ඉඳුනිල් තුෂාර අමරසේන
එක්සත් ජාතික පක්ෂයේ කුරුණෑගල දිස්ත‍්‍රික් පාර්ලිමේන්තු මන්ත‍්‍රී
ඉදිරි මහමැතිවරණය වෙනුවෙන් කුරුණෑගල දිස්ත‍්‍රික්කයේ දේශපාලනය ගැන ඔබේ අදහස මොකක්ද?
කුරුණෑගල දිස්ත‍්‍රිකකයේ නොවන අය දැන් කුරුණෑගල දිස්ත‍්‍රික්කයට ඇවිල්ලා. හම්බන්තොට රාජපක්ෂවරුන් පිරී ඉතිරී ගිහින්. ඒ නිසා මීට පෙර මැතිවරණයේදී මහින්ද රාජපක්ෂ මහත්මයා කුරුණෑගල දිස්ත‍්‍රික්කයෙන් තරඟ කළා. ඒ අනුව කුරුණෑගල අතිරික්ත රාජපක්ෂවරුන්ගේ දිස්ත‍්‍රික්කය වෙලා. රාජපක්ෂවරුන් කුරුණෑගලින් ඉදිරිපත් වුණාට අපිට නම් කිසිම බලපෑමක් නැහැ. ඒක බලපාන්නේ ඔවුන්ගේම පිළේ අයට. තමන්ගේ දිස්ත‍්‍රික්කය ගැන දැනුමක්, කැක්කුමක් තියෙන මහජන නියෝජිතයෙකුට පාර්ලමේන්තුවට පත්වීමේ අවස්ථාව අහිමි වෙනවා. කුරූණෑගල දිස්ත‍්‍රික්කයේ මහජන නියෝජිතයෝ හැටියට අපි මේ වෙනකොට කුරුණෑගල දිස්ත‍්‍රික්කයේ, මැතිවරණ කොට්ඨාසවලත් දැවැන්ත සංවර්ධනයක් සිදු කරලා තියෙනවා. දිස්ත‍්‍රික්කය පුරා අපි විවිධ සංවර්ධන වැඩසටහන් කරලා තියෙනවා. ඒ නිසා අපට බයක් නෑ.
නමුත් පසුගිය ජනාධිපතිවරණයේදී කුරුණෑගලින් සජිත් පේ‍්‍රමදාස මහතා පරාජය වුණා…
පසුගිය ජනාධිපතිවරණයේදී පරාජය වුණේ ජාතික මට්ටමෙන් ඇතිවෙලා තිබුණු රැුල්ලක් නිසා. එහෙත් ඉතාම ශීඝ‍්‍රයෙන් වර්තමාන ආණ්ඩුව තමන්ගේ සළුපිළි උනා දමමින් ඉන්නවා. ඒ අනුව ජාතික දේශපාලනය පැත්තෙන් ඔවුන් දුර්වල වෙනවා. කුරුණෑගල දිස්ත‍්‍රික්කය කෘෂි කර්මාන්තයෙන් ස්වයං පෝෂිත දිස්ත‍්‍රික්කයක්. පසුගිය ජනාධිපතිවරණය කාලේ ගෝඨාභය රාජපක්ෂ මහත්මයා ගොවි ජනතාවට පොරොන්දු දුන්නා. දේශීය නිෂ්පාදනවලට මුල් තැන දීලා කටයුතු කරන බව කීවා. පොහොර නොමිලේ දෙන බව කීවා. එහෙත් මේ වෙනකොට ගොවි ජනතාවට පොහොර සල්ලිවලට මිලදී ගන්නවත් ක‍්‍රමයක් නැතිවෙලා. දැනටමත් ගොවි ජීවිත කඩාකප්පල් වෙලා.
එසේ කියන්නේ ඇයි?
ගොවීන්ගේ බවබෝග වගා මේ වන විට සම්පූර්ණයෙන්ම ඇනහිටිලා. ඉතිරි වුණ එළවළුවක් සල්ලි දීලා ගන්නත් බැහැ. දැන් එළවළු අහස උසට ගිනි ගණන් ගිහින්. දිස්ත‍්‍රික්කයේ ජීවත්වෙන රජයේ සේවකයෝ මේ වන විට ඉන්නේ කලකිරීමෙන්. ඇත්තටම මේ ඇතැම් ප‍්‍රශ්න ජනාධිපතිවරණයට කලින් ඉඳලාම තිබුණා. ජනාධිපතිවරණයේදී ගෝඨාභය රාජපක්ෂ මහතාට ඡුන්දය දෙන්නත් ඒ ප‍්‍රශ්න හේතු වුණා. එහෙත් ගෙවුණු මාස දෙකේදී ඒ ප‍්‍රශ්න විසඳන්න ආණ්ඩුව කිසිම දෙයක් කළේ නැහැ. ඒ වෙනුවට සංදර්ශන කරමින් හිටියා. දැන් රටේ ජනතාව ආණ්ඩුවේ ක‍්‍රියා කලාපය ගැන කළකිරිලා ඉන්නේ. ඒ නිසා ජනතාව නැවත රාජපක්ෂ කඳවුරට නැවත බලය ලබා දෙන්නේ නැති බවට බරපතළ විශ්වාසයක් අපිට තියෙනවා. එක්සත් ජාතික පක්ෂය කිසිම මොහොතකවත් මැතිවරණවලට භය වුණේ නැහැ. ඒ නිසා ඉදිරි පාර්ලිමේන්තු මැතිවරණයට අපි බොහෝම උනන්දුවෙන් මුහුණ දෙනවා. අපි විශ්වාස කරනවා ජනාධිපතිවරණයේදි ලැබුණු ප‍්‍රතිඵලයට වඩා සම්පූර්ණ වෙනස් ප‍්‍රතිඵලයක් ඉදිරි පාර්ලිමේන්තු මැතිවරණයේදි ලැබේවි කියලා. ජනතාවට යථාස්වභාවය අවබෝධ වෙලා. 2015දීත් ජනාධිපතිවරණයේ ප‍්‍රතිඵලයට වඩා මාස ගණනකින් පැවැත්වූ මහ මැතිවරණයේ ප‍්‍රතිඵලය වෙනස්. අපට කාලය තියෙනවා.
දිස්ත‍්‍රික්කයේ එජාප පාක්ෂිකයන්ගේ බලාපොරොත්තු මොනවාද?
අපි බලාපොරොත්තු වෙන්නේ ඉදිරි මැතිවරණයේදී කරට කර සටනක් දෙන්න. ආසන මට්ටමෙන් අපි ඒකට සංවිධාන කටයුතු කරමින් ඉන්නවා. අපි පෙර මැතිවරණයටත් වඩා ශක්තිමත් ව්‍යාපාරයක් ගෙනියනවා. කුරුණෑගල වුණත් බහුතර එක්සත් ජාතික පාක්ෂිකයින් සජිත් පේ‍්‍රමදාස මැතිතුමාව නායකත්වයට පත්කරමින් පක්ෂයේ ඉදිරි වැඩ කටයුතු කරන්න කියලා අපෙන් ඉල්ලීම් කරනවා. මේ සති කිහිපය තුළ පක්ෂයත්, පාක්ෂිකයිනුත් රැුකෙන විසඳුමක් පක්ෂය තුළ ගැනීමට අපි උත්සාහ කරනවා. ඒ වෙනුවෙන් අපි මන්ත‍්‍රීවරුන් විදියට සටන් කරනවා. දිස්ත‍්‍රික්කයේ පාක්ෂිකයන්ගේ බලාපොරොත්තු ඉෂ්ඨවෙන තීන්දුවකට පක්ෂය යොමු කිරීම සඳහා අපිත් මැදිහත් වෙනවා. යහපත් තීරණයකට පක්ෂය පැමිණෙන බව අපට විශ්වාසයි.
ඔබේ මන්ත‍්‍රී කණ්ඩායම නියෝජනය කරන රන්ජන් රාමනායක මන්ත‍්‍රීවරයාට චෝදනා එල්ලවෙනවා..
රන්ජන් රාමනායක කියන්නේ එක්සත් ජාතික පක්ෂය නෙවෙයි. ඔහු තනි පුද්ගලයෙක්. එක්සත් ජාතික පක්ෂයේ එක් මහජන නියෝජිතයෙක් පමණයි. ඔහු විවිධ අවස්ථාවල පක්ෂයේ අනුමැතිය හෝ අනුදැනුමකින් තොරව විවිධ ප‍්‍රකාශ, මාධ්‍ය සාකච්ඡුා පැවැත්වීම සම්බන්ධයෙන් ප‍්‍රසිද්ධියට පත්ව ඉන්නවා. එක් එක් කෙනාගේ රුචි අරුචිකම් පාර්ලිමේන්තු ආවාට නවත්වන්න බැහැ. විවිධ අයට විවිධ ආසාවල් තියෙනවා. විමල් වීරවංශ මහත්තයාට ආසාවක් තිබුණා වයස වෙනස් කරලා අයිඩෙන්ටිටි කාඞ් හදන්න. එයාට අයිඞී දෙකයි, නෝනාට දෙකයි හැදුවේ ඒ නිසා. විමල් වීරවංශ මහත්තයා අයිඩින්ටිටි දෙකක් හැදුවාට පක්ෂයේ හැමෝම අයිඩෙන්ටිටි දෙක ගාණේ හදන්නේ නැහැ. රන්ජන් රාමනායක මහත්තයා මේ වගේ දේවල් කරනවා කියලා එක්සත් ජාතික පක්ෂයට චෝදනා කිරීම වැරදියි. ඒක පක්ෂයේ අනුදැනුමකින් සිද්ධ වුණ දේවල් නෙවෙයි.
