නලින්ද ජයතිස්ස – ජාතික ජන බලවේගය
ජාතික ජන බලවේගයට මාධ්‍ය ආයතනවලින් ආවරණය ලැබුණේ තෙවැනි අපේක්ෂකයෙක් ලෙස සලකමින් බව පෙනෙනවා. ඒ සැලකීමට අභියෝග කරන ප‍්‍රතිඵලයක් මැතිවරණයේදී ලැබේයැයි සිතනවාද?
විද්‍යුත් මාධ්‍ය අපේක්ෂකයන් දෙදෙනෙක් වෙනුවෙන් ප‍්‍රසිද්ධියේ වැඩ කරනවා. ඔවුන්ගේ ව්‍යාපාරික අරමුණුවලට හිමිකරුවන් සියලූදෙනාම පාහේ පෞද්ගලික වුවමනාවලට චැනල් මෙහෙයවනවා. සමහර වෙලාවට අපේ රටේ මැතිවරණ කොමිසමේ නීති මගින්වත් පාලනය කරන්න බැරි තරමට ඔවුන්ගේ ක‍්‍රියාකාරීත්වය ඔඩු දුවලා තියෙන්නේ. මැතිවරණයකදී ජනතාවගේ මතයට සාධාරණ ඉඩක් ලබාදෙමින් තමන්ගේ මාධ්‍ය සදාචාරය ආරක්ෂා කිරීම මාධ්‍ය හිමිකරුවන්ගේ වගකීමක්. කවුරුත් දැනගන්න ඕනෑ මාධ්‍ය ආයතන සතු කැමරා, සන්නිවේදන උපකරණවල හිමිකාරීත්වය හිමිකරුවාට තිබුණාට සංඛ්‍යාත අයිති ජනතාවට කියලා. තමන්ගේ ව්‍යාපාර අරමුණු මත ඒ මාධ්‍ය ආයතන අපේක්ෂකයාට උදව් කරන බව ප‍්‍රසිද්ධ කාරණයක්. ඒක දැනගෙන තමයි ජනතාව මාධ්‍ය දිහා බලන්නේ.
එහෙත් ඊට වඩා කනගාටුදායක තත්වය තමයි රටේ ප්රජාතන්ත්රවාදය වෙනුවෙන් පෙනී හිටපු යම් පිරිසක් මේ මැතිවරණ ව්‍යාපාරයත් දෙදෙනෙකු අතර සටනක් බවට පත්කරන්න උත්සාහ කිරීම. අපි වැඩිපුර ඒ ගැන සැලකිලිමත් වෙන්න ඕනෑ. යම්කිසි කෙනෙක් ප්රජාතන්ත්රවාදය හා යහපාලනය ගැන බලාපොරොත්තුවක් තියාගෙන හිටියා නම්, ඒවා ඉටු නොකළ අය පසුපස නැවත යන එක තේරුමක් නැහැ. 2015දී ජනතාව රාජපක්ෂ පාලනය පරාජය කිරීම සඳහා ලක්ෂ 62ක ජනවරමක් ලබාදුන්නා. ජනතාවට කරන්න පුළුවන්කම තිබුණේ ඒකයි. ඒකාධිපති, ෆැසිස්ට් පන්නයේ පාලනය පරාජය කිරීමටයි ජනතාව ඡුන්දය දුන්නේ. ඒ ඡුන්දයෙන් බලය ලබාගත් ආණ්ඩුව ජනතා බලාපොරොත්තු ඉටු කළේ නැහැ. එවැනි තත්වයක් තුළදී තවදුරටත් ඔවුන් ගැන විශ්වාසය තැබීම සුදුසු නැහැ. ඒක අපේ දේශපාලන සෞඛ්‍යයට හිතකර නැහැ. රනිල් වික‍්‍රමසිංහගේ උගුලේ වැටෙන්නට ප්රජාතන්ත්රවාදය අගය කරන කවුරුත් ඉදිරිපත් විය යුතු නැහැ.
එහෙත් ජනාධිපතිවරණයෙන් ජයගන්නට ජාතික ජන බලවේගයට පුළුවන් වේවිද?
ජනාධිපතිවරණයට ඉදිරිපත් වුණේ දිනන්න තමයි. අපව ජයග‍්‍රහණය කරවීම ජනතාව සතු වගකීමක්. ජයග‍්‍රහණය අපට අසීරු බව කියලා දේශපාලනයේ තියෙන ඉඩකඩ පිළිබඳව සලකන්නේ නැතිව කාට හරි මේ ඡුන්ද කුට්ටි ලියලා දීලා පැත්තකට වෙන්න අපි සූදානම් නැහැ. විකල්ප බලවේගයකට ජනාධිපති වෙන්න කිසිම ඉඩක් නැහැ කියලා කවුරුහරි කියනවා නම්, ව්‍යවස්ථාවට දෙන්නෙකුට තමා ඉදිරි පත්වෙන්න පුළුවන් කියලා වගන්තියක් එකතු කරන්න තිබුණා. එහෙම වගන්තියක් නැති නිසා, විකල්ප බලවේගයකට ජනාධිපතිවරණයට ඉදිරිපත් වෙන්න තියෙන ඉඩකඩ අහුරන එක වැරදියි.
ජාතික ජන බලවේගය ජනාධිපතිවරණය ජයගැනීමේ ඉඩක් නැතැයි හිතන කෙනෙක් ඉන්නවා නම්, එවැන්නෙක් ඔබේ කණ්ඩායමට ඡුන්දය දිය යුත්තේ ඇයි?
ජාතික ජන බලවේගයට ජනතාව ඡුන්දය දෙන්න ඕනෑ මේ රට අවුරුදු 71ක් තිස්සේ ශ‍්‍රීලනිපය හා එජාපය විනාශ කරපු නිසා. ඒ යූඇන්පීයෙන් එන සජිත් පේ‍්‍රමදාසට මේ රටේ තවදුරටත් අලූත් දෙයක් කරන්න බැරි බව ඕනෑවටත් වඩා ඔප්පු කරලා තියෙනවා. මේ රට පාලනය කරපු රාජපක්ෂ කල්ලියටත් අලූතින් දෙයක් මේ රටට දෙන්න බැරි බව ඔප්පු වෙලා. එසේ තිබියදී මේ පක්ෂ දෙක පස්සේ තවදුරටත් යනවා නම් මේ රටට අනාගතයක් නැහැ.
මේ රටට අනාගතයක් ගැන අපේක්ෂාවක් තියෙන සියලූදෙනා ජාතික ජන බලවේගයත් එක්ක එකතුවෙන්න ඕනෑ. එකතුවෙමින් ඉන්න බව අපි දන්නවා. ඒ එකතුවෙන ජනතාව වැළැක්වීම සඳහා අපට දිනන්න බැරි බවට මතවාදයක් දියත් කරන බව දන්නවා. මේ දෙපැත්තම එකම විදියට ඉතාම කැත දේශපාලන තුරුම්පු පාවිච්චි කරමිනුයි දේශපාලනය කරන්නේ. එහෙත් අපට මේ දෙන්නාගෙන් අඩු නරක වැඩි නරක කියලා එකක් නැහැ. දෙපැත්තම නරකයි. ජනතාවට දුන් පොරොන්දු දෙපැත්තෙන්ම ඉටු කරලා නැහැ. අලූත් අපේක්ෂාවක් ජයග‍්‍රහණය කිරීම සඳහා පෙළගැසිය යුතුයි. ඒකට වචනයකින් හෝ බාධා කරන අය මොන කඳවුරේ හිටියත් එක සමානයි.
ජාතික ජන බලවේගයේ අපේක්ෂකයාගේ තේමාව විදියට අපේක්ෂාව කියන සංකල්පය පාවිච්චි කරනවා. වසර විස්සක පමණ කාලයක් තිස්සේ ජනාධිපතිවරණයකට ඉදිරිපත් නොවී ඉඳපු කණ්ඩායමක් විදියට ජනාධිපතිවරණයෙන් අපේක්ෂා කරන්නේ ඉන් පසු අනාගතය ගැනද?
ජනාධිපතිවරණවලදී ජවිපෙ තීන්දු ගත්තේ අපට ලැබෙන ඡුන්ද ගොඩ දිහා බලාගෙන නෙවෙයි. ඒ මොහොතේ රට ඉදිරියේ පැනනැගී තිබෙන දේශපාලන අභියෝගය මොකක්ද කියලා බලලා ඒ සඳහා අපට ගත හැකි ප‍්‍රායෝගික දේශපාලන ක‍්‍රියාමාර්ගය අපි තෝරාගත්තා. ඒ නිසා තමයි 2005දී රනිල් වික‍්‍රමසිංහගේ රට බෙදන ව්‍යාපෘතිය පරාජය කිරීම සඳහා අපි මහින්ද රාජපක්ෂ මහතාව බලයට පත් කරන්නට උදව් කළේ. 2010දී යුද්ධය අවසන් වෙලා තිබියදීත් අපි සරත් ෆොන්සේකා මහතාව බලයට පත් කරන්න උදව් කළේ ප්රජාතන්ත්රවාදය වෙනුවෙන්. 2015 දීත් අපි කළේ ඒක. ඒ හැම මොහොතකදීම රටට සම්පූර්ණ වශයෙන් හෝ අර්ධ වශයෙන් දේශපාලන ජයග‍්‍රහණ හිමිවෙලා තියෙනවා. මේ මොහොතේ තිබෙන්නේ මේ දෙගොල්ලන්ගෙන් කවුරුවත් පිළිබඳ විශ්වාසයක් නොතබා රටේ ජනතාවගේ බලයක් ඔස්සේ රටේ ප්රජාතන්ත්රවාදය දිනාගැනීම, ආර්ථික සංවර්ධනය කිරීම, සමාජ සාධාරණත්වය තහවුරු කිරීම, නීතියේ ආධිපත්‍යය දිනාගැනීම වගේ දේවල්. එයට අපේම මාවතක් තෝරාගැනීම හැර කිසිදු විකල්පයක් මේ මොහොතේ ඉතිරිවෙලා නැහැ.
ගෝඨාභය රාජපක්ෂ මහතා ලංකාවේ ජනාධිපති වුණොත් ඉන්පසුව නැගෙන ප‍්‍රශ්නවලට පිළිතුරු දෙන්න පුළුවන්ද?
ගෝඨාභය රාජපක්ෂ එක්සත් ජාතික පක්ෂයෙන් හදන මහා භීතිකාවක් කරගෙන යන්න පුළුවන් කෙනෙක් නෙවෙයි. ඔහු ඉතාමත්ම දුර්වල කෙනෙක්. අපේ හමුදාවේ හිටපු සාමාන්‍ය සොල්දාදුවෝ යුද්ධයට මුහුණදෙද්දී තමන්ගේ අතේ තිබුණු ආයුධය අත්හැරලා පෙන්ෂන් එකත් එපා කියලා ගෝඨාභය රාජපක්ෂ ලංකාවෙන් ගියේ. ඉන්පස්සේ ඔහු ආවේ තමන්ගේ අයියා ජනාධිපති වීම නිසා. ඒ ඇවිල්ලාත් ඇමෙරිකානු පුරවැසිකම සම්පූර්ණයෙන් අත්හැරියේ නැහැ. එහෙම කළේ අයියා පරාදවුණා නම් ආයෙත් ඇමෙරිකාවට යන්න බලාගෙන. ගෝඨාභය රාජපක්ෂ තමන්ගේ සහෝදරයාගේ බලය අවභාවිතයේ යෙදෙව්වා. එහෙම නැතිව යූඇන්පීයෙන් මතු කරන තරම් සංවිධානාත්මක, ෆැසිස්ට්, ඒකාධිපති පාලනයක් ගෙනයන්න පුළුවන් කෙනෙක් නෙවෙයි ගෝඨාභය රාජපක්ෂ කියන්නේ. ජාතික ජන බලවේගයේ අපි ගෝඨාභයට බය නෑ. අද ගෝඨාභය රාජපක්ෂලා අරගෙන ගිය ඒකාධිපති තුච්ඡු පාලනයට නොදෙවනි ක‍්‍රියාවක් තමයි ඔහුට බලයට එන්න ඉඩහැරලා එජාපය කරමින් ඉන්නේ.
