ණය පොලි ගෙවන්නත් සල්ලි නෑ
රටේ කටයුතු පවත්වාගෙන යෑමට නොහැකි දැඩි මූල්‍ය අර්බුදය හමුවේ චීන සංවර්ධන බැංකුවෙන් ඇමෙරිකානු ඩොලර් මිලියන 1000ක ණය මුදලක් ලබාගැනීමට ආණ්ඩුව තීරණය කර ඇත.
මුදල්, අර්ථික හා ප‍්‍රතිපත්ති සංවර්ධන අමාත්‍යවරයා වශයෙන් අග‍්‍රාමාත්‍ය මහින්ද රාජපක්ෂ චීන සංවර්ධන බැංකුවෙන් ණය ගැනීමට අදාළ කැබිනට් සංදේශය කැබිනට් මණ්ඩලයට යොමුකර ඇත. ඊට ජනවාරි 14 වැනිදා පැවති කැබිනට් මණ්ඩලයේදී අනුමැතිය හිමිවී ඇත.
2020 වර්ෂය සඳහා විදේශ විනිමය කාලීන මූල්‍ය පහසුකමක් ලබාගැනීම යනුවෙන් එම කැබිනට් සංදේශය නම්කර ඇත.
එම ණය ගැනීම සඳහා පසුබිම වශයෙන් දක්වා ඇත්තේ 2020 ජනවාරි සිට අපේ‍්‍රල් දක්වා ණය හා පොලි ආපසු ගෙවීම වෙනුවෙන් ඇමෙරිකානු ඩොලර් මිලියන 1195ක් හා ශ‍්‍රී ලංකා සංවර්ධන බැඳුම්කර ගෙවීමට ඇමෙරිකානු ඩොලර් මිලියන 568ක් අවශ්‍ය වීමත්, රජය විසින් සිදුකරනු ලබන ව්‍යාපෘතිවල ආනයනයන් සඳහා විදේශ මුදල් අවශ්‍යතාවන් පැවතීමත්ය.
මෙම ණය මුදල ගැන සාකච්ඡුා කිරීම සඳහා චීන සංවර්ධන බැංකුවේ ඉහළ පෙළේ නිලධාරී කණ්ඩායමක් ජනවාරි 03 හා 04 දිනවල ශ‍්‍රී ලංකාවේ නිරීක්ෂණ චාරිකාවක නිරතවූ බවද එම නියෝජිත පිරිස ශ‍්‍රී ලංකා රජයේ ඉල්ලීම සලකා බැලීම සඳහා යහපත් ප‍්‍රතිචාර දැක්වූ බවද කැබිනට් සංදේශයේ සඳහන් කර තිබේ.
ශ‍්‍රී ලංකා රජය 2018 වර්ෂයේදී චීන සංවර්ධන බැංකුව සමග ණය ගිවිසුමකට එළැඹී ඇති අතර ඒ යටතේ ඇමෙරිකානු ඩොලර් මිලියන 1000ක ණය පහසුකමක් ලබාගෙන ඇත. කැබිනට් සංදේශයෙන් යෝජනා කර ඇත්තේ එම ණය ගිවිසුමේ සඳහන් ණය ප‍්‍රමාණය ඇමෙරිකානු ඩොලර් මිලියන 2000 දක්වා වැඩිකිරීමට හෝ චීන සංවර්ධන බැංකුව සමග නව ණය ගිවිසුමකට එළඹීමටය.
ඊට අමතරව චීනය සමග ජාතික ජල සම්පාදන හා ජලප‍්‍රවාහන මණ්ඩල ව්‍යාපෘතියක් සඳහා 2017 වර්ෂයේදී එළැඹුණු ඇමෙරිකානු ඩොලර් 242,644,617ක සහන ණය ගිවිසුම චීන යුආන් රෙන්මින්ඩි (ආර්එම්ඞී* මුදල් ඒකකයට පරිවර්තනය කිරීමටත්, චීනය සමග ඇති අනෙකුත් ණය ගිවිසුම් යුආන් රෙන්මින්ඩි මුදල් ඒකකයට පරිවර්තනය කිරීම සඳහාත් එම කැබිනට් සංදේශයෙන් අවසර ඉල්ලා ඇත.
ණය මුදලේ ප‍්‍රමාණය, ණය ලබාගැනීමේ වාර ගණන, කල් පිරීම, මුදල් වර්ගය, පොලි අනුපාතය හා ණය කොන්දේසි තීරණය කිරීම ඇතුළු චීන ණය ගිවිසුම ඉහළ නැංවීම සාකච්ඡුා කර අවසන් කිරීමට කමිටුවක් ස්ථාපිත කර ඇති අතර එම කමිටුවේ සහභාගිත්වය දරන්නේ භාණ්ඩාගාරයේ නියෝජ්‍ය ලේකම් ආර්.එම්.පී. රත්නායකය. සෙසු සාමාජිකයන් වශයෙන් ශ‍්‍රී ලංකා මහ බැංකුවේ සහකාර අධිපති කේ.එම්.එම්. සිරිවර්ධන, භාණ්ඩාගාර මෙහෙයුම් දෙපාර්තමේන්තුවේ අධ්‍යක්ෂ ජෙනරාල් ආර්.එම්.ඒ. රත්නායක, විදේශ සම්පත් දෙපාර්තමේන්තුවේ අධ්‍යක්ෂ ජෙනරාල් ඞී.ඒ.පී. අබේසේකර, රාජ්‍ය ව්‍යාපාර දෙපාර්තමේන්තුවේ අධ්‍යක්ෂ ජෙනරාල් පී.ඒ.එස්. අතුල කුමාර, මූල්‍ය ප‍්‍රතිපත්ති දෙපාර්තමේන්තුවේ අධ්‍යක්ෂ ජෙනරාල් ආචාර්ය කපිල සේනානායක, ශ‍්‍රී ලංකා මහ බැංකුවේ රාජ්‍ය ණය පිළිබඳ සුපරීක්ෂක ආචාර්ය එම්.ඉසෙඞ්. එම්. අසීස්, විදේශ සම්පත් දෙපාර්තමේන්තුවේ අධ්‍යක්ෂ ( ප‍්‍රාග්ධන වෙළඳපල *, එම්.ටී.අයි.ටී. අමරසේකර හා රාජ්‍ය ව්‍යාපාර දෙපාර්තමේන්තුවේ නියෝජ්‍ය අධ්‍යක්ෂ ආර්.ඒ.එල්. උදයකුමාර පත්කර ඇත.
