ඉදිරි මහමැතිවරණයට පෙර එක්සත් ජාතික පක්ෂ නායකත්වයෙන් ඉවත් නොවී, ඉදිරියටත් පක්ෂ නායකත්වයේ රැුඳී සිටීමට එජාප නායක රනිල් වික‍්‍රමසිංහ මහතා තීන්දු කර ඇති බවත්, ඔහුගේ සමීප මිත‍්‍රයන්ගේ ඉල්ලීම මත රනිල් වික‍්‍රමසිංහ මහතා එම තීන්දුව ගෙන ඇති බවත් රනිල් වික‍්‍රමසිංහ මහතාට සමීප ආරංචි මාර්ග පවසයි.
පසුගිය ඔක්තෝබර් 03 වැනිදා සුගතදාස ගෘහස්ථ ක‍්‍රීඩාංගණයේ පැවති එජාප පක්ෂ සම්මේලනයේදී ඉදිරි වසර තුනක කාලයක් සඳහා එක්සත් ජාතික පක්ෂයේ නායකත්වයට රනිල් වික‍්‍රමසිංහ මහතා තෝරා පත් කරගෙන තිබුණි. ඒ අනුව ඔහු පක්ෂ නායකත්වයෙන් ඉවත් වීමට තීන්දු කළහොත් හෝ විශේෂ පක්ෂ සම්මේලනයක් කැඳවා නව පක්ෂ නායකයෙකු තෝරා ගතහොත් මිස රනිල් වික‍්‍රමසිංහ මහතා පක්ෂ නායකත්වයෙන් ඉවත් කළ නොහැකිය.
රනිල් වික‍්‍රමසිංහ මහතා පක්ෂ නායකත්වයෙන් ඉවත් වී සජිත් පේ‍්‍රමදාස මහතාට නායකත්වය ලබාදිය යුතු බව ජනාධිපතිවරණයෙන් පසු කාලසීමාවේදී එජාප සජිත් පේ‍්‍රමදාස පාර්ශ්වය ඉල්ලා සිටියත් එම ඉල්ලීම ප‍්‍රතික්ෂේප කරමින්, ඉදිරියටත් පක්ෂ නායකත්වයේ රැුඳී සිටීමට වික‍්‍රමසිංහ මහතා තීන්දු කර තිබේ.
එක්සත් ජාතික පක්ෂයේ සම්මේලනයක් කැඳවීමේ බලය ඇත්තේ පක්ෂයේ කෘත්‍යාධිකාරී මණ්ඩලයටය. දැනට පවතින කෘත්‍යාධිකාරී මණ්ඩලයේ කාලසීමාව 2019 දෙසැම්බර් 31 වැනිදායින් අවසන් වන අතර නව කෘත්‍යාධිකාරී මණ්ඩලයක් පත්කරගැනීම 2020 ජනවාරි අග දක්වා ප‍්‍රමාද වනු ඇතැයි පක්ෂයේ ආරංචිමාර්ග පවසයි. ඒ අනුව ඉදිරි මහමැතිවරණයට පෙර පක්ෂ නායකත්වය වෙනස් කරගැනීමට කාලවේලාව තිබේදැයි සැක සහිත බව එම ආරංචි මාර්ග පවසයි.
දෙසැම්බර් 31 වැනිදා වත්මන් කෘත්‍යාධිකාරී මණ්ඩලයේ කාලසීමාව අවසන් වීමට පෙර එය රැුස් කොට, පක්ෂයේ නායකත්වය වෙනස් කිරීම සඳහා අවශ්‍ය මූලික පියවර ගන්නා ලෙස මීට පෙර ලිඛිතව හා වාචිකව සජිත් පේ‍්‍රමදාස පාර්ශ්වය ඉල්ලා තිබුණි. එහෙත් එම ඉල්ලීම ඉටු නොකර දෙසැම්බර් අවසාන සතියේ රනිල් වික‍්‍රමසිංහ මහතා විදේශගත වී තිබුණි.
එක්සත් ජාතික පක්ෂ මහලේකම් අකිල විරාජ් කාරියවසම් සමඟ කරන ලද සම්මුඛ සාකච්ඡුාවකදී එක්සත් ජාතික පක්ෂයේ නායකත්වය හා කෘත්‍යාධිකාරී මණ්ඩලය පිළිබඳව විමසූ විට ඔහු ප‍්‍රකාශ කළේ රනිල් වික‍්‍රමසිංහ මහතා වසර තුනක කාලයකට පක්ෂ නායකත්වයට පත්කර ඇති බවයි. සජිත් පේ‍්‍රමදාස මහතාට විපක්ෂ නායකත්වය ලබාදුන් බවත්, ඒ අනුව පක්ෂයේ අභ්‍යන්තර අර්බුදය විසඳාගෙන ඇති බවත් ඔහු කීය.
අනිද්දා සමග නිර්නාමිකව සිටීමට කැමැත්තෙන් අදහස් දැක්වූ සජිත් පේ‍්‍රමදාස පිළේ ප‍්‍රබල මන්ත‍්‍රීවරයෙකු ප‍්‍රකාශ කළේ රනිල් වික‍්‍රමසිංහ මහතා පක්ෂ නායකත්වය අත්හරිනු ඇතැයි කිසිදු බලාපොරොත්තුවක් නැති නමුත් ජනවාරි මාසය අවසාන වනතුරු පක්ෂ නායකත්වය ලබාගැනීම සඳහා බලපෑම් කිරීමට තම කණ්ඩායම බලාපොරොත්තු වන බවයි. එය අසාර්ථක වුවහොත් වෙනත් පක්ෂයක් පිහිටුවාගැනීමේ යෝජනාව පිළිබඳව සලකා බලන්නට සිදුවන බව ඔහු කීය.
