හතුරුසිංහ බඳවාගැනීමේ ක‍්‍රිකට් වියවුල

ශ‍්‍රී ලංකා ක‍්‍රිකට් ආයතනය 2019 ජුනි මාසය වෙද්දී දැනට තාවකාලික වැඩ තහනමකට ලක්ව සිටින ශ‍්‍රී ලංකා ක‍්‍රිකට් හිටපු ප‍්‍රධාන පුහුණුකරු චන්දික හතුරුසිංහ මහතා වෙත ගෙවා තිබුණු මුදල රුපියල් 153,519,792කි. එනම් මිලියන 153කට වැඩි මුදලකි. තනි පුද්ගලයෙකුගේ රැුකියාවක් ගැන කතාවක් වුව ශ‍්‍රී ලංකා ක‍්‍රිකට්හි ප‍්‍රධාන පුහුණුකරුවා ගැන කතාවක් ජාතික වැදගත්කමක් ඇති මාතෘකාවක් වන්නේ එම මූල්‍යමය වටිනාකම නිසා පමණක් නොවේ.

අපගේ ක‍්‍රිකට් කණ්ඩායම 2019 මුල් කාලසීමාව දක්වා හතුරුසිංහ මහතාගේ පුහුණුකාරීත්වය යටතේ ලැබූ ජයග‍්‍රහණ හා පරාජයන් සංඛ්‍යාව ගැන සැලකිල්ලට ගත හැකිය. ටෙස්ට් ජයග‍්‍රහණ 6කි. පරාජයන් 7කි. (දකුණු අප‍්‍රිකාවේදී ඓතිහාසික ජයග‍්‍රහණයක් ශ‍්‍රී ලංකාව ලැබූ බවත්, ඒ ජයග‍්‍රහණය ලැබුවේ කෝච් වෙනුවෙන් බවත් ක‍්‍රිකට් කණ්ඩායමේ ක‍්‍රීඩකයෙකු කණ්ඩායමේ අභ්‍යන්තර සාකච්ඡුාවකදී කියූ බවත් අමතක කළ යුතු නැත.* කෙසේ වෙතත් එක්දින තරග 10ක් ජයගනිද්දී පරාජයන් 22කට මුහුණදෙන්නට සිදුවිය. මීට පෙර එක්දින ශ්‍රේණිගත කිරීම්වල අංක එකේ සිටියත් ඔහු යටතේ ශ‍්‍රී ලංකාව විස්සයි විස්ස ජයග‍්‍රහණ 4ක් ලබද්දී පරාජයන් 10ක් ලැබීය. වරද පුහුණුකරු අත පමණක් බව අප නම් කියන්නේ නැත.

එහෙත් ඔහු බඳවාගැනීම ගැන ප‍්‍රශ්න කරන්නට පටන්ගත්තේ ඉහත කී කාර්යසාධනය පිළිබඳ ගැටලූ නිසා බව පැහැදිලිි කාරණයකි.
රාජ්‍යයක් ලෙස ශ‍්‍රී ලංකාව සතු වටිනාම සම්පතක් ලෙස ශ‍්‍රී ලංකා ජාතික ක‍්‍රිකට් කණ්ඩායම ප‍්‍රමුඛ ක‍්‍රිකට් ක‍්‍රීඩාව හැඳින්විය හැකිය. ක‍්‍රිකට් කණ්ඩායම ජාත්‍යන්තර වශයෙන් අප රටට අත්පත් කරදෙන කීර්තිය අනිවාර්යයෙන්ම මුදල් බවට පවා පත්වේ. සියල්ලට වඩා අපට වටින්නේ ජාතියක් ලෙස එයින් අපට ලැබෙන ගෞරවය, අභිමානය හා ජයග‍්‍රාහී හැඟීමයි. අනිවාර්යයෙන්ම ශ‍්‍රී ලංකා ක‍්‍රිකට් කණ්ඩායම ලබන ජයග‍්‍රහණ හෝ පරාජයන් රටේම මානසිකත්වය තීරණය කරනවා පමණක් නොව ආණ්ඩුවේ සාර්ථක අසාර්ථකභාවය පිළිබඳ තක්සේරු කරන මාධ්‍යයක් ලෙසත් අප කැමති වුණත් අකැමති වුණත් පුරවැසියන් පාවිච්චි කරනු ඇත. ශ‍්‍රී ලංකාවේ ක‍්‍රිකට් ප‍්‍රවර්ධනය කිරීම සහ වැඩි වැඩියෙන් ජයග‍්‍රහණ ලබන තැනට පත්කිරිමේ වගකීම පැවරී ඇත්තේ ශ‍්‍රී ලංකා ක‍්‍රිකට් ආයතනයටයි. ඒ නිසා ශ‍්‍රී ලංකා ක‍්‍රිකට් ආයතනයට පුරවැසියන්ගේ අවධානය යොමුවීම වැදගත්ය.

ශ‍්‍රී ලංකා ක‍්‍රිකට් ගැන ජනාධිපතිවරණයට පෙර විගණකාධිපති දෙපාර්තමේන්තුව වාර්තාවක් ඉදිරිපත් කර තිබුණි. එය පරිච්ෙඡ්ද හයකින් සමන්විත විය. අපි මීට පෙර එහි පරිච්ෙඡ්ද දෙකක් ගැන කතාකළෙමු. එකක් ක‍්‍රිකට් ඒඞ් ආයතනය ගැනය. අනෙක ක‍්‍රිකට් විශ්වවිද්‍යාලයක් ගැනය. මෙහි අප කතාකරන්නේ ශ‍්‍රී ලංකා ක‍්‍රිකට් වෙත නව පුහුණුකරුවෙකු බඳවාගැනීමේදී සිදුවූ අක‍්‍රමිකතාව ගැනයි. ආන්දෝලනාත්මක චන්දික හතුරුසිංහ බඳවාගැනීමේ කතාව ගැනයි.
අපේ කලාපයේ මිනිසුන් අතර යම්කිසි විශේෂ හැකියාවක් ඇති තනි පුද්ගලයෙකු පැමිණ තමන් ගලවාගනු ඇතැයි දැඩි විශ්වාසයකින් සිටින අවස්ථා බොහෝය. සාමූහික ක‍්‍රියාකාරකම් වෙනුවට තනි පුද්ගල විජ්ජා විශ්වාස කරන්නට අප කැමතිය. බංග්ලාදේශ ක‍්‍රිකට් පසුගිය වසර දහයක් පමණ තිස්සේ නැගී එද්දී, එම නැග්මෙහි වැඩි කාලසීමාවක් බංග්ලාදේශ පුහුණුකරු ලෙස කටයුතු කළ චන්දික හතුරුසිංහගේ තනි පුද්ගල විජ්ජාවක් ලෙස ඇතැමුන් විග‍්‍රහ කරගත් බව පෙනුණි. ඒ නිසාම හතුරුසිංහ වැනි වැඩකාරයන්ගෙන් සේවය නොගන්නා බවට ශ‍්‍රී ලංකා ක‍්‍රිකට්වලට එකල රසිකයන්ගෙන් චෝදනා එල්ලවිය. අද මාධ්‍යවලින් පතුරු ගැසුවද එදා මාධ්‍යවලට හතුරුසිංහ මහතා වීරයෙක් විය. ශ‍්‍රී ලංකා ක‍්‍රිකට්වලට පුහුණුකරුවෙක් බඳවාගැනීම සිදුවුණේ එවැනි පසුබිමකය.

බඳවාගැනීම් ක‍්‍රමවේදය

ශ‍්‍රී ලංකා ක‍්‍රිකට් ආයතනයට පුහුණුකරුවන් බඳවා ගැනීමේදී අනුගමනය කළ යුතු විධිමත් ක‍්‍රමවේදයක් නැත. මෙම විගණකාධිපති වාර්තාව පෙන්වාදෙන ඉතාම වැදගත් සහ මූලිකම කාරණයක් වන්නේ එයයි. නිසි වැටුපක් නැත, නිසි තෝරාගැනීම් ක‍්‍රමවේදයක් නැත, මීට පෙර බඳවාගත් අය ගැනත් ඔවුන්ගේ කාර්යසාධනය ගැනත් විධිමත් වාර්තා ගොනුවක් නැත. දැන් සිටින පුහුණුකරුවන් ගැනත් කාර්යසාධනයක් නැත. කාර්යසාධනය සහ ලකුණු ලබාදීම සඳහා ක‍්‍රමවේද ඇතත් ඒ ක‍්‍රමවේද පාවිච්චි කර නැත. ජාතික පුහුණුකරුවන් බඳවාගැනීම හිතූ හිතූ හැටියට කරන දෙයක් බවට පත්ව ඇත. මෙම විගණකාධිපති වාර්තාව ඇසුරෙන් රජය ගත යුතු වැදගත්ම පියවර වන්නේ ඒ පිළිබඳ නිසි නීති සහ ක‍්‍රමවේද සැකසීමයි.

චන්දික හතුරුසිංහ මහතා බඳවාගන්නට පෙර ශ‍්‍රී ලංකාවේ ක‍්‍රිකට් පුහුණුකරුවෝ තිදෙනෙක් සිටියෝය. මාවන් අතපත්තු මහතා 2015 ඔක්තෝබර් 01 වැනිදා ඉල්ලා අස්විය. ඉන්පසු ග්‍රෙහෑම් ෆෝඞ් මහතා පත්විය. ඔහු සමඟ ගිවිසුම් අත්සන් කර තිබුණේ 2019 වර්ෂයේ අග භාගය දක්වා දීර්ඝ කාලයකටය. එහෙත් ඊට පෙර ෆෝඞ් මහතා ඉල්ලා අස්විය. හිස්වූ තනතුරට ශ‍්‍රී ලංකාවේ පන්දු රැුකීමේ පුහුණුකරුවා ලෙස කටයුතු කළ නිකලස් පොතාස් මහතා පත්කර තිබුණි. ඒ 2017 නොවැම්බර් මාසයේය. ඉන්පසුව බඳවාගත් පුහුණුකරු වන්නේ උපුල් චන්දික හතුරුසිංහය. 2018 දෙසැම්බර් 19 වැනිදා සිට ඔහු බඳවාගෙන තිබුණි.

චන්දික හතුරුසිංහ මහතා බඳවාගැනීමට පෙර තත්වය පැහැදිලිි කරමින් ශ‍්‍රී ලංකා ක‍්‍රිකට් ආයතනය කියා ඇත්තේ මීට පෙර ග්‍රෙහෑම් ෆෝඞ් මහතා ඉවත් කිරීමෙන් පසුව ශ‍්‍රී ලංකා ක‍්‍රිකට් ආයතනයට පුහුණුකරුවෙකු ලෙස කෙනෙකු බඳවාගැනීම අසීරු කරුණක්ව තිබුණු බවයි. චන්දික හතුරුසිංහ මහතා කණ්ඩායම බාරගැනීමට කැමති වී තිබුණේ එවැනි පසුබිමකය.

සාමාන්‍යයෙන් ශ‍්‍රී ලංකා ක‍්‍රිකට් ආයතනයේ ප‍්‍රධාන නිලධාරීන් බඳවාගැනීම ඇතුළුව ක‍්‍රිකට් ආයතනයට අදාල වැදගත් තීන්දු සියල්ලම ගනිද්දී එම ආයතනයේ විධායක කමිටුවේ අනුමැතියට ලක් කිරීම වැදගත් කාරණයකි. පුදුම සහගත කාරණය වන්නේ ප‍්‍රධාන පුහුණුකරුවා බඳවාගැනීම ගැන විධායක කමිටුවේ අනුමැතියක් ලබා නොතිබීමයි. ශ‍්‍රී ලංකා ක‍්‍රිකට් ආයතනය කියන්නේ, පුහුණුකරුවාගේ වැටුප ආදි තොරතුරු මාධ්‍යවලට නිරාවරණය වීමේ අවදානමක් ඇති නිසා එසේ අනුමැතිය ලබා නොගන්නා බවයි. එපමණක් නොව චන්දික හතුරුසිංහ මහතාට ලබාදෙන වැටුප ගැන සාකච්ඡුා කළේ කෙලෙසද, ඒ වැටුප තීරණය කළේ කෙලෙසද යන කාරණා ගැන ක‍්‍රිකට්හි ප‍්‍රධාන විධායක නිලධාරියා දන්නේත් නැත. ඒ ගැන දන්නේ ක‍්‍රිකට් උප සභාපතිවරයා ඇතුළු එහි දේශපාලන අධිකාරියයි.

ගිිවිසුමේ කරුණු

හතුරුසිංහ මහතා 2018 ජනවාරි පළවැනිදා සිට 2020 දෙසැම්බර් 31 දක්වා මාස 36කට ගිවිසුම්ගතවී තිබුණි. කෙසේ වෙතත් ඔහු 2017 දෙසැම්බර් 19 වැනිදා සිට ශ‍්‍රී ලංකාවට පැමිණ තිබුණි. ගිවිසුම අනුව චන්දික හතුරුසිංහ මහතාට තිබුණු පහසුකම් මෙසේය.
මාසික වැටුප ඇමෙරිකානු ඩොලර් 20,000 ක් විය. ඒ අනුව ගිවිසුම්ගත මාස තිස් හය සඳහා ඇමරිකානු ඩොලර් 720,000 කට හිමිකම් ලබා තිබුණි. මෙතරම් මුදලක ආදායමක් ලබද්දී, අනිවාර්යයෙන් බදු ගෙවීම්වලට යටත්විය යුතුය. කෙසේ වෙතත් බදු අඩු කරන්නේ සීයට 16ක් දක්වා පමණක් බව ගිවිසුමේ ඇත. ලංකාවේ නීතිය අනුව සීයට 16ට වඩා බදු නියම වුණොත් එය හතුරුසිංහ මහතා ගෙවන්නට ඕනෑ නැත. බදු වැඩිවුණොත් ක‍්‍රිකට් ආයතනය ගෙවනු ඇත. ඒ නිසා අඩුම තරමේ මසකට ඩොලර් 16,800ක් වැටුප ලෙස හිමිවෙයි.

ඒ වැටුප පමණි. හතුරුසිංහ මහතාගේ ඕස්ටේ‍්‍රලියානු පුරවැසියෙකු වූ නිසාත්, ඔහුගේ ස්ථීර ලිපිනය ලෙස ඕස්ටේ‍්‍රලියානු ලිපිනයක් තිබුණු නිසාත් නිල වශයෙන් ඔහුව ඕස්ටේ‍්‍රලියානුවකු ලෙස සලකමින් ගිවිසුම අත්සන් කර තිබුණි. ඒ අනුව ලංකාවේ නතරවෙන මේ ඕස්ටේ‍්‍රලියානුවාට මාසිකව ජීවන වියදම් දීමනාව ලෙස ඇමරිකානු ඩොලර් 10,000 ක් ගෙවීමට එකඟ වී තිබුණි.

ඊට අමතරව අර්ධ වාර්ෂිකව ඩොලර් 60,000 බැගින් වසරකට ඩොලර් 120,000ක් ගෙවන්නටද ගිවිසුමෙන් එකඟ වී ඇත. ඒ අනුව එම මුදල 2018,19 හා 20 වසරවලදී ලැබෙන්නට නියමිතව තිබුණි. එම ගෙවීම බදු රහිත එකකි.

ඒවායින් දීමනා නතර වෙන්නේ නැත. යම් විදේශ සංචාරයකදී ව්‍යාපාර පන්තියේ ගුවන්යානා සහ නවාතැන් පහසුකම් හිමිවෙයි. අන්තර්ජාල පහසුකම් ආදි සියල්ල ලැබේ. ඊට අමතරව විදේශ සංචාර සඳහා දිනකට ඇමෙරිකන් ඩොලර් 50ක දීමනාවක් හිමිවේ.
පුහුණුකරුට හා ළඟම පවුලේ සාමාජිකයන්ට ගුවන් ගමන් වියදම් බිල්පත් සඳහා වසරකට ඇමෙරිකානු ඩොලර් 20,000 දීමනාවක හිමිකම් ලැබේ. ඒ අනුව විදේශ සංචාරයක යෙදී, ගුවන් ගමන් බලපත‍්‍ර ඉදිරිපත් කොට එම මුදල්ද ලබාගත හැකිය.

ඉන්ධන දීමනාව සහිතව ක‍්‍රිකට් ආයතනය නඩත්තු කරන මෝටර් රථයක් ලබාදීමටත්, ජංගම ¥රකථනයක් සහ මාසිකව රුපියල් 5000ක් ලබාදීමටත්, ලැප්ටොප් පරිගණකයක්ද ලබාදීමට ගිවිසුමෙන් එකඟ වී ඇත. අප මුලින්ම කී රුපියල් මිලියන 153,519,792ක සමස්ත මුදල ගෙවා ඇත්තේ මුලින්ම කී දීමනා ලෙසය.

ඒ දීමනාවලට අමතරව ක‍්‍රිකට් ආයතනය පුහුණුකරු වෙනුවෙන් වියදම් රැුසක් දරා තිබුණි. මුලින්ම ඔහුට ලංකාවට පැමිණීම සඳහා රුපියල් ලක්ෂ හතක් වියදම් කර තිබුණි. ඔහු වෙනුවෙන් ටොයොටා ඇක්සියෝ මෝටර් රියක බදු කුලිය ලෙස මිලියනයකට වැඩි මුදලක් ගෙවා තිබුණි. තවත් ජීප් රථයකටත්, ලැප්ටොප් පරිගණකයකටත්, ¥රකථනයකටත් මුදල් ලක්ෂ ගණන් දරා තිබුණි.

මේ තනතුර කෙතරම් ඉහළ මිලක් සහිත තනතුරක්ද යන්න වටහාගැනීමට ඉහත කී තොරතුරු වැදගත්ය. ඒ මිලටත් වඩා අපට වටින්නේ තනතුරට ලැබෙන වගකීමය. ඒ සියල්ල සලකද්දී තනතුරට පුද්ගලයෙක්ව තෝරාගැනීම කෙතරම් බරපතල කටයුත්තක්ද යන්න පැහැදිළි කාරණයකි. සූදු කෙළිනවා මෙන් කවුරුන් හෝ සොයාගෙන අවුරුදු කිහිපයකට ගිවිසුම් අත්සන් කර බලමු යැයි කීම කළ වගකීම් විරහිත වැඩකි. සිතූ විදියට වැඬේ වුණේ නැතැයි කීම කළ නොහැක්කකි. චන්දික හතුරුසිංහ මහතා බඳවාගැනීමේදී ගැටලූව ඇත්තේ එතැනය. සාමාන්‍ය ක‍්‍රිකට් රසිකයන් එකල හතුරුසිංහ වීරයෙකු කරගැනීම වෙනම තත්වයකි. ක‍්‍රිකට් ආයතනයට එලෙස අන්ධානුකරණයෙන් කටයුතු කළ නොහැකිය. ඔහු බඳවාගැනීමේදී අනුගමය කළ විධිමත් පියවරක් තිබිය යුතු විය. එහෙත් මෙතැන එවැනි කිසිදු විධිමත් පියවරක් හෝ ක‍්‍රමවේදයක් නැත. හතුරුසිංහ අපට ගැළපෙන්නේ ඇයිද කියා තක්සේරුවක්වත් නොවීය. විධායක කමිටුව සම්බන්ධ වූ සාකච්ඡුාවක්වත් ඔහු බඳවාගැනීමට කර තිබුණේ නැත. ගිවිසුමේ නීත්‍යානුකූලභාවය හා විධිමත්භාවය ගැනත් පරීක්ෂා කර තිබුණේ නැත. තනි පුද්ගලයෙකු වෙනුවෙන් විශේෂයෙන්ම ගිවිසුමක් අත්සන් කරන මොහොතක ආයතනයක් ඒ ගැන විශේෂයෙන් සැලකිලිමත් වීම වැදගත් කාරණයකි. අන්තිමේ හතුරුසිංහ ඉවත් කිරීමට ඕනෑ වූ මොහොතේ දැවැන්ත අර්බුදයක් ඇතිවුණේත්, වැටුප් ගෙවමින් ඔහුව නිකන්ම සේවයේ තබාගැනීමට සිදුවුණේත් එවැනි පසුබිමකය.

අනෙක් අතට හතුරුසිංහ මහතාට ඉහත පහසුකම් ලබාදීම සඳහා එකඟ වී තිබුණේ ඔහු සමඟ කුමන සාකච්ඡුා කිරිමෙන් පසුවද, ඔහු බංග්ලාදේශයේදී ලබමින් සිටි පහසුකම් ආදි කාරණා මොනවාද යන්න පිළිබඳව විධිමත් සොයාබැලීමක් සිදුවී තිබුණේ නැත. ශ‍්‍රී ලංකා ක‍්‍රිකට් ආයතනය මේ පිළිබඳව පැහැදිලි කරමින් කියා ඇත්තේ ජාතික ක‍්‍රිකට් පුහුණුකරුවන් සඳහා සුදුසුකම් ඇති අය ඉන්නේ අතොලොස්සක් බැවින්, එම තනතුරට තෝරා පත් කරගැනීමේදී තනි පුද්ගලයන් සොයායෑමේ ක‍්‍රමවේදය පාවිච්චි කරන බවයි. ඒ අනුව ඒ ඒ පුද්ගලයා සමඟ විශේෂයෙන් සාකච්ඡුා කිරීම, එක් එක් පුද්ගලයාට විවිධ මට්ටමේ වැටුප් ගෙවීම, ඇතැම් පුද්ගලයන් සුවිශේෂ ලෙස සලකමින් ඉතාම ඉහළ මිලක් ගෙවීම ආදි දේවල් සිදුවිය හැකිය. ඒ අනුව ගෙවන මුදල ආදි සියල්ල පුද්ගල දක්ෂතාවට අනුව වෙනස් වෙයි. එහෙත් එසේ වූ පළියට ඕනෑම කෙනෙකු ඕනෑම මුදලක් ගෙවා බඳවාගන්නට නිදහසක් ලැබෙන්නේ නැත. එවැනි බඳවාගැනීමකට වුව වගවීමක් තිබිය යුතුය. අහවලා බඳවාගත්තේ කුමන පදනමක් මතදැයි විමසද්දී පිළිතුරු දීමේ හැකියාවක් තිබිය යුතුය. හතුරුසිංහ බඳවාගනිද්දීත්, ඔහුට අසීමිත පහසුකම් ලබාදෙද්දීත් එවැනි විධිමත් පදනමක් තිබී නැත.

දැන් තත්වය

ලෝක කුසලානයේදී ශ‍්‍රී ලංකාව ලැබූ පරාජයන් හේතුවෙන් පසුගිය කාලයේදී චෝදනා පත‍්‍රයක් ඉදිරිපත් කොට හතුරුසිංහ මහතාට එරෙහිව ශ‍්‍රී ලංකා ක‍්‍රිකට් ආයතනය පරීක්ෂණයක් ආරම්භ කර තිබුණි. ඔහුගේ වැඩ තහනම් කර තිබුණි. කෙසේ වෙතත් හතුරුසිංහ මහතා තමාට ඇති චෝදනා ප‍්‍රතික්ෂේප කර තිබුණි.

වත්මන් තත්වයට පසුබිම සැකසෙන්නේ ඔහුගේ ගිවිසුමේ ඇති අර්බුද නිසාය. මෙම ගිවිසුම සාපේක්ෂව පුහුණුකරුට ඉතාම වාසිදායක ආකාරයට සකසා ඇති බව විගණකාධිපති දෙපාර්තමේන්තුව පැහැදිලිව පෙන්වාදෙයි. විශේෂයෙන්ම ගිවිසුමේ කොන්දේසි කඩකිරීමක් හේතුවෙන් හතුරුසිංහ මහතා ඉවත් කිරීමට සිදුවුණත් ඔහුට වසරක වැටුප් සහ ගිවිසුමේ ඉතිරි කාලයට අදාල වැටුප හෝ ගෙවීමට එකඟ වී තිබුණි. ඉවත් කිරීමට අදාලව ගිවිසුමේ නිසි කරුණු දැක්වීම් නැත. මේ වෙද්දී හතුරුසිංහ මහතා ඉල්ලමින් සිටින්නේ ඒ අයිතීන්ය. ඔහුට එරෙහිව ශ‍්‍රී ලංකා ක‍්‍රිකට් ආයතනය පරීක්ෂණයක් සිදු කළත්, ඔහු ඉවත් කළ පසු අඩුම තරමේ වසරක වැටුප් ගෙවන්නට සිදුවෙයි. මේ වෙද්දී හතුරුසිංහ මහතා ශ‍්‍රී ලංකා ක‍්‍රිකට් ආයතනයට එරෙහිව නඩු පවරන්නට සූදානමකින් සිටින බවද මාධ්‍ය වාර්තා කර ඇත. එමෙන්ම ඔහු තමන්ට ඇති චෝදනා ප‍්‍රතික්ෂේප කරමින් සිටී.

ඔහුගේ කාර්යසාධනය ගැන නිසියාකාරව පෙන්වාදෙමින් ඔහු ඉවත් කිරීමට නොහැකි වී ඇත්තේ ගිවිසුම අත්සන් කිරීමේ අඩුපාඩු නිසාය. ඒ අනුව ඇතැම්විට ඉදිරියේදී හතුරුසිංහ මහතාට රුපියල් මිලියන ගණනක් ගෙවා, අලූතින් බඳවාගන්නා පුහුණුකරුවෙකුටත් ඒ කාලසීමාව වෙනුවෙන්ම තවත් මිලියන ගණනක් ගෙවීමට සිදුවනු ඇත.