එක්සත් ජාතික පක්ෂ මහලේකම් අකිල විරාජ් කාරියවසම්
නව ආණ්ඩුවේ ආරම්භය ගැන දකින්නේ කොහොමද?
අපට පෙනෙන විදියට පටන්ගැනීමම අවුල් සහගතයි. ආණ්ඩුව බලයට පත්වුණේ බොහොම ප‍්‍රගතිශීලී දේවල් කරනවා කියලයි. දේශපාලනිකව පළිගන්නේ නැහැ කියලා ඔවුන් කිව්වා. එහෙත් දැනටමත් පළිගැනීම් කරලා. අධ්‍යාපන අමාත්‍යාංශයේ පත්වීම් පෝෂණ සහකාර සේවකයන් එළියට දාලා. පුරාවිද්‍යා දෙපාර්තමේන්තුවේ වැටුප් ගෙවන්නේ නැහැ අවුරුදු ගාණක් වැඩකරපු අයට. පෙට්‍රෝලියම් එකේ සේවකයන් එළියට දාලා.
ඊට අමතරව මැති ඇමතිවරුන් දඩයම් කරන්න පටන් අරගෙන. අතීතයේ විසඳුණු නඩුවක් නැවත ඇදලා අරගෙන ඒවා සම්බන්ධයෙන් චම්පික රණවක මන්ත‍්‍රීවරයා හිරබාරයට ගත්තා. එහෙත් ඒ අත්අඩංගුවට ගැනීම ආණ්ඩුව නොසිතූ පැත්තට කැරකුණා. අසාධාරණයට එරෙහිව ජන බලවේගය මතුවුණා. ඒ අතර අධිකරණය ඔහුට ඇප නියම කිරීම සතුටට කාරණාවක්. රාජිත සේනාරත්න මහතා පසුපස මේ දවස්වල එළවනවා. ඔය අතරේ ආණ්ඩුව ආර්ථිකය හසුරුවන්නේ කොහොමද කියලා හිතාගන්න බැරිව ඉන්නවා. අද ආර්ථිකය කඩවැටිලා. අපි වැඩිකරපු වැටුප් වර්ධක නොගෙවන්න තීන්දු කරලා තියෙනවා. දීමනා නවත්වලා තියෙනවා. ආණ්ඩුවට සම්බන්ධ ස්වාමීන් වහන්සේලා පවා කියනවා පිටරටවල ඉන්න ලාංකිකයන්ට ආණ්ඩුව ගෙනියන්න උදව් කිරීමට කණකර බඩු ගෙනැල්ලා දෙන්න කියලා. ඔබ අප මේ අත්දකින්නේ මහමැතිවරණයක් එන්නත් කලින්, බලයට පත්වූ විගස ආණ්ඩුවේ ක‍්‍රියාකාරීත්වය.
ඔබ හිතන ආකාරයට ඉදිරියේදී කෙබඳු තත්වයක් ඇතිවේවිද?
අපි ඉතිහාසයේ පළවැනි වතාවට ලක්ෂ 15ක රාජ්‍ය සේවකයන්ට වැටුප් වැඩිකරලා රටේ ආර්ථිකය ගෙනිච්චේ. එහෙත් ඔවුන් අපේ ආණ්ඩුව අවස් කරන්නට එම්සීසී බිල්ලෙක්ව ගෙනාවා. නොයෙකුත් රකුසන් මැව්වා. උපවාස කළා. දැන් ඒ එම්සීසී ගිවිසුමේ සීයට හැත්තෑවක් හොඳයි කියලා තියෙනවා. ගිවිසුම ඉරලා විසිකරනවා කියපු අය කමිටු දාලා තියෙනවා. ඔය තමයි මේ ආණ්ඩුවේ සංදර්ශන සහ සැබෑව පිළිබඳ හොඳම උදාහරණය. එන්න එන්නම මිනිස්සුන්ට ඒවා තේරුම් යනු ඇති. අපි ටොන් මිලියන 10,000ක් වී ගබඩා කරලා තිබුණා. ඒ ටික බෙදාගන්නවත් බැරිවුණා. හාල් මිල ඉහළ ගියා.
ආණ්ඩුව ඇතුළේත් බරපතළ අර්බුද තියෙනවා. මේ තමයි ආණ්ඩුවේ ඇත්ත ස්වරූපය. දැනටමත් මාසයයි ගියේ. පාර්ලිමේන්තු මැතිවරණයක් නියමිතව තිබියදීත් ආර්ථිකය පාලනය කරගන්න බැරි නම්, ප‍්‍රතිවාදීන්ව දඩයම් කරනවා නම්, ඡුන්දය දින්නොත් කරන්නේ මොනවාද කියලා අමුතුවෙන් විග‍්‍රහ කරන්න දෙයක් නැහැ. මේ ආණ්ඩුවේ නායකයන් හරිම බුද්ධිමත් කාර්යශූර පිරිසක් කියලා හිතන අයත් ඇති. ඒ අයට සැබෑ තත්වය වැටහේවි.
එම්සීසී ගිවිසුම අත්සන් කිරීම සඳහා ආණ්ඩුව කාලසීමාව දීර්ඝ කරගෙන තිබෙන බවත් පෙනෙනවා නේද?
එයින් පැහැදිලි වෙන්නේ වෙන කිසිවක් නෙවෙයි. ගිවිසුම අත්සන් කරන්න ආණ්ඩුවට වුවමනාවක් තියෙන බව. කාලය දික් කරලා තියෙන්නේ ඒකයි. ආණ්ඩුව බලයට පත්වෙද්දී කරපු තවත් දෙයක් තමයි ජාතිවාදය ඇවිස්සීම. බොරු විශාල ප‍්‍රමාණයක් කියලා, ජනතාව නොමඟ යැව්වා. ඒ හැම එකකම ඇත්ත නැත්ත දැන් ඔප්පු වෙමින් පවතිනවා. අපි ජනතාවට කියනවා මහ මැතිවරණයේදීවත් ඔවුන්ට අධික බලයක් දීලා මේවා වළපල්ලට ඇදලා දාන්න එපා කියලා. මේ ආණ්ඩුවේ ක‍්‍රියාකාරීත්වය නැවැත්වීමට හෝ පාලනය කිරීමට අපට පාර්ලිමේන්තු මැතිවරණයේදී බලය දෙන්න කියලා.
මේ අතර එක්සත් ජාතික පක්ෂයේ අභ්‍යන්තර ගැටුම් ගැන චෝදනා එල්ලවෙනවා නේද?
අපේ පක්ෂයේ තිබුණු දේවල් සියල්ල අපි ප‍්‍රජාතන්ත‍්‍රවාදීව විසඳාගන්නවා. දැනටමත් පක්ෂයේ ප‍්‍රශ්නවලට විසඳුම් ලැබිලා තියෙනවා. සජිත් පේ‍්‍රමදාස මහතා විපක්ෂ නායක විදියට පත්කළා. අනෙකුත් ඔක්කෝම නායකයන් සාකච්ඡුා කරලා තීන්දු ගත්තා. ඇතුළේ මතවාද තියෙනවා නම් අපි ඒක ඇතුළේ විසඳාගන්නවා. සමහර දේශපාලනඥයන් එළියේ කරන ප‍්‍රකාශවලින් යම් යම් වගකීම් රහිත තත්වයක් ඇතිවෙනවා තමයි. එහෙත් පක්ෂයට හානි ගෙන දෙන ආකාරයේ ප‍්‍රකාශ වළක්වන්න උත්සාහ කරනවා.
එක්සත් ජාතික පක්ෂයේ කෘත්‍යාධිකාරී මණ්ඩලයේ කාලසීමාව දෙසැම්බර් 31 වැනිදායින් අවසන් වෙනවා. එය නැවත පත්කිරීම සහ පක්ෂ නායකත්වය වෙනස්කිරීම ජනවාරි මුල් සති කිහිපයේදීවත් සිදුකළ යුතු බව ඇතැම් අය කියනවා නේද?
සාමාන්‍යයෙන් එවැනි තීන්දු ගැනීම සඳහා පක්ෂ අභ්‍යන්තරයේ ක‍්‍රමවේදයක් තියෙනවා. අපි පක්ෂ නායකත්වය සඳහා පක්ෂ සම්මේලනයේදී රනිල් වික‍්‍රමසිංහ මහතාව පත්කළා. ජනාධිපතිවරණ අපේක්ෂකයා වශයෙන් සජිත් පේ‍්‍රමදාස මහතාවත් පත්කළේ ඒ මොහොතේ. ඒ සුගතදාස ක‍්‍රීඩාංගණයේ පැවති පක්ෂ සම්මේලනයකදී කරපු දෙයක්. එහි වෙනසක් වෙනවා නම් පක්ෂ සම්මේලනයක් කැඳවලා ඒක කළ යුතුයි. පක්ෂ සම්මේලනයක් කැඳවන්නත් ක‍්‍රමවේදයක් තියෙනවා. ඒක නිකන්ම කරන්න පුළුවන්කමක් නෑ. කෘත්‍යාධිකාරී මණ්ඩලය නම් හැම වසරකම දෙසැම්බර් 31 වැනිදායින් පස්සේ පත්කරනවා. ඒක සම්ප‍්‍රදාය සහ ව්‍යවස්ථාවේ තියෙන තත්වය.
ඉදිරි මැතිවරණයට ඉදිරිපත් වෙන ආකාරය ගැන එක්සත් ජාතික පක්ෂය තීන්දු කළාද?
එක්සත් ජාතික පක්ෂය තීරණය කරලා නැහැ. එක්කෝ තනිවම ඉදිරිපත් වෙනවා. නැතිනම් ඔක්කෝම එකඟතාවය මත සන්ධානයකින් ඉදිරිපත් වෙනවා. අපි තවම සාකච්ඡුා කරලා, නෑ.
ඉදිරියේදී ආණ්ඩුව ඉදිරිපත් කරන පනත් ආදියට සහයෝගය දෙනවාද?
අපි ආණ්ඩුවේ ජනවරම අනුව බලය දීලා හොඳ දේවල්වලට සහයෝගය දෙන්න තමයි ස්ථාවරය තියෙන්නේ. යන විදිය බලලා පක්ෂයක් විදියට තීන්දු ගන්නවා. කෙසේවෙතත් කවුරු අණපනත් ගෙනාවත් කටයුතු කරන්න වෙන්නේ පක්ෂයේ බහුතරයේ එකඟතාවය හා කැමැත්ත මත. ඉදිරියේදී ඉදිරිපත් වන පනත් ආදිය සම්බන්ධයෙන් අපි නිරීක්ෂණයෙන් ඉන්නවා. මධ්‍යස්ථව හා ප‍්‍රවේශමෙන් තීන්දු ගන්නවා. අපි දන්නේ නැහැ කෙබඳු පනත් ඉදිරිපත් වේවිද කියලා. ඇතැම් ඒවා පෞද්ගලික මන්ත්රී යෝජනා වෙන්න පුළුවන්. සියල්ල ගැන තීන්දු ගන්නේ බහුතරයේ එකඟතාවය මත.
නැවත වාරාවසාන කිරීමේ උත්සාහයක් තියෙන බව කියනවා නේද?
සමහරවිට ඒගොල්ලන් පාර්ලිමේන්තුව වහන්න උත්සාහ කරයි. ආණ්ඩුවට බහුතරය නැති හින්දා. පාර්ලිමේන්තුව කල් තබමින් ආණ්ඩුව ගෙනියන්න උත්සාහ කරයි.
මේ වෙද්දී වෝහාරික විගණන වාර්තාව එළියට දානවාද නැද්ද කියන එක ගැනත් සංවාදයක් මතුවෙලා නේද?
ආණ්ඩුවේ වගකීමක් තමයි ඒ වාර්තාව එළියට දාන එක. බැඳුම්කර හොරු කියලා හැමදාම අපට කීවා. එහෙම හොරකමක් තියෙනවා නම් වාර්තාව එළියට දාලා ඒ ගැන කටයුතු කරන්න පුළුවන්. ඇත්තටම මේ වාර්තාවෙන් 2002 ඉඳලා බැඳුම්කර ගනුදෙනු සම්බන්ධයෙන් තොරතුරු තියෙනවා. ඒ අනුව අපේ ආණ්ඩුව කාලයේත්, කලින් ආණ්ඩුව කාලයේත් තොරතුරු තමයි එහි තියෙන්නේ. ඒවා ජනතාවට දාන එක බොහොම හොඳයි. අපි ඒ ගැන කැමැත්තෙන් ඉන්නේ.
හිටපු ජනාධිපතිවරයා පත්කරපු වංචා ¥ෂණ විමර්ශන කොමිෂන් වාර්තාවකුත් තියෙනවා නේද?
ඒ වාර්තා ඕනෑ එකක් එළියට දාන්න පුළුවන්. ඒත් ඔවුන් දාන්නේ නැහැ. අපට කරපු චෝදනාවල හිස් බව හෙළිවෙනවා. දේශපාලන පළිගැනීමේ අරමුණෙන් අපට කරනවා නම් වැරදියි. පදනම් සහගතව කරුණු ඉදිරිපත් කරනවා නම් ඒක වෙනම කාරණයක්. මම දැක්කා ඒ කොමිසමේදී ඇත්තටම සොයාබැලූවේ මොනවාද කියලා. කොමිෂන් සභාවට මමත් ගියා. ඒකෙදී ඇහුවේ පාසල් නිල ඇඳුමට වවුචරය දුන්නේ ඇයි, අච්චු පොතට පණිවුඩයක් දැම්මේ ඇයි කියලා. ඇතැම් දේවල් ඒ විදියටම ඉතිහාසයේත් කරලා තියෙන දේවල්. අනෙක වවුචරය මේ ආණ්ඩුවෙනුත් ක‍්‍රියාත්මක කළා. ඒත් ඒවා ගැන කරපු විමර්ශන වෙනුවෙන් අපි දවස් ගණන් රස්තියාදු වුණා. අපේ ආණ්ඩුවේ කවුරු හරි වැරැුද්දක් කරලා තියෙනවා නම් ඇත්ත වශයෙන්ම දඬුවම් කරන්න. තනතුරු තියෙන අයව ඉලක්ක කරන්න බලාපොරොත්තු වෙනවා නම් ඒක පිළිකුලට ලක්වෙන කාරණයක්.
