මෙරට ස්විස්ටර්ලන්ත තානාපති කාර්යාලයේ නිලධාරිනියක වෑන් රථයකින් පැහැරගෙන ගොස් ප්‍රශ්ණ කොට මුදාහැර ඇති බව පවසන සිද්ධිය සම්බන්ධයෙන් පොලීසිය සහ අපරාධ පරික්ෂණ දෙපාර්තමේන්තුව විශේෂ පරික්ෂණයක් ආරම්භ කර ඇති බව විදේශ කටයුතු අමාත්‍යාංශය පවසයි.
අදාල සිද්ධිය සම්බන්ධයෙන් කඩිනම් හා සම්පූර්ණ පරික්ෂණයක් පවත්වා වැරදිකරුවන් නීතිය හමුවට පැමිණිවිමට ශ්‍රී ලංකා රජය පියවර ගත යුතු බව ස්විස්ටර්ලන්ත විදේශ කටයුතු අමාත්‍යාංශය නිල නිවේදනයක් නිකුත් කරමින් පවසා ඇති අතර විදේශ කටයුතු අමාත්‍යාංශයේ නිවේදනය පළකර ඇත්තේ ඉන් පසුවය. ස්විට්සර්ලන්ත රජය නිකුත් කළ නිවේදනයෙන් දැනුම් දී තිබුනේ තානාපති කාර්යාලයක නිලධාරිනියක මෙසේ පැහැරගෙන ප්‍රශ්න කිරීම බරපතල ලෙස සලකා බලන බවත්, ශ්‍රී ලංකා රජය ඒ සම්බන්ධයෙන් නොපමාව පරීක්ෂණ සිදුකර වැරදිකරුවන්ට දඬුවම් කළ යුතු බවත්ය.
එම නිවේදනයෙන් පසු ජාත්‍යන්තර මාධ්‍ය ආයතන ඒ පිළිබඳව බරපතල ලෙස වාර්තා කර තිබුණි.
ස්විස්ටර්ලන්ත තානාපති කාර්යාලයේ සේවය කරන පැහැරගැනීමට ලක්වූ නිලධාරිනිය තම සේවා මුරය අවසන් වී යන අවස්ථාවේදී වෑන් රථයකින් පැමිණි පිරිසක් ඇයගේ කැමැත්ත නොමැතිව එහින් රැගෙන ගොස් අපරාධ පරික්ෂණ දෙපාර්තුමේන්තුවේ සමූහ මංකොල්ල අංශයේ ස්ථානාධිපති නිශාන්ත ද සිල්වා මහතාට සහ ඔහුගේ පවුලේ අයට ස්විට්සර්ලන්ත වීසා ලබාදීම සඳහා මැදිහත්වුණේ කවුරුන්ද යන්න පිළිබඳ ප්‍රශ්ණ කර ඇති බවය.
නොවැම්බර් 27 වන දින ස්විස්ටර්ලන්ත තානාපති හෑන්ස්පීටර් මොක් මහතා අගමැතිවරයාව හමුවී සාකච්ඡා කිරීමට උත්සාහ කර තිබුණි. කෙසේ වෙතත් එම සාකච්ඡාව නොපැවැත්වුණු අතර විදේශ කටයුතු අමාත්‍ය දිනේෂ් ගුණවර්ධනව හමුවී සිද්ධිය සම්බන්ධයෙන් සාකච්ඡාවක් පවත්වා ඇත.
