මහින්ද යාපා අබේවර්ධන
ගෝඨාභය රාජපක්ෂ මහතා ඉදිරිපත් කළ ප‍්‍රතිපත්ති ප‍්‍රකාශනයෙහි විධායක ජනාධිපති ක‍්‍රමය අහෝසි කිරීමේ යෝජනාවක් නැත්තේ ඇයි?
අපි විධායක ජනාධිපති අහෝසි කරන්න තීන්දු කරලා බොහෝ කාලයක් වෙනවා. ඒත් ප‍්‍රතිපත්ති ප‍්‍රකාශයට ඒ කාරණය ඇතුළත් කරන්න අපි කල්පනා කළේ නැහැ. ඒත් අපි බලාපොරොත්තු වෙනවා ව්‍යවස්ථා සංශෝධනයක් කරන්නට. ඒ රටේම ජනතාවගේ මැදිහත්වීමෙන්. අපි ‘ජනතාව සමඟ පිළිසඳරක්’ කියන වැඩසටහනක් ක‍්‍රියාත්මක කළා. ඒකෙදී ජනතාව ඉදිරිපත් කළ අදහස්වල සම්පිණ්ඩනයක් හැටියටයි ප‍්‍රතිපත්ති ප‍්‍රකාශය හැදුවේ. අපි විශ්වාස කරන්නේ ව්‍යවස්ථා සම්පාදනයත් රටේම මිනිස්සු එක්ක කතාකරලා කරන්න ඕනෑ දෙයක්. එක් එක් දේශපාලන පක්ෂවලට ඕනෑ විදියට ඒවා කරන්න බැහැ. අපි බලාපොරොත්තු වෙන්නේ සම්පූර්ණ රටේම ජන සම්මතවාදය ක‍්‍රියාත්මක වෙන වැඩසටහනක් ඉදිරියට ගෙනයන්නයි. එක් එක්කෙනාට වුවමනා විදියට පාලනය කරන්නේ නැහැ.
එහෙත් ගෝඨාභය රාජපක්ෂට ප‍්‍රසිද්ධියේ සහාය දෙන අය බලාපොරොත්තු වෙන්නේ ‘දැඩි පාලනයක්‘ නේද?
දැඩි පාලනය කියලා කීවාට, ඒකෙන් අදහස් වෙන්නේ ජනමතය එක්ක යන දැඩි පාලනයක්. අපි දැඩිව හෝ මෘදුව ක‍්‍රියාත්මක කරන්නේ ජනතාවගේ අවශ්‍යතාවය.
එහෙත් කුමාර වෙල්ගම මහතා පෙන්වන්නේ පොදුජන පෙරමුණේ රාජපක්ෂලා හැර අනෙක් කවුරුවත් ඇමතිකමකින් එහා ගිය කිසිවක් බලාපොරොත්තු වෙලා වැඩක් නැති බව. ඒක ජන සම්මතවාදයට ගැළපෙන්නේ නැහැ නේද?
වෙල්ගම ඇමතිවරයා ගැන නම් කතාකරන්න බලාපොරොත්තු වෙන්නේ නැහැ. එතුමාට තියෙන්නේ පෞද්ගලික ප‍්‍රශ්නයක්. ඒ ගැන දන්න නිසා අපි ඒ ගැන කතාකරන්නේ නැහැ. එයාගේ පෞද්ගලික වුවමනා සාධාරණීකරණය කිරීම සඳහා විවිධ තර්ක ඉදිරිපත් කරනවා.
ජ්‍යෙෂ්ඨ දේශපාලනඥයෙක් විදියට රාජපක්ෂවරුන්ට පමණක් බලය හිමි පක්ෂයක හිඳීම ගැන ඔබට අදහසක් ඇති නේද?
එහෙම බරපතළ ගැටලූවක් මම දකින්නේ නැහැ. ඔය කියන දේ ඇත්තක් බව පෙනෙන්නේ නැහැ. අපි දකින්නේ රටේ තියෙන අවශ්‍යතාවය සහ දැන් තියෙන අනාරක්ෂිතභාවය ගැනයි. ජාතික ආරක්ෂාව ගැන වැඩි අවධානය යොමු කරලයි අපි නායකයන්ව තෝරාගත්තේ.
ජාතික ආරක්ෂාව හා ජාතික සමඟිය යන දෙකම සමබරව පවත්වාගෙන යන්න ගෝඨාභයට හැකි බව හිතනවාද?
අද තියෙන මුස්ලිම් අන්තවාදය අලූත් දෙයක්. ඒක ලත් තැනම ලොප් කළ යුතුයි. මේ රජයට ඒක කරන්න බැහැ. ඒ ප‍්‍රශ්නය මතු වුණ ගමන් විසඳුම් හොයන්න තිබුණා. ඒක තමයි රජයකින් විය යුත්තේ. මේ ආණ්ඩුවෙන් ඒක සිද්ධවුණේ නැහැ. උතුරු නැගෙනහිර පළාත්වල පවා ගම සමඟ පිළිසඳරක් වැඩසටහන කරද්දී ඔවුන් වැඩි දෙනෙකුගේ මතය වුණේ ඒ මිනිස්සුන්ට දැන් ආණ්ඩුක‍්‍රම ව්‍යවස්ථාව වෙනස් කරන්නත්, බලය බෙදාගන්නත් ඕනෑ නැති බව. ඔවුන්ට වැදගත් විදියට රටේ ජීවත්වෙන්න ඉඩකඩත්, රැුකියා අවස්ථාත් සහ සංවර්ධනයත් තමයි ඉල්ලන්නේ. ඒ සංවර්ධනය තමයි අපි දෙන්න ඕනෑ. දැන් මිනිස්සු කතා කරනවා මහින්ද මහත්තයාගේ කාලේ හැරුණාම මෙහේ වෙනත් වැඩක් කෙරිලා නැති බව. තවමත් ඒ මිනිස්සු ජීවත්වෙන්නේ පරණ වැඩවසම් යුගයේ. ඒකෙන් ඒ මිනිසුන්ව එළියට අරගෙන පූර්ණ නිදහස දෙන්න ඕනෑ. රටේ අනාගතයට දායකත්වය දෙන්න ඕනෑ. ඒ මිනිසුන්ව කොන් කරගෙන ඉන්න තාක් කල් රට හැදෙන්නේ නැහැ. කෝච්චි පාරවල් හැදුණා, පැය හයෙන් කොළඹ එන්න පුළුවන් වුණා කියලා ඔවුන් කියනවා. ඔවුන් කියන්නේ අධිවේගී මාර්ගය හැදුවා නම් මීටත් වඩා හොඳයි කියලා. එහෙම වුණොත් යාපනේ ඉඳලා පැය හතරෙන් පහෙන් කොළඹටම එන්න පුළුවන්. ඉතින්, අපි ඒ වැඩපිළිවෙළ තමයි ක‍්‍රියාත්මක කරන්නේ.
ඔය අදහස ඔබේ පක්ෂයේ නායකයන් නිතර කියනවා. එහෙත් ඒකෙන් ඔවුන්ගේ අනන්‍යතාවය ගැන ඉල්ලීම් භෞතික සංවර්ධනයට පමණක් ලඝු කරනවා නේද?
භෞතික සංවර්ධනය විතරක් මදි. ආධ්‍යාත්මික වශයෙනුත් ඔවුන්ට සංවර්ධනය ඕනෑ. දරුවන්ට රැුකියා ඕනෑ. ඔවුන්ට අනාගතයක් සහ සමාජයේ පිළිගැනීමක් අවශ්‍යයි. ඒකෙන් තමයි සංහිඳියාවත් හැදෙන්නේ. දැන් සමහරු කියන විදියට එයාලාට වෙනම පාර්ලිමේන්තුවක් දීලා, කැමති දේවල් කරගන්න කියලා කියන එක නෙවෙයි වැඬේ. දැන් දෙමළ මිනිසුන්ට සාම්ප‍්‍රදායික නායකත්වය ගැන කිසිම විශ්වාසයක් නැහැ. ඒ නායකයන් කරලා තියෙන්නේ බොරු.
ඔබේ අදහස දෙමළ ජාතික සන්ධානයේ නායකයන් ගන්න තීන්දුවට මැතිවරණයේදී දෙමළ ජනතාව එකඟ නොවේවි කියලාද?
පැහැදිලිවම. දැන් ටීඑන්ඒ එක එකඟවුණ යෝජනා 13ට දෙමළ ජනතාව එකඟ නෑ. මිනිස්සු ඒ ඉල්ලීම් ගැන කතාකරන්නේත් නැහැ. සමහරු ඒවා ගැන දන්නේත් නැහැ. ගුරුකන්දේ හාමුදුරුවන්ගේ ආදාහනයට ටීඑන්ඒ නායකයෝ කරපු දේ දැක්කානේ. ඒ සිද්ධිය සුළුකොට තකන්න නරකයි. සිංහල ජනතාව කවදාවත් එහෙම දේවල් දෙමළ ජනතාවට කළේ නැහැ නේද කියලයි දැන් දෙමළ අය කතාවෙන්නේ. දෙමළ අයට මෙහේ එන්න බැහැ, කෝවිල් තියන්න බැහැ කියලා කවදාවත් සිංහල ජනතාව කීවේ නැහැනේ. ඒ මිනිස්සු ඒ බව කියනවා. දෙමළ ජනතාව කියන්නේ ප‍්‍රබුද්ධ ජනතාවක්.
ඔබ අදහස් කරන්නේ 1983 කළු ජූලිය දෙමළ ජනතාවට අමතක බවද?
එහෙම දේවල් සිද්ධවුණා තමයි. දෙපැත්තෙන්ම එහෙම දේවල් සිද්ධවුණා. ඒත් දැන් ඒවා ඉවරයිනේ. ඔබ මොහොතටවත් හිතනවාද, දැන් සිංහල ජනතාව එහෙම කෝලාහලයකට මැදිහත් වේවි කියලා. ඒ යුගය දැන් ඉවරයි. එදා සිංහල සොල්දාදුවෝ දහතුන්දෙනෙක් මැරුවා කියලා කෝපයෙන් කෝලාහලයකට පැටලූණාට අනාගතයේදී එහෙම දෙයක් වේවි කියලා හිතන්නේ නැහැ. දැන් ජනතාව බුද්ධිමත්. හැම ගෙදරකම ඉන්නවා උසස් පෙළ, සාමාන්‍ය පෙළ සමත් ළමයි. එහෙත් සාමාන්‍ය පෙළවත් නැති උදවිය රට පාලනය කරන්න ගියොත් තමයි ගැටලූව මතුවෙන්නේ. අද නායකත්වය ඉල්ලන සමහර අයට රට පාලනය කරන්න තරම් බුද්ධියක් නැහැ.
ගෝඨාභය රාජපක්ෂ මහතාගේ ජනප‍්‍රියත්වය මහින්ද රාජපක්ෂ මහතාගෙන් ලැබුණු එකක් බව විශ්වාස කරනවාද?
පැහැදිලිවම ගෝඨාභය මහතා ලබන ජනප‍්‍රියත්වයෙන් සීයට අනූවක් මහින්ද මහත්තයාට අයිතියි. කිසිම සැකයක් නැහැ. මහින්ද රාජපක්ෂ මහතාට තියෙන ජනප‍්‍රියතාවය එසේ මෙසේ එකක් නෙවෙයි. ඒ ජනප‍්‍රියත්වය තමයි රට පුරා තියෙන්නේ. ඔහු තමයි ප‍්‍රායෝගිකව රටේ වැඩ කරලා පාලනය කරන විදිය ගැන කියලා දුන්නේ. ඒකේ අඩුපාඩු තිබුණා තමයි. ඒ නිසා තමයි එතුමාව ජනතාව පැරැුද්දුවේ. ඒත් ඒ අඩුපාඩු හදාගෙන මහින්ද මහත්තයාව ගේන්න තමයි මිනිස්සුන්ට දැන් ඕනෑ. මහින්ද මහත්තයාට ඉල්ලන්න බැරි හින්දා, විකල්පයක් වශයෙන් තමයි ප‍්‍රතිපත්ති මාලාවක් හදලා ඒක ක‍්‍රියාත්මක කරවන්නට ගෝඨාභය මහත්තයාව ගේන්නේ.
රාජපක්ෂ ආණ්ඩුව සමයේ තිබුණු අඩුපාඩු හදාගත් බව කීවත්, බොහෝ අය කියන්නේ ආරක්ෂාව ඉදිරියට දමමින් ගෝඨාභය රාජපක්ෂ මහතා කරපු ඇතැම් දේවල් රාජපක්ෂ රජය පරාජය වීමට ප‍්‍රධාන හේතුවක් වුණ බව නේද?
ආරක්ෂාව ගැන දැඩි අවධානයක් යොමු නොකළොත් වුණ දේ දැන් රටම දැක්කානේ. ඉස්සෙල්ලා රට තියෙන්න එපැයි. රට රකින්න එපැයි. ආරක්ෂක අංශවලින් තීරණ අරගෙන ඒවා දැඩි ලෙස ක‍්‍රියාත්මක නොකළොත් භයානක ප‍්‍රතිඵල ලැබෙනවා. එක එක්කෙනාට ඕනෑ හැටියට බෝම්බ ගේන්න දීලා බලාගෙන ඉන්න එකයි දැන් වෙලා තියෙන්නේ. පාස්කු ඉරිදා ත‍්‍රස්ත ප‍්‍රහාරයට කලින් බුද්ධි අංශයෙන් තොරතුරු දුන්නා. අපට අපේ‍්‍රල් 9 වැනිදා ලියුමකින් ඔය බෝම්බය ගැන බුද්ධි අංශ කීවානේ. ඒ ලියුමේ පිටපතක් මගේ ළඟ තියෙනවා. ප‍්‍රහාරය ගැන වැදගත් තොරතුරු ඒ ලියුමේ තිබුණා. ඊට පස්සේ තමයි අපේ‍්‍රල් 21 වැනිදා බෝම්බ පිපිරුණේ. අපට කිව්වේ එළියේ ගැවසෙන්න එපා, මෙහෙම දෙයක් වෙන්න පුළුවන්, අවධානයෙන් ඉන්න කියලා. ඒත් ආණ්ඩුව අවධානයෙන් ඉඳලා නැහැ. අන්තිමේ බෝම්බය පිපිරිලා මිනිස්සු සිය ගාණක් මැරුණා. ඔය වගේ වෙලාවක දැඩි තීන්දු ගන්නේ නැතිව රට රකින්නේ කොහොමද. අපට ආරංචි හැටියට නායකයාට ප‍්‍රහාරය ගැන පණිවුඩය කීවාම, එයා කියලා තියෙනවා ඔය මගේ මුස්ලිම් ඡුන්දවලට ගහන්නයි යන්නේ කියලා. තමුසෙලාගේ පාඩුවේ ඉන්න කියලා ජනාධිපතිවරයා කීවාලූ. ඡුන්ද කැඩෙන බව කියලා රටේ ආරක්ෂාව නැති කරනවා නම් ඒක වැරදියි.
අපේ‍්‍රල් 9 වැනිදා ලියුම් ලැබුණා නම් ඔබටත් ජනතාවට අනතුරු හඟවන්න අවස්ථාව තිබුණා නේද?
අපේ ආරක්ෂක අංශවලටයි ලියුම ඇවිල්ලා තියෙන්නේ. අපට නෙවෙයි. අනෙක ඒ තොරතුරු ප‍්‍රසිද්ධ කරන්න එපා කියලා දැනුම්දීලා තියෙනවා. ප‍්‍රභූවරයා ආරක්ෂා කරගන්න කියලා උපදෙස් දීලා තියෙන්නේ. ආරක්ෂක නිලධාරීන් අපට තියෙන හිතවත්කම නිසා ඒ ගැන අපට කීවා. අපි නෙවෙයිනේ ඒ වගේ වෙලාවක ක‍්‍රියාත්මක වෙන්න ඕනෑ. ඒක රජයේ වගකීමක්නේ කියලා අපි කල්පනා කළා. අපි හිතුවේ රජය මේ ගැන රහසින් වැඩපිළිවෙළක් ක‍්‍රියාත්මක කරලා, රහසේම මේ උත්සාහය නවත්වයි කියලා. ජනතාව බියගන්වන්න ඕනෑ නැති නිසා තොරතුරු ප‍්‍රසිද්ධ නොකළ බවයි අපි හිතුවේ. අපි ඔය අස්සේ කෑගහන්න ගියොත් බුද්ධි අංශවලට පවා බාධාවක් වෙනවානේ. ඒත් ඉතින් බුද්ධි අංශ අකර්මණ්‍ය කරලානේ තිබුණේ.
අපේ‍්‍රල් 9 වැනිදා වෙද්දී ප‍්‍රහාරය ගැන තොරතුරු හොයාගත්තා නම් බුද්ධි අංශ දුර්වල නැහැ නේද?
ඒක ඇත්ත. බුද්ධි අංශවල කටයුත්ත කරපු නිසයි තොරතුර ලැබුණේ. ඒත්, ඒකෙන් තේරෙන්නේ මෙයාලා දැනගෙන හිටියත් පියවරක් ගත්තේ නැති බව. මීට කලිනුත් පියවර ගන්න තිබුණානේ. බුදුපිළිම කැඩූ වෙලාවේ ක‍්‍රියාත්මක වෙන්න තිබුණා. වනාතවිල්ලූවේ වත්තකින් ආයුධ අහුවුණාමත් පියවර ගත්තේ නැහැ. ඒ දවස්වල මම පාර්ලිමේන්තුවේදීත් ඔය ගැන ඇහුවා.
ගෝඨාභය රාජපක්ෂ මහතාට 2006 දී තමන්ටම එල්ලවුණ පිත්තල හන්දියේ බෝම්බය වළක්වාගන්න බැරි වුණා නම්, අනාගතයේ එන ප‍්‍රහාර වළක්වාගන්න පුළුවන් වේවි කියලා හිතන්නේ කොහොමද?
ඒක යුද්ධයක් තිබුණු වෙලාවක්නේ. ඒත් යුද්ධය ඉවරවෙලා එහෙම වුණේ නැහැනේ. යුද්ධයක් යද්දී කොතැනදී මොනවා වේවිද කියලා කියන්න බැහැ. අපටත් ගොඩපිටියේදී බෝම්බ වැදුණා. ඒකෙන් අවුරුදු දහයකට පස්සේ මෙවැනි දේවල් වේවි කියලා හිතන්න බැහැනේ.
කොහොම වුණත්, මේ ප‍්‍රහාරය වළක්වාගැනීම පිළිබඳ වගකීම් කඩපු ජනාධිපති මෛත‍්‍රීපාල සිරිසේන මහතාගේ පක්ෂය දැන් පොදුජන පෙරමුණත් එක්ක සන්ධානගත වෙලා නේද?
ඒ සන්ධානගත වීම මේකට අදාල නැහැනේ. ගිය අවුරුද්දේ අපේ තාවකාලික ආණ්ඩුව වෙලාවේදීත් රටේ ආරක්ෂාව ගැන කරපු පරීක්ෂණ නතර වුණේ නැහැනේ. ජනාධිපතිවරයා පොලීසිය පවරාගන්න කලින් තමයි බුදුපිළිම කැඞීමේ සිද්ධිය වුණේ. ඒ වෙලාවේත් ගන්න ඕනෑ පියවර ගත්තේ නැහැනේ. රටේ සාමාන්‍ය නීතිය හරිහැටි ක‍්‍රියාත්මක වුණා නම් ඔය සිදුවීම් නවත්වන්න තිබුණානේ.
ඇත්තටම සහරාන් නමැත්තා රටේ සාමාන්‍ය නීතිය කඩලා තිබුණේ රාජපක්ෂ ආණ්ඩුව තිබියදීයි. ඒ කාලයේත් නීතිය ක‍්‍රියාත්මක වෙලා නැහැ නේද?
සහරාන් ගැන 2013දීත් තොරතුරු තිබුණු බව කියනවා. ඒත් පැහැදිලි ක‍්‍රියාකාරකමක් දකින්න ලැබුණේ නැහැ. ඒවා වුණේ ඊට පස්සේ. ඒත් ඒ දවස්වල ඔහු ගැන සෙවිල්ලෙන් ඉඳලා තියෙනවා. රහස් ඔත්තු සේවය ඔහු ගැන විමසිල්ලෙන් ඉඳලා තියෙනවා. රජයේ දුර්වලතාවය නිසයි මේ ප‍්‍රහාරය නවත්වගන්න බැරිවුණේ. ඒ ගැන වෙන වෙන කතා කියලා වැඩක් නැහැ.
