සජින් වාස් ගුණවර්ධන කියූ සැණින් මතකයට එන්නේ හිටපු ජනාධිපති මහින්ද රාජපක්ෂගේ ළඟින්ම සිටි ඔහුගේ බොහෝ වැඩකිඩ දන්නා පුද්ගලයා ඔහු බවය.
පසුගිය 6 වෙනිදා මාධ්‍ය සාකච්ඡුාවක් තබමින් හිටපු පාර්ලිමේන්තු මන්ත්රී සජින් වාස් ගුණවර්ධන, තමා සහ මහින්ද රාජපක්ෂ හිටපු ජනාධිපතිවරයා අතර සම්බන්ධය පැහැදිලි කරයි.
‘මම අවුරුදු 17ක් මහින්දලාගේ හැම කුණු බාල්දියක්ම ඇද්දා. ඒ කුණු සෝදලා පිරිසිදු කළා. ඒ සේරටම පස්සේ මාව අයින් කළා. පස්සේ මාව හිරේ තියාගන්න කටයුතු කළා‘.
2014 සැප්තැම්බරයේදී ඇමරිකාවේ පැවති සාදයක් අතරතුර එවක බි‍්‍රතාන්‍යයේ හිටපු ශ‍්‍රී ලංකා මහ කොමසාරිස් ක‍්‍රිස් නෝනිස්ට, එවක විදේශ කටයුතු අමාත්‍යාංශයේ අධීක්ෂණ මන්ත‍්‍රීවරයා සේ කටයුතු කළ සජින් වාස් ගුණවර්ධන බිම පෙරළාගෙන ප‍්‍රහාරයක් එල්ල කළ බව මාධ්‍යයේ වාර්තා පළවිය. එම සිද්ධියෙන් සජින් වාස් ගුණවර්ධන මහතාට කිසිදු අපල උපද්‍රවයක් සිදු නොවුණි. ඔහු යෙහෙන් සිටියේ ය. ඒ පිළිබඳව ජනපති නියමයෙන් විදෙස් අමාත්‍යාංශය කළ පරීක්ෂණයෙන් ද සජින් වාස් ගුණවර්ධන මහතාට කිසිම අහිතකර දෙයක් වුණේ නැත. එයින් එළියට ආවේ මහින්ද රාජපක්ෂ හිටපු ජනාධිපතිවරයාගේ බලය සජින් අත මොළවාගෙන සිටින බවය. ඔහු මහින්ද රාජපක්ෂගේ සමීපතමයා බවය.
අද ඔහුම එය වචනයට පෙරළා මහින්ද රාජපක්ෂගෙන් සහ රාජපක්ෂ පවුලෙන් විමසන්නේ තමන් රාජපක්ෂවරුන්ට කළ දේවල් අමතකද කියාය. ඔහු අද කියන්නේ ඒ වැඩකිඩ ගැන මහා පොතක් වුණත් ලියන්න හැකි බවය. අනේ ඒ පොත ලියන්න!! අපි ඔහුට කියමු. ඒ එමගින් රාජපක්ෂ පවුලේ රට පාලන කෙරුවාව කරළියට පැමිණෙන නිසා ය.
සජින් වාස් ගුණවර්ධනගේ කට මෙලෙස මහින්ද රාජපක්ෂ මහතාට විරුද්ධව ඇරෙන්නේ ඇයි?
මේ කෙටි ලියවිල්ලේ අරමුණ ඒ පිළිබඳව විමසීමය. ඒ මන්ද, රාජපක්ෂ පවුල් පාලනයට උරුම විසකුරු ස්වභාවය එතුළින් එළියට ගලන බැවිණි.
පසුගිය දා මුහුණු පොතට පැමිණි වීඩියෝ පටයක් විසින් ෆේස්බුක් සමාජය සොලවා දමනු ලැබීය. එහි ගැබ් වී තිබුණේ, පටිගත කරනු ලැබූ සජින් වාස් ගුණවර්ධන මහතාගේ සහ තවත් පාර්ලිමේන්තු මන්ත‍්‍රීවරයකුගේ යැයි කියන ¥රකථන සංවාදයකි. එම ඇමතුම අසා සිටින විට වැටහෙන්නේ එම ඇමතුම සජින් වාස් ගුණවර්ධන මහතා විසින් වෙනත් පාර්ලිමේන්තු මන්ත‍්‍රීවරයකු අමතා ගනු ලැබූ එකක් බවය. එම ඇමතුම ගැනීමට හේතුව සජින් වාස් ගුණවර්ධන මහතා පසුගිය නොවැම්බර් 6 වෙනිදා පැවති මාධ්‍ය හමුවේදී අනාවරණය කළේ ය.
‘මගේ බිරිඳට පොහොට්ටුවේ මන්ත‍්‍රීවරයෙක් නිතරම කෝල් කර කර කියලා තියෙනවා මොනවද මේ සජින් කරන්නේ? ඔයාලට ළමයි ඉන්නවා නේද? ඒගොල්ලන්ගේ ආරක්ෂාව ගැන හිතන්න ඕනෑ නේද කියලා.. මෙහෙම කීප දවසක්ම කෝල් කරලා පස්සේ එක දවසක කියලා තියෙනවා, රාජපක්ෂ කියන්න කිව්වයි කියලා, මාව මරනවා කියලා. මගේ ළමයි දෙන්නවත් පරිස්සම් කරගන්න කියලා. මේ කෝල් එකෙන් පස්සේ මගේ බිරිඳ හොඳටම බයවෙලා, මට මේ ගැන කිව්වා. ඊට පස්සේ මම ඒ මන්ත‍්‍රීවරයාට කතා කළා. මම ඒ කෝල් එක පටිගත කළා. ඒ මන්ත‍්‍රීවරයා මම කියපු දේවල්වලට දක්වපු ප‍්‍රතිචාරයෙන් මට හොඳටම වැටහුණා, ඔව් මේ කතාව ඇත්ත කියලා. ඇයි මාව මරන්නේ? මම සජිත්ට සහය දෙන නිසා.’
මෙහි පැහැදිලි හඬපටය මේ වෙනවිට අන්තර්ජාලයේ සංසරණය වෙමින් තිබෙයි.
මෙහිදී තමන් සහ තම දරුවන් මරා දමන බවට මහින්ද රාජපක්ෂ ප‍්‍රකාශ කළේ දැයි සජින් වාස් ගුණවර්ධන මහතා විමසයි. අනෙක් අන්තයෙන් කියන්නේ ‘අනවශ්‍ය වැඩක්නේ සජින්. ඔයාට ළමයි ඉන්නවා, නෝනා ඉන්නවා ටිකක් හිතන්න.’ කියා ය. ඔහු මෙය කිහිප වතාවක්ම පවසයි. මෙහිදී සජින් වාස් ගුණවර්ධන මහතා පවසන්නේ ‘එයාලගේ වැඩ හැම දෙයක්ම මම දන්නවා. කරලා බලන්න කියන්නකෝ, මමත් නිකං ඉන්නේ නෑ‘ යන්නයි. මෙලෙස මෙම ¥රකථන සංවාදය ඉදිරියට ඇදෙයි. එහිදී සජින් වාස් ගුණවර්ධන මහතා වසීම් තාජුඞීන් නම් රගර් ක‍්‍රීඩකයා ගැනද මතක් කරයි.
පසුගිය 6 වැනිදා මාධ්‍ය හමුවේදී සජින් වාස් ගුණවර්ධන මහතා මෙවැනි තවත් කතාවක් කියයි.
‘2010 සිට 2015 දක්වා මම ශ‍්‍රීලනිපය නියෝජනය කළ මන්ත‍්‍රීවරයෙක්. 2015 පස්සේ මහින්ද රාජපක්ෂ ජනාධිපතිවරයා පැරදුණාට පස්සේ මට අත්වුණ ඉරණම ගැනත් මම කියන්න කැමතියි. ආණ්ඩුව පැරදුණාට පසු මාව බන්නාධගාරගත කළා. ඒ මගේ ආරක්ෂකයන් භාවිත කළ වාහන කීපයක් ගැන ජනාධිපති ලේකම් කාර්යාලයේ සටහන් තුළ හරියට තිබුණේ නෑ කියලා. ඒ වෙලාවේ මහින්ද රාජපක්ෂ හිටපු ජනාධිපතිවරයා මාව බන්ධනාගාරය තුළ සිර කළා. ඔහු මම ඇප ගන්න හදන එකටත් බලපෑම් කළා. මම දන්නවා රාජපක්ෂ පවුල එකතුවෙලා තීරණයක් අරගෙන තිබුණා මේ වැරදිවලට හොරකම්වලට ඞීල්වලට සේරටම වැරදිකාරයා සජින් වාස් ගුණවර්ධන කියලා මගේ පිට කුණු සේරම තියන්න. මම බන්ධනාගාරය තුළ සිටි මාස හත තුළ ඒ පවුල මේ රටේ මාධ්‍යයට ඒත්තු ගැන්වුවා සජින් වාස් තමයි මේ සියලූ දේවල්වලට වගකියන්න ඕනෑ කියලා. මම හොරෙක් කියලා සමාජගත කළේ මේ පවුල. මහින්ද රාජපක්ෂ මේ සේරම කරන්නේ නාමල් රාජපක්ෂ ජනාධිපති කරන්න‘. ඔහු මෙලෙස රාජපක්ෂවරුන් ගැන, ඔවුන්ගේ පාලන කාලය ගැන බොහෝ දේ ප‍්‍රකාශ කරයි.
මෙම මාධ්‍ය හමුවේදී ඔහු හිටපු අමාත්‍ය සුසිල් පේ‍්‍රමජයන්ත මහතා පිළිබඳවද යම් තොරතුරක් අනාවරණය කරයි. ‘සුසිල් පේ‍්‍රම ජයන්ත ඇමතිතුමා, ඔබතුමාට මතකද මම ඔබතුමා ඛනිජ තෙල් සංවර්ධන අමාත්‍යවරයා විදිහට ඉන්නකොට මහින්ද රාජපක්ෂ හිටපු ජනාධිපතිවරයාගේ පණිවිඩයක් අරගෙන ඔබතුමා හමුවෙන්න මම ආවා. ඒ පණිවිඩයෙන් එතුමා ඔබතුමාට කිව්වේ අමාත්‍ය ධුරයෙන් ඉල්ලා අස්වෙන්න කියලා. එතකොට ඔබතුමාට මතකද? ඔබතුමා බැහැ කිව්වා. එතකොට හිටපු ජනාධිපතිවරයා ඔබතුමාට වීඩියෝ එකක් පෙන්නුවා. ඒක දැකලා ඔබතුමාට ක්ලාන්තේ ආවා. ඊට පස්සේ ඔබතුමා ඉල්ලා අස්වුණා. අනුර යාපා ඇමතිතුමා ඔබතුමාගේ අමාත්‍යාංශය භාර ගත්තා. ඊට පස්සේ ඔබතුමාට විද්‍යා හා තාක්ෂණ අමාත්‍යාංශය දුන්නා. රාජපක්ෂලා මිනිස්සු බ්ලැක්මේල් කළේ එහෙමයි. ඒක තමයි රාජපක්ෂ ක‍්‍රමය.‘
ඔහු ප‍්‍රකාශ කරන මේ කරුණ සත්‍ය නම් සමහර අමාත්‍යවරුන්ගේ ෆයිල් මහින්ද ඕනෑ වෙලාවට ගන්න ළඟ තියාගෙන හිටියා කියන කරුණට, ඒ අමාත්‍යවරුන් ගැන වීඩියෝ පටයන්ද තියාගෙන සිටි බවට වූ තොරතුරද එකතුකරන්නට පුළුවන් ය.
සජින් වාස් ගුණවර්ධන මහතා මහින්ද රාජපක්ෂ මහතාගේ සමීපයේ සිටිමින් රාජපක්ෂ පවුලට ඔහු කියන ආකාරයටම සට්ටැඹියෙකු සේ කටයුතු කළ කාලයේ ඔහු කළ බොහෝ කාර්යයන් සහ හැසිරුණු ආකාරය අමතක කළ නොහැකිය. යම් යම් චෝදනාවලට ඔහු උසාවියක් ඉදිරියේ වරදකරුවෙකු නොවුණත් ඔහුට මිනිසුන් අතරින් නැගඑන චෝදනා සියල්ල බැහැරකර දමන්නටද බැරිය. එහෙත් කුමනාකාරයේ පුද්ගලයෙකුට වුණත් මරණ තර්ජන කිරීම අනුමත කළ නොහැකිය. බල්ලන් සමග සිටියා නම් මැක්කන් සමග නැගිටපං කියමින් මේ සිදුවීම අමතක කරන්නට ද බැරිය. එනිසාම අප මේ මරණ තර්ජනය පිළිබඳව කතාකළ යුතුය. අනික් පැත්තෙන් පාලන බලය ලබාගන්නට ඕනෑම දෙයක් කරන්නට ලෑස්ති මේ පවුල ගැන නැවත සංවාදයක් ආරම්භ කළ යුතුය. එයට මෙම සිදුවීම හොඳම අවස්ථාව සපයා දෙයි.
මේ හඬපටය පිළිබඳව සහ මේ තර්ජනය පිළිබඳව පොලිසියට පැමිණිලි කළ බවද සජින් වාස් ගුණවර්ධන ප‍්‍රකාශ කරයි. ඊට අමතරව ඔහු මහින්ද රාජපක්ෂ මහතාට මේ තර්ජනය ගැන සඳහන් කරමින් 1995 අවුරුද්දේ සිට තමන්ට ඔහු සමග තිබුණු සමීප සම්බන්ධතාව මතකයට නගමින් ලිපියක් යවා ඇතැයි කියයි. මේ මරණ තර්ජනය පිළිබඳ පොලිස් පරීක්ෂණවල අනාගතය කුමක් වුණත් පුරවැසියා ලෙස නැවත නැවතත් කල්පනා කළ යුත්තේ බලය හමුවේ වියරුවෙන් හැසිරෙන, බලය ලබාගැනීමට ඕනෑම දෙයක් කරන්නට ලෑස්ති මේ පවුලට නැවත පාලන බලය ලබාදෙනවාද නැද්ද යන්නයි.
