ජනාධිපතිවරණයෙන් පසුව ශ‍්‍රී ලංකා පොදුජන පෙරමුණ සමඟ අත්සන් කර ඇති අවබෝධතා ගිවිසුමෙන් ඉවත්වී ඉදිරි මැතිවරණවලට වෙනම ඉදිරිපත් වෙන්නට තම පක්ෂයේ නායකයන් බලාපොරොත්තු වන බව ශ‍්‍රී ලංකා නිදහස් පක්ෂයේ ප‍්‍රබල නායකයෝ් කිහිපදෙනෙක් අනිද්දාට පැවසූහ.
පසුගිය සතියේ පොදුජන පෙරමුණට එරෙහිව චන්ද්‍රිකා බණ්ඩාරනායක හිටපු ජනාධිපතිවරිය ඇතුළු පිරිසක් සංවිධානය කර තිබූ රැුස්වීමට සහභාගී වූ ශ‍්‍රීලනිප සාමාජිකයන් සාමාජිකත්වයෙන් නෙරපීමට කටයුතු නොකළේ ශ‍්‍රීලනිපය පොදුජන පෙරමුණෙන් වෙන්වූ පසුව එම කණ්ඩායම නැවත එකතු කරගැනීමට බලාපොරොත්තු වන නිසා බව අනිද්දා සමග අදහස් දක්වමින් එක් නායකයෙක් ප‍්‍රකාශ කළේය.
ජනාධිපතිවරණයකදී ශ‍්‍රීලනිපය වෙනම තරග කිරීමෙන් ප‍්‍රයෝජනයක් නැති නිසා පොදුජන පෙරමුණ සමඟ සන්ධානගත වුවද, ජනාධිපතිවරණයෙන් පසුව එම සන්ධානයේ සිටීම ශ‍්‍රීලනිපයට අවාසිදායක බව එක් මන්ත‍්‍රීවරයෙක් කීය. 2015 මහමැතිවරණයේදීද ශ‍්‍රීලනිපය සමග දැන් සිටින නායකයන් පරාජය කිරීමට මහින්ද රාජපක්ෂ මහතාට හිතවත් පිරිස් කටයුතු කළ බව ඔහු සිහිපත් කළේය. මෙම ජනාධිපතිවරණ ව්‍යාපාරයේදී සංවිධානාත්මකව ශ‍්‍රීලනිප සාමාජිකයන්ට හූ කීමේ ව්‍යාපෘතියක් ක‍්‍රියාත්මක වූ බවත්, ඉදිරියේදීත් ශ‍්‍රීලනිපය දුර්වල කිරීමට පොදුජන පෙරමුණ කටයුතු කරනු ඇති බවත් ඔහු කීය. පොදුජන පෙරමුණ සමග සන්ධානගතව ලැබිය හැකි මන්ත‍්‍රීධුර සංඛ්‍යාවට වඩා වැඩි මන්ත‍්‍රීධුර සංඛ්‍යාවක් වෙනම තරග කළහොත් ලබාගැනීමට හැකිවනු ඇතැයි ඔහු පැවසීය.
ශ‍්‍රීලනිපයේ ඉහළම තනතුරක් දරන තවත් මන්ත‍්‍රීවරයෙකු ප‍්‍රකාශ කළේ මේ වනවිට පොදුජන පෙරමුණ සමඟ අත්සන් කර ඇති අවබෝධතා ගිවිසුමෙහි ඉදිරි මැතිවරණවලට පක්ෂ දෙක එක්ව පුටුව ලකුණෙන් තරග කරන බව සඳහන්ව ඇතත් ශ‍්‍රිලනිපය ඒ ගැන තවම අවසන් තීන්දුවක් ගෙන නැති බවය. කෙසේ වෙතත් ජනාධිපතිවරණ ව්‍යාපාරයට හා සන්ධානයේ එකඟතාවට බාධා ඇතිවිය හැකි නිසා ඒ ගැන නිල වශයෙන් කරුණු කීමට නොහැකි බව ඔහු කීය. 2018 වසරේ පැවති පළාත් පාලන ඡුන්දයෙන් පසුව පොදුජන පෙරමුණ සමග එක්වූ ශ‍්‍රීලනිප මන්ත්රීවරුන් කිහිපදෙනෙකුටද පහුගිය කාලයේදී හූ හඬ එල්ලවූ අතර, එම මන්ත්රීවරුන් අතරින් පිරිසක්ද නැවත ශ‍්‍රීලනිපය සමඟ එක්වීමට බලාපොරොත්තුවෙන් සිටිනවා නේදැයි අප කළ විමසුමකදී එම මන්ත‍්‍රීවරයා පැවසුවේ එලෙස මන්ත්රීවරුන් කිහිපදෙනෙකු සිටින බවයි. කෙසේ වෙතත් ජනාධිපතිවරණයේදී එකට කටයුතු කරන පක්ෂ දෙකක් ලෙස, එකමුතුකමට බාධා කරමින් පක්ෂ දෙක අතර පුද්ගලයන් මාරුවීමට ඉඩ තැබිය නොහැකි බව ඔහු කීය. ඉදිරියේදී එම මන්ත්රීවරුන් ඒ ගැන සලකා බලනු ඇතැයි ඔහු කීය. වාර්තා වන ආකාරයට පොදුජන පෙරමුණ සමඟ එක්වූ මන්ත්රීවරුන් නැවතත් ශ‍්‍රීලනිපයට එක්වීමට බලාපොරොත්තු වන්නේ පොදුජන පෙරමුණ සමඟ තරග කළහොත් පාර්ලිමේන්තු මැතිවරණයේදී මන්ත‍්‍රීධුර ලබාගැනීමට නොහැකි වනු ඇතැයි සිතමිනි.
