ජනාධිපති ගෝඨාභය රාජපක්ෂගේ පළමු පත්කිරීම වූයේ ජනාධිපති ලේකම් ලෙස ආචාර්ය පී.බී. ජයසුන්දර පත් කිරීමය. ඔහු මහින්ද රාජපක්ෂ ජනාධිපතිවරයාගේ ආණ්ඩුවේ මුදල් අමාත්‍යාංශ ලේකම්වරයා ලෙස කටයුතු කළේය.
එම පත්කිරීම මේ වනවිට සමාජ මාධ්‍ය ජාලාවල විමල් වීරවංශ මන්ත‍්‍රීවරයා හාස්‍යයට ලක් කරන පෝස්ටු බවට පත්වී ඇත. ඒ විමල් වීරවංශ මන්ත‍්‍රීවරයා එකල ‘ආර්ථික ඝාතකයා‘ වශයෙන් හැඳින්වූ ආචාර්ය පී.බී. ජයසුන්දර ජනාධිපති ගෝඨාභය රාජපක්ෂ ඔහුගේ ‘ලේකම්වරයා‘ වශයෙන් පත් කරගැනීම නිසාය. මේ පත්වීම ගැන කථා නොකර නොදැක්කා වාගේ සිටිය යුතුයැයි විමල් වීරවංශ මන්ත‍්‍රීවරයා සිතන අයුරු එම පෝස්ටුවල දැක්වේ.
මෙම පත්කිරීම් ගැන නිල වශයෙන්ම විරෝධයක් මේ වනවිට ජනාධිපති ගෝඨාභය රාජපක්ෂට යොමුකර තිබේ. ඒ ශ‍්‍රී ලංකා රක්ෂණ සංස්ථාවේ ප‍්‍රබලම වෘත්තීය සමිතිය වන රක්ෂණ සේවක සංගමයයි.
(එය දේශපාලන පක්ෂයකට අයත් වෘත්තීය සමිතියක් නොවේ.*
රක්ෂණ සේවක සංගමය වූ කලී එදා එක්සත් ජාතික පක්ෂ ආණ්ඩුව ශ‍්‍රී ලංකා රක්ෂණ සංස්ථාව හැරී ජයවර්ධනට විකුණූ ගනුදෙනුවට එරෙහිව ශ්‍රේෂ්ඨාධිකරණයට ගොස් එය නැවත රජයට ලබාගැනීමට කටයුතු කළ සංගමයය.
දූෂිතයන් පිටුදකිමු. ජාතියට දුන් ප‍්‍රතිඥාව ඉටුකරමු.‘ යනුවෙන් නොවැම්බර් 19 දින සහිතව සිය ලිපිය ජනාධිපතිවරයාට යොමුකරන රක්ෂණ සේවක සංගමය අවධාරණය කරන්නේ ජනාධිපති ලේකම් ලෙස පත්කර ඇති ආචාර්ය පී.බී. ජයසුන්දර එම තනතුරට සුදුසු නිලධාරියෙකු නොවන බවයි.
එම ලිපියේ පළමු කරුණ වශයෙන් එම සංගමය පැහැදිලි කරන්නේ බත්තරමුල්ල වෝටර්ස් එජ් ඉඩම් අත්පත් කරගැනීමේ නඩුවේ චූදිතයන් අතර හිටපු ජනාධිපතිනි චන්ද්‍රිකා බණ්ඩාරනායක හා ආචාර්ය පී.බී. ජයසුන්දර ද සිටි බවත්, එකී නඩුවේදී වරදකරුවන් වූ බැවින් රුපියල් ලක්ෂ 5ක දඩයක් ගෙවීමට ආචාර්ය පී.බී. ජයසුන්දරට සිදුවූ බවත්ය.
එම වෝටර්ස් එජ් නඩුවේ තීන්දුව තුළ ආචාර්ය පී.බී. ජයසුන්දර සම්බන්ධයෙන් කියවුණ එක් ප‍්‍රධාන කාරණාවක් වූයේ ඔහු රජයේ කිසිදු තනතුරක් දැරීමට නුසුදුස්සෙකු බවයි. එහෙව් ආචාර්ය පී.බී. ජයසුන්දර ඉන්පසු බලයට පත් මහින්ද රාජපක්ෂ පාලනයේදී යළි මුදල් අමාත්‍යාංශ ලේකම් ධුරයට පත්කරනු ලැබූ අතර ඉහත කී ශ්‍රේෂ්ඨාධිකරණ තීන්දුව සලකා බැලූවේ නැත. විමල් වීරවංශ මන්ත‍්‍රීවරයාද එම ආණ්ඩුවේ අමාත්‍ය තනතුරක් දැරුවේ ආචාර්ය පී.බී. ජයසුන්දර සම්බන්ධයෙන් කිසිවක් නොකී ලෙසටය.
2003 වසරේදී ශ‍්‍රී ලංකා රක්ෂණ සංස්ථාව එක්සත් ජාතික පක්ෂ ආණ්ඩුව පුද්ගලිකකරණය යටතේ ව්‍යාපාරික හැරී ජයවර්ධනට විකුණා දැමූ අතර ඊට එරෙහිව 2007 වර්ෂයේදී ශේෂ්ඨාධිකරණයට නඩු ගොනු කරනු ලැබුයේ එෆ්ආර්/ 117 /2007 යටතේ රක්ෂණ සේවක සංගමයත් එෆ්ආර්/158/ 2007 යටතේ වාසුදේව නානායක්කාර මන්ත‍්‍රීවරයාත්ය.
එම නඩුවේ තීරණය අනුව ශ‍්‍රී ලංකා රක්ෂණ සංස්ථාව නැවත රජයට පැවරුණ අතර රක්ෂණ සංස්ථාව මිලදී ගැනීමට වැයකළ මුදල් හා පොළිය වශයෙන් ව්‍යාපාරික හැරී ජයවර්ධනගේ මිල්ෆෝඞ් හෝල්ඩින්ස් සමාගමට රුපියල් කෝටි 672ක මුදලක් භාණ්ඩාගාර බිල්පත් වශයෙන් වසර 5ක කාලයකදී ගෙවීයන පරිදි ගෙවන ලෙස නියෝග කරනු ලැබීය.
රක්ෂණ සේවක සංගමය එම ලිපිය යටතේ දෙවන කරුණ ලෙස සඳහන් කරන්නේ එම මුදල ශ‍්‍රී ලංකා රක්ෂණ සංස්ථාවේ මුදලින් එකවර ගෙවීම සඳහා 2010/07/21 දින ඉදිරිපත් කරන ලද අංක අ.ප.ම./10/1619/404/079 දරන කැබිනට් පත‍්‍රිකාව සඳහා ආචාර්ය පී.බී. ජයසුන්දරද වගකිව යුතු බව හා එම ශ්‍රේෂ්ඨාධිකරණ නියෝගය කඩ කිරීමක් බවයි.
මෙම මුදල් ගෙවීම සිදුවීමෙන් පසු ශ‍්‍රී ලංකා රක්ෂණ සංස්ථාව එම මුදල් ගෙවීමට අදාලව මිල්ෆෝඞ් හෝල්ඩින්ස් සමාගමෙන් ලබාගන්නා ලද තහවුරු කිරීමකදී එම සමාගම ලිඛිතවම දන්වා තිබුණේ ශ‍්‍රී ලංකා රක්ෂණ සංස්ථාව රජයට පවරාගැනීම යටතේ ඔවුන්ට රුපියල් බිලියන 5.9ක හෙවත් කෝටි 590ක මුදලක් ලැබුණ බවය. ඒ අනුව රුපියල් කෝටි 82ක මුදලක් මෙම මුදල් ආපසු ගෙවීමේ ගනුදෙනුව යටතේ අතුරුදහන් වී තිබුණි.
එමෙන්ම මෙම සියලූ නඩු පිළිබඳ තොරතුරු ජනාධිපති නීතිඥ පාර්ලිමේන්තු මන්ත්රී විජයදාස රාජපක්ෂගෙන් ලබාගත හැකි බවද රක්ෂණ සේවක සංගමය සිය ලිපියේ සඳහන් කර තිබේ.
එමෙන්ම එම සංගමය ලිපිය අවසානයේත් අවධාරණය කරන්නේ ¥ෂිතයන් රජයේ හෝ රාජ්‍ය ආයතනවල තනතුරු සඳහා බඳවා නොගන්නා බව ජනාධිපතිවරණ සටනේ ප‍්‍රකාශ කරමින් රටේ දෙකෝටියකට වැඩි ජනතාවට දුන් පොරොන්දුව සිහිකරමින් මෙවැනි දූෂිත පුද්ගලයින් තනතුරු සඳහා බඳවා නොගන්නා ලෙස හා ඔවුන්ගේ සහාය ලබා නොගන්නා ලෙස ඉල්ලා සිටින බවයි.
