පාර්ලිමේන්තුවේ පොදු ව්‍යාපාර කාරක සභාවේ හෙවත් කෝප් කමිටුවේ රැුස්වීමේ මාධ්‍යවලට විවෘත කිරීමෙන් පසුව ගෙන්වූ ආයතන අතර ශ‍්‍රී ලංකා ක‍්‍රිකට් ආයතනය ඉදිරියෙන්ම ඇත. ලංකාවේ වැඩිපුරම මුදල් ගැවසෙන ආයතනයක් මෙන්ම ඉහළම මහජන උනන්දුවක් තිබෙන ආයතනයක් ලෙස ශ‍්‍රී ලංකා ක‍්‍රිකට් සැලකිය හැකිය.
පසුගිය කාලයේදී ශ‍්‍රී ලංකා නිදහස් පක්ෂයේ තීන්දු ගැනීමේ ක‍්‍රියාවලියේදී තිරය පසුපස සිටි ප‍්‍රබලම නායකයෙක් වුණේ පාර්ලිමේන්තු මන්ත්රී තිලංග සුමතිපාලය. ගෝඨාභය රාජපක්ෂ මහතා පොහොට්ටුව ලකුණෙන් හැර වෙනත් ලකුණකින් ජනාධිපතිවරණයට ඉදිරිපත් වුණොත් පමණක් ශ‍්‍රීලනිපයේ සහයෝගය ඔහුට ලැබෙන බව ශ‍්‍රීලනිප මහලේකම් දයාසිරි ජයසේකර පවා කියූ කාලයේ තිලංග සුමතිපාල මන්ත‍්‍රීවරයා කීවේ පොහොට්ටුව ලකුණ තිබියදීම ගෝඨාභය රාජපක්ෂ මහතාට ශ‍්‍රීලනිපය සහයෝගය දීමට එකඟ වන බවයි. අවසානයේදී ක‍්‍රියාත්මක වුණේ තිලංග සුමතිපාල මන්ත‍්‍රීවරයා කී කතාවය. ශ‍්‍රීලනිපය අභ්‍යන්තරයෙහි විශාල බලයක් ඔහුට පසුගිය කාලය පුරාම තිබුණි. එතරම් දේශපාලන බලයක් තිබියදීත් ඔහු ශ‍්‍රී ලංකා ක‍්‍රිකට් ආයතනයේ සභාපතිත්වය ගැන ඉහළම උනන්දුවක් දැක්වීම තුළින්ම එම ආයතනයෙහි වටිනාකම තක්සේරු කරගත හැකිය.
ශ‍්‍රී ලංකා ක‍්‍රිකට් ආයතනය කෝප් කමිටුවට කැඳවූ විට වැඩිපුර ප‍්‍රශ්න කිරීම්වලට ලක්වුණේ තිලංග සුමතිපාල මහතා ක‍්‍රිකට් සභාපතිවරයාව සිටි කාලයේ සිදුවූ දේවල් පිලිබඳවය. ප‍්‍රධාන කරුණු පහක් ගැන එහිදී කතාවට ලක් කළේය. අප මෙහි කතාකරන්නේ ඒ අතරින් ක‍්‍රිකට් ඒඞ් නමින් පිහිටවූ අරමුදල් රැුස්කිරීමේ සමාගම ගැනය.
පසුබිම
ඉතා සරලව කීවොත් ක‍්‍රිකට් ඒඞ් ආයතනය යනු ශ‍්‍රී ලංකා ක‍්‍රිකට් ආයතනයේ පුණ්‍යාධාර හස්තය ලෙස පිහිටවූ සමාගමකි. බැලූ බැල්මට සමාගමට ඇත්තේ ඉතාම යහපත් අරමුණකි. සරලව කල්පනා කළොත් මේ වෙද්දී ජාත්‍යන්තර වශයෙන් ශ‍්‍රී ලංකාව නියෝජනය කරන ප‍්‍රධානම සන්නාමයක් වන්නේ ශ‍්‍රී ලංකා ක‍්‍රිකට්ය. ලොව දෙවැනියට වැඩිම පිරිසක් නරඹන ක‍්‍රීඩාව වන ක‍්‍රිකට්ය. ශ‍්‍රී ලංකාවේ ක‍්‍රිකට් ක‍්‍රීඩකයන් විශාල කැපකිරීම් කරමින්, අප‍්‍රතිහත ධෛර්යයෙන් යුතුව ජාත්‍යන්තර වශයෙන් අතිශය ජනප‍්‍රියත්වයක් ලබා සිටී. ඉතින්, ඒ ජනප‍්‍රියත්වය මත ලංකාවේ පීඩා විඳින පුද්ගලයන්ට ආධාර සැපයීමේ ව්‍යාපෘතියක් ක‍්‍රියාත්මක කිරීම ඉතා යහපත්ය.
තිලංග සුමතිපාල මහතා ශ‍්‍රී ලංකා ක‍්‍රිකට් සභාපතිවරයාව සිටියදී, 2016 මැයි 07 වැනිදා ඒ යහපත් ක‍්‍රියාව ආරම්භ කිරීම සඳහා තීන්දුව ගෙන තිබුණි. ශ‍්‍රී ලංකා ක‍්‍රිකට් ආයතනයේ 2016 මැයි 07 තිබුණු විධායක කමිටු වාර්තාවක කියා තිබුණේ වකුගඩු රෝගයෙන් පීඩාවිඳින පුද්ගලයන්ට ආධාර කිරීම පිණිස ආධාර වැඩපිළිවෙලක් දියත් කිරීමේ අවශ්‍යතාවය ගැනය. සුනාමි ව්‍යවසනයෙන් පසුවද ශ‍්‍රී ලංකා ක‍්‍රිකට් ආයතනය මෙවැනි ව්‍යාපෘතියක් ක‍්‍රියාත්මක කළ බව එම වාර්තාවෙහි සිහිපත් කර තිබුණි.
එහෙත් එම වාර්තාවෙහි තිබී ඇත්තේ මූලික අදහසක් පමණි. ඒ අදහස ක‍්‍රියාත්මක කරන අන්දම ගැන නිල තීන්දුවක් ගෙන තිබී නැත. එහෙත් මේ සහනාධාර වැඩපිළිවෙල ගැන කෙතරම් හදිස්සියක් තිලංග සුමතිපාල මහතා ප‍්‍රමුඛ විධායක කමිටුවට තිබුණේද යත්, ඉහත විධායක රැුස්වීමෙන් දින 16ක් ඇතුලත එනම් මැයි 23 වැනිදා වෙද්දී ක‍්‍රිකට් ඒඞ් ගරන්ටි ලිමිටඞ් නමින් ඇපයෙන් සීමිත සමාගමක්ද පිහිටුවා ඇත. ශ‍්‍රී ලංකා ක‍්‍රිකට් ආයතනයේ සභාපති විධායක කමිටු සාමාජිකයන් අටදෙනෙකු සහ ප‍්‍රධාන විධායක නිලධාරියා එහි ප‍්‍රධාන තනතුරුවලට පත්කර තිබුණි. ශ‍්‍රී ලංකා ක‍්‍රිකට් ආයතනයේ විධායක අනුමැතිය එවැනි සමාගමකට දී ඇත්තේ ඒ සමාගම පිහිටවූවාටත් පසුවය. එනම් මැයි 28 වැනිදාය.
ක‍්‍රිකට් ඒඞ් සමාගම පිහිටුවීම කෙතරම් හදිස්සියේ සිදුවුණාද කිවහොත් සමාගම පටන්ගන්නට හේතුවණායැයි කියන ප‍්‍රධානම අරමුණ වන වකුගඩු රෝගීන්ට ආධාර දීම, එම සමාගම ලියාපදිංචි කරද්දී සමාගම් මැදුරට දුන් අරමුණු 13 අතර නැත. විගණකාධිපති දෙපාර්තමේන්තුව කියා ඇත්තේද සඳහන් කර ඇති එහි ඇති කිසිදු අරමුණකින් වකුගඩු රෝගීන්ට ආධාර කිරීමේ හැකියාවක් ඇතැයි පෙනී නොගිය බවය. මේ සමාගමේ අරමුණම අවුල් සහගත වීමෙන් සමාගමේ ස්වභාවය තේරුම් ගත හැකිය.
ලෝඞ්ස් වැඩසටහන
සියල්ල සිදුවුණේ අධිවේගයෙන්ය. මේ සමාගම මැයි මාසය අගදී පිහිටවූ අතර ජුනි 05 වැනිදා වෙද්දී පළවැනි ආධාර රැුස්කිරීමේ වැඩසටහනත් දියත් කරන්නට සියල්ල සැලසුම් කර තිබුණි. ඒ වෙද්දී ශ‍්‍රී ලංකා කණ්ඩායම සිටියේ එංගලන්ත සංචාරයකය. ජුනි 05 වැනිදා එංගලන්තයේ ලෝඞ්ස් පිටියේ පැවති ක‍්‍රිකට් තරගයකින් ක‍්‍රිකට් ඒඞ් ආයතනයට ආධාර එකතු කිරීමේ වැදගත් කටයුත්ත ආරම්භ කරන්නට හදිස්සියේම තීරණය කළේය.
ඒ වෙනුවෙන් එක්සත් රාජධානියේ පදිංචි සරත් අබේසුන්දර නම් ක‍්‍රිකට් ආයතනයෙන් පරිබාහිර පුද්ගලයෙක්ව ශ‍්‍රී ලංකා ක‍්‍රිකට්හි නියෝජිතයා ලෙස පත්කිරීමටත් තීරණය කර ඇත. එහෙත් ඔහුව නිල වශයෙන් පත්කර නැත.
2016 මැයි 30 වැනිදා අංක එෆ්සී – 097 වවුචරයෙන් ඇමෙරිකන් ඩොලර් 54,000 ක් ශ‍්‍රී ලංකා ක‍්‍රිකට් ආයතනයෙන් එංගලන්ත සහ වේල්ස් ක‍්‍රිකට් මණ්ඩලයට ගෙවා තිබුණේ මේ වැඩසටහන වෙනුවෙන් බව කියමින්ය. කෙසේ වෙතත් මේ ඩොලර් සංඛ්‍යාව ගෙවද්දී ඒ මුදලෙහි වටිනාකම තීරණය කළේ කුමන පදනම මතද, එය ලබාගත්තේ කවුද, පරිහරණය කළේ කුමන කටයුත්තක් වෙනුවෙන්ද යන්න පැහැදිළිව කියා නැත. ඒ ගැන විමසද්දී පිළිතුරු දෙමින් ශ‍්‍රී ලංකා ක‍්‍රිකට් මෙසේ කියා ඇත.
‘එම මුදල් යවන ලද්දේ අරමුදල් සම්පාදනය කරගැනීමේ මූළික වැඩ කටයුතු සඳහා අවශ්‍ය මුදල් ලබාගැනීම සඳහාය. ඒ සම්බන්ධයෙන් ලබන ආදායම් සහ වියදම් සම්බන්ධයෙන් වාර්තාවක් දැක්වේ. මෙම වැඩසටහන ක‍්‍රියාත්මක කිරීම වෙනුවෙන් දේශීය නියෝජිතයා වශයෙන් කටයුතු කළේ සරත් අබේසුන්දර මහතායි.‘
එහෙත් සැබෑ තත්වය වෙන්නේ මෙම මුදල් පරිහරණය කිරීම ගැන කිසිදු පැහැදිළි තොරතුරක් ඉදිරිපත් කර නොතිබීමයි. ඒ ගිණුම අයිති කාටදැයි තහවුරු වී තිබුණේත් නැත. අනෙක් කාරණය වන්නේ සරත් අබේසුන්දර නම් පුද්ගලයාව ක‍්‍රිකට් ඒඞ් සමාගමේ හෝ ශ‍්‍රී ලංකා ක‍්‍රිකට්හි නියෝජිතයෙකු ලෙස පත්කළ බව කියන්නට කිසිදු නෛතික පදනමක් නොතිබීමය.
කෙසේ වෙතත් ජුනි 4,5 දින දෙකේදීම එංගලන්තයේදී ක‍්‍රිකට් ඒඞ් වෙත ආධාර එකතු කර තිබුණි. විගණකාධිපති දෙපාර්තමේන්තුව කළ පරීක්ෂා කිරීම් අනුව මේ තරගයේදී ටිකට්පත් අලෙවියෙන් රුපියල් 1,480,000ක් උපයා ඇත. පරිත්‍යාගවලින් රුපියල් 9,103,000ක් උපයා තිබුණි. වෙන්දේසි කිරීම්වලින් රුපියල් 2,445,000ක් උපයා තිබුණි. ඒ අනුව සම්පූර්ණයෙන්ම රුපියල් 13,028,000ක් උපයාගෙන ඇතැයි නිල වශයෙන් සඳහන් වෙයි. එහෙත් මෙම වැඩසටහනට දරන්නට සිදුව තිබෙන සමස්ථ වියදම රු 14,832,506 ක් විය. ඒ මුදලින්ද රුපියල් 4,701,095ක් පමණක් සරත් අබේසුන්දර ශ‍්‍රී ලංකා ක‍්‍රිකට් ආයතනයේ ප‍්‍රධාන බැංකු ගිණුමට මාරු කර ඇත. එම වැඩසටහනේදී උපයාගත් මුදල් ගැනත් ඒ සම්පූර්ණ මුදලට අත්වූ ඉරණමත් අපැහැදිළි බව විගණකාධිපති දෙපාර්තමේන්තුව කියයි.
ගිණුමක්
සමාගම පිහිටුවන්නට තිබූ හදිස්සියම එයට ගිණුමක් විවෘත කිරීම වෙනුවෙනුත් තිබී ඇත. එහෙත් එයට බාධකයක් වැටී තිබේ. ශ‍්‍රී ලංකා ක‍්‍රිකට් ආයතනයේ ප‍්‍රධාන විධායක නිලධාරියාගේ හා ප‍්‍රධාන මූල්‍ය නිලධාරියාගේ අත්සන සහිතව 2016 මැයි 26 වැනිදා ශ‍්‍රී ලංකා මහ බැංකුවේ විනිමය පාලකවරයා වෙත ලිපියක් යවා ඇත. ලංකා බැංකුවේ ටොරිංටන් ශාඛාවෙහි ක‍්‍රිකට් ඒඞ් ගරන්ටි ලිමිටඞ් නමින් ඇමෙරිකානු ඩොලර් ඉතිකිරීමේ ගිණුමක් විවෘත කිරීමට එයින් අනුමැතිය ඉල්ලා තිබුණි. විනිමය පාලකවරයා ජුනි 20 වැනිදා දැනුම් දී තිබුණේ විදේශ මුදල් ගිණුමකට අවසර දිය නොහැකි බවයි.
එහෙත් 2016 මැයි 26 වැනිදා ශ‍්‍රී ලංකා ක‍්‍රිකට් ආයතනයේ ප‍්‍රධාන බැංකු ගිණුමෙන් රුපියල් 2,000,000ක් පාවිච්චි කර ක‍්‍රිකට් ඒඞ් සමාගමේ නමින් ලංකා බැංකුවේ ටොරිංටන් ශාඛාවෙහි 0079238381 යන අංකය යටතේ ගිණුමක් විවෘත කර තිබුණි. ඉන්පසුව 2016 මැයි 31 වැනිදා රුපියල් 1,985,000ක් නැවත ශ‍්‍රී ලංකා ක‍්‍රිකට් ආයතනයේ ප‍්‍රධාන බැංකු ගිණුමට මාරු කර ඇත.
2016 ජුලි 23 වැනිදා පැවති ක‍්‍රිකට් විධායක කමිටුවේ සාකච්ඡුා සටහන්වල විදේශීය මුදල් බැංකු ගිණුමක් ආරම්භ කිරීමටත් බලය ලබාදී තිබේ. ඒ මහබැංකුවේ නිර්දේශයටත් පිටින් යෑමකි. එහෙත් එම ගිණුමේ කිසිදු කටයුත්තක් ගැන විගණකාධිපති දෙපාර්තමේන්තුවට තොරතුරු ලබාදී ඇත. ඊට අමතරව 2019 මාර්තු 12 වැනිදා විගණනයට දුන් ලිපියක් මගින්ද දන්වා ඇත්තේ මූල්‍ය ප‍්‍රකාශ වලින් ඉදිරිපත් කර ඇති බැංකු ගිණුම් හැර කිසිදු විදේශීය මුදල් බැංකු ගිණුමක් නැති බවයි.
2019 සැප්තැම්බර් 03 වැනිදා එවැනි බැංකු ගිණුමක් තිබෙන බව කෝප් කමිටුව ඉදිරියේ තහවුරු විය. මේ ගිණුමේ මුදල් පාවිච්චි කළේ මොනවාටදැයි රහසකි.
එපමණයි
සති කිහිපයක් ඇතුලත පිහිටවූ මේ සමාගම ඒ තකහනියෙන්ම ශ‍්‍රී ලංකා ක‍්‍රිකට් ආයතනය සතු මුදල් වියදම් කරමින් ලෝඞ්ස් පිටියේ ආධාර එකතු කිරීමේ වැඩසටහනක් ආරම්භ කරද්දී තීරණය කර තිබුණේ ඉදිරියේ ශ‍්‍රී ලංකා ක‍්‍රිකට් කණ්ඩායම සහභාගීවන හැම තරග සංචාරයකදීම මෙවැනි ආධාර වැඩසටහන් ක‍්‍රියාත්මක කළ යුතු බවයි. ලෝඞ්ස් සංචාරයෙන් පසුව 2018 අවසානය දක්වා ශ‍්‍රී ලංකා ක‍්‍රිකට් කණ්ඩායම සංචාර 13කට සහභාගී වී ඇත. එහෙත් නිල ගිණුම් වාර්තාවලට අනුව එතැනින් පසුව එවැනි වැඩසටහන් කිසිවක් ක‍්‍රියාත්මක වූ බවට වාර්තා වී නැත.
එහෙත් ඒවා වාර්තා නොවන්නේ ගිණුම්වල ආදායම් කොටසට පමණි. ඕස්ට‍්‍රේලියානු හා දකුණු අප‍්‍රිකානු තරගවලදී අරමුදල් රැුස්කිරීමේ වැඩසටහන් වෙනුවෙන් මුදල් වියදම් කළ බව නම් සඳහන්ය.
එතැනින් පසු ක‍්‍රිකට් ඒඞ් ආයතනයේ එතැනින් පසුව සිදුව ඇති නිල ගිණුම් වාර්තා බලද්දී එහි කිසිදු ගණුදෙනුවක් සිදු නොවූ තරම්ය. ඒ සදහා පසුගිය වසරවලදී සිදුව තිබෙන ගණුදෙනු සංඛ්‍යාව සලකා බැලිය හැකිය. එනම් ආදායම් හා වියදම් තීරු යටතේ සඳහන් කර ඇති ගණුදෙනු සංඛ්‍යාව කොපමණද යන්න සලකා බැලිය හැකිය.
ඒ අනුව 2016 වසරේ ඇති ආදායම් සංඛයාව 2ක් පමණි. ඒ ගණුදෙනු දෙකේ වටිනාකම රුපියල් 4,701,095කි. වියදම් 10ක් සිදුව ඇත. ඒවායේ වටිනාකම රුපියල් 14,832,506කි. 2017 දී ආදායම් සංඛ්‍යාව 9කි. වටිනාකම රුපියල් 17,184,134කි. වියදම් සංඛ්‍යාව 12 කි. වටිනාකම රුපියල් 4,411,526කි. 2018 වසරේ ආදායම් සංඛ්‍යාව 2කි. වටිනාකම රුපියල් 5,000,000කි. වියදම් සංඛ්‍යාව 12කි. වටිනාකම රුපියල් 4,453,983 කි. පෙනී යන අන්දමට සහනාධාර වෙනුවෙන් යැයි පිහිටවූ මේ සමාගම පසුගිය වසර කිහිපයේ සිදුකර ඇත්තේ රුපියල් මිලියන විසි ගණනක වටිනාකමක් ඇති ගණුදෙනු පමණි. ලෝඞ්ස්ට වැඩසටහනේදී හැරුණාම ක‍්‍රිකට් ඒඞ් ආයතනයට කිසිම කෙනෙක් ආධාර කර නැති බව නිල වශයෙන් එම ගිණුම් බලද්දී පෙනෙන කාරණාවය.
ආධාර නෑ
අනෙක් ගැටලූ‍ව වන්නේ වකුගඩු රෝගීන්ට මුදල් එකතු කිරිමේ කතාවක් කියා ලොවපුරා මුදල් එකතු කළද 2018 දෙසැම්බර් 31 වනවිටත් සතපහක මුදලක් වකුගඩු රෝගීන් සඳහා පිරිනමා නොතිබීමය. ඒ කතාව ගැන ශ‍්‍රී ලංකා ක‍්‍රිකට් ආයතනය 2019 දී පිළිතුරු දී ඇත්තේ මෙසේය.
‘වකුගඩු රෝගීන් සඳහා ආධාර මුදල් පිරිනමා නොතිබුණද, වකුගඩු රෝගීන් සඳහා පිරිසිදු පානීය ජලය ලබාදීම සඳහා කටයුතු කිරීමට ශ‍්‍රී ලංකා නාවික හමුදාවේ සහාය ඇතිව ජල යෝජනා ක‍්‍රම ඉදිකිරීමට අවශ්‍ය කටයුතු දැනටමත් සිදු කරමින් පවතී.‘ කියාය. එහෙත් ඒ පිළිතුර හදිසියේ ගොතාගත් එකක්දෝ සැක මතුවෙයි. ඒ කතාවට සාක්ෂ්‍ය ලෙස ක‍්‍රිකට් අයතනය එවා ඇත්තේ ලිපි ශීර්ෂ රහිතව යවන්නාගේ නමවත් අත්සනවත් නැතිව හිඟු‍රක්ගොඩ ප‍්‍රාදේශීය සභාවේ ලේකම් අමතා යැවූ 2018 පෙබරවාරි 16 දිනැති ලිපියක් පමණක් ඉදිරිපත් කර තිබීමය. විගණකාධිපති දෙපාර්තමේන්තුව පැහැදිළිව කියන්නේ මෙය විගණනය නොමඟ යැවීම සඳහා ව්‍යාජ ලෙස සකස් කර ඇති බවට සැකයක් තිබෙන බවයි.
ශ‍්‍රී ලංකා ක‍්‍රිකට් ආයතනයේ පුණ්‍යාධාර හස්තය ලෙස ක‍්‍රිකට් ඒඞ් සමාගම පිහිටුවා තිබියදීත්, ශ‍්‍රී ලංකා ක‍්‍රිකට් සමාගම 2016 මැයි 23 සිට 2018 දෙසැම්බර් 31 දක්වා රු 32,807,100 ක මුදලක් ප‍්‍රණ්‍යාධාර ලෙස ගෙවා ඇත්තේ, වෙනම සමාගමක් පුණ්‍යාධාර වෙනුවෙන් හැදුවේ ඇයිද යන කාරණය ගැන ප‍්‍රශ්න මතු කරමින්ය.
ඒ සියල්ල මැද විගණකාධිපති දෙපාර්තමේන්තුව නිර්දේශයක් ලබාදෙමින් මෙසේ කියයි. ‘ක‍්‍රිකට් ඒඞ් ගරන්ටි ලිමිටඞ් සමාගමෙහි 2016 -2018 දක්වා කාල සිමාවට අදාළ වාර්තා පරීක්ෂා කිරිමේදි සමාගම විසින් සිදු කර ඇති ගණුදෙනු සංඛ්‍යාව සහ වටිනාකම් ඉතා අඩු ප‍්‍රමාණයක් වීම හේතුවෙන් ක‍්‍රිකට් ආයතනයේ පුණ්‍යාධාර හස්තය ලෙස වෙනම ආයතනයක් ස්ථාපිත කිරිම ඵලදායි නොවන බව නිරීක්ෂණය විය.‘
සමස්ථයක් ලෙස ගණනය කරද්දී මේ සමාගම 2018 දෙසැම්බර් 31 දක්වා පුණ්‍යාධාර කටයුතු වෙනුවෙන් වියදම් කර ඇත්තේ රුපියල් 2,478,260 ක් පමණි. එනම් මිලියන දෙකක් පමණි. එහෙත් සමාගමේ මැනේජර්වරයා වෙත වැටුප්, දීමනා ඇතුළු පාරිශ‍්‍රමිකය ලෙස රුපියල් 3,998,693ක් ගෙවා තිබුණි. එනම් මිලියන 3කි. නිල වාර්තා බලද්දී පෙනෙන ඒ කරුණු භාරගත යුත්තේ විහිළුවක් ලෙසය.
ඉහත කී සියළු කරුණු කල්පනා කරද්දී, මේ සමාගම පිහිටුවද්දී ප‍්‍රසිද්ධියේ කී අරමුණ එකකි. සමාගම් මැදුරට දුන් අරමුණු 13 වෙනම ඒවාය. එහෙත් නිල ගිණුම් වාර්තා බලද්දී මේ සමාගමෙන් ඉටුව ඇති සැබෑ අරමුණ වන්නේ මැනේජර්වරයෙකුට වැටුප් ගෙවීමය. නිල ගිණුම් එසේ වුණත්, විගණන වාර්තාවකට එහා ගොස් අධිකරණමය කටයුත්තක් වශයෙන් සැබෑ ලෙසම මේ සමාගමෙන් සිදුව ඇති ගණුදෙනු ගැන සොයා බැලූ‍වොත් ඉහත කී අරමුණු තුනටම පිටින් ගිය සැබෑම යටි අරමුණ කුමක්දැයි සොයා බැලිය හැකිය. ලංකාවට තිබෙන ගෞරවණීයම සන්නාමයක් පාවිච්චි කරමින්, ආධාර එකතු කිරීමට පටන්ගත් ව්‍යාපෘතියක සැබෑ අරමුණ තේරුම් ගැනීම අත්‍යාවශ්‍ය කරුණකි.
ශ‍්‍රී ලංකා ක‍්‍රිකට්හි සභාපතිවරයාව සිටි තිලංග සුමතිපාල ඇතුළු මහත්වරුන්ට අධිකරණය හමුවේ කරන පරීක්ෂණයක් ඉදිරියට පැමිණෙන ලෙස ආරාධනා කළහොත් ඔවුන් සැබෑ අරමුණ ගැන කියන්නට ඉඩ ඇත.
