බුද්ධි අංශ නියාමනය හා බලගැන්වීමේ පනතක් ලෙස නව පනතක් ඉදිරිපත් කිරීමට සැබෑ හේතුව බුද්ධි අංශවල නිලධාරීන් සිදුකරන අපරාධ මුක්තිය ලබාදීම බව අනිද්දාට වාර්තා වේ.
බුද්ධි අංශ නිලධාරීන් කරන ක‍්‍රියා සම්බන්ධයෙන් පරීක්ෂණ කිරීම, පරීක්ෂණ අංශවලින් ගෙන්වා ප‍්‍රශ්න කිරීම, එම නිලධාරීන්ට දඬුවම් කිරීම ආදිය වළැක්වීම සඳහා එම පනත ගෙන එන බව එම පනත පිළිබඳව කළ විමසීමකදී කැබිනට් අමාත්‍යවරයෙක් අනිද්දා වෙත පැවසීය.
ඔහු පෙන්වාදුන්නේ බුද්ධි අංශ නිලධාරීන් අපරාධ ක‍්‍රියාවක් කළද, ඒ පිළිබඳව පරීක්ෂණ පැවැත්වීමට ඇති ඉඩකඩ එම පනතෙන් අහුරා දැමීමට නියමිත බවය.
මීට පෙර ආණ්ඩුව සමයේදී විවිධාකාර අපරාධවල සැකකරුවන් ලෙස බුද්ධි අංශ නිලධාරීන් ගෙන්වා ප‍්‍රශ්න කළ බවත්, එම නිලධාරීන් අත්අඩංගුවට ගත් බවත්, ඒ නිසා නව පනතින් එලෙස ගෙන්වා ප‍්‍රශ්න කළ නොහැකි ලෙස බුද්ධි අංශ නිලධාරීන්ට මුක්තියක් ලබාදෙන බවත් එම ඇමතිවරයා කීය.
ඔහු පසුගිය ආණ්ඩුවේ සිදුකළ පරීක්ෂණ යන්නෙන් අදහස් කර තිබුණේ ලසන්ත වික‍්‍රමතුංග ඝාතනය, ප‍්‍රගීත් එක්නැළිගොඩ අතුරුදන් කිරීම, කීත් නොයාර් පැහැරගෙන ගොස් වධහිංසා සිදු කිරීම, උපාලි තෙන්නකෝන් පැහැරගෙන යෑමට උත්සාහ කිරීම, තරුණයන් 5දෙනෙකු ඇතුළු 11 දෙනෙකු කප්පම් ලබාගැනීම සඳහා පැහැරගෙන ගොස් අතුරුදන් කිරීම ආදි අපරාධ සම්බන්ධයෙන් කළ පරීක්ෂණ පිළිබඳවය.
ඉදිරියේදී බුද්ධි අංශ නිලධාරීන්ගේ ක‍්‍රියා සම්බන්ධයෙන්, ඔවුන්ගේ අනන්‍යතාව විමසීම හෝ ප‍්‍රශ්න කිරීමට ඇති ඉඩකඩ වළක්වන බවද ඔහු කීය.
මීට පෙර ආරක්ෂක අංශ හා පොලිස් නිලධාරීන් කරන කටයුතු සම්බන්ධයෙන් මුක්තිය ලබාදෙන ‘වගකීමෙන් ආරක්ෂා කිරීමේ තාවකාලික විධිවිධාන පනත’ නමින් පනතක් ක‍්‍රියාත්මක වූ අතර ඇමතිවරයා පෙන්වාදුන්නේ ඉදිරිපත් කිරීමට නියමිත පනත ඒ ආකාරයේ පනතක් බවයි.
ඊට අමතරව බුද්ධි අංශවල ක‍්‍රියාකාරීත්වය නැවත ප‍්‍රතිසංවිධානය කිරීමටද පනතෙන් අපේක්ෂා කරන බව ඔහු කීය.
එම පනතට ඇතුළත් වන අනෙකුත් කරුණු පිළිබඳව කැබිනට් මණ්ඩලය තුළ සාකච්ඡුා නොකළ බවත්, ආරක්ෂක අමාත්‍යාංශයේ උපදෙස් පරිදි එම පනත කෙටුම්පත් කරනු ඇති බවත් ඔහු කීය.
මේ වනවිට රජය යටතේ පවතින සියලූ බුද්ධි අංශ ආවරණය වන පරිදි බුද්ධි අංශ නියාමනය හා බලගැන්වීමේ පනතක් හඳුන්වාදීමට කැබිනට් මණ්ඩල අනුමැතිය ලැබී තිබුණේ ජනවාරි 14 වැනිදා පැවති කැබිනට් මණ්ඩල රැුස්වීමේදීය. ඒ සඳහා යෝජනාව ඉදිරිපත් කර තිබුණේ වාරිමාර්ග හා ග‍්‍රාමීය සංවර්ධන, අභ්‍යන්තර වෙළෙඳ ආහාර සුරක්ෂිතතාව හා පාරිභෝගික සුබසාධන අමාත්‍ය හා ආරක්ෂක රාජ්‍ය අමාත්‍ය චමල් රාජපක්ෂය.
