස්කෑනර් යන්ත‍්‍රවලින් රෝගය ඇග තුළ තිබෙනවාදැයි 100%ක් නිවැරදිව දැනගන්නට බැරිබව ප‍්‍රකාශ කරන ඔහු එහිදී කියා සිටියේ හොඳම ක‍්‍රියාව චීනය, දකුණු කොරියාව වැනි අවධානම් රටවල සිට පැමිණෙන ගුවන් ගමන් තාවකාලිකව තහනම් කිරීමට කටයුතු කිරීම බවය. එහෙත් බළධාරීන්ට තවමත් ඒ පිළිබඳව අදහසක් නැත.
දැනට ඉදිකර තිබෙන නිරෝධායන මධ්‍යස්ථාන දෙක පිළිබඳව අදහස් දැක්වූ වෛද්‍යවරයෙක් ප‍්‍රකාශ කළේ මෙම නිරෝධායන මධ්‍යස්ථාන වචනයේ පරිසමාප්ත අර්ථයෙන් නිරෝධායනය සඳහා පිහිටවූ තැන්දැයි සැක බවය. එක ශාලාවක එක පෙළට, එකට යාව පිහිටවූ ඇදන් ඇති මෙම ස්ථාන, රෝගය ව්‍යාප්ත කරන ස්ථාන බවට පත්විය හැකි යැයි ඔහු අනතුරු අඟවයි. මෙවැනි ස්ථානයකට පනස් දෙනෙක් ගෙන ආවායැයි සිතමු, එම පනස් දෙනා අතර එක් රෝගියෙක් සිටිය හොත් ඔහුගෙන් ඉතිරි 49 දෙනාටම රෝගය බෝවීමේ අනතුරක් ඇති බව වෛද්‍යවරයාගේ මතයයි. මෙම ස්ථානවලට විදේශයන්හි සිට පැමිණි පිරිස් නිරෝධායනය සඳහා ගෙන යන ආකාරය පසුගිය දිනවලදී රූපවාහිනියෙන් පෙන්වනු ලැබූ අතර ඔවුන් එම බස් රථ තුළ හැසිරෙන ආකාරයෙන් පෙනෙන්නේ මෙම රෝගය නිරෝධායනය කෙසේවුණත් මේ වැඩපිළිවෙළ නිසා රෝගය ව්‍යාප්ත වියහැකි බවය. එනිසා ආණ්ඩුව මේ අවස්තාවේ දැනුවත්ව මෙම කාර්‍ය සඳහා මැදිහත්විය යුතුය.
මෙම වෛරසය මේ වනවිට මිනිස් ජීවිත 4200කට වැඩි ප‍්‍රමානයක් බිලිගෙන ඇත. ලොව පුරා ආසාදිතයින් 118000කි. එනිසා තත්ත්වය දරුණුය. යුහුසුළුව එරෙහිවීම අපි සැමට හොඳය.x
