ශ‍්‍රී ලංකා නාවික හමුදාවේ නැවත සේවයේ පිහිටවූ යෝෂිත රාජපක්ෂට හා තරුණයන් අතුරුදන් කිරීමේ නඩුවේ චූදිතයෙක් වන ඞීකේපී දසනායකට උසස්වීම් ලබාදී ඇත්තේ වසර ගණනාවක් ආපස්සට වන පරිද්දෙන්ය.
යෝෂිත රාජපක්ෂව 2016-12-28 දින සිට බලපැවැත්වෙන පරිදි නැවත සේවය පිහිටවනු ලැබූ අතර එය සිදුකළේ සැප්තැම්බර් 24 වැනිදාය. ඔහුව තාවකාලික ලූ‍තිනන් කර්නල් ධුරයට උසස්කර ඇත්තේ නැවත සේවයේ පිහිටවූ 2016 අදාල දිනයේ සිටමය.
තරුණයන් 5 දෙනෙකු ඇතුළු 11 දෙනෙකු අතුරුදන් කිරීමේ නඩුවේ ප‍්‍රධාන චූදිතයෙකු වූ ඞී.කේ.පී. දසනායකව තාවකාලික කොමදෝරු ධූරයට උසස් කර ඇත්තේ 2016-01-01 දින සිට ක‍්‍රියාත්මක වන පරිදිය.
එම උසස්වීම් සඳහා අවශ්‍ය මූලික සුදුසුකම් හෙවත් පාඨමාලා සම්පූර්ණ කිරීම යෝෂිත රාජපක්ෂ සිදුකර නැති බවත්, අපරාධ චෝදනා මත ඇප මත සිටින අයෙකුට උසස්වීම් නොදිය යුතු බවට වූ නාවික හමුදා පනතේ හා ආයතන සංග‍්‍රහයේ ඇති ප‍්‍රතිපාදන ඞී.කේ.පී. දසනායක සම්බන්ධයෙන් කඩකර ඇති බවත් අපගේ ආරංචිමාර්ග පවසයි.
