බිමල් රත්නායක – ජාතික ජන බලවේගය
ඇල්පිටිය ඡන්ද ප‍්‍රතිඵලය අනුව ජවිපෙ තවමත් ඉන්නේ දුර්වල තැනක නේද?
ඇල්පිටිය ඡුන්ද ප‍්‍රතිඵලය ජනාධිපතිවරණයක් එක්ක සම්බන්ධ කිරීම තර්කානුකූල නැහැ. එතැන ජවිපෙට ඡුන්ද වර්ධනයක් තියෙනවා. එහෙත් අප පිළිගන්නවා ප‍්‍රාදේශීය සභා මැතිවරණයේ පොදු ප‍්‍රතිඵලයේ වර්ධනයක් තිබුණාට එය ප‍්‍රමාණවත් නැති බව. වර්ධනයක් තිබුණාට බලාපොරොත්තු වුණ මට්ටමට නැහැ. එහෙත් අනෙක් පක්ෂ එක්ක ගත්තාම වැඩිම වර්ධනයක් තියෙන්නේ අපේ පක්ෂයට තමයි. කොහොම වුණත් ඒ ප‍්‍රතිඵලයෙන් ජනාධිපතිවරණයට අදාලව අපට මේ මොහොතේ ලැබී තියෙන ප‍්‍රසාදය නිරූපණය වෙන්නේ නැහැ.
ජනාධිපතිවරණයේදී ඊට වඩා වෙනස් තත්වයක් අපේක්ෂා කරන්න පුළුවන්ද?
එහෙම බලාපොරොත්තුවක් තබාගන්නට හේතු ගණනාවක් තියෙනවා. එකක් ජාතික මැතිවරණයකදී කල්පනා කරන ප‍්‍රශ්න නෙවෙයි ප‍්‍රාදේශීය මැතිවරණයකදී කල්පනා කරන්නේ. ඊට වඩා පුළුල් දේශපාලන සංවාදයක් තියෙනවා. ජනාධිපති අපේක්ෂකයන් අතරින් පරිණතම, දක්ෂම, ශිෂ්ටතම අපේක්ෂකයා අනුර කුමාර දිසානායක. ඒකේ විශාල බලපෑමක් තියෙනවා. අනෙක් කරුණ තමයි අපි මෙවර ඉදිරිපත් වෙලා තියෙන්නේ ජවිපෙ පමණක් නෙවෙයි ජාතික ජන බලවේගය විදියට වීම. එතැන විශාල සමාජ කණ්ඩායම් ඉන්නවා. මේ වෙලාවේ පාවෙන ඡුන්දදායකයන් බලාපොරොත්තු වන දේශපාලන ආර්ථික ප‍්‍රතිපත්ති අප නියෝජනය කරනවා. ඒ තුන නිසා අපි පැහැදිලිව දකිනවා වැඩි ප‍්‍රතිඵලයක් ලැබේවි කියලා. ඇල්පිටිය රටේ පොදු සාම්පලයක් විදියට ගන්න බැහැ. නාගරික හා අර්ධ නාගරික ප‍්‍රදේශවල පාවෙන ඡුන්ද ඉන්නවා. ජාතික ජන බලවේගයට සුවිශාල ලෙස ආකර්ෂණය වී සිටින ඡුන්දදායකයන් වැඩි ප‍්‍රතිශතයක් නාගරික හා අර්ධ නාගරික මට්ටමේ.
කෙසේවෙතත් ජාතික ජන බලවේගය මැතිවරණය ජයගැනීම ගැන කල්පනා කරනවා නම්, ජනමාධ්‍යවලින් ලොකු සහයෝගයකුත් නොලැබෙන පසුබිමක නොසිතූ මට්ටමේ ප‍්‍රචාරක ව්‍යාපාරයක් අවශ්‍ය වේවි නේද?
අපි තල තුනක ව්‍යාපාරයක් කරනවා. අපි පටන් ගන්නකොටම දන්නවා මාධ්‍යවලට පක්ෂ තියෙන බව. ඒ ගැන අපි බොරු බලාපොරොත්තු තියන්නේ නැහැ.
අපි එක පැත්තකින් විශාල මට්ටමෙන් ජනතාව තුළ උද්යෝගයක් ඇති කරන්න සමත් ජනබලයක් උත්පාදනය කරන්න බලාපොරොත්තු වෙනවා. අපි රටේ ප‍්‍රතිපත්තියක් ගැන හිතන ලක්ෂ 50ක පමණ පාවෙන ඡුන්දදායකයන් ඉලක්ක කරලා මැතිවරණයේ ප‍්‍රතිපත්තිමය තලය ගැන සාකච්ඡුා කරන්න විද්වතුන් සම්බන්ධ කරගන්නවා.
දෙවැනි කාරණය තමයි ප‍්‍රතිපත්ති ඉදිරිපත් කිරීම. ජනාධිපති හෝ අගමැති අපේක්ෂකයෙක් විෂය දහයකට විස්තීර්ණ ප‍්‍රතිපත්ති වෙන වෙනම ඉදිරිපත් කරන්නේ පළවැනි වතාවට. අපි එය කරනවා. ප‍්‍රතිපත්ති මත රට හරි පාරට ගන්න ඕනෑ බව හිතන විශාල පිරිසක් පක්ෂවලට එළියෙන් ඉන්නවා.
තුන්වැනියට අපි අපේක්ෂකයන් සහභාගි නොවන කුඩා මට්ටමේ සාකච්ඡුා හා සම්මන්ත‍්‍රණ සැලසුම් කරලා තියෙනවා. ඊට අමතරව විශාල වශයෙන් සමාජ මාධ්‍යවල ස්වෙච්ඡුා ක‍්‍රියාකාරිකයන් මාර්ගයෙන් ප‍්‍රචාරක කටයුතු කරනවා. අපේ බලවේගයේ විශාලම හයිය තමයි විවිධත්වය. අපේක්ෂකයා වෙනුවෙන් කතාකරන අය අතර දේශපාලනඥයන්ට වඩා විද්වතුන්, කලාකරුවන්, සමාජ ක‍්‍රියාකාරිකයන් ඉන්නවා. මූලිකවම ජවිපෙ අනන්‍යතාවක් නැති අය.
ප‍්‍රධාන අපේක්ෂකයන් දෙදෙනාගේ අදහස් දැක්වීම්වලදී පෙනෙන අඩුපාඩු ජාතික ජන බලවේගයට වාසියක් ලෙස පෙනෙනවාද?
ඔය පක්ෂ දෙක ප‍්‍රධාන වෙලා ඉන්නේ රට විනාශ කිරීමෙන්, හොරකමෙන් හා බොරු කීමෙන්. රට පහළට දැමීමෙන්. ප‍්‍රධාන හා අප‍්‍රධාන කියලා වෙන්කිරීම සාධාරණ නැහැ. කොහොම වුණත් දෙදෙනාම පෙන්වන අසාර්ථකභාවය අනිවාර්ය වශයෙන්ම සංසන්දනාත්මකව අපට වාසිදායක ලෙස බලනවා. ප‍්‍රශ්නය වන්නේ ඔවුන්ගේ හිස්බව වහන දැවැන්ත ජනමාධ්‍ය ව්‍යාපෘතියක් තිබීමයි. ගෝඨාභයට අදහස් නැතිකම ගැන සමාජගත කරන්නේ ගෝඨාභය වැඩිය කතාකරන කෙනෙක් නෙවෙයි, වැඩකරන කෙනෙක් කියලයි. ඇත්තටම ගෝඨාභයට කතාකරන්න බැරිකමක් නෙවෙයි තියෙන්නේ. අදහස් නැතිකමයි අවුල. ඔහුට රටට තියෙන ප‍්‍රශ්න මොනවාද කියලාවත් දන්නෑ. ඒ නිසා උත්තර දෙන්නට කොහොමත් දන්නේ නැහැ.
ඇමෙරිකානු ජනාධිපතිවරණයේදී ඉදිරිපත් කළ දුර්වලම අපේක්ෂකයෝ ට‍්‍රම්ප් හා හිලරි. ට‍්‍රම්ප් දින්නාම ඇමෙරිකාව ස්වාසිලන්තය ගාණට වැටුණු බව අප දකිනවා. දුර්වල නායකයන් බිහිවීමේ ආදීනව තමයි ඒ. අපි ප‍්‍රතිපත්තිමය වශයෙන් ඇමෙරිකාව පිළිගන්නේ නැහැ. එහෙත් ඇමෙරිකාවේ දේශපාලන සංස්කෘතිය තුළ ඉස්සර බුද්ධි මට්ටමක් හා තර්කණයක් තිබුණා. එහෙත් දැන් තමිල්නාඩු මට්ටමට දේශපාලන සංස්කෘතිය වැටිලා. ඇමෙරිකාවේත් එහෙම නම් ලංකාවේ කොහොම වේවිද. දැන් මාධ්‍යවලින් වහගත්තාට, ඔය අපේක්ෂකයන්ගේ දුර්වලතා නොවැම්බර් 17 වැනිදායින් පස්සේ වහන්න බැහැ. ගෝඨාභය හෝ සජිත් දින්නොත් උපදේශකයෝ දහස් ගාණක් දාලා රට පාලනය කරන්න වේවි. දැන් ඔවුන්ගේ දුර්වලතාව ඇඞ්වර්ටයිසින් කඳුවලින් වහලා. මේ පුද්ගලයන්ව ශිෂ්ට රාජ්‍යතාන්ත‍්‍රිකයන් විදියට මවා පෙන්වීම සාහසික වැඩක්.
ජාතික ජන බලවේගය වෙනම ඉදිරිපත් කිරීමෙන් මේ මොහොතේ රට ඉදිරියේදී තිබෙන අභියෝගයක් වන ඒකාධිපතිවාදය පරාජය කිරීමේ සටන දුර්වල වෙනවා නේද?
අපි හෝද හෝදා මඬේ දාන්නේ නැහැ. අපි 2015දී කියපු දේවල්ම නැවතත් කියනවා නම් අප ගැන ලැජ්ජා වෙන්න ඕනෑ. අවුරුදු 70ක් තිස්සේ හැම ඡුන්දෙකදීම අපි ඕකයි කීවේ. 2015 දී මෛත‍්‍රීපාල සිරිසේන දිනවන්න කටයුතු කළ සංවිධානවලින් රාශියක් කැපී පෙනෙන ලෙස දැන් ඉන්නේ ජාතික ජන බලවේගය එක්ක. එදා අරමුණු පාවාදුන්නු එජාපයට කිසිසේත්ම ඒ නපුර පරදන්න බැරි බව අපි දන්නවා. ගෝඨාභය නපුර නම්, එජාපය නපුර එක්ක ඞීල් කරනවා. අපි පහුගිය අවුරුදු හතරේ සිද්ධවුණ දේවල් සලකලා බැලූවොත් ගෝඨාභයට පිටිය හැදුවේ රනිල් වික‍්‍රමසිංහ අගමැතිවරයා බව තේරුම් ගන්න පුළුවන්. ඒක කළේ රනිල් වික‍්‍රමසිංහලාගේ දුර්වලතාව නිසා නෙවෙයි. ඔහු මැතිවරණ උපක‍්‍රමයක් ලෙසම ගෝඨාභය රාජපක්ෂට නිදැල්ලේ ඉන්න ඉඩ හැරියා. දැන් යකා අප ඉදිරියෙන් තියලා කියනවා, ඔන්න යකා ආවා යකාගෙන් බේරෙන්න ඡුන්දය දෙන්න කියලා. මේක සුළුතර ජනවර්ග සහ ප‍්‍රජාතන්ත‍්‍රවාදයට ගරු කරන අවංක පුරවැසියන් බ්ලැක්මේල් කිරීමක්. ඇත්තටම ගෝඨාභය රාජපක්ෂ මහතාට පාස්පෝට් එක නිදහස් වුණේ කොහොමද. ඔහු නඩුවලින් බේරුණේ කොහොමද.
එහෙත් 2015න් පස්සේ පුළුල් වූ ප‍්‍රජාතන්ත‍්‍රවාදී අවකාශයක් තියෙනවා නේද?
යූඇන්පී ආණ්ඩුව හදපු ප‍්‍රජාතන්ත‍්‍රවාදී අවකාශයක් නැහැ. මිනිස්සු තමයි ඒ අවකාශය හැදුවේ. මිනිස්සු ඔය නායකයන්ට වඩා ඉදිරියට ගිහිල්ලා ප‍්‍රජාතන්ත‍්‍රවාදී ක්ෂිතිජය පුළුල් කළා. ඒත් යූඇන්පීය බලයට ඇවිල්ලා කළේ ඒ ක්ෂිතිජය හැකිතරම් හකුළන්න උත්සාහ කිරීමයි. එහෙව් යූඇන්පීයේ උපායමාර්ගවලට දැන් ගොදුරු වෙන්න ඕනෑ නැහැ. මේ මැතිවරණයෙන් කවුරු ජයගත්තත් ලෝක විනාශය වෙන්නේ නැහැ. දැන් දෙපැත්තෙන්ම ඉදිරිපත් කරන්නේ ලෝක විනාශය වගේ තර්ක. අනෙක් පැත්තෙනුත් කියන්නේ එජාපය ආවොත් විනාශය සිද්ධවේවි කියලා. ඔය අධිසංවේදී ඡුන්ද ව්‍යාපාර ගොඩනඟලා ප‍්‍රජාතන්ත‍්‍රවාදයට ගරු කරන පුරවැසියන් ගොදුරු කරගැනීම දැන් නැවැත්විය යුතුයි.
