ඉදිරි ජනාධිපතිවරණය නොවැම්බර් මාසය අවසානයේදී පවත්වනු ඇති බව මැතිවරණ කොමිෂන් සභාවේ ආරංචි මාර්ග කියයි.
කෙසේවෙතත් නොවැම්බර් 18 නොවැම්බර් 23 හෝ දෙසැම්බර් 07 යන දින තුනෙන් එකකවත් ජනාධිපතිවරණය නොපවත්වන බව දැනට ස්ථීර ලෙස එකඟ වී ඇතැයි එම ආරංචි මාර්ග පවසයි.
නොවැම්බර් 18 වැනිදා ශ්‍රී ලංකා පොදුජන පෙරමුණේ නායක විපක්ෂ නායක මහින්ද රාජපක්ෂ මහතාගේ උපන් දිනය වෙයි. නොවැම්බර් 23 හා දෙසැම්බර් 07 ලංකාවේ දේශපාලන පක්ෂවල නියෝජිතයන් හා මාධ්‍යවලින් ජනාධිපතිවරණ දිනය ලෙස නම් කර තිබෙන නිසා එම දිනවලද මැතිවරණය නොපැවැත්වීමට එකඟ වී තිබේ.
සාමාන්‍ය පළ විභාගය පැවැත්වීමට පෙර ජනාධිපතිවරණය පැවැත්විය යුතු බව දැනට එකඟ වී තිබෙන අතර නොවැම්බර් තුන්වැනි සතිය වඩා සුදුසු වනු ඇතැයි මැතිවරණ කොමිසමේ ආරංචි මාර්ග පවසයි.
මේ වනවිට එක්සත් ජාතික පක්ෂය, ශ්‍රී ලංකා පොදුජන පෙරමුණ, ශ්‍රීලනිපය, ජනතා විමුක්ති පෙරමුණ යන ප්‍රමුඛ පක්ෂ කිහිපයක්ම ජනාධිපතිවරණයට ඉදිරිපත් වෙන බව මැතිවරණ කොමිෂන් සභාව වෙත දැනුම් දී තිබේ.
ඊට අමතරව රාජා කොල්ලුරේ මහතා ලේකම්ධුරය දරන එක්සත් සමාජවාදි පෙරමුණ, පෙරටුගාමි සමාජවාදී පක්ෂය, වික්‍රමබාහු කරුණාරත්න මහතාගේ නව සමසමාජ පක්ෂය, අසාත් සාලි මහතාගේ පක්ෂය, සිරිතුංග ජයසූරිය මහතාගේ පක්ෂය, ලීනස් දිසානායක මහතාගේ පක්ෂය, මහින්ද හේවගේ මහතා ලේකම්ධුරය දරන ශ්‍රී ලංකාවේ සමාජවාදී පක්ෂය, බත්තරමුල්ලේ සීලරතන හිමියන්ගේ ජනසෙත පෙරමුණ, ආරියවංශ දිසානායක මහතා ප්‍රධානත්වය දරන රාජාලියා ලකුණ සහිත පක්ෂය, ටිරාන් අලස් මහතා ප්‍රධානත්වය දරන එක්සත් මහජන පක්ෂය ඇතුළු දේශපාලන පක්ෂ ගණනාවක් ජනාධිපතිවරණයට ඉදිරිපත් වෙන බව දැනුම්දී තිබේ
