සර්වෝදය ආයතනයේ ප‍්‍රධාන ලේකම් වින්යා ආරියරත්න මහතා ඇතුළු කණ්ඩායමක් ඉදිරි ජනාධිපතිවරණයට අපේක්ෂකයෙක්ව ඉදිරිපත් කිරීමට බලාපොරොත්තු වන නිසා සර්වෝදය උපසභාපති ලෙස කටයුතු කළ රෝහණ හෙට්ටිආරච්චි මහතා එම තනතුරෙන් ඉවත්වී ඇත.
ඔහු පැෆරල් මැතිවරණ නිරීක්ෂණ සංවිධානයේ විධායක අධ්‍යක්ෂවරයා ලෙසද කටයුතු කරයි.
ඒ පිළිබඳව කළ විමසීමකදී රෝහණ හෙට්ටිආරච්චි මහතා ප‍්‍රකාශ කළේ මැතිවරණ නිරීක්ෂකයෙකු ලෙස තමන්ගේ ස්වාධීනත්වය බැලූ බැල්මටම පෙනී යා යුතු නිසා සර්වෝදය ආයතනයේ තනතුරෙන් ඉවත්වූ බවයි.
දේශපාලන ක‍්‍රියාකාරකම්වලට සම්බන්ධ වීම නිසා සර්වෝදය ආයතනයේ මධ්‍යස්ථභාවය ප‍්‍රශ්නගත වී ඇති නිසා තමන් ඒ තීරණය ගත් බව ඔහු කීය. ඉදිරියේදී සර්වෝදය සමඟ කටයුතු කිරීමේදීද එම කාරණය සලකා බලන බව ඔහු ප‍්‍රකාශ කළේය.
රෝහණ හෙට්ටිආරච්චි මහතා සර්වෝදය ආයතනයේ උපසභාපතිවරයෙකුව සිටීම මගින් ඔහුගේ මැතිවරණ නිරීක්ෂණ කටයුතු අභියෝගයට ලක්වෙන බව සඳහන් කරමින් මැතිවරණ කොමිෂන් සභාවට පැමිණිල්ලක් ඉදිරිපත් වීම මෙම තීරණය සඳහා ආසන්නම හේතුව වශයෙන් වාර්තා වෙයි.
