පාර්ලිමේන්තු මන්ත්රී ජනාධිපති නීතිඥ එම්.ඒ. සුමන්තිරන් සිලෝන් ටුඬේ පුවත්පතට හා එම පුවත්පත අයත්වන සිලෝන් නිව්ස්පේපර්ස් සමාගමට රුපියල් බිලියන 10ක වන්දි ඉල්ලා එන්තරවාසි යවා ඇත. නොවැම්බර් 13 වැනිදා එම එන්තරවාසිය යවා ඇත්තේ සිලෝන් ටුඬේ පුවත්පතේ කර්තෘවරයා, සිලෝන් නිව්ස්පේපර්ස් ලිමිටඞ් සමාගම යන ලිපින වෙතය.
සින්නදුරෙයි සුන්දරලිංගම් සහ බාලේන්ද්‍ර නීති සමාගමෙන් යවා ඇති එම එන්තරවාසියෙන් පෙන්වාදෙන්නේ තමන්ගේ සේවාදායකයා වන ජනාධිපති නීතිඥ එම්.ඒ. සුමන්තිරන් සමාජයේ ප‍්‍රකට නීතිඥවරයෙකු මෙන්ම ඉලංකෙයි තමිල් අරසු පක්ෂයේ පාර්ලිමේන්තු මන්ත‍්‍රීවරයෙකුද වන බවත්, ශ‍්‍රී ලංකාවේ නීති වෘත්තියට හා නීතියේ වර්ධනයට වැදගත් සේවයක් ඉටු කර ඇති බවත්ය. ඊට අමතරව ශ‍්‍රී ලංකාවේ ඓතිහාසික නඩු තීන්දු ගණනාවකට ඔහු සම්බන්ධ බව පෙන්වාදෙයි. එමෙන්ම ඔහු තවත් නීතිඥවරුන් ගණනාවක් පුහුණු කර ඇති බව පෙන්වාදෙයි. යාපනය දිස්ත‍්‍රික්කයේ ජනතාව ඔහු පාර්ලිමේන්තුවට තෝරා පත්කළ බවත් පෙන්වාදෙයි. ඒ නිසා ඔහු පොදු ජනතාව අතර මෙන්ම නීති ක්ෂේත‍්‍රයේද ගෞරවනීය චරිතයක් බව පෙන්වාදෙයි.
සිලෝන් ටුඬේ පුවත්පතේ පළවැනි පිටුවේ පළවූ පුවතක ශීර්ෂපාඨය ලෙස ‘සජිත් පේ‍්‍රමදාසට ඡුන්දය දීමෙන් සිංහල ජනතාව පරාජය කළ හැකි‘ බව සඳහන්ව තිබුණු බව ඔහු පෙන්වාදෙයි.
එම පුවතෙහි සඳහන්ව තිබුණු කරුණු ලෙස දෙමළ ජනතාව දකුණේ ජනතාවගේ අරමුණුවලට විරුද්ධව කටයුතු කළ යුතු බවත්, ගෝඨාභය රාජපක්ෂගේ ජයග‍්‍රහණය වැළැක්වීමට සහ සිංහල නායකයන්ගේ ජයග‍්‍රහණ වැළැක්වීමට කටයුතු කළ යුතු බවත් එම්.ඒ. සුමන්තිරන් මන්ත‍්‍රීවරයා පැවසූ බව එම පුවතේ සඳහන්ව තිබී ඇතැයි එම එන්තරවාසියෙන් පෙන්වාදෙයි. එම කරුණු ඇතුළත් පුවතක් මව්බිම පුවත්පතේ ප‍්‍රධාන ප‍්‍රවෘත්තිය ලෙස පළවී තිබුණු බවත් සඳහන් කරයි.
එම ප‍්‍රවෘත්තිය ශ‍්‍රී ලංකාවේ සහ ඉන් පිටත වසන විශාල පිරිසක් කියවා ඇති බවත්, එම පුවත සමාජ මාධ්‍යවල සහ වෙබ් අඩවිවලද පළවී තිබුණු බවත් එහි සඳහන්ය. එම පුවතෙහි සඳහන් වන අන්දමට සුමන්තිරන් මහතා සිංහල ජනතාවට එරෙහිව ඡුන්දය දෙන ලෙස දෙමළ ජනවර්ගය පෙළඹවන බව පුවතක් පළ කිරීමෙන් සුමන්තිරන් මහතා සිංහල ජනතාවට එරෙහිව කුමන්ත‍්‍රණය කරන බවත්, ජනවාර්ගික වෛරය ඇතිකිරීම සඳහා කටයුතු කරන බවත් ඉඟි කරන බව එහි සඳහන්ය.
එම පුවත කිසිම පදනමක් නැති, ව්‍යාජ පුවතක් බව එහි සඳහන්ය. ඒ අනුව එය අපහාස කිරීමක් බව එහි පෙන්වාදෙයි. තම සේවාදායකයා ජනවාර්ගික සමගිය වෙනුවෙන් වෙහෙස වී වැඩකරන පුද්ගලයෙකු බවත්, ඔහු සිංහල ජනවර්ගයේ මිත‍්‍රයන් හා සගයන් ආශ‍්‍රය කරන බවත් එහි සඳහන්ය. එමෙන්ම ඔහුගේ සේවාදායකයන් ලෙස සිංහල ජාතිකයන් විශාල පිරිසක් සිටින බවද පෙන්වාදෙයි. ඒ අතර බෞද්ධ හිමිවරුන්ද ඇතැයි ප‍්‍රකාශ කර ඇත.
ඒ අනුව පුවත්පතේ පළවූ ලිපියෙන් වැරදි ආකාරයට, නීති විරෝධීව සහ අයුක්ති සහගත ආකාරයට සේවාදායකයාගේ ගෞරවනාමයට හානි කර ඇති බව එහි සඳහන්ය. තම සේවාදායකයා සජිත් පේ‍්‍රමදාස මහතාට ජනාධිපතිවරණයේදී සහාය දක්වන පසුබිමක සිලෝන් ටුඬේ පුවත්පත ගෝඨාභය රාජපක්ෂ මහතාට සහාය දක්වමින් සිටි බවත්, ඒ නිසා ඉහත කී අපහාසාත්මක පුවත පළ කළ බවත් දැනගන්නට ලැබෙන බව එහි සඳහන්ය.
ඒ අනුව රුපියල් බිලියන 10ක වන්දියක් ල්ලා සිටින බවත්, ඉහත කී අපහාසාත්මක ප‍්‍රකාශ නිවැරදි කරගන්නා ලෙසත් එන්තරාවාසියෙන් ඉල්ලා සිට ඇත. එසේ නොකළහොත් නඩු පැවරීමට බලාපොරොත්තු වන බව එහි සඳහන්ය.
මෙම එන්තරවාසි යැවීමට හේතුවූ පුවත පසුගිය ජනාධිපතිවරණයට දින කිහිපයකට පෙර මෙන්ම ජනාධිපතිවරණයෙන් පසුවද විශාල පිරිසක් සැබෑවක් ලෙස සලකමින් කතාබහට ලක්කළ එකක් විය. කෙසේ වෙතත් එම්.ඒ. සුමන්තිරන් මන්ත‍්‍රීවරයා එම ප‍්‍රකාශය තබා ඊට ළඟින් යන ප‍්‍රකාශයක්වත් කර තිබුණේ නැත. මීට සති කිහිපයකට පෙර මව්බිම හා සිලෝන් ටුඬේ පුවත්පත් ඝාතනයට ලක්වූ ලසන්ත වික‍්‍රමතුංග මහතාගේ දියණියගේ ඡුායාරූපයක් විකෘති කිරීම නිසාද කතාබහට ලක්විය. පසුගිය කාලයක් පුරාවට පැහැදිළිවම ආචාරධර්ම විරෝධී පුවත් පළකිරීම සම්බන්ධයෙන් එම පුවත්පත් චෝදනාවට ලක්විය. තමන්ගේම මාධ්‍ය භාවිතය ගැන එම පුවත්පත් ස්වයං නියාමනයක් කරගන්නේ නැතිනම්, මෙවැනි එන්තරවාසි යැවීම හැර වෙනත් විසඳුමක් නැත.
