ජාතික පාසල් සංඛ්‍යාව 1000 දක්වා ඉහළ නැංවීමට රජය ගෙන ඇතැයි කියන තීන්දුවෙන් සිදුවන්නේ කුඩා පාසල් සංවර්ධනය අඩපණ වීම බවත් එමනිසා එම තීන්දුවට සිය සංගමය දැඩි විරෝධය පලකරන බවත් ලංකා ගුරු සංගමයේ ප‍්‍රධාන ලේකම් ජෝසෆ් ස්ටාලින් මහතා පැවසීය.
එක පන්තියක සිසුන් දහයකට අඩු ප‍්‍රමාණයක් සිටින පාසල් 3000ක් පමණ ලංකාවේ ඇති බවත්, කළයුත්තේ ඒවාට සම්පතච් ලබාදී සංවර්ධනය කර ඒවායේ ඉගෙනුම ලබන ළමයින්ට හොඳ අධ්‍යාපනයක් ලබාගැනීමට පහසුකම් සැලසීම බවත් ජෝසෆ් ස්ටාලින් මහතා පෙන්වාදුන්නේය.
දැනට පවතින ජාතික පාසල් සංඛ්‍යාව 350ක පමණ වන අතර, එය 1000 දක්වා වැඩිකරන බව අධ්‍යාපන අමාත්‍ය ඩලස් අලහප්පෙරුම මහතා කැබිනට් තීරණ දැනුම්දීමේ මාධ්‍ය හමුවේදී ප‍්‍රකාශ කර තිබේ. මේ තීන්දුව සම්බන්ධයෙන් කැබිනට් මණ්ඩල එකඟතාවය ලබාදුන් බවද ඔහු එහිදී වැඩිදුරටත් පැවසීය. අදාල පාසල් හඳුනාගැනීම සඳහා තාක්ෂණික කමිටුවක් ස්ථාපනය කර ඇති බවද ඔහු ප‍්‍රකාශ කර තිබේ.
