අපරාධ පරීක්ෂණ දෙපාර්තමේන්තුවේ පොලිස් නිලධාරීන් 704 දෙනකු රටින් පිටවීම තහනම් කළ බව දන්වමින් ගුවන්තොටුපළට නම් ලැයිස්තුවක් යැවීම නිසා තමාගේ මානව හිමකම් උල්ලංඝනය වී ඇතැයි පවසමින් ඊට විරුද්ධව මානව හිමිකම් කොමිසමට පැමිණිලි කළ අපරාධ පරීක්ෂණ දෙපාර්තමේන්තුවේ ජාත්‍යන්තර දිසාව භාර අධ්‍යක්ෂ ලෙස කටයුතු කළ පොලිස් අධිකාරී රංජිත් වෙදසිංහ මාරුකර යවා ඇත.
තමන් කැමති ස්ථානයක ජීවත්වීමට සහ තමන් කැමති තැනකට යාමට ඒමට තිබෙන අයිතියට අදාළ මූලික මානව අයිතිවාසිකම මෙම ක‍්‍රියාව මගින් උල්ලංඝනය වන බවට මෙම පොලිස් නිළධාරියා මානව හිමිකම් කොමිසමට කරන ලද පැමිණිල්ලේ සඳහන් කර ඇත.
ඒ අනුව කිසිම හේතුවක් නොදක්වා මෙම උසස් පොලිස් නිළධාරියා පොලිස් දුක්ගැනවිලි අංශයේ අධ්‍යක්ෂ ලෙස මාරුකර යවා ඇත. ජනවාරි 1 දා ඔහු එම ස්ථානයේ වැඩ භාරගෙන ඇත. මීට අමතරව නියෝජ්‍ය පොලිස්පති රවී සෙනෙවිරත්න, සහකාර පොලිස් අධිකාරී තිසේරා, පොලිස් පරීක්ෂක නිශාන්ත සිල්වා ආදින් සමග සම්බන්ධව පසුගිය කාලයේ නම ගිය අපරාධ පිළිබඳව පරීක්ෂණ මෙහෙයවූ සීඅයිඞීයේ ඉහළ පොලිස් නිලධාරීන් 50දෙනෙකු පමණ වෙනත් පොලිස් ස්ථානවලට මාරු කිරීම සඳහා මූලික කටයුතු සිදුකෙරෙමින් පවතින බවද වාර්තා වේ.
ඉහත කී පැමිණිල්ල පිළිබඳව මානව හිමිකම් කොමිසමේ නිලධාරියෙකුගෙන් අනිද්දා කළ විමසීමකදී ඔහු පැවසුවේ පැමිණිල්ල මේ වන විට පාලන අංශයට යොමු කර ඇති බවත් ඒ සම්බන්ධයෙන් තවමත් කිසිදු පරීක්ෂණයක් ආරම්භ කර නොමැති බවත්ය.
කේ. සංජීව/ හංසි මානවඩු
