හිටපු ජනාධිපති මෛත‍්‍රිපාල සිරිසේන මහතාගේ ජනාධිපති ලේකම්වරයා සෞන්දර්ය විශ්වවිද්‍යාලයේ උපකුලපති මහාචාර්ය සරත්චන්ද්‍ර සරත් චන්ද්‍රජීවට මාස දෙකකට පෙර, එනම් සැප්තැම්බර් 18 වැනිදා හිටි හැටියේම ලිපියකින් දන්වා තිබුණේ ඔහු උපකුලපති ධුරයෙන් ඉවත් කළ බවය.
ජනාධිපතිවරයා එසේ කළේ කිසිදු පරීක්ෂණයකින් හෝ සාධාරණ හේතු දැක්වීමකින් තොරව බවත්, ඒ නිසා ජනාධිපතිවරයා සිය බලය අවභාවිත කර ඇති බවත් පවසමින් මහාචාර්ය චන්ද්‍රජීව අධිකරණය ඉදිරියේ මූලික අයිතිවාසිකම් පෙත්සමක් ගොනු කර තිබුණි. දැන් ජනාධිපති මෛත‍්‍රීපාල සිරිසේනගේ ධුරකාලය අවසන්ය. ඉන්නේ අලූත් ජනාධිපතිවරයෙකි. අප මෙහි කතාකරන්නේ එම ඉවත් කිරීම නීත්‍යනුකූලද නැද්ද යන්න පිළිබඳව නොවේ. මේ මහාචාර්යවරයා ඉවත් කිරීමට හේතුවක් ලෙසත් සැලකිය හැකි ඊට පෙර සිදුවූ සිදුවීමක් ගැනය. ඒ සෞන්දර්ය විශ්වවිද්‍යාලයේ බඳවාගැනීමේ ප‍්‍රතිපත්තිය පිළිබඳ බරපතළ ගැටලූවකි.
ලංකාව සෞන්දර්ය විශ්වවිද්‍යාලයෙන් බිහිකළ යුත්තේ පාසල් ගුරුවරුන් හෝ සංවර්ධන නිලධාරීන් ලෙස ආණ්ඩුවේ රස්සාවලට යවන්නට සිසුන් තොග ගණන් නොවේ. වත්මන් ජනාධිපතිවරයා සිය ප‍්‍රතිපත්ති ප‍්‍රකාශයෙහිද කියා තිබුණේ කුසලතාවට තැන දෙන ක‍්‍රමයක් ඇතිවන බවයි. ඔහු සිය කතාවලදී කියා තිබුණේ ආණ්ඩුවේ රැුකියා සඳහා පුද්ගලයන් යොමුකරන අධ්‍යාපන ක‍්‍රමයකින් වැඩක් නැති බවය. ඒ අනුව සෞන්දර්ය විශ්වවිද්‍යාලයේදී බිහිකළ යුත්තේ කලාවෙහි ප‍්‍රවීණයන්ය. කලා ක්ෂේත‍්‍රවල ආචාර්ය මහාචාර්යවරුන්ය, කලාකරුවන්ය, කලාව පිළිබඳ ප‍්‍රායෝගික අධ්‍යාපනයක් ලබාදිය හැකි දක්ෂ ගුරුවරුන්ය. ඒ සඳහා සෞන්දර්ය කලා විශ්වවිද්‍යාලයට බඳවාගැනීමේදී තිබිය යුතු අංක එකේ සුදුසුකම වන්නේ කලා ක්ෂේත‍්‍රයේ හැකියාවයි. ඊට අමතරව අධ්‍යාපනික සුදුසුකම් තිබීමත් අවැසි වෙයි. සාර්ථකත්වය ලැබෙන්නේ මේ දෙපැත්තේ සමබරතාව රැුකුණොත්ය.
ප‍්‍රායෝගික පරීක්ෂණ
තෝරාගන්නා සිසුන්ගේ කලා කුසලතා මැනීම සඳහා ලොව පුරා ඇති දියුණුම සෞන්දර්ය විශ්වවිද්‍යාලවල චිත‍්‍ර කලාව, මූර්ති කලාව, නිර්මාණ සැලසුම්, සංගීතය, නර්තනය, නාට්‍ය හා රංග කලා මෙන්ම වාස්තු වාස්තුවිද්‍යා විෂයන්ට අදාල පාඨමාලා සඳහා සිසුන් බඳවාගන්නේ ප‍්‍රායෝගික හැකියාව සලකමින්ය. ඒ වෙනුවෙන් අභියෝගතා පරීක්ෂණයක් පැවැත්විය හැකිය. නැතිනම් අපේක්ෂකයා අපේක්ෂකයා හෝ අපේක්ෂිකාවගේ නිර්මාණ ගොනුවක් ඇගයීමට ලක්කර ලක් කර අදාළ අදාල පාඨමාලා සඳහා තෝරාගත හැකිය. එය ජාත්‍යන්තරව පිළිගත් සම්මතයකි.
ශ‍්‍රී ලංකාවේද සෞන්දර්ය කලා විශ්වවිද්‍යාලයෙන් උපාධි ප‍්‍රදානය කරනු ලබන්නේ ප‍්‍රායෝගික කුසලතාව හා නිර්මාණශීලීත්වයටය. සිසුන්ව විශ්වවිද්‍යාලයට බඳවා ගැනීමේදීද අපොස උසස් පෙළ සමත් සිසුන්ගේ දෘශ්‍ය කලාව, සංගීතය, නර්තනය හා නාට්‍ය අනුවිෂයන් පිළිබඳව සංවේදීතාව ප‍්‍රායෝගික හැකියාව සහ නිර්මාණශීලීත්වයේ ඇගයීම් පිණිස ඇතුළත්වීමේ ප‍්‍රායෝගික පරීක්ෂණයක් පවත්වනු ලැබේ. මේ ප‍්‍රායෝගික පරීක්ෂණය ලොව පුරා අප වැනි විශ්වවිද්‍යාල අනුගමනය කරන නිවැරදි ක‍්‍රමවේදයකි.
අනෙක් අතට සෞන්දර්ය විශ්වවිද්‍යාලයේ ප‍්‍රායෝගික පරීක්ෂණයෙන් සිසුන්ව සමත් කරගැනීමේදී පිළිගත් කුසලතා මට්ටමක්ද ඇත. ඒ අනුව පරීක්ෂණයෙන් සමත් කරන සිසුන් ප‍්‍රමාණයෙහි සීමාවක් ඇත. මේ කාරණා පිළිබඳ ලෝක මට්ටමේ සංචාරයන්ගෙන්ද ලද අත්දැකීම් ඇති අයෙකු මෙන්ම ලංකාවේ මූර්ති කලා ක්ෂේත‍්‍රයේ ඉහළම විද්වතෙකු වන සරත් චන්ද්‍රජීව මහතා එම ක‍්‍රමවේදය වෙනුවෙන් පෙනී සිටින්නට උත්සාහ ගෙන තිබුණි. ඒ වෙනුවෙන් විශ්වවිද්‍යාල ප‍්‍රතිපාදන කොමිෂන් සභාව සමඟ ලිපි හුවමාරු කර තිබුණි.
තුන්ගුණයක් ඉල්ලීම
කෙසේවෙතත් 2019 වර්ෂයේ දී පැවැත්වූ ප‍්‍රායෝගික පරීක්ෂණයෙන් 2020 වසරට සිසුන් බඳවා ගැනීමේ ක‍්‍රියාවලියේදී ගැටලූවක් ඇතිවී තිබුණි. එහිදී බඳවාගැනීමට නියමිත ශිෂ්‍ය ප‍්‍රමාණය මෙන් තුන් ගුණයක් වන නම් ලැයිස්තුවක් ප‍්‍රායෝගික පරීක්ෂණයෙන් සමත් කොට එවන ලෙස විශ්වවිද්‍යාල ප‍්‍රතිපාදන කොමිෂන් සභාව සෞන්දර්ය විශ්විද්‍යාලයට දැනුම් දී තිබුණි. ඒ 2019.01.16 වන දිනයේය. කෙසේ වෙතත් සිසුන් තුන් ගුණයක් යැවීමෙන් ප‍්‍රායෝගික කුසලතාව අතින් අඩු, දුර්වල සිසුන්ගේ නම්ද එම ලැයිස්තුවට ඇතුළත් කිරීමට සිදුවෙයි. එසේ වුවහොත් කලා ක්ෂේත‍්‍රයේ සැබෑ දක්ෂයන් වෙනුවට, ඉසෙඞ් ස්කෝර් යටතේ වෙනත් විෂයන් නිසා ලකුණු ලැබූ සිසුන්ට සෞන්දර්ය විශ්වවිද්‍යාලයට ඇතුළත්වීමට අවස්ථාව ලැබේ. එය සෞන්දර්ය විශ්වවිද්‍යාලයේ අරමුණ ඉටුවීමක් නොවේ.
කෙසේ වෙතත් 2020 වෙනුවෙන් ප‍්‍රායෝගික පරීක්ෂණ සිදුකර තිබුණි. සාමාන්‍යයෙන් දක්ෂ යැයි සැලකිය හැකි සීමාව සමඟ සලකද්දී බඳවාගැනීමට නියමිත සිසුන් ප‍්‍රමාණය මෙන් තුන්ගුණක් සිසුන් සමත් කළ නොහැකි බව පැහැදිළිව පෙනීගොස් තිබුණි. ඒ නිසා බඳවාගැනීමට නියමිත සිසුන් ප‍්‍රමාණයට අදාල නම් 2019.05.09 දින විශ්වවිද්‍යාල ප‍්‍රතිපාදන කොමිෂන් සභාවට යවා තිබුණි. සමත්වූ සියලූ සිසුන්ට ඔවුන් ප‍්‍රයෝගික පරික්ෂණය සමත් බව දන්වා ලිපි යවා තිබුණි. ඒ 2019.05.15 වන දිනයේය. ඒ සාමාන්‍ය ක‍්‍රමවේදයයි.
එහෙත් පෙර දන්වා තිබූ පරිදි සමත් සිසුන් ප‍්‍රමාණය මෙන් තුන් ගුණයක ලේඛනයක් එවන ලෙස මැයි 23 දින නැවත වතාවක් විශ්වවිද්‍යාල ප‍්‍රවේශ කොමිෂන් සභාව උපකුලපති සරත් චන්ද්‍රජීව මහාචාර්යවරයාට දන්වා තිබුණි. ඒ අනුව මතුවන ගැටලූව පෙන්වාදෙමින්ම තුන් ගුණයක සිසුන්ගේ නාමලේඛනයක් සෞන්දර්ය විශ්වවිද්‍යාලයේ උපකුලපතිවරයා විශ්වවිද්‍යාල ප‍්‍රතිපාදන කොමිෂන් සභාව වෙත මැයි 27 වන දින යවා තිබුණි.
විශ්වවිද්‍යාල ප‍්‍රතිපාදන කොමිෂන් සභාව නැවතත් සෞන්දර්ය විශ්වවිද්‍යාලයට ලිපියක් එවා තිබුණි. 2018.08.09 වන දින පවත්වා ඇති 992 වන කොමිෂන් සභා රැුස්වීමේදී ප‍්‍රායෝගික පරීක්ෂණයෙන් සිසුන් තුන් ගුණයක් සිසුන් තෝරා ගන්නා බවට වූ තීරණය පිහිටා කටයුතු කරන බව එහි සඳහන් විය. එම ලිපිය 2019.06.14 දින එවා තිබුණි. මේ දැනුම්දීම කර තිබෙන්නේ විශ්වවිද්‍යාල ප‍්‍රතිපාදන කොමිෂන් සභාව එම තීරණය ගෙන මාස 10 කින් පසුවය. පරීක්ෂණ පවත්වා දෙවන ලකුණු ලේඛනය ද විශ්වවිද්‍යාල ප‍්‍රතිපාදන කොමිෂන් සභාවට යැවූ පසුවය.
ඒ අනුව ප‍්‍රායෝගික පරීක්ෂණයේ කඩඉම් සීමා වන සියයට 50 ලකුණු සීමාවෙන් පහතට ගිය අසමත් සිසුන් ද අදාල ලේඛනයට නිරායාසයෙන්ම ඇතුළත් ව තිබුණි. ඒ පිළිබඳව අදාල සිසුන්ට දන්වා ලිපි යැවීමටද සෞන්දර්ය විශ්වවිද්‍යාලය කටයුතු කර තිබුණි. එහෙත් එසේ දැන්වීමේදී සෞන්දර්ය විශ්වවිද්‍යාලය පැහැදිලිව පෙන්වාදී තිබුණේ මෙම නම් යවන්නේ විශ්වවිද්‍යාල ප‍්‍රතිපාදන කොමිෂන් සභාවේ ඉල්ලීම් මත බවයි. එම ලිපිය 2019.06.28 වන දිනැතිව යවා ඇත.
විරෝධය
එම ලිපියෙන් පසුව විශ්වවිද්‍යාල ප‍්‍රතිපාදන කොමිෂන් සභාවේ තීන්දුව ප‍්‍රසිද්ධ වී තිබුණි. ඒ ගැන සමාජ විරෝධයක් ඇතිවී තිබුණි. විශේෂයෙන්ම මුලින් ප‍්‍රායෝගික පරීක්ෂණය සමත්වූ සිසුන්ගේ විරෝධය මතුවිය. සිසුන්ගේ මෙන්ම පීඨාධිපතිවරුන්ගේ විරෝධයක්ද මතුවිය.
විශ්වවිද්‍යාලයට 2020 වසරේදී නවක සිසුන් බඳවා ගන්නා කාල වකවානුව දන්වා එවන මෙන් සෞන්දර්ය විශ්වවිද්‍යාලයට විශ්වවිද්‍යාල ප‍්‍රතිපාදන කොමිෂන් සභාව දැනුම් දී තිබුණි. ඒ අනුව උපකුලපති මහාචාර්ය සරත් චන්ද්‍රජීව පීඨාධිපතිවරුන් සමග සාකච්ඡුා කර අදාළ දින තීරණය කර දැනුම්දී තිබුණි.
එම අවස්ථාවේ ප‍්‍රායෝගික පරීක්ෂණය අසමත් සිසුන් විශ්වවිද්‍යාලයට බදවා ගැනීම සිදුවීම් පිළිබඳව සියලූ පීඨාධිපතිවරුන් සිය විරෝධය පළ කර ඇත. විශ්වවිද්‍යාලය බලාපොරොත්තු විය යුත්තේ ගුණාත්මක උපාධිධාරීන් බිහිකිරීම වුවත් ගුණාත්මකභාවය අබිබවා ප‍්‍රමාණාත්මකභාවය මෙහිදී ඉස්මතු වී ඇතැයි පීඨාධිපතිවරුන් පෙන්වා තිබුණි. උපාධිධාරීන් ලෙස පැවතිය යුතු විශ්වසනීයත්වය බිඳවැටීමත් මෙම ක‍්‍රියාවලියෙන් ප‍්‍රායෝගික පරීක්ෂණය තේරුමක් නැති වීමත් ගැන විරෝධය මතුවී ඇත.
සමත් සිසුන් විශ්ව විශ්වවිද්‍යාල විද්‍යාලයට නොතේරී අසමත් සිසුන් විශ්වවිද්‍යාලයට තේරී තිබීම පිළිබඳව කරුණු එක් රැුස් කරගත් මාපියන් කණ්ඩායමක් 2019.08.27 දින විශ්වවිද්‍යාලයට පැමිණ සිය විරෝධය දක්වා ඇත. විශ්වවිද්‍යාලය නිලධාරීන් හා පීඨාධිපතිවරුන් සමඟ ඔවුන් සියලූ දෙනාම රැුස්වීමක් පවත්වා තිබුණි. මහාචාර්ය සරත් චන්ද්‍රජීව ඉවත් කළේ ඒ අතරේය. මේ සිදුවීම්වල පසුබිම දන්නා ඕනෑම අයෙකු කල්පනා කරන්නේ මහාචාර්යවරයා ඉවත් කළේ ඉහත කී සිදුවීමෙහි ප‍්‍රතිඵලයක් ලෙස බවය.
දැන් තත්වය
සෞන්දර්ය විශ්වවිද්‍යාලය අප සැලකිය යුත්තේ ලංකාවේ වැදගත්ම අධ්‍යාපනික ආයතනයක් ලෙසය. ලංකාව සංවර්ධනය කිරීම ගැන කල්පනා කරන ඕනෑම අයෙකු කලා සංස්කෘතික ක්ෂේත‍්‍රයේ සංවර්ධනය ගැනත් කල්පනා කළ යුතුය. ඒ නිසාම සෞන්දර්ය විශ්වවිද්‍යාලයෙන් ප‍්‍රමිතියෙන් යුතු උපාධිධාරීන් බිහිකිරීම ගැන කල්පනා කළ යුතුය.
මීට පෙරද කිහිප වතාවක්ම සෞන්දර්ය විශ්වවිද්‍යාලයේ සිසුන් බඳවාගැනීමේ ක‍්‍රමවේදය විකෘති කිරීමට උත්සාහයන් ගෙන තිබුණි. ඇතැම් අවස්ථාවල අධිකරණයට යෑමේ සිදුවීම්ද වාර්තා විය. ඒ අතරින් එක්තරා කුප‍්‍රකට අවස්ථාවක් වන්නේ ශිරාණි බණ්ඩාරනායක අගවිනිසුරුවරිය ලෙස කටයුතු කළ කාලයේදී මෙම ප‍්‍රායෝගික පරීක්ෂණය නැවැත්වීමට ගත් උත්සාහයකට එරෙහිව දුන් තීන්දුවයි. එම තීන්දුව එවක ආණ්ඩුවේ සතුටට හේතු නොවීමද ඇයට එරෙහි දෝෂාභියෝගය ගෙන ඒමට හේතුවක් වූ බව ඇය සිය ‘උත්තරීතර’ කෘතියෙහි සඳහන් කර ඇත.
ඇතැම් අවස්ථාවල සෞන්දර්ය විශ්වවිද්‍යාලයට වැඩිපුර සිසුන් බඳවාගැනීමට උත්සාහ කරන්නේ ආණ්ඩු බලය හිමි උදවියට අවැසි පුද්ගලයන් එක් අයෙකු හෝ කිහිපදෙනෙකු ඇතුළත් කරගැනීමේ වුවමනාවෙන්ය. මීට පෙර එවැනි සිදුවීම් වාර්තා තිබුණි. මෙවර සිදුවූයේ එවැන්නක්දැයි පැහැදිලි නැත. කෙසේ වෙතත් මෙම ක‍්‍රමවේද ලෝකයේ පිළිගත් ක‍්‍රමවේදවලට අනුව කළ යුතු බව පැහැදිලිිය. නව ආණ්ඩුව මෙම කාරණා සම්බන්ධයෙන් කෙසේ ක‍්‍රියාත්මක වනු ඇතිදැයි අප බලා සිටිය යුතුය.
