ශ‍්‍රීලනිපයෙන් ඉවත්ව මෑත කාලයේදී ශ‍්‍රී ලංකා පොදුජන පෙරමුණ සමඟ එක්වූ මන්ත්රීවරුන් පිරිසක් නැවත ශ‍්‍රීලනිපය හා එක්වීමට කැමැත්තෙන් සිටියද, ශ‍්‍රීලනිපය හා පොදුජන පෙරමුණ සමඟ ඇති කරගත් ගිවිසුම නිසා එසේ කිරීමට නොහැකි වී තිබෙන බව වාර්තා වෙයි.
ශ‍්‍රීලනිපයේ අමාත්‍යධූර කටයුතු කරමින් සිට, පසුව පොදුජන පෙරමුණ සමඟ එක්වූ මන්ත‍්‍රීවරුන්ටද පොදුජන පෙරමුණේ ක‍්‍රියාකාරිකයන් අතර විරෝධයක් මතුවී තිබුණි. පසුගිය දිනවලදී පොදුජන පෙරමුණේ මැතිවරණ රැුස්වීම්වලට සහභාගී වූ ජෝන් සෙනෙවිරත්න, ටී.බී. ඒකනායක, තාරානාත් බස්නායක ඇතුළු එලෙස පොදුජන පෙරමුණට එක්වූ මන්ත‍්‍රීවරුන්ට එරෙහිවද හූ හඬ නඟා තිබුණි. මීට අමතරව චන්දිම වීරක්කොඩි මන්ත‍්‍රීවරයාට එරෙහිව රමේෂ් පතිරණ මන්ත‍්‍රීවරයා ඇතුළු පිරිසක් පක්ෂ අභ්‍යන්තරයේ විරෝධය පළ කර තිබුණි.
එම ප‍්‍රතිචාර හේතුවෙන් ජෝන් සෙනෙවිරත්න, එස්.බී. දිසානායක, ඩිලාන් පෙරේරා, චන්දිම වීරක්කොඩි ඇතුළු මන්ත්රීවරුන් පිරිසක් නැවත ශ‍්‍රීලනිපයට එක්වීමට කැමැත්ත පළ කර ඇතැයි අනිද්දා සමඟ අදහස් දැක්වූ ශ‍්‍රීලනිපයේ මධ්‍යම කාරක සභිකයෙකු කීය. එහෙත් ශ‍්‍රීලංකා පොදුජන පෙරමුණ හා ශ‍්‍රීලනිපය අතර ඇතිකරගත් අවබෝධතා ගිවිසුම හා ඇති කරගත් එකඟතා අනුව මෙම පක්ෂ දෙකේ පාර්ලිමේන්තු මන්ත්රීවරුන් හා ප‍්‍රාදේශීය මට්ටමේ මන්ත්රීවරුන් පක්ෂ මාරු නොකළ යුතු බවට එකඟතාවයක් ඇති බව ඔහු පැවසීය. කෙසේ වෙතත් ජනාධිපතිවරණයෙන් පසු පොදුජන පෙරමුණේ සාමාජිකයන් හා සාකච්ඡුා කොට ශ‍්‍රීලනිපයේ මෑත කාලය දක්වාම කටයුතු කළ මන්ත‍්‍රීවරුන්ව ශ‍්‍රීලනිපය හා එකතු කරගැනීමට හැකිවනු ඇතැයි බලාපොරොත්තු වන බව ඔහු වැඩිදුරටත් පැවසීය.
මේ වෙද්දී කටයුතු කරන්නේ පොදුජන පෙරමුණේද, ශ‍්‍රීලනිපයේද යන කාරණය පිළිබඳ විමසීමකදී පාර්ලිමේන්තු මන්ත්රී චන්දිම වීරක්කොඩි මහතා ප‍්‍රකාශ කළේ මේ මොහොතේ වැදගත් වන්නේ මෙම පක්ෂ දෙකෙන් කුමන පක්ෂයේ සිටිනවාද යන්න පිළිබඳව නොවන බවයි. තමන් නියෝජනය කරන්නේ ජනතාව බවත්, මේ මොහොතේ කුමන පක්ෂයේ සිටිනවාද යන කාරණය පිළිබඳව සැලකිලිමත් නොවන බවත් එයට පිළිතුරු ලෙස ඔහු කීය. වැඩිදුරටත් ඔහු පැවසුවේ ශ‍්‍රීලනිපය හා පොදුජන පෙරමුණ ඇති කරගත් ගිවිසුම් අනුව දෙපාර්ශ්වය තනතුරු ආදිය බෙදාගෙන සිටින බවත්, දෙපාර්ශ්වය අතර පක්ෂ මාරු කිරීම් සඳහා එම ගිවිසුම අනුව ඉඩ නොමැති බවත්ය. මේ මොහොතේ තමන්ට ආරාධනා ලැබෙන ඕනෑම තැනකට තමන් යන බව ඔහු කීය.
