x තිවංක සපරමාදු
ගෝඨාභය රාජපක්ෂ මහතාගේ ඔක්තෝබර් 15 මාධ්‍ය හමුව මේ දිනවල බොහෝ දෙනාට විනෝදය සපයන සිදුවීමක් වී තිබේ. එහිදී ගෝඨාභය රාජපක්ෂ මහතා පැහැදිලි කළ එක් සත්‍යයක් වන්නේ, තමා මෙතෙක් පෙන්නුම් කළ දැනුම, විනය හා නිහතමානිකම පිළිබඳ චිත‍්‍රය මුළුමනින්ම මවාගත් එකක් බවයි. එහිදී අසන ලද කිසිම ප‍්‍රශ්නයකට සංයුක්ත පිළිතුරක් දෙන්නට ඔහු අසමත් විය. හැම ප‍්‍රශ්නයකින්ම පිළිතුරු නොදී පැනයන ස්වභාවයක් පෙන්වීය. තමාගෙන් ප‍්‍රශ්න ඇසීම ගැන ඔහු කෙතරම් උරණවී සිටියාද කියනවා නම්, මගෙන් විතරක් නෙවෙයි, මේ අයගෙනුත් අහන්න යනුවෙන් සිනාවෙන් නමුත් ප‍්‍රතිරෝධය දැක්වීමට ඔහුට සිදුවිය. ජනාධිපති අපේක්‍ෂකයා හැටියට අන් අය නොව, තමාම ඒ ප‍්‍රශ්න සියල්ලටම පිළිතුරු දිය යුතු බව වත් ඔහු නොදැන සිටියා වාගේය.
මාර්තු 12 ව්‍යාපාරය සංවිධානය කළ ‘මහජන වේදිකාව’ට නොපැමිණියේ ඇයිද යන ප‍්‍රශ්නයට එහිදී ඔහු කිව්වේ, දහදෙනකු වටවී තමාගෙන් ප‍්‍රශන අහන තැනකට පැමිණිය නොහැකි බවය. මහජන වේදිකාවේදී දහදෙනෙකු වටවී එකෙකුගෙන් ප‍්‍රශ්න ඇසුවේ නැති බව හැමෝම දනිති. අපේක්‍ෂකයන්ට මුලින් ප‍්‍රශ්න පවා දී තිබුණු අතර, ඔවුන් එහි පැමිණ කළේ තමන් සූදානම් වූ කතාවකි. ඒ අනුව ගෝඨාභයගේ පිළිතුරෙන් පෙනෙන්නේ කවර ආකාරයක හෝ ප‍්‍රශ්න කිරීමකට, බඳුන්වීමට ඔහුගේ ඇති අකමැත්තයි.
ඔහු ගලවාගැනීමට සිදුවුණේ අසලින්ම වාඩිවී සිටි මහින්ද රාජපක්ෂ සහෝදරයාටය. තමාගෙන් විමසූ සමහර ප‍්‍රශ්න ගෝඨාභය මහින්ද රාජපක්‍ෂටම යොමු කළේය. ඒවා ගැන ඔහුට සංයුක්ත පිළිතුරු නැති බව එයින් පැහැදිලි වුණු අතර, මහින්ද රාජපක්‍ෂටද ඒ ගැන දැනුමක් නැති බව තවදුරටත් පැහැදිලි විය.
දි අයිලන්ඞ් පුවත්පතේ ශමීන්ද්‍ර ෆර්ඩිනැන්ඩු ඇසූ ප‍්‍රශ්නය වුණේ, ජනාධිපති ධුරයට පත්වූ පසු අගමැති තනතුර වෙනස් කරන්නේද යන්නයි. ශමීන්ද්‍ර ෆර්ඩිනැන්ඩු පසුගිය කාලයේ, 2015 ජනාධිපතිවරණ ජයෙන් පසු ඒ වන විට ධුරයේ සිටි අගමැති දිමු ජයරත්න ඉවත් කොට රනිල් වික‍්‍රමසිංහ අගමැති ධුරයට පත්කිරීම ගැන තදබල විවේචනාත්මක අදහසක් දැක්වූවෙකි. ඔහු ගෝඨාභයගෙන් ඒ ගැන ඇසුවේ ඒ පරණ අත්දැකීම නිසාම වන්නට පුළුවන. ගෝඨාභය පිළිතුරක් නොදී මහින්ද රාජපක්ෂ වෙත ප‍්‍රශ්නය පාකර හැරියේය.
මහින්ද රාජපක්ෂ දුන් පිළිතුර විස්මයජනක බොරුවකි.
ඔහු කිව්වේ අලූත් ජනාධිපතිවරයකු දිවුරුම් දුන් වහාම, අගමැතිවරයා වෙනස් වන බවයි. ඒ වන විට සිටින අගමැති සහ කැබිනට් මණ්ඩලය ඉවත්වන බවත්, අලූත් අගමැතිවරයකු හා කැබිනට් මණ්ඩලයක් පත්කරන්නට සිදුවන බවත්ය.
මේ වනාහි, ආණ්ඩුක‍්‍රම ව්‍යවස්ථාවවත්, පාර්ලිමේන්තු සම්ප‍්‍රදායන්වත් නිසි ලෙස නොදන්නකුගේ අමනොඥ පිළිතුරකි.
මේ සම්බන්ධව අනිද්දා සමග අදහස් දැක්වු ජනාධිපති නීතිඥ ආචාර්ය ජයම්පති වික‍්‍රමරත්න කීවේ, ජනාධිපතිවරයකු අලූතෙන් පත්වීම ඒ වන විට පවතින කැබිනට් මණ්ඩලය සම්බන්ධයෙන් කිසිම බලපෑමක් ඇති නොකරන බවයි.
මුලින් ජනාධිපතිට අගමැති ඉවත්කළ හැකි වුණත්, 19වැනි සංශෝධනය යටතේ අගමැතිවරයා ඉවත් කරන්නට කිසිම බලයක් ජනාධිපතිවරයකුට නැත. ආණ්ඩුක‍්‍රම ව්‍යවස්ථාව අනුව, අගමැතිවරයකු ඉවත් වන්නේ අවස්ථා දෙකකදීය. එකක්, ඔහු සිය ධුරයෙන් ඉල්ලා අස්වූ විටය. දෙවැන්න ඔහු පාර්ලිමේන්තු මන්ත‍්‍රීවරයකු හැටියට සිටීම නතරවූ විටය.
ජයම්පති වික‍්‍රමරත්න මහතා කියන්නේ, අමාත්‍ය මණ්ඩලය විසිරෙන අවස්ථා කිහිපයක් ඇති බවයි. එකක් නම්, අගමැතිවරයාට තවදුරටත් ධුරය දරන්නට නොහැකි වූ විටය. අයවැය යෝජනාව පාර්ලිමේන්තුවේදී පරාජය වුවහොත් එවිටද අමාත්‍ය මණ්ඩලය විසිරෙනු ඇත. ඒ වගේම ආණ්ඩුවට විරුද්ධව විශ්වාස භංග යෝජනාවක් සම්මත වූ විටද ඇමති මණ්ඩලය විසිරෙන්නේය. ආණ්ඩුවේ ප‍්‍රතිපත්ති ප‍්‍රකාශය පාර්ලිමේනතුවේදී පරාජය වුවහොත් ද ඇමති මණ්ඩලය විසිරෙන්නේය.
මේ අවස්ථාවලට නොවැටෙන තැනකදී, අගමැති ධුරය හෝ ඇමති මණ්ඩලය වෙනස් වන්නේ නැත. මහින්ද රාජපක්ෂ මහතා, අලූත් ජනාධිපතිවරයකු පත්වුණු විට ඇමති මණ්ඩලය විසිරෙන්නේයැයි කීවේ සමහර විට, ඒ ගැන තිබෙන නීතිමය තත්ත්වය නොදැනම නොවන්නට පුළුවන. එනම්, නීතිය කුමක් වුණත්, තමන් කරන්නට සිතාගෙන සිටින දේ කරන්නට බලාපොරොත්තුවෙන් විය හැකිය.
2015 ජනවාරියේදී මෛත‍්‍රීපාල සිරිසේන මහතා ජනාධිපති අපේක්‍ෂකයා ලෙස සිටි සෑම වේදිකාවකම පැහැදිලිව ප‍්‍රකාශ කෙළේ රනිල් වික‍්‍රමසිංහ මහතා අගමැති හැටියට පත්කරන බවය. ඔහු ජනාධිපති වුණු වහාම අගමැති දිමු ජයරත්න වෙත ධුරයෙන් ඉවත්කිරීමේ ලිපියක් යවන ලදි. ඒ සඳහා ඒ අවස්ථාවේදී ජනාධිපතිවරයාට බලය තිබිණ. අගමැති ලෙස රනිල් වික‍්‍රමසිංහ පත්කරන ලදි. එදා ඒ පත්කිරීම ගැන විරුද්ධව කරුණු කියන කිසිවකු, රනිල් වික‍්‍රමසිංහගේ පත්වීම ගැන පාර්ලිමේන්තුව තුළදී කිසිවකු විරුද්ධ නොවුණු බව කියන්නේ නැත. රනිල් වික‍්‍රමසිංහ අගමැති කළ පසු ඊට විරුද්ධ යමෙකු සිටී නම් කළ යුතුව තිබුණේ ඔහුට විරුද්ධව විශ්වාසභංග යෝජනාවක් සම්මත කරගැනීමට තැත් දැරීමය. එවැන්නක් සම්මත වුණි නම් රනිල් වික‍්‍රමසිංහ මහතාට වහාම ගෙදර යන්නට සිදුවෙයි. එහෙත්, කුමන හේතුවක් නිසා හෝ ඒ වන විටත් මහින්ද රාජපක්ෂ මහතාගේ පිලට වැඩි බලයක් තිබුණු පාර්ලිමේන්තුව තුළින් රනිල් වික‍්‍රමසිංහ අගමැතිට එරෙහි විශ්වාස භංග යෝජනාවක් ගෙනාවේ නැත.
ගෝඨාභයගේ හමුවෙන් පසු මාධ්‍ය හමුවකදී අගමැතිවරයා පත්කිරීම ගැන ඩලස් අලහප්පෙරුම මහතාගෙන් මාධ්‍යවේදියකු ප‍්‍රශ්න කළ විට ඔහු කියා තිබුණේ, අගමැතිගෙන් ඉල්ලා අස්වන ලෙස රනිල්ගෙන් ඉල්ලා සිටිය හැකි බවය. එම ඉල්ලීම ඔහුට පිළිගත නොහැක්කේ අවස්ථා දෙකකදී බවත් අලහප්පෙරුම මන්ත‍්‍රීවරයා කිව්වේය. එකක් නම්, එම ඉල්ලීම නීති විරෝධී වන විටය. අනෙක, පාර්ලිමේන්තුවේ බහුතර බලය අගමැතිවරයාට තිබෙන විටය.
මේ විදියට බැලූ විට, ගෝඨාභය රාජපක්ෂ මහතා ජනාධිපති වුවද, මහින්ද රාජපක්ෂ මහතා වහාම අගමැති ධුරයට පත්කරන්නට, 19 සංශෝධනය යටතේ පුළුවන්කමක් නැත. අගමැතිට වර්තමාන පාර්ලිමේන්තුවේ වැඩි බලයක් තිබෙන තාක් වෙනත් අගමැති කෙනකු පත්කරන්නට පුළුවන්කමක් නැත. තම සහෝදරයාගේ මාධ්‍ය හමුවලදී මහින්ද රාජපක්ෂ මහතාත් හරි හරියට ඔහු සමග මේ විදියට බොරු කියන්නට ගියොත්, ඡුන්ද කඩන්නන්ගේ සමිතිය ශක්තිමත් වෙයි.x
