ජනාධිපතිවරණ පරාජයෙන් පසුව සජිත් ප්‍රේමදාස මහතා දේසපාලනයෙන් සමුගන්නවායැයි ප්‍රකාශ කරමින් සැඟව සිටීම නිසා එක්සත් ජාතික පක්ෂයේ සහ එක්සත් ජාතික පෙරමුණේ සජිත් හිතවාදී මන්ත්‍රී කණ්ඩායම විශාල අර්බූදයකට පත්ව ඇතැයි වාර්තා වේ.
ජනාධිපතිවරණයෙන් පසුව නොවැම්බර් 18 වැනි සදුදා දින කොළඹ ගෝල්ෆෙස් හෝටලයේදී එක්සත් ජාතික පෙරමුණේ මන්ත්‍රීවරුන් සහ සජිත් ප්‍රේමදාස මහතා අතර හමුවක් පැවති අතර එහිදී සජිත් ප්‍රේමදාස මහතා ප්‍රකාශ කර තිබුණේ තමන් ස්ථිර වශයෙන්ම දේශපාලනයෙන් සමුගන්නා බවය. එහෙත් එම අවස්ථාවට සහභාගීවූ බහුතර සජිත් හිතවාදීන් ඔහු දේශපාලනයේ තවදුරටත් රඳවා තබාගනිමින් ඔහුට විපක්ෂනායකත්වය සහ පක්ෂ නායකත්වය රැගෙන දීමට පොරොන්දු වෙමින් නැවත ඔහු සක්‍රීය දේශපාලනයේ තබාගන්නට කටයුතු කර ඇත. ඒ අනුව සජිත් ප්‍රේමදාස මහතා සහ පාක්ෂිකයින් අතර හමුවක් පසුගියදා කොළඹ වොක්ෂෝල් වීදියේ ජනාධිපතිවරණ ප්‍රචාරක කාර්යාලයේ පැවැත්විණි. එහෙත් එම හමුවෙන් පසුව සජිත් ප්‍රේමදාස මහතා නැවත තමන් දේශපාලනයට නොඑන බව කියමින් මගහරිමින් කටයුතු කරන බව වාර්තා වේ.
නොවැම්බර් 26 වැනිදා එක්සත් ජාතික පක්ෂය තුළ නායකත්වය සහ විපක්ෂ නායකත්වය පිළිබඳව ඇතිවී තිබෙන අර්බූදය විසඳා ගැනීමට කථානායක නිළ නිවසේ කරු ජයසූරිය මහතා, රනිල් වික්‍රමසිංහ මහතා, සහ සජිත් ප්‍රේමදාස මහතා අතර සාකච්ඡාවක් සංවිධානය කර තිබූ අතර අවසාන මොහොතේදී සජිත් ප්‍රේමදාස මහතා එම සාකච්ඡාවට පැමිණ නැත. ඉන්පසුව කථානායක කරු ජයසූරිය පාර්ලිමේන්තු සාම්ප්‍රදාය අනුව යමින් එජාප නායක රනිල් වික්‍රමසිංහ මහතාට විපක්ෂ නායකත්වය දෙන බව ට්විටර් පණිවිඩයක් නිකුත් කර තිබුණි. ඉන්පසුව එක්සත් ජාතික පෙරමුණේ මන්ත්‍රීවරුන් 57 දෙනෙක් සජිත් ප්‍රේමදාස මහතාට විපක්ෂ නායකත්වය ලබාදිය යුතු යැයි ඉල්ලීමක් කරමින් ලිපියක් යවා තිබුණ බැවින් කථානායකවරයා නැවත ප්‍රකාශ කළේ එජාපය තම පක්ෂය තුළ මෙම අර්බූදය විසඳා ගතයුතු බවය.
නොවැම්බර් 27 වැනි දින හිටපු අමාත්‍ය රංජිත් මද්දුමබණ්ඩාර මහතාගේ නිවසේදී එක්සත් ජාතික පෙරමුණේ ප්‍රබලයින් හමුවී ඇත. එම හමුවටද සජිත් ප්‍රේමදාස මහතා පැමිණ නැත. ඉන්පසුව මෙම අර්බූදය සාකච්ඡා කර විසඳා ගැනීම සඳහා පසුගිය 28 වැනි දින උදෑසනද සිරිකොත පක්ෂ මූලස්ථානයේදී එක්සත් ජාතික පෙරමුණේ නායකයින් හමුවී ඇති අතර එම අවස්ථාවටද සජිත් ප්‍රේමදාස මහතා පැමිණ නැත. මේ පිළිබඳව අදහස් දක්වමින් එක්සත් ජාතික පෙරමුණේ සජිත් හිතවාදී ප්‍රබලයෙක් ප්‍රකාශ කළේ සජිත් ප්‍රේමදාස මහතා නැගිට්ටවීම අසීරුවී ඇති බවය. ඔහු දූරකථන ඇමතුමකට හෝ සම්බන්ධ නොවෙමින් කොළඹ සිය නිවසට වී සිටින බවද ඒ මහතා වැඩිදුරටත් පැවසීය.
