ඩලස් අලහප්පෙරුම මහතා අධ්‍යාපන අමාත්‍යවරයා ලෙස පත් වු විගස මාධ්‍ය වෙත පවසා තිබුණේ ශ‍්‍රී ලංකාවේ ජාතික පාසල් 274කට විදුහල්පතිවරුන් නොමැති බවය. ඊට අමතරව ජනප‍්‍රිය පාසල් ලෙස සලකන පාසල් 60ක් අතරින් 40කටම විදුහල්පතිවරුන් නොමැති බවත් ඔහු කියා තිබුණි. පුරප්පාඩු සම්පූර්ණ කරන බව ඉඟි කර තිබුණි.
වැඩ බැලීම යනු එක් විදුහල්පතිවරයෙකු සේවයෙන් ඉවත්ව, තවත් නිලධාරියෙකු පත්වන තුරු තාවකාලිකව පත්කරන නිලධාරියෙකු තනතුරේ වැඩ ආවරණය කිරීමයි. එහෙත් ලංකාවේ අධ්‍යාපන සේවය තුළ ඇතැම් වැඩබලන විදුහල්පපත්වරු වසර දහයක පමණ කාලයක් වැඩ බැලීමෙහි යෙදෙන්නෝය.
ලංකාවේ දීර්ඝ කාලයක් තිස්සේ පවතින විදුහල්පති පුරප්පාඩු පාසල් පද්ධතියේ දෂණය සඳහා බලපාන ප‍්‍රධාන හේතුවක් වී තිබේ. වැඩ බැලීමේ තනතුරක සිටින්නට නම් දේශපාලන හයියක් වුවමනාය. තනතුරට නිල වශයෙන් පත්වීමේදී සුදුසුකම් ඇති අය විය යුතුය. ඒ නිසා දේශපාලන නායකයන් බලාපොරොත්තු වන්නේ වෘත්තීයමය ස්වාධීනත්වයක් ඇති ස්ථීර විදුහල්පතිවරුන් නොව, තමන්ගේ හයියෙන් පුටුවල රැුඳෙන වැඩබලන විදුහල්පතිවරුන්ය. ස්ථීර පත්වීම් නොලබා දේශපාලන හයියෙන් විදුහල්පති ලෙස කටයුතු කරමින් සිටින්නට කැමති විදුහල්පතිවරුද සිටිති. කෙසේ වෙතත් වැඩබලන විදුහල්පතිවරුන් වෙනුවට ස්ථීර විදුහල්පතිවරුන් පත්කිරීමට ගන්නා උත්සාහයන්හිදී දැවැන්ත බලපෑමක් එයට විරුද්ධව පැනනඟින්නේය. කෙතරම් ශක්තිමත් වැඩබලන විදුහල්පති මාෆියාවක් ලංකාවේ ඇතිදැයි එයින් පැහැදිලි වේ. ඩලස් අලහප්පෙරුම අමාත්‍යවරයා ඒ මාෆියාව පරාජය කරන්නේ නම් එය අගය කළ යුත්තකි.
2012 සිට වරින් වර මේ විදුහල්පති පුරප්පාඩු පුරවන්නට සම්මුඛ පරීක්ෂණ කැඳවා ඇත. එහෙත් වසර අටක් තිස්සේ එම පුරප්පාඩු සම්පූර්ණ කර නැත. ඒ වෙනුවට තව තවත් පුරප්පාඩු වැඩි වී තිබේ.
එහෙත් පෙනෙන්නට ඇත්තේ පොරොන්දුවෙන් අඩක් පමණක් ඉටුව ඇති බවකි. ජාතික පාසල් සඳහා විදුහල්පතිවරුන් බඳවා ගැනීමට අදාළව රාජ්‍ය සේවා කොමිෂන් සභාවේ අධ්‍යාපන සේවා කමිටුවේ ද අනුමැතිය ඇතිව විදුහල්පතිවරුන් 153ක් සඳහා අධ්‍යාපන අමාත්‍යාංශය පෙබරවාරි 28 වන දින පත්වීම් ලබා දී තිබුණි. ඒ අනුව පුරප්පාඩු රැුසක් සම්පූර්ණ වී නැත. පුරවා නැත්තේ ආණ්ඩුවට හිතවත් වැඩබලන විදුහල්පතිවරුන් වැඩ ආවරණය කරන තනතුරුදැයි විමසන්නට දැන් සිදුව තිබේ.
රාජ්‍ය සේවා කොමිෂන් සභාවේ අධ්‍යාපන සේවා කමිටුව මගින් නිර්දේශ කරනු ලැබු විදුහල්පතිවරුන් කිහිපදෙනෙකුගේ පත්වීම් ලබා නොදී අධ්‍යාපන අමාත්‍යාංශය වළක්වා ඇත.
බම්බලපිටිය හින්දු විද්‍යාලයේ විදුහල්පති තනතුරට යාපනයේ අතිරේක පළාත් අධ්‍යක්ෂවරිය පත්වී ඇති නමුත් අධ්‍යාපන අමාත්‍යාංශය ඇයට හින්දු විද්‍යාලයේ වැඩ භාර නොගන්නා ලෙස දැනුම් දී ඇත. වව්නියාව මධ්‍ය මහා විද්‍යාලයට පත් වී ඇත්තේ මඩු කලාපයේ අධ්‍යාපන අධ්‍යක්ෂවරයෙකු වුව ඔහුටද අධ්‍යාපන අමාත්‍යංශය එලෙස දැනුම් දී ඇත. සමන්තුරේ ජාතික පාසල, මාතර දිස්ත‍්‍රික්කයේ අරෆා ජාතික පාසල, බේරුවල අල් හුමෙහිරා ජාතික පාසල, දොම්පේ සියනෑ ජාතික පාසල යන පාසල්වලට පත්වීම් ලද විදුහල්පතිවරුන්ට වැඩ බාර නොගන්නා ලෙස දැනුම් දී තිබේ.
ඊට අමතරව පන්නිපිටිය ධර්මපාල විද්‍යාලයේ විදුහල්පතිවරයා ලෙස කටයුතු කළ, පසුව එම පාසලේ ළමයින් ඇතුළත් කිරිමේදී සිදු වී ඇති බවට පවසන ¥ෂණ චෝදනා මත පරීක්ෂණයක් කිරීමට වෙනත් පාසලකට මාරු කර යැවු විදුහල්පතිවරයාම යළිත් පන්නිපිටිය ධර්මපාල විද්‍යාලයේ විදුහල්පතිවරයා ලෙස පත් කර ඇත.
2008 සිට 2017 අගෝස්තු 30 දිනය දක්වා විවිධ අක‍්‍රමිකතා සහ විනය කඩකිරීම් නිසා නොවිසඳී තිබුණු විනය ගැටලූ ප‍්‍රමාණය 343ක් බව විගණකාධිපති දෙපාර්තමේන්තුව කියා තිබේ. එලෙස මඟ නතර වී ඇති විනය පරීක්ෂණවලින් බහුතරය විශේෂ දේශපාලන බලයක් ඇති නිලධාරීන් සම්බන්ධ විනය පරීක්ෂණ වේ. එවැනි සිදුවීම් සම්බන්ධයෙන් විනය පරීක්ෂණ නොකර වෙනත් පාසල්වලට මාරු කිරීම පමණක් කර ඇත. ඉන් පසුව පරීක්ෂණ ආරම්භ කරන බව කියා ඇත. එහෙත් සැබෑ ලෙස සිදුවන්නේ ෆයිල් විවෘත කිරීම පමණකි. එතැනින් එහාට විනය කඩකරන නිලධාරීන් නිදැල්ලේය. ඉතා කලාතුරකින් අල්ලස් කොමිසම වැනි ආයතනයක් නඩු පැවරීමෙන් අල්ලස් ගත් විදුහල්පතිවරයෙකුට හෝ විදුහල්පතිවරියකට ද`ඩුවම් ලැබුණු බව ඇසේ.
එහෙත් ලොකුම ගැටලූව අල්ලස් පමණක් නොවේ. සම්පූර්ණ නොකළ පරීක්ෂණ අතර පාසල්වල ළමා අපචාර සිදුවීම්ද තිබීම භයානකය. ඒවා සම්බන්ධයෙන් අප‍්‍රමාදව කටයුතු නොකර එවැනි ගුරුවරුන් වෙනත් පාසැල්වලට මාරු කර යැවීමෙන් පමණක් නැවතීම ඉතා භයානක තත්වයකි.
මේවා චෝදනා පමණක් බව ඇත්තය. එහෙත් වැරදි නිලධාරීන්ට පියවර ගෙන, නිර්දෝෂී නිලධාරීන් චෝදනාවලින් නිදහස් නොකළහොත් සමස්ත ගුරු සේවයටම ඒ චෝදනාව අදාළ වෙයි. ගුරු හා විදුහල්පති සේවා ළමා අපචාර චෝදනා ඇති සේවාවන් වීම භයානකය.
මුලින්ම 2010 ජුලි මස 21 වැනිදා පාසල් 66ක පුරප්පාඩු සම්පූර්ණ කිරීම සඳහා අයදුම්පත් කැඳවා තිබුණි. ඉන්පසුව 2012 දී පාසල් 106ක පුරප්පාඩු පිරවීම සඳහා අයදුම්පත් කැඳවා තිබුණි. එයිනුත් පසුව නැවතත් 2012 දෙසැම්බර් 14 වැනිදා අයදුම්පත් කැඳවා තිබුණි. ඒ මහින්ද රාජපක්ෂ ආණ්ඩුව කාලයේ ගත් උත්සාහයන්ය. ඉන්පසුව වැඩබලන විදුහල්පතිවරුන් සමඟ මහින්ද රාජපක්ෂ ආණ්ඩුව ඉදිරියට ගියේය. එකල විපක්ෂයේ සිටි එක්සත් ජාතික පක්ෂයෙන් මෙයට විවේචන එල්ලවිය.
අප මුලින්ම සිහිපත් කළ විදුහල්පතිවරුන් බඳවාගැනීමේ පෙර උත්සාහයන් ගැන සිහිපත් කිරීමද වටී. යහපාලන ආණ්ඩුව පත්වීමෙන් පසුව 2015 අපේ‍්‍රල් 01 වැනිදා අයැදුම්පත් කැඳවා තිබුණි. එහෙත් ඒ අනුව බඳවාගැනීම් කර තිබුණේ නැත. ඉන්පසුව 2018 ජුලි 20 වැනිදා නැවතත් පාසල් 202ක් සඳහා අයැදුම්පත් කැඳවා තිබුණි. එහෙත් ඔවුන් බලයෙන් ඉවත්ව යන තුරුම විදුහල්පති පුරප්පාඩු පිරවීමට සමත් නොවිණි.
හිටපු අගමැති රනිල් වික‍්‍රමසිංහ මහතා කළ දැනුම්දීම අනුව රාජ්‍ය සේවා කොමිසමේ සභාපතිවරයා ඇතුළු එහි අධ්‍යාපන සේවා කමිටුවේ නිලධාරීන් පිරිසක් 2018 මාර්තු 22 වැනි දා ඔහු හමුවී තිබුණි. අගමැතිවරයා එම කැඳවීම සිදුකර ඇත්තේ ජාතික පාසල්වල විදුහල්පති පුරප්පාඩු පිරවීම සම්බන්ධයෙන් සාකච්ඡුා කිරීමට වන අතර, ඔහු අධ්‍යාපනය ලැබූ පාසල වන රාජකීය විද්‍යාලයට විදුහල්පතිවරයෙකු පත්කිරීම ගැන අගමැතිවරයා විශේෂයෙන් කතාකර ඇත. අගමැතිවරයාම එලෙස තමාගේ පාසල ගැන විශේෂයෙන් සලකන විට ලංකාවේ විදුහල්පති සේවයට ස්ථීර පත්වීම් ලබාදීම කෙතරම් අසීරු කටයුත්තක්ද යන්න පැහැදිලි වනු ඇත.
දැන් විදුහල්පති බඳවාගැනීම් අසම්පූර්ණ වීමටත්, එම බඳවාගැනීම් අතරද පත්වීම් ලද නිලධාරීන්ට වැඩ බාර නොගන්නා ලෙස දැනුම්දීමත් නිසා නැවත වතාවක් තහවුරු වන්නේ වැඩබලන විදුහල්පති මාෆියාව තවම අපරාජිත බවය.x
