බැඳුම්කර පිළිබඳ වෝහාරික වාර්තාවට මෑත කාලයේ වැඩිපුරම ප‍්‍රහාර එල්ලකළ පුද්ගලයා වන්නේ මහ බැංකුවේ හිටපු අධිපති, දැන් අගමැති මහින්ද රාජපක්ෂගේ ජ්‍යෙෂ්ඨ උපදේශක අජිත් නිවාඞ් කබ්රාල් මහතා. එම වාර්තාවෙන් ඔහු ගැන හෙළිවී ඇති කරුණු, එලෙස පහරදීමට ප‍්‍රධාන හේතුවක් විය හැකියි.
හඳුනාගත් නිලධාරීන්
වෝහාරික විගණන වාර්තාව සකස් කිරීමේදී විගණන ආයතනය බැඳුම්කර ගනුදෙනු සඳහා මූලික වූ නිලධාරීන්ව වෙනම හඳුනාගෙන තිබෙනවා. හිටපු මහබැංකු අධිපතිවරුන් වන අර්ජුන් මහේන්ද්‍රන් හා අජිත් නිවාඞ් කබ්රාල් මහත්වරුන් ඒ අතර සිටිනවා. ඔවුන් ඇතුළු මෙම ගනුදෙනුවලට මැදහත් වූ නිලධාරීන් ගණනාවක් හඳුනාගත් නිලධාරීන් ලෙස එම වෝහාරික විගණන වාර්තාවලින් වෙනම නම්කර තිබෙනවා.
එම හඳුනාගත් නිලධාරීන්ට ප‍්‍රාථමික ගැනුම්කරුවන් වන සමාගම් සමග තිබුණු සම්බන්ධතා ගැනත් එහිදී අධ්‍යයනය කර තිබෙනවා. ඒ පොදු සමාජයේ ඇති තොරතුරු ගැන කරන ලද අධ්‍යයනයන්ගෙන්. ප‍්‍රාථමික ගැනුම්කරුවන් හා හඳුනාගත් නිලධාරීන් අතර බැඳියාවන් අතර ගැටුමක් තිබුණාදැයි එහිදී සොයාබලා තිබෙනවා. අප සැම පැහැදිලිව දන්නා බැඳියාවන් අතර ගැටුම වන්නේ පර්පෙචුවෙල් ටේරෂරීස් සමාගමේ අර්ජුන් ඇලෝෂියස් සහ අර්ජුන් මහේන්ද්‍රන් අතර බැඳියාවන්ගේ ගැටුම. ඒ දෙදෙනා ඥාතීන්. එම ඥාතීත්වය 2015 කුප‍්‍රකට බැඳුම්කර වංචාවේදී පර්පෙචුවෙල් ටේරෂරීස් සමාගමේ වාසියට පාවිච්චි වූ ආකාරය දැනටමත් රටම හොඳින් දන්නවා.
කබ්රාල්ගේ ඥාතීන්
අජිත් නිවාඞ් කබ්රාල් මහතා 2006 ජුලි මාසයේ සිට 2015 ජනවාරි මාසය දක්වා ශ‍්‍රී ලංකා මහ බැංකුවේ අධිපතිවරයා වශයෙනුත්, මුදල් මණ්ඩලයේ සභාපතිවරයා වශයෙනුත් කටයුතු කළා.
බොහෝ අය නොදන්නේ අජිත් නිවාඞ් කබ්රාල් මහතාට ප‍්‍රාථමික ගැනුම්කරුවන් සමග බැඳියාවන් අතර ගැටුම් තිබුණාද යන්නයි. හෙළිදරව්ව තිබෙන්නේ කබ්රාල් මහතාගේ ඥාතීන් කිහිප දෙනෙකුම ඒ වනවිට ප‍්‍රාථමික ගැනුම්කාර ආයතනවල ඉහළ තනතුරුවල සේවය කර ඇති බවට. එක්කෝ කබ්රාල් මහතාගේ පවුලටම මේ ආයතනවලට ඉහළට පැමිණීම සඳහා විශේෂ පරම්පරාගත දක්ෂතාවක් තිබුණා විය යුතුයි. නැතිනම් ඒ ඥාතීන්ට තිබුණු ලොකුම ‘දක්ෂතාව’ කබ්රාල් මහතාගේ ඥාතීන් වීම විය යුතුයි.
එහිදි වෝහාරික වාර්තාව සකස් කළ බීඞී ඕ ඉන්දියා සමාගම පැති කිහිපයකින් තම අධ්‍යයනය කර තිබෙනවා. ඔවුන් සාමාන්‍ය සමාජයෙහි හා අන්තර්ජාලයෙහි ඇති තොරතුරු එකතු කර තිබෙනවා. අන්තර්ජාලයේ තිබෙන සියලූ තොරතුරු නිවැරදි නැහැ. එම නිසා ලැබුණු තොරතුරු තහවුරු කරගැනීම සඳහා ඒ ඒ ප‍්‍රාථමික ගැනුම්කරුවන්ගේ සහ පොදු අවකාශයේ ඇති අනෙක් කරුණු සමග සසඳා බැලීම් සිදුකර තිබෙනවා.
ඔවුන් ප‍්‍රාථමික ගැනුම්කරුවන් 16 දෙනෙකුට අදාල කරුණු එහිදී සොයාබලා තිබෙනවා. ප‍්‍රාථමික ගැනුම්කරුවන් වන සමාගම්වල වාර්ෂික වාර්තා ආදිය ඒ සඳහා පාවිච්චි කර තිබෙනවා. ඊටත් අමතරව මෙම සමාගම්වල ඉතිහාසය සොයන්නට තිබෙන ප‍්‍රධානතම මාර්ගයක් වන සමාගම් රෙජිස්ට‍්‍රාර් කාර්යාලයේ ඇති තොරතුරුද වෝහාරික වාර්තාවේදී අධ්‍යයනය කර තිබෙනවා. එම කරුණු අනුවයි බැඳියාවන් අතර ගැටුම් ගැන ඔවුන් කරුණු සොයා ඇත්තේ. ඒ අනුව මේවා හුදු ආරංචි නොවෙයි. තහවුරු කරගත් කරුණු. මේ කරුණුවලින් පලා යන්නට කබ්රාල් මහතාට හෝ එකල ආණ්ඩුවේ හිතවාදීන්ට බැහැ.
නිහාල් ෆොන්සේකා
ඇන්තනි නිහාල් ෆොන්සේකා අජිත් නිවාඞ් කබ්රාල්ගේ ඥාති සහෝදරයෙක්. ඔහු ඞී.එෆ්.සී.සී. බැංකුව පෞද්ගලික සමාගමේ ප‍්‍රධාන විධායක නිලධාරියා ලෙස 2000 ජනවාරි මාසයේ සිට 2013 දක්වා සේවය කළා. ඔහු ඞී.එෆ්.සී.සී. වර්ධන බැංකුවේ විධායක නොවන අධ්‍යක්ෂවරයෙකු ලෙස 2009 සැප්තැම්බර් මාසයේ සිට 2015 දක්වා කටයුතු කර තිබෙනවා. ඊට අමතරව ශ‍්‍රී ලංකාවේ කොමර්ෂල් බැංකුවේ අධ්‍යක්ෂවරයෙකු ලෙස 2000 සිට 2009 දක්වා කටයුතු කර තිබෙනවා. ඊටත් අමතරව ඇකුයිටි නම් ඞී.එෆ්.සී.සී. බැංකුව හා හැටන් නැෂනල් බැංකුව සම අයිතිය දැරූ ආයෝජන බැංකුවේ අධ්‍යක්ෂවරයෙකු ලෙස 2008 ජුලි මාසයේ සිට 2013 ජුලි මාසය දක්වා කටයුතු කර තිබෙනවා. එම ඇකුයිටි ආයතනය යටතේ ඇකුයිටි සෙකියුරිටීස් නම් ආයතනයක් පැවතුණා. ඇකුයිටි සෙකියුරිටීස් ආයතනය ප‍්‍රාථමික ගැනුම්කරුවෙකු ලෙස බැඳුම්කර ගනුදෙනුවලට සම්බන්ධවූ ආයතනයක්. එම ආයතනය ගැන මෙම සටහනේ ඉදිරියේදී වැඩිදුර විස්තර කතාකරනවා.
ශිරෝමි නොඑල්
අජිත් නිවාඞ් කබ්රාල් මහතාගේ සහෝදරියක් වන ශිරෝමි නොඑල් වික‍්‍රමසිංහ පර්පෙචුවෙල් ටේරෂරීස් ආයතනයේ ප‍්‍රධාන සමාගම වන පර්පෙචුවෙල් හෝල්ඩින්ස් සමාගම සමගත් සම්බන්ධයි. දැනට ඇති කරුණු සලකද්දී පෙනී යන්නේ පර්පෙචුවෙල් ටේරෂරීස් සමාගම ප‍්‍රාථමික ගැනුම්කරුවෙකු බවට පත් කිරීමේදී මේ සහෝදර බැඳීමත් ඉතාම තදින් බලපා ඇති බව.
2013 දෙසැම්බර් 23 වැනිදා සිට 2015 මාර්තු 09 වැනිදා දක්වා ශිරෝමි නොඑල් වික‍්‍රමසිංහ මහත්මිය පර්පෙචුවෙල් ටේරෂරීස් සමාගමේ අධ්‍යක්ෂවරියක ලෙස සේවය කර තිබෙනවා. එහි සරල තේරුම මෙයයි. කුප‍්‍රකට පළමු බැඳුම්කර වංචාව 2015 පෙබරවාරි 27 වැනිදා සිදුවෙද්දී කබ්රාල් මහතාගේ සහෝදරිය පර්පෙචුවෙල් හෝල්ඩින්ස් ආයතනයේ අධ්‍යක්ෂවරියක්. එම ගනුදෙනුවෙන් දින 10කට පසු ඇය එම සමාගමෙන් ඉවත්ව තිබෙනවා.
ඊටත් පෙර පර්පෙචුවෙල් ටේරෂරීස් සමාගමට බැඳුම්කර ගනුදෙනු සඳහා සුදුසුකම් ලත් ප‍්‍රාථමික ගැනුම්කරුවෙකුගේ තත්වය ලැබෙද්දීත් ඇය පර්පෙචුවෙල් හෝල්ඩින්ස් ආයතනයේ අධ්‍යක්ෂවරියක්. අජිත් නිවාඞ් කබ්රාල් මහතා පර්පෙචුවෙල් ටේරෂරීස් ආයතනයට අනුමැතිය නොලැබෙන්නේ මන්දැයි ¥රකථනයෙන් විමසා බලපෑම් කරද්දීත් ඇය පර්පෙචුවෙල් හෝල්ඩින්ස් අධ්‍යක්ෂවරියක්.
ඊට අමතරව 2013 සිට 2017 දක්වා ඇය එච්එන්බී ඇෂුවරන්ස්හි අධ්‍යක්ෂවරියක ලෙස සේවය කර තිබෙනවා. ඊටත් පෙර 2009 පෙබරවාරි 1 වැනිදා සිට 2010 මැයි 26 වැනිදා දක්වා ශ‍්‍රී ලංකාවේ කොමර්ෂල් බැංකුවේ අධ්‍යක්ෂවරියක ලෙස සේවය කර තිබෙනවා.
ඇය නිවාස බැංකුව හෙවත් එච්.ඞී.එෆ්.සී. බැංකුවේ සභාපතිනිය ලෙස 2010 මැයි මාසයේ සිට 2015 ජනවාරි මාසය දක්වා කටයුතු කර තිබෙනවා. එය රජය සතු බැංකුවක්. ශිරෝමි වික‍්‍රමසිංහ හා අර්ජුන් ඇලෝෂියස් යනු අහම්බෙන් හමුවූ වෘත්තීය බැඳීමක් ඇති දෙපළක් නොවන බව තහවුරු වෙන්නේ ඇය එච්.ඞී.එෆ්.සී. බැංකුවේ සභාපතිනියව සිටියදී, අර්ජුන් ඇලෝෂියස්ටත් එම බැංකුවේ ඉහළ තනතුරක් වෙන්ව තිබී ඇති නිසායි. අර්ජුන් ඇලෝෂියස් 2011 මැයි මාසයේ සිට එච්.ඞී.එෆ්.සී. බැංකුවේ අධ්‍යක්ෂවරයෙකු ලෙස කටයුතු කර තිබෙනවා.
තවත් ඥාතීන්
ඊට අමතරව අජිත් නිවාඞ් කබ්රාල් මහතාගේ සමීප ඥාති සහෝදරයෙකු වන අමල් කබ්රාල් එච්.එන්.බී. බැංකුවේ අධ්‍යක්ෂවරයෙකු ලෙස 2014 අපේ‍්‍රල් මාසයේ සිට කටයුතු කර තිබෙනවා. එච්.එන්.බී. බැංකුව ඇකුයිටි සෙකියුරිටීස් ආයතනයේ සම අයිතිකාර සමාගම ලෙස කටයුතු කළා.
අජිත් නිවාඞ් කබ්රාල් මහතාට ඥාතිත්වයෙන් මස්සිනා වන රවීන්ද්‍ර බාලකන්ත තම්බයියා 2010 ජනවාරි මාසයේ සිට 2015 දක්වා ඞී.එෆ්.සී.සී. බැංකුවේ අධ්‍යක්ෂවරයෙකු ලෙස කටයුතු කළා.
කබ්රාල් මහතාගේ ඥාති සහෝදරියක වන ධාරා විජේතිලක මහත්මිය සම්පත් බැංකුවේ අධ්‍යක්ෂවරියක ලෙස 2011 සිට කටයුතු කර තිබෙනවා. තවත් ඥාති දියණියක වන ශිබානි රේණුකා තම්බයියා ඞී.එෆ්.සී.සී. බැංකුවේ අධ්‍යක්ෂවරියක ලෙස 2010 සිට 2015 දක්වා සේවය කර තිබෙනවා.
කබ්රාල් මහතාගේ තවත් මස්සිනා කෙනෙකු වන රනෙල් ටී විජේසිංහ ලංකා බැංකුවේ අධ්‍යක්ෂවරයෙකු ලෙස 2013 සිට කටයුතු කර තිබෙනවා.
ඉහත කී ඥාතීන් අතරින් ඞී.එෆ්.සී.සී. බැංකුවෙහි කබ්රාල් මහතාගේ ඥාතීන් ගණනාවක් සිට ඇති බව පෙනී යනවා. මීට අමතරව 2015 සිට පර්පෙචුවෙල් සමූහයේ කටයුතු කළ ප‍්‍රකටම චරිතයක් වන සංජීව ප‍්‍රනාන්දු 2007 සිට 2016 දක්වා ඞී.එෆ්.සී.සී. බැංකුවේ සේවය කර තිබෙනවා.
ඇකුයිටි
ඉහත කී ඥාති සම්බන්ධතා අතරින් ඇකුයිටි සෙකියුරිටීස් නම් ප‍්‍රාථමික ගැනුම්කරුවා ගැන වෝහාරික වාර්තාවේ විශේෂයෙන් කරුණු පෙන්වා තිබෙනවා. ඇකුයිටි සෙකියුරිටීස් ආයතනයේ සම හිමිකාරීත්වය ඇත්තේ ඞී.එෆ්.සී.සී. බැංකුවට සහ එච්.එන්.බී. බැංකුවට.
ඇකුයිටි සෙකියුරිටීස් ආයතනය සමග කර ඇති ගනුදෙනු අතරින් වැඩි ප‍්‍රමාණයක් සිදුවී ඇත්තේ 2013 – 2014 කාලසීමාවේදීයි. එලෙස සිදුව ඇති ගනුදෙනුවලින් රුපියල් මිලියන 60ක පාඩුවක් සිදුව ඇතැයි ගණනය කර තිබෙනවා. එහි සඳහන් වෙන්නේ බැඳුම්කර ලබාදීමේදී ලැබුණු පාඩුව පමණයි. ඒ බැඳුම්කර විකුණා ඇකුයිටි ලැබූ ලාභය කෝටි සිය ගණනක් ඉක්මවනු ඇති.
අප මතක තබාගත යුතු කාරණාව වන්නේ පර්පෙචුවෙල් ටේරෂරීස් ආයතනයෙහි ජ්‍යෙෂ්ඨ ගනුදෙනුකරුවෙකු ලෙස කටයුතු කළ, කුප‍්‍රකට බැඳුම්කර වංචාවේදී චෝදනා ලත් ගජන් දේවේන්ද්‍රන්ද එකල ඇකුයිටි සෙකියුරිටීස් ලිමිටඞ් ආයතනයේ ඉහළ තනතුරක සේවය කළ බව. ඊට අමතරව පර්පෙචුවෙල් ටේරෂරීස් සමාගමේ ප‍්‍රධාන විධායක නිලධාරී ලෙස සේවය කළ කසුන් පලිසේන මීට 2013ට ඔක්තෝබර් දක්වාම ඇකුයිටි සෙකියුරිටීස් ආයනයේ සේවය කර තිබෙනවා. සංජීව ප‍්‍රනාන්දු උක්ත කාලයේදී ඇකුයිටි සෙකියුරිටීස් ආයතනයේ සේවය කර තිබෙනවා.
මේ කාල සීමාවේදී රවීන්ද්‍ර බාලකන්ත තම්බයියා ඞී.එෆ්.සී.සී. බැංකුවේ අධ්‍යක්ෂවරයෙකු ලෙසත්, අමල් කබ්රාල් මහතා එච්.එන්.බී. බැංකුවේ අධ්‍යක්ෂවරයෙකු ලෙසත් සේවය කර තිබෙනවා.
කොමර්ෂල් බැංකුව
අප මීට පෙර සඳහන් කළ ආකාරයට නිහාල් ෆොන්සේකා මහතා සහ ශිරෝමි නොඑල් වික‍්‍රමසිංහ මහත්මිය යන දෙදෙනාම 2009 දී කොමර්ෂල් බැංකුවට සම්බන්ධව කටයුතු කරමින් සිටියා. එම වසරේදී කොමර්ෂල් බැංකුවට ලබාදී ඇති බැඳුම්කර ප‍්‍රමාණය 2008 වසරට වඩා තීරණාත්මක ලෙස වැඩිවී තිබුණා. 2008 දී රුපියල් කෝටි 355ක් වටිනා බැඳුම්කර කොමර්ෂල් බැංකුවට දී තිබුණා. කබ්රාල් මහතාගේ සහෝදරිය අධ්‍යක්ෂ ධුරයට සම්බන්ධ වූ පසුව 2009 දී කෝටි 2511ක් දක්වා වැඩිව තිබුණා.
ෆස්ට් කැපිටල්
ෆස්ට් කැපිටල් ටේරෂරීස් නම් ආයතනයේ සම හිමිකාරීත්වය තිබී ඇත්තේ පර්පෙචුවෙල් හෝල්ඩින්ස් ලිමිටඞ් ආයතනයට හා බ‍්‍රවුන්ස් ආයතනයට සම්බන්ධ ෆ‍්‍රී ලංකා කැපිටල් හෝල්ඩින්ස් සමාගමට. ඒ අනුව ෆස්ට් කැපිටල් හරහා පර්පෙචුවෙල් ටේරෂරීස් ආයතනය වසර ගණනාවකට පෙර සිටම බැඳුම්කර ගනුදෙනු ක්ෂේත‍්‍රයේ කටයුතු කර තිබෙනවා.
බැඳුම්කර ගනුදෙනුවලදී 2008 සහ 2009 වර්ෂවල ෆස්ට් කැපිටල් ටේරෂරීස් ආයතනය සමග සිදුකර ඇති බැඳුම්කර ගනුදෙනු ප‍්‍රමාණය තීරණාත්මක ලෙස වැඩි බව එම වාර්තාවෙන් පෙන්වාදෙනවා. 2008 දී කෝටි 2051ක් හා 2009 දී කෝටි 1998ක් වටිනා බැඳුම්කර ගනුදෙනු එම සමාගම සමග සිදුකර තිබෙනවා. පර්පෙචුවෙල් ට‍්‍රෂෙරීස් ආයතනයේ කටයුතු කළ පුද්ගලයෙකු වන රුවන් ප‍්‍රසන්න සුගතදාස මෙම කාලසීමාවේදී ෆස්ට් කැපිටල් ආයතනයෙහි කටයුතු කර තිබෙනවා.
කුප‍්‍රකට බැඳුම්කර ගනුදෙනුව සිදුවී දින හතරකට පසු, එනම් 2015 මාර්තු 03 වැනිදා ඇලෝෂියස් පවුලේ සාමාජිකයන් ෆස්ට් කැපිටල් සමාගමෙන් වෙන්ව තිබුණා. ඔවුන් පර්පෙචුවෙල් හෝල්ඩින්ස් සමාගමේ කොටස් බ‍්‍රවුන් ඉන්වෙස්මන්ට්ස් සමාගමට විකුණා තිබුණා. ශිරෝමි නොඑල් වික‍්‍රමසිංහ මහත්මිය පර්පෙචුවෙල් හෝල්ඩින්ස් සමාගමෙන් ඉවත්වෙන්නේ ඉන් දින හයකට පසුව.
විගණනයට බාධා
ඉහත කී පෞද්ගලික ඥාති සම්බන්ධතා බැඳුම්කර ගනුදෙනුවලට බලපෑම් කළ ආකාරය තහවුරු කරගැනීම සඳහා වෝහාරික විගණනය කළ ආයතනයට බැඳුම්කර ගනුදෙනුවලට අදාල නිල ¥රකථන සංවාදවල, රාජ්‍ය ණය දෙපාර්තමේන්තුවේ කාර්යාලයේ හඬ පටිගත කිරීම් හා නිල ඊමේල් සංවාදවල තොරතුරු අවශ්‍ය වී තිබෙනවා.
ඇත්තෙන්ම 2015න් පසු සිදුවූ වංචාව ගැන කරුණු තහවුරු කරගැනීමට එවැනි නිල පටිගත කිරීම් ඇතුළු තොරතුරු අතිශය වැදගත් සාධකයක්ව තිබුණා.
එහෙත් රාජපක්ෂ යුගයේදී සාමාන්‍යයෙන් මහ බැංකුව කළ යුතු කටයුත්තක් වන නිල ¥රකථන සංවාද පටිගත කර තිබුණේ නැහැ. ඒ අනුව ඔවුන්ට තිබී ඇති සීමිත තොරතුරු නිසා ඉහත කී ඥාති සම්බන්ධතා බැඳුම්කර ගනුදෙනුවලදී එම සමාගම්වලට වාසි සහගත ලෙස කටයුතු කිරීමට පසුබිම සැකසූ ආකාරය එම වාර්තාවෙන් නිශ්චිතව තහවුරු කර නැහැ. ඒ වෙනුවට ඔවුන් එම ඥාති සම්බන්ධතා පෙන්වා දී තිබෙනවා පමණයි. සටහන ලියන මොහොත වෙද්දී ලියුම්කරු අතට පාර්ලිමේන්තුවේ දැනට සභාගත කර ඇති වෝහාරික වාර්තාවේ ඇමුණුම් ලැබී තිබුණේත් නැහැ. ඇතැම්විට ඇමුණුම්වලින් මෙම ඥාති සම්බන්ධතා ගැන තවත් කරුණු තහවුරු වීමේ ඉඩක් තිබෙනවා.
කෙසේ වෙතත් අජිත් නිවාඞ් කබ්රාල් මහතා මහ බැංකු අධිපතිවරයාව සිටි සමයේදී බැඳුම්කර විජිතයෙහි ඔහුගේ ඥාතීන්ගේ ක‍්‍රියාත්මක වීම තීරණාත්මක බව මේ කතාවලින් පැහැදිලිි වෙනවා. විශේෂයෙන්ම ඔහුගේ සහෝදරිය හා අර්ජුන් ඇලෝෂියස් මහතා අතර සම්බන්ධය මඟහැරිය නොහැකියි. ඇය සභාපති සිටි බැංකුවක අධ්‍යක්ෂ මණ්ඩලයට අර්ජුන් ඇලෝෂියස් මහතා පත්වීමත්, ඇලෝෂියස් පවුලේ සමාගමක අධ්‍යක්ෂ මණ්ඩලයක ඇය සිටීමත් මගින් ඒ කතාව පැහැදිලිවම පෙනෙන්නට තිබෙනවා. දැන් කුමන කතා කීවත්, එම කතාවලින් පලායෑමේ හැකියාවක් අජිත් නිවාඞ් කබ්රාල් මහතාට නැහැ.
