හිටපු ජ්‍යෙෂ්ඨ මලල ක‍්‍රීඩා පුහුණුකරුවකු වූ යෝගානන්ද විජේසුන්දර කලක් රෝගාතුරව හිඳ පසුගිය සතියේ දිවියට සමුදුන්නේය.
යෝගානන්ද විජේසුන්දර යනු පසුගිය කාලයේ ශ‍්‍රී ලංකාව ජාත්‍යන්තර මලල ක‍්‍රීඩා පිටිය දක්වා රැුගෙන ගිය ක‍්‍රීඩක ක‍්‍රීඩිකාවන් රැුසකගේ පුහුණුකරුය. දිලීමා පීටර්සන්, තිලකා ජිනදාස, ජයමිණි ඉලේපෙරුම, ධම්මිකා මැණිකේ, චාන්දනී ජයවීර, රවීන්ද්‍ර කුමාර ප‍්‍රනාන්දු ආදිහු ඒ අතර කැපී පෙනෙති.
දිලීමා පීටර්සන් දුර පැනීමෙන්ද තිලකා ජිනදාස මීටර් 100 කඩුලූ පැනීමෙන්ද, ජයමිණි ඉලේපෙරුම මීටර් 400 හා මීටර් 800 ඉසව්වලින්ද, ධම්මිකා මැණිකේ මීටර් 800 හා මීටර් 1500 ඉසව්වලින්ද දකුණු ආසියාව ජයගන්නට සමත්වූ ක‍්‍රීඩිකාවෝය.
එමෙන්ම තිලකා ජිනදාස, ධම්මිකා මැණිකේ හා ජයමිණි ඉලේපෙරුම ශ‍්‍රී ලංකාව නියෝජනය කරමින් ඔලිම්පික් උළෙල පවා නියෝජනය කරන්නට සමත්වූහ.
නම් සඳහන් නොකරන ලද තවත් ක‍්‍රීඩක ක‍්‍රීඩිකාවෝ බොහොමයක් යෝගානන්ද විජේසුන්දර මහතා යටතේ පුහුණුව ලබමින් සහාය දිවීමේ ඉසව්වලදී මෙන්ම කේවල ඉසව්වලදී දකුණු ආසියාව ජයගන්නටත්, ආසියානු පොදු රාජ්‍ය මණ්ඩලීය හා ඔලිම්පික් තරඟ නියෝජනය කරන්නටත් සමත්වූහ.
විශේෂයෙන්ම යෝගානන්ද විජේසුන්දර මහතා ඔහුගේ පුහුණුකරු භූමිකා යුගයේදී හඳුන්වනු ලැබුයේ මලල ක‍්‍රීඩක ක‍්‍රීඩිකාවන්ගේ ශිල්පීය ක‍්‍රම සකස් කිරීමේ ප‍්‍රාමාණිකයෙකු ලෙසය. ඒ අතරින් කඩුලූ පැනීමේ ඉසව් කැපී පෙනුණි.
එමෙන්ම ඔහුගේ පුහුණුකරු භූමිකාව ක‍්‍රීඩක ක‍්‍රීඩිකාවන් බිහිකිරීමෙන් ඔබ්බට අනාගත පුහුණුකරුවන් රටට දායාද කිරීමේ මහඟු කාර්යයය සඳහාද දිගුවිය. ජාතික ක‍්‍රීඩා විද්‍යායතනයේ ප‍්‍රථම අධ්‍යක්ෂවරයා වූයේ ඔහුය. ජාතික මට්ටමේ බොහෝ ක‍්‍රීඩක ක‍්‍රීඩිකාවන්ට ඔවුන්ගේ ක‍්‍රීඩා ජීවිතය අවසන්වීමත් සමඟ පුහුණුකරුවකු වීම සඳහා ජාතික ක‍්‍රීඩා විද්‍යායතනයෙන් ලබාගත් ඩිප්ලෝමා පුහුණුව මහත් අස්වැසිල්ලක් විය.
යෝගානන්ද විජේසුන්දර මහතාත් ඔහුගේ පරපුරේ සමකාලීන අනෙක් පුහුණුකරුවන් සියල්ලෝමත් ජාතික මට්ටමෙන් ඔබ්බට ගොස් ජාත්‍යන්තර මට්ටමේ කීර්තිය ශ‍්‍රී ලංකාවට ගෙන ඒම සඳහා සිය පුහුණුකරු භූමිකාව ඔසවා තැබූ පුද්ගලයෝය.
ලක්ෂ්මන් ද අල්විස්, ඩර්වින් පෙරේරා, එස්.එම්.ජී. බණ්ඩාර, සුනිල් ගුණවර්ධන යන ඔහුගේ සමකාලීන පුහුණුකාර පරපුරේ පුහුණුකරුවන් යටතේ හා යෝගානන්ද යටතේ පුහුණුව ලබමින් ශ‍්‍රී ලංකාව නියෝජනය කරමින් දස්කම් දැක්වූ හා වාර්තා තැබූ ක‍්‍රීඩක ක‍්‍රීඩිකාවන් ගැන අප අදටත් කථාකරන්නේ ඒ නිසාය. මේ පුහුණුකාර සමකාලීනයන් යටතේ පුහුණුව ලැබූ ක‍්‍රීඩක ක‍්‍රීඩිකාවන් තැබූ සමහර වාර්තා අදටත් බිඳී නැත. එම ක‍්‍රීඩක ක‍්‍රීඩිකාවන් ලැබූ ජයග‍්‍රහණවලට අදටත් සමහරුන්ට ළංවීමට හැකිවී නැත.
ඊට විශේෂ හේතුව පුහුණුකරුවන් වශයෙන් ඔවුන් තුළ පැවති මහා දැනුම් හා අත්දැකීම් සමුදායයි. විශේෂයෙන්ම යෝගානන්ද විජේසුන්දර, ලක්ෂ්මන් ද අල්විස්, ඩර්වින් පෙරේරා, සුනිල් ගුණවර්ධන ආදින්ට ලැබුණු විදේශ පුහුණු ආදියයි.
ඛේදවාචකය වන්නේ ඔවුන්ගේ පරපුරෙන් පසු ද්විපාර්ශ්වික රාජ්‍ය සබඳතා යටතේ යුරෝපීය රටවල පුහුණුකරුවන් ලෙස පුහුණුවීම් අවස්ථා ඔවුන්ගෙන් පසු පරම්පරාවට නොලැබී යෑමය.
ශ‍්‍රී ලංකාවේ අනාගත පරපුරේ දක්ෂතා තවදුරටත් වර්ධනය කිරීමට හා රැුකගැනීමට යුරෝපීයට රටවලදී පුහුණුකරුවන්ට ලැබෙන පුහුණු අවස්ථා වඩා වැදගත්ය. ප‍්‍රතිඵල සොයමින් සිටින ක‍්‍රීඩා බලධාරීන් අවධානය යොමු කළ යුතු එක් අංශයක් වන්නේද පුහුණුකරුවන්ට ලබාදෙන එම පුහුණු අවස්ථාවන්ය.
ඊට ඇති හොඳම උදාහරණය වන්නේ සුසන්තිකා ජයසිංහය. ඇය ජාත්‍යන්තරය ජයගන්නේ ඩර්වින් පෙරේරා මහතාගේ පුහුණුව යටතේය. ඒ 1997 ලෝක මලල ක‍්‍රීඩා ශූරතාවලියේදීය. එහිදී ඇය මීටර් 200 ඉසව්වේ දෙවැනි ස්ථානය ලබාගන්නේ තත්පර 22.39කටය. ඉන්පසු ඇය එවක ක‍්‍රීඩා අමාත්‍ය එස්.බී. දිසානායකත් සමග ඇතිවන මතභේදයක් හේතුවෙන් විවිධ තීරණ ගන්නේය. එකක් වන්නේ ඇගේ පුහුණුකරු වශයෙන් සැමියාව නම්කර ඇගේ පුහුණුකරුට ක‍්‍රීඩා අමාත්‍යාංශය ලබාදෙන දීමනාව ලබා ගැනීමය.
ඉන්පසු ඔලිම්පික් උළෙල ආසන්නයේ ඩන්කන් වයිට් පදනමේ අනුග‍්‍රහයෙන් ඉතා කෙටි කාලයකට ඇයට ඇමෙරිකාවේ පුහුණුවකට යෑමට ලැබෙන බව ඇත්තය. හුසේන් බෝල්ට්ගේ පුහුණුකරු වන ටෝනි කැම්බල් යටතේ එහිදී ඇයට පුහුණුවක් ලැබෙන බවත් ඇත්තය. එහෙත් අපගේ ක‍්‍රීඩා වාර්තාකරුවන් 2000 සිඞ්නි ඔලිම්පික්හි ඇයගේ රිදී පදක්කම සින්නක්කරයටම ටෝනි කැම්බල්ට පවරාදීම මේ දේශීය පුහුණුකරුවන්ට කරන මහා අසාධාරණයකි. ලෝක ශූරතා මලල ක‍්‍රීඩා උළෙලටත් වඩා තරඟකාරී යැයි කිව හැකි ඔලිම්පික් ක‍්‍රීඩා උළෙලේදී මීටර් 200 ඉසව්ව සඳහා ඇය වාර්තා කරන්නේ තත්පර 22.28කි. ඇමෙරිකාවේ හෝ ටෝනි කැම්බල් යටතේ කෙටි පුහුණුවක් ලැබුවේ යැයි කියා එය ඇයගේ තරග නිමි කාලයේ මහා ලොකු දියුණුවක් සිදුවී තිබුණේ නැත.
ඩර්වින් පෙරේරා මියයන්නට ප‍්‍රථම රෝගාතුරව සිටි සමයේ ඔහුගේ සුවදුක් බැලීමට ගිය සුසන්තිකා ජයසිංහ ඇගේ ජයග‍්‍රහණයේ ගෞරවය ප‍්‍රසිද්ධියේම ඩර්වින් පෙරේරා මහතාට ලබාදුන් බවද අමතක නොකළ යුතුය.
යෝගානන්ද විජේසුන්දර මහතාගේ දිවිසැරියෙන් සමුගැනීම අපට කියන්නේ ඔහුගේ පරපුරේ දැනුම් හා අත්දැකීම් සමුදාය අපෙන් ගිලිහී යන බවය. ලක්ෂ්මන් ද අල්විස්, ඩර්වින් පෙරේරා හා යෝගානන්ද විජේසුන්දර අද අපට නැත. ක‍්‍රියාකාරීව සිටින්නේ සුනිල් ගුණවර්ධන මහතා පමණය. එස්.එම්.ජී. බණ්ඩාර මහතාද සිටින්නේ අසනීපවය.
මේ හිස්තැන් පිරවීම මලල ක‍්‍රීඩාවේ හෙට දවස වෙනුවෙන් අද අත්‍යවශයය.
