ශ‍්‍රී ලංකා නිදහස් පක්ෂය හා ශ‍්‍රී ලංකා පොදුජන පෙරමුණ එක්ව පුටුව ලකුණෙන් ඉදිරි මහමැතිවරණයට ඉදිරිපත්වීම සඳහා නිර්මාණය කිරීමට අපේක්ෂා කරන ශ‍්‍රී ලංකා නිදහස් පොදුජන සන්ධානය ලියාපදිංචි කොට මැතිවරණයට පෙර එහි ජාතික සමුළුවක් පැවැත්වීමට ආණ්ඩු පක්ෂයේ පක්ෂ නායකයන්ගේ රැුස්වීමේදී තීරණය කළ බව එම සන්ධානයේ පක්ෂ නායකයෙක් පැවසීය.
ජනවාරි 28 වැනිදා පැවති එම පක්ෂ නායකයන්ගේ රැුස්වීමේදී ඩලස් අලහප්පෙරුම, නිමල් සිරිපාල ද සිල්වා සහ රාජා කොල්ලූරේ මහත්වරුන්ගේ මැදිහත්වීමෙන්, එම සන්ධානය ලියාපදිංචි කිරීමේ කටයුතු ඉක්මන් කිරීමට එකඟ වී ඇත.
කෙසේ වෙතත් ඉදිරි මහමැතිවරණයට එම සන්ධානය යටතේ ඉදිරිපත් වෙනවාද, පොදුජන පෙරමුණේ ඇතැම් නායකයන් යෝජනා කරන පරිදි පොදුජන පෙරමුණ යටතේ ඉදිරිපත් වෙනවාද, එසේත් නැතිනම් පොදුජන පෙරමුණේ ලකුණ වන පොහොට්ටුව ලකුණ පාවිච්චි කරමින් නව සන්ධානය යටතේ ඉදිරිපත් වෙනවාද යන පියවර තුනෙන් එකක් අනුගමනය කිරීමට එහිදී එකඟ වී තිබේ. ඒ පිළිබඳව දැන්ම තීන්දුවක් නොගෙන ඉදිරියේදී තීන්දුවක් ගත යුතු බව එහිදී එකඟ වී ඇත.
ඉදිරි මැතිවරණයට එම සන්ධානය ඉදිරිපත් විය යුත්තේ පොදුජන පෙරමුණ පක්ෂයෙන් හා එම පක්ෂයේ පොහොට්ටුව ලකුණෙන් බව අනිද්දා කළ විමසීමකදී පොදුජන පෙරමුණේ සාමාජිකත්වය දරන කැබිනට් අමාත්‍යවරයෙක් කීය. වෙනත් යෝජනාවලට පොදුජන පෙරමුණේ පාක්ෂිකයන්ට එකඟ විය නොහැකි බව ඔහු කීය. සන්ධානයක් ගොඩනැගිය හැකි නමුත්, මැතිවරණයට එම සන්ධානය යටතේ ඉදිරිපත් විය නොහැකි බවද ඔහු කීය.
ඔහු ප‍්‍රකාශ කළේ මේ වනවිටත් ශ‍්‍රීලනිපය ඇතුළු අනෙකුත් පක්ෂවල සාමාජිකයන් පොහොට්ටුව ලකුණෙන් මැතිවරණයට ඉදිරිපත් වීමේ යෝජනාවට කැමැත්තෙන් පසුවන්නේයැයි තමා විශ්වාස කරන බවයි.
මේ වනවිට පුටුව ලකුණ ලියාපදිංචි පක්ෂයක් වන පොදුජන එක්සත් පෙරමුණ සතුව පවතී. එම පක්ෂයේ අයිතිය ඇත්තේ ශ‍්‍රී ලංකා නිදහස් පක්ෂය සතුවය. ජනවාරි 30 වැනිදා පොදුජන එක්සත් පෙරමුණේ විධායක සභාවේ රැුස්වීමක් පැවැත්වීමට නියමිතව තිබුණි. එහිදී පොදුජන එක්සත් පෙරමුණේ ලේකම්ධුරයට ලසන්ත අලගියවන්න මහතා පත්කිරීමේ යෝජනාව අනුමත කරගැනීම, පුටුව ලකුණ අලූතින් බිහිකරන සන්ධානයට ලබාදීමට එකඟ වීම හා පොදුජන එක්සත් පෙරමුණේ නියෝජිත සම්මේලනයක් පැවැත්වීම යන තීන්දු ගැනීමට නියමිතව තිබුණි.
