පොදුජන පෙරමුණේ ජනාධිපතිවරණ අපේක්ෂක ගෝඨාභය රාජපක්ෂට සහාය දැක්වීමට නම් පොදුජන පෙරමුණේ ලකුණ වන පොහොට්ටුව ලකුණ වෙනුවට වෙනත් පොදු ලකුණක් තෝරාගත යුතු බව ශ‍්‍රීලනිප මහලේකම් දයාසිරි ජයසේකර අනිද්දා සමඟ පැවසීය.
සාමාන්‍යයෙන් ප‍්‍රධාන පක්ෂ දෙකක් අතර සන්ධාන ඇතිකරගැනීමේදී එක් පක්ෂයක සලකුණෙන් මැතිවරණයට ඉදිරිපත් වීම සිදුනොවන බව ඔහු පෙන්වාදුන්නේය. ඒ නිසා බුලත් කොළය, පුටුව වැනි දැනට පවතින සන්ධාන ලකුණක් හෝ නව ලකුණක් යටතේ තරග කිරීමට ශ‍්‍රී ලංකා පොදුජන පෙරමුණ එකඟ විය යුතු බව ඔහු කීය.
එම කරුණට හා ප‍්‍රතිපත්තිමය කාරණා කිහිපයකට එකඟ වන්නේ නම් ගෝඨාභය රාජපක්ෂට සහාය දැක්වීම කළ හැකි බව ඔහු පැවසීය. කෙසේවෙතත් දැනට පවතින සාකච්ඡුාවල ප‍්‍රගතිය ගැන අදහස් දක්වමින් ඔහු කීවේ තවමත් ඉහත කී එකඟතා ඇති කරගැනීමට නොහැකි වූ බවයි.
ශ‍්‍රීලනිපයේ තවත් ප‍්‍රකාශකයෙකු ප‍්‍රකාශ කළේ බැසිල් රාජක්ෂ සමඟ පසුගිය සතියේ කළ සාකච්ඡුාවේදී වෙනත් ලකුණකින් ඉදිරිපත්වීමට ඔහු කැමැත්ත දැක්වූ බවයි. එහෙත් ගෝඨාභය රාජපක්ෂ සමඟ කළ සාකච්ඡුාවේදී ඔහු ඒ කරුණට එකඟතාවක් නොදැක්වූ බව ඔහු කීය. පොහොට්ටුව නැතිව වෙනත් ලකුණකින් ඉදිරිපත් වුවහොත් පරාජයට පත්වනු ඇතැයි කල්පනා කිරීම එසේ පැවසීමට හේතුව යැයි එම ප‍්‍රකාශකයා කීය. ඉහත කී එකඟතා ඇති කරගැනීමට නොහැකි වුවහොත් ශ‍්‍රීලනිපය ගෝඨාභය රාජපක්ෂට සහාය නොදක්වන බව ඔහු පැවසීය. වෙනත් ලකුණක් පිළිබඳ යෝජනා කිරීමට හේතුව වන්නේ ඉදිරි ජනාධිපතිවරණයෙන් පසුව ශ‍්‍රීලනිපයට තනිව දේශපාලනය කිරීමට ඉඩකඩ විවෘතව තබාගැනීම සඳහාත් ශ‍්‍රී ලංකා පොදුජන පෙරමුණ අඩියක් පසුපසට ගන්නා තැනට පත්කිරීමෙන් ශ‍්‍රීලනිපයේ බලය තහවුරු කරගැනීම සඳහාත් බව ඔහු වැඩිදුරටත් කීය. ශ‍්‍රීලනිප කණ්ඩායමට පොහොට්ටුව ලකුණ ප‍්‍රවර්ධනය කිරීම කිසිසේත්ම කළ නොහැකි බව එම ප‍්‍රකාශකයා කීය.x
