රාජපක්ෂලා කැපූ කැලෑ යහපාලනය වැවූ හැටි

විල්පත්තු වනාන්තරයට ඉහළින් ඇති රක්ෂිත වනාන්තර අසබඩ ගම්මානවලට නැවත ගිය ගමනේදී අපට දකින්නට හැකිවුණේ පෙර තිබුණු කාෂ්ඨක පරිසරය නොවේ. 2013 දී රාජපක්ෂ පාලනය යටතේ කපා දැමූ ගස් වෙනුවට අලූතින් ගස් වැවී ඇත. ප‍්‍රදේශයේ පදිංචිකරුවන් තමන්ගේ ගෙවතුවලද, නිවාස නැති තැන්වලද ගස් වැවෙන්නට ඉඩ හැර ඇත.

නියං කාලයේදී සිඳී ගිය දිය උල්පත් නැවත පිරී ඇත. වැව් පවා පිරී ඇත. ගස්වැල් වැවී ඇති නිසා සිසිල් සුළං හමයි. 2018 දී අප එහි යනවිටත් නියඟය නිසා වගා කරගත නොහැකිව තිබුණු අක්කර ගණනාවක කුඹුරු මේ වෙද්දී වගා කර ඇත. ඇතැම් කුඹුරු ඉඩම්වල ගොයම් කැපීමට පවා සූදානම් වෙයි.

මීට පෙර අප මරිච්චිකට්ටු ප‍්‍රදේශයට යන විට නාවික හමුදාවෙන් මිනිසුන්ගේ ඉඩම්වල කෙසෙල් වගාවක් පවත්වාගෙන යමින් තිබුණි. නාවික හමුදාවේ එම කෙසෙල් වගාව, කැලෑව කපා මුස්ලිම් ජනතාව කෙසෙල් වගා කර ඇති බව කියමින් හිරු ටීවී වැනි නාලිකාවලින් වීඩියෝ ලෙස පෙන්වා තිබුණේ එම වගාවන්ය. මේ වෙද්දී නාවික හමුදාව එම වගාවන්වල ඉඩම් හිමිකරුවන්ට නිදහස් කර ඇත. ඒ ඉඩම්වල දැන් කුඹුරු සැකසී ගොයම් වැවී ඇත. මෙම ප‍්‍රදේශවාසීන්ගේ ආර්ථිකය හා ජන ජීවිතය නංවන්නට යහපාලන ආණ්ඩුව කිසිවක් කළේ නැත. එහෙත් තමන්ගේම ශක්තියෙන් එම මිනිසුන් නැගිටිමින් සිටින බව අපට දැකගන්නට හැකිවිය.

දකුණේ පණ්ඩිතයන්ගේ විල්පත්තු කැපීම ගැන කෑගැසීම් තවමත් නැවතී නැත. හිරු ටීවී ප‍්‍රමුඛව මාධ්‍ය ආයතනවලින් මුස්ලිම් ජනතාවට එරෙහි දේශපාලන වෛරයක් ගොඩනැගීම සඳහා විල්පත්තු කැපූ බව අදටත් කියනු ඇසේ. එහෙත් මාධ්‍ය වාර්තාවලදී මේ ප‍්‍රදේශවල වත්මන් ඡුායාරූප පාවිච්චි නොකර, වසර හතරක් පමණ පැරණි ඡුායාරූප පාවිච්චි කිරීමටද ඔවුන් පරෙස්සම්ය. දැන් ඡුායාරූප පාවිච්චි කළා නම්, කොළ පැහැයෙන් වැඞී ඇති සෞභාග්‍යමත් පරිසරය පෙනෙනු ඇතැයි බියක් ඇති නිසා විය යුතුය.

මෑතකදී විගණකාධිපති දෙපාර්තමේන්තුව ජාත්‍යන්තරව පිළිගත් රම්සාර් තෙත් වනාන්තරවල ආරක්ෂාව පිළිබඳ වාර්තාවක් නිකුත් කර තිබුණි. විල්පත්තු වනාන්තරය ලංකාවේ පිළිගත් ප‍්‍රධාන රම්සාර් තෙත් වනාන්තරයකි. එහිදී විල්පත්තු වනාන්තරය තුළ ඇති අනවසර ඉදිකිරීම් ලෙස සඳහන්ව තිබුණේ පූකුලම් ගම්මානය ගැන පමණි. පූකුලම් ගම්මානයේ ජීවත්වන්නෝ සිංහල ජාතිකයෝය.

ඒ සියල්ලට වඩා අපට පුදුමාකාර කාරණයක් පසක් විය. ඒ විල්පත්තුවට ඉහළින් ඇති නැවත පදිංචි කිරීම් ව්‍යාපෘතියේදී ඇත්තටම සිදුව ඇත්තේ කුමක්දැයි අවබෝධ වීමය. ඇත්තෙන්ම සිදුව ඇත්තේ රාජපක්ෂ ආණ්ඩුව සමයේ ජනාවාස සඳහා නිදහස් කළ ඉඩම් යහපාලන ආණ්ඩුවෙන් නැවත වන සංරක්ෂණ දෙපාර්තමේන්තුවට පවරාගෙන ඒවායේ නැවත කැලෑ වවා තිබීමය. ඒ අනුව රාජපක්ෂලා කැපූ, යහපාලනය වැවූ කැලෑවක කතාවක් යහපාලන ආණ්ඩුවට එරෙහි ප‍්‍රමුඛ දේශපාලන සටන්පාඨයක් ලෙස පාවිච්චි කර ඇති බව අපට පසක් විය. දූෂිත මාධ්‍යවලට කතාවක් ඒක පාර්ශ්වීයව සම්පූර්ණයෙන්ම උඩු යටිකුරු කළ හැකි බව තේරුම් ගන්නට මෙම සිදුවීම අපූරු සාධයකි.

රාජපක්ෂලා කැලෑව කැපූ හැටි

මෙම ප‍්‍රදේශයේ ඉඩම් නිදහස් කිරීම ගැන විගණකාධිපති දෙපාර්තමේන්තුව මීට පෙර වාර්තාවක් නිකුත් කර තිබුණි. එම වාර්තාවෙහි නිර්දේශ හා නිගමනවලින් කියා ඇත්තේ මෙම පදිංචි කිරීම් වෙනුවෙන් රක්ෂිත ලෙස තිබුණු ඉඩම් නිදහස් කිරීම විධිමත් ක‍්‍රමවේදයට අනුව සිදු නොවූ බවය. ඊට අමතරව සැබෑ ලෙස අවතැන්වූ පවුල්වලට මෙම ඉඩම් ලබාදුන්නාදැයි තහවුරු නොවන බවත්, විගණකාධිපති දෙපාර්තමේන්තුව කීය. කෙසේ වෙතත් විගණකාධිපති දෙපාර්තමේන්තුව ගනුදෙනු කරන්නේ නිල ලියකියවිලි හා ස්ථාන නිරීක්ෂණ අනුව බව සිහි තබාගත යුතුය.

රාජපක්ෂ ආණ්ඩුව සමයේ ඉඩම් ලබාදීමේදී නිවැරදි ක‍්‍රමවේද අනුව කටයුතු කර නොමැති බව එම වාර්තාවෙහි කරුණු සලකද්දී පැහැදිලිව පෙනේ. එහෙත් අවතැන්වූ මුස්ලිම් ජනතාව නැවත පදිංචි කිරීම රාජපක්ෂ ආණ්ඩුව සමයේ, බැසිල් රාජපක්ෂ මහතාගේ මූලිකත්වයෙන් ගත් නිවැරදි තීන්දුවක් බව ඉතා පැහැදිලිව කිව යුතුය. යුද සමයේදී, එල්ටීටීඊ සංවිධානයේ බලපෑම මත මන්නාරම, සිලාවතුර, මුසලි හා මරිච්චිකට්ටු ප‍්‍රදේශවල වාසය කළ පුද්ගලයන්ට ඉඩම් අත්හැර යන්නට සිදුවූ බව ඓතිහාසික සත්‍යයකි. එම ප‍්‍රදේශවල පැරණි ජනාවාස තිබුණු බවත්, පැරණි ගොඩනැගිලි පවා තවම පවතින බවත් මීට පෙර පැහැදිලිව තහවුරු කර ඇති නිසා එයට නැවත ඉඩ වෙන්කිරීම ඵල රහිතය.

කෙසේ වෙතත් මෙම ඉඩම් නිදහස් කරන මොහොත වනවිට වන සංරක්ෂණ දෙපාර්තමේන්තුව රක්ෂිත වනාන්තර ලෙස නම් කර තිබුණු ප‍්‍රදේශයකට අයත් විය. එයට හේතුව, වන සංරක්ෂණ දෙපාර්තමේන්තුවේ වාර්තාවක මෙසේ සඳහන්ය.

‘යුද සමය අවසන් වීමත් සමගම මන්නාරම දිස්ත‍්‍රික්කය තුළ අනවසර වනාන්තර හෙළි කිරීම් බහුලව සිදුකරන ස්ථාන නිරීක්ෂණය වීමෙන් පසු කඩිනමින් එම වනාන්තරවල ආරක්ෂාව තහවුරු කිරීම සඳහා බිම් මැනුමකින් තොරව ජීපීඑස් පාඨාංක යොදාගනිමින් තර්ජනයට ලක්ව ඇති වනාන්තර ප‍්‍රදේශ රක්ෂිත ලෙස ප‍්‍රකාශයට පත්කරනු ලැබිණි. ඒ අනුව 2012/2013 වර්ෂවලදී මෙම වැඩසටහන යටතේ හෙක්ටයාර 70,000ක ප‍්‍රමාණයක විලයිත්තිකුලම් රක්ෂිතය ඇතුළුව රක්ෂිත 8ක් ප‍්‍රකාශයට පත්කරනු ලැබ ඇත.‘

ඒ අනුව 2012 මැයි 21 දා අංක 1759/02 දරන අතිවිශේෂ ගැසට් පත‍්‍රයෙන් එම ප‍්‍රදේශ රක්ෂිත වනාන්තරයක් ලෙස නම් කර තිබුණි.

සිදුව තිබුණේ, වන සංරක්ෂණ දෙපාර්තමේන්තුව යුද්ධයෙන් පසු තමන්ගේ ඉඩම් නිවැරදිව හඳුනාගත නොහැකි නිසා කැලෑව වැවී තිබුණු සියලූ ඉඩම් රක්ෂිත ලෙස නම් කර තිබීමය. ඉඩම් මැනීමට කාලය ගත්තා නම් වන සංරක්ෂණ දෙපාර්තමේන්තුව සතු රක්ෂිත ඉඩම් පුද්ගලයන් බලහත්කාරයෙන් අල්ලාගැනීමේ අවදානමක් තිබුණි.

ගැසට් කිරීමෙන් පසුව තමන්ගේ ඉඩම් හඳුනාගැනීම සඳහා මහපොළොවේ සිට ඉඩම් මැනීමට පටන්ගෙන තිබුණි. 2014 වර්ෂයේ සිට මැනීම් ආරම්භ කර තිබුණි. මැයි 22 වැනිදා විලයිත්තිකුලම් රක්ෂිතය ලෙස ජීපීඑස් ඛණ්ඩාංක අනුව ගැසට් කර තිබුණු වනාන්තරයෙන් අක්කර 667ක භූමි භාගයක් වන සංරක්ෂණ දෙපාර්තමේන්තුවෙන් මුසලි ප‍්‍රාදේශීය ලේකම් කොට්ඨාසයට නිදහස් කර තිබුණි. ඒ නැවත පදිංචි කිරීම් සඳහාය.

නැවත පදිංචි කිරීම් සිදුවුණේ ඒ වනවිට උතුරු පළාත සඳහා නැවත පදිංචි කිරීම්, සංවර්ධනය හා ආරක්ෂාව පිළිබඳ ජනාධිපති කාර්ය සාධන බලකායේ නිරීක්ෂණ යටතේය. එම කාර්ය සාධන බලකායේ ප‍්‍රධානත්වය දැරුවේ බැසිල් රාජපක්ෂ මහතාය. එහි ලේකම්වරයා වුණේ එස්.බී. දිවාරත්නය.

දිවාරත්න මහතා 2012 නොවැම්බර් 22 වැනිදා පරිසර අමාත්‍යාංශයේ ලේකම් බී.එම්.යූ.ඞී. බස්නායකට ලිපියක් යවා තිබුණි. එම ලිපියෙහි පිටපතක් බැසිල් රාජපක්ෂ මහතාටද යවා ඇත. විලියිත්තිකුලම් රක්ෂිතයේ පමණක් නොව මුලතිව් හා වවුනියා දිස්ත‍්‍රික්කවල රක්ෂිත ලෙස හඳුනාගත් ඉඩම් අක්කර සිය ගණනක්ද නිදහස් කරන ලෙස එයින් ඉල්ලා තිබුණි.

2013 මාර්තු 25 දින හවස 5ට ආර්ථික සංවර්ධන අමාත්‍ය බැසිල් රාජපක්ෂගේ කාර්යාලයේදී විලයිත්තිකුලම් රක්ෂිතයේ ඉඩම් නිදහස් කිරීම ගැන රැුස්වීමක් පවත්වා තිබුණි. එයට බැසිල් රාජපක්ෂ මහතාට අමතරව එවකට පරිසර අමාත්‍යවරයා වූ සුසිල් පේ‍්‍රම්ජයන්තද සහභාගි විය. එහිදී මෙම ප‍්‍රදේශවල නැවත පදිංචි කිරීමේ අවශ්‍යතාව ගැන කතාකර තිබුණි. ඉඩම් කච්චේරියක් පවත්වා ඉඩම් අහිමිවූ අයට එම ඉඩම් ලබාදීමට එහිදී එකඟ වී තිබුණි. එපමණක් නොවේ, ‘උතුරු වසන්තය’ වැඩසටහන යටතේ ප‍්‍රදේශවලට විදුලිය ලබාදීම ඇතුළුව ප‍්‍රදේශයේ යටිතල පහසුකම් සංවර්ධන වැඩසටහන් ගැනද එහිදී එකඟ වී තිබුණි. පදිංචි කරවන අයට මුල් කාලයේදී වියළි ආහාර ලබාදීම, මාර්ග ඉදිකිරීම, මොරටුව විශ්වවිද්‍යාලයේ සහයෝගය ලබාගෙන ගම්මාන සැලසුම් කිරීම ඇතුළු එකඟතාවන්ට බැසිල් රාජපක්ෂ මහතාගේ ප‍්‍රධානත්වයෙන් පැවති එම සාකච්ඡුාවේදී පැමිණ තිබේ.

ඉඩම් නිදහස් කිරීම නිසියාකාරව සිදුව නැතිනම්, එහි වගකීමද රාජපක්ෂ ආණ්ඩුව සතුය. එවකට වන සංරක්ෂණ දෙපාර්තමේන්තුව භාරව සිටි අමාත්‍යවරයාද, රාජපක්ෂ ආණ්ඩුවද, නැවත පදිංචි කිරීමේ ජනාධිපති කාර්ය සාධක බලකායද එහි වගකීම ගත යුතුය.

ගස් කැපූ හැටි

මේ ප‍්‍රදේශවල ගස් කපා ඉවත් කොට එයින් මුදල් ඉපැයීමේදී වංචාවක් සිදුව ඇතැයි සැක කිරීමට සාධාරණ කරුණු තිබේ. ඒ බව විගණකාධිපති දෙපාර්තමේන්තුවද පෙන්වාදී තිබේ.
වන සංරක්ෂණ ජෙනරාල්වරයා ලිපියක් මගින් නිදහස් කළ කොටසේ ඇති වාණිජමය වටිනාකමකින් යුත් ගස් සියල්ල ලැයිස්තුගත කරන ලෙස 2013 පෙබරවාරි 14 වැනිදා ලිඛිතව දන්වා ඇත. ඉන්පසුව 2013 ඔක්තෝබර් 23 වැනිදා සිට එම කොටසේ ගස් දැව සංස්ථාවේ මැදිහත්වීමෙන් කපා ඇත. දැව ඝන ඩෙසිමීටර් 12,548ක් හෙවත් ඝන මීටර් 12.5ක් සඳහා වන සංරක්ෂණ දෙපාර්තමේන්තුවට රාජ්‍ය භාගය වශයෙන් ගෙවා තිබේ.

එහෙත් නිල වශයෙන් ලේඛනගත වී ඇත්තේ පලූ හා බුරුත දැව ඝන මීටර් 12.5 පමණකි. මෙම ප‍්‍රදේශයේ වනාන්තර නිරීක්ෂණයෙන් පසු විගණකාධිපති දෙපාර්තමේන්තුව කියන්නේ මෙතරම් අඩු දැව ප‍්‍රමාණයක් තිබිය නොහැකි බවය. ඒ අනුව මේ ප‍්‍රදේශයේ අවුරුදු තිහක් තිස්සේ වැවී ඇති දැවැන්ත ගස්වල දැව වංචාවක් සිදුව ඇති බවට පැහැදිලිවම සැක කළ හැකිය.

මෙම ඉඩම්වලට බලපත‍්‍ර ලබාදී තිබුණේ එලෙස රාජ්‍ය දැව දෙපාර්තමේන්තුවෙන් දැව කපා ඉවත් කරගත් පසුවය. මහින්ද රාජපක්ෂ ජනාධිපතිවරයා ඉඩම් සංවර්ධන පනතේ 19(2* වගන්තිය යටතේ අවසර පත‍්‍ර 944ක් ඉඩම් කට්ටි හිමියන් වෙත 2014 සැප්තැම්බර් 12 වැනිදා බෙදා තිබුණි. එම අවසර පත‍්‍ර මහින්ද රාජපක්ෂ මහතාගේ ඡුායාරූපයද සහිතව බෙදා තිබුණි.

බදියුදීන් සහෝදරයාගේ ඔමේගා

අනෙක් කාරණය වන්නේ මෙම නැවත පදිංචි කිරීම්වලට අදාළ මාර්ග සකස් කිරීම ඔමේගා කන්ස්ට‍්‍රක්ෂන් ප‍්‍රයිවෙට් ලිමිටඞ් නම් ආයතනයකින් සිදු කිරීමය. එය රජයේ මූල්‍ය දායකත්වයකින් සිදුකළ කටයුත්තක් නොවන බව විගණකාධිපති දෙපාර්තමේන්තුව පෙන්වයි. කෙසේ වෙතත් එයට බාහිර ආධාර ලැබී තිබුණි. සමාගම් ලේකම් කාර්යාලයේ ඇති තොරතුරු අනුව ඔමේගා කන්ස්ට‍්‍රක්ෂන් නම් ආයතනයේ ප‍්‍රධානියා වන්නේ රිෂාඞ් බදියුදීන් මහතාගේ සොහොයුරු රියාජ් බදියුදීන්ය.

දැව සංස්ථාවේ දැව ගනුදෙනුව මෙන්ම, ඔමේගා කන්ස්ට‍්‍රක්ෂන් ආයතනයේ මැදිහත්වීම ගැනද පැහැදිලිවම සැකයක් ඇති කරගත හැකිය. එහෙත් ඒ පිළිබඳව අපරාධ පරීක්ෂණ සිදුවී නැත. මෙම ක‍්‍රියාකාරකම් මහින්ද රාජපක්ෂ ආණ්ඩුව සමයේ සිදුවූ නිසා ගෝඨාභය රාජපක්ෂ ආණ්ඩුව සමයේ ඒ ගැන පරීක්ෂණ සිදුකරනු ඇතිදැයි ඇත්තේ සැකයකි.

යහපාලනය කැලෑව වැවූ හැටි

කෙසේ වෙතත් අපූරු කතාව වන්නේ රාජපක්ෂලා මෙම ඉඩම්වල වැවී තිබුණු කැලෑව කැපුවාට පසු, යහපාලන ආණ්ඩුව සමයේ එම ඉඩම්වල කැලෑව වැවී ඇති බවය. දෙපැත්තකින් එය සිදුවී ඇත. මෙලෙස නැවත පදිංචි කිරීම්වලදී අයදුම්පත් ඉදිරිපත් කොට, ඉඩම් ලබාගත් අවතැන්වූවන් අතරින් සැලකිය යුතු පිරිසක් මෙම ප‍්‍රදේශවල නිවාස තනාගෙන පදිංචියට පැමිණ නැත. පුත්තලම ප‍්‍රදේශයට යුද්ධය සමයේ ගිය ඔවුන්, එම ප‍්‍රදේශයේ තමන්ගේ ජීවිත ගොඩනඟාගෙන ඇත. සමහරුන් පුත්තලමෙන්ද වෙනත් ප‍්‍රදේශවලට සංක‍්‍රමණය වී ඇත. තමන්ගේ පාරම්පරික ඉඩම් ලබාගැනීමේ අරමුණෙන්, නැවත පදිංචි කිරීමේදී අයදුම්පත් යොමු කළත් ඔවුන් නිවාස තනා පදිංචියට පැමිණ නැත. එවැනි ඉඩම් රැුසක දැන් ඝන කැලෑ වැවෙමින් පවතී. ඊට අමතරව නැවත පදිංචි වූ උදවියද තමන්ගේ ඉඩම්වල ගස් වැවෙන්නට ඉඩ හැර ඇත.

ඊට අතරව රාජපක්ෂ යුගයේ නිදහස් කළ ඉඩම්වලින් කොටසක් වන සංරක්ෂණ දෙපාර්තමේන්තුව නැවත පවරාගෙන තිබුණි. ඒ ශ‍්‍රී ලංකාවේ වනවැස්ම පුළුල් කිරීමේ ව්‍යාපෘතිය යටතේය. ගුවන් හමුදාව හා එක්ව ගුවනින් බීජ වර්ග ඉස එම ඉඩම්වල නැවත වන වගා කර තිබුණි.

ප‍්‍රදේශවාසීන් කියන්නේ ඒ ඇතැම් ඉඩම් තමන්ගේ පාරම්පරික ඉඩම් වන බවය. වන සංරක්ෂණ දෙපාර්තමේන්තුව පවරාගත් කොටසේ පරණ ඉදිකිරීම් පවා ඇති බව ඔවුහු කියති. ඒ අනුව ඉඩම් නැවත පවරාගැනීම ගැන ප‍්‍රදේශවාසීන්ගේ විරෝධයක් ඇත. ඉඩම් අයිතිය ගැන සැලකිලිමත් විය යුතු බව ඇත්තය. එහෙත් නූතන යුගයේ වනාන්තර ප‍්‍රමාණය වැඩිකිරීමත් අගය කළ යුත්තකි. සිලාවතුර පැත්තේ සිට මරිච්චිකට්ටුව පාරේ යන අයෙකුට දැන් මග දෙපස දැකිය හැක්කේ අලූතින් වැඩෙන ගස්ය. එම ප‍්‍රදේශයට ගමන් නොකරන අයෙකුට ‘ගූග්ල් අර්ත්‘ හරහා සැටලයිට් තාක්ෂණයෙන් එම ප‍්‍රදේශයේ කොළපැහැ වනාන්තර වැඩෙන අයුරු බලාගත හැකිය.

අසාධාරණය

තමන්ගේ ජනාවාසවලින් කොටසක් නැවතත් වන සංරක්ෂණ දෙපාර්තමේන්තුවට ලබා දීමෙනුත් පසුව මෙම ප‍්‍රදේශවල අවතැන් වූ ජනතාවට ජනවාර්ගික වෛරයන් මත අවලාද කීම අඩුවී නොමැත. පසුගිය වසර ගණනාවක් තිස්සේ ශ‍්‍රී ලංකාවේ රජය, ජනමාධ්‍ය හා සිංහල සමාජය මහත් අසාධාරණයක් කර තිබේ. මෙම ජනතාව වසර ගණනාවක් තිස්සේ අසීරුවෙන් මේ බිමෙහි තමන්ගේ ජීවිත ගැටගසාගන්නට වෙහෙස දරමින් සිටී. දැන් ටිකෙන් ටික ඔවුහු මේ ප‍්‍රදේශවල ධීවර රැුකියාව, ගොවිතැන් ආදි ක‍්‍රමවලින් ආර්ථික දිවියක් ගොඩනගාගනිමින් සිටිති.

පසුගිය වසර කිහිපයක් තිස්සේම මහා අපරාධකරුවන් පිරිසක් ලෙස ඔවුන් ලේබල් කිරීමට ලාංකීය සමාජය කටයුතු කර තිබුණි. අදටත් ලංකාවේ සිදුව ඇති මහා පරිසර විනාශයන් වසා ගැනීමට මේ බොරුව පාවිච්චි කරන අවස්ථා ඕනෑ තරම්ය. මුස්ලිම් අය විල්පත්තු කැපුවා නම්, අපි අහවල් දේ කළාම මොකද කියා විමසන අය ඕනෑ තරම් දකින්නට ඇත. පසුගිය සතියක වන සංරක්ෂණ දෙපාර්තමේන්තුවේ දේවානි ජයතිලක මහත්මියට බලපෑම් කරමින් මුන්නක්කරයේ කඩොලාන විනාශ කරන්නට අවසර ඉල්ලූ ගම්වාසීන් පිරිසද විල්පත්තු කතාව ඇදගන්නා අයුරු දකින්නට ලැබුණි. යුද්ධය ඇරඹුණු කාලයේ සිට අද දක්වාම, ලංකාවේ පවතින ජාතිවාදී දේශපාලනයෙන් බැටකන පිරිසක් ලෙස මරිච්චිකට්ටු ආශ‍්‍රිත ගම්මානවල වැසියන් සලකන්නට සිදුවන්නේ ඒ නිසාය.