ශ‍්‍රීලංකා නිදහස් පක්‍ෂයේ මහා සම්මේලනයේ දී එහි සභාපති, මෛත‍්‍රීපාල සිරිසේන ජනාධිපතිතුමා කෙළේ, එක්සත් ජාතික පක්‍ෂයටත්, එහි නායකයාටත් බැන අඬගැසීම ය. ඇත්ත වශයෙන් ම ශ‍්‍රී ලංකා නිදහස් පක්‍ෂය, මේ වන විට මුහුණ දී සිටින දිය වී යෑමේ තර්ජනයට මුහුණ දෙන්නේ කෙසේ ද? වර්තමාන සුවිශේෂ දේශපාලන මොහොත තුළ පක්‍ෂය කළමනාකරණය කරගන්නේ කෙසේ ද වැනි දුර දැක්මක් ඒ කතාවේ කිසි ලෙසකින් වත් අන්තර්ගත නොවී ය. එවැනි නායකයකු සිටින දේශපාලන පක්‍ෂයක ඉරණම එය අද මුහුණ දී තිබෙන තත්ත්වය ම මිස අනෙකක් විය හැකි නොවේ.
ජනාධිපතිවරයා සිය පක්‍ෂය ගැන කතා නොකරනවාට සහ එක්සත් ජාතික පක්‍ෂයට බැන අඬගසනවාට අමතර ව රටට ඉතා වැදගත් වන ප‍්‍රකාශයක් ද කෙළේය. එනම්, මහ බැංකු බැඳුම්කර කොල්ලයට අදාළ නඩුවේ දී උසාවියට, හිටපු මහබැංකු සභාපතිවරයාටත් වඩා ඉහළ අය ගෙනෙන බව ය. මහ බැංකු බැඳුම්කර වංචාවට සම්බන්ධ දේශපාලකයන් සියලූ දෙනා ම දේශපාලනයෙන් ඉවත් විය යුතු බව ය.
ඇත්ත, මහබැංකු බැඳුම්කර වංචාවට සම්බන්ධ දේශපාලකයෝ කිසිවෙක් සිටිත් නම් අනිවාර්යයෙන්ම ඔවුන් දේශපාලනයෙන් ඉවත් විය යුතු ය. එවැන්නන්ට දේශපාලනයේ සිටීමට කිසි ම සදාචාරාත්මක අයිතියක් නැති බැවිනි. ඒ කාරණය සම්බන්ධයෙන් නම් අපට ජනාධිපතිවරයා සමග එකඟ විය හැකි ය.
එහෙත්, ප‍්‍රශ්නගත වන්නේ, හිටපු මහබැංකු අධිපතිවරයාටත් වඩා ඉහළ අය නඩුවට අධිකරණයට ගෙනෙන බවට ජනාධිපතිවරයා කීම ය. පසුගිය අවුරුදු හතරහමාරක කාලය තුළ පණ පිහිටුවා ජනාධිපතිවරයා කියූ බොහෝ දේවලට අත්වූ ඉරණම මෙන්, මේ කතාව ද ආ ගිය තැනක් අනාගතයේ සොයා ගන්නට නැති විය හැකි ය. එහෙත්, එය සිදු වන්නේ යයි උපකල්පනය කළහොත්, ඒ ආශ‍්‍රයෙන් බරපතළ කාරණා කිහිපයක් අපගේ අවධානයට ගනු වටියි.
එකක් නම්, මේ වන විට මහ බැංකු බැඳුම්කර වංචාව සම්බන්ධයෙන් නීතිපතිවරයා නඩු පවරා ඇති බවයි. ඒ රුපියල් මිලියන 688ක පාඩුවක් රජයට කළ බව කියමිනි. ඒ නඩුව ඇසෙන්නේ ද කොළඹ පැවැත්වෙන විශේෂ ත‍්‍රිපුද්ගල මහාධිකරණ විනිශ්චය මණ්ඩලය ඉදිරියේ ය. එම නඩුවේ විත්තිකරුවෝ දහ දෙනෙකි. ඒ හිටපු මහ බැංකු අධිපති අර්ජුන් මහේන්ද්‍රන්, ඔහුගේ බෑනා වන පර්පෙචුවල් ටේරෂරීස් හිමිකරු අර්ජුන් ඇලෝසියස් ඇතුළු තවත් අට දෙනෙකි. සාක්‍ෂිකරුවෝ එකසිය පහළොවකි. ලේඛන දෙසිය තිස් හයකි.
මේ වන විට ලංකාවෙන් පැන ගොස් සිටින අර්ජුන් මහේන්ද්‍රන් අත්අඩංගුවට ගෙන අධිකරණයට ඉදිරිපත් කිරීම සඳහා වන උදර්පණ ඉල්ලීමට අවශ්‍ය ලේඛන නීතිපතිවරයා පසුගිය දා අධිකරණ හා විදේශ අමාත්‍යාංශ දෙකට ඉදිරිපත් කෙළේ ය.
එහෙත්, අප දන්නා පරිදි, මේ නඩු ලේඛනවල සිටින ඉහළ ම පුද්ගලයා අර්ජුන් මහේන්ද්‍රන් නමැති හිටපු මහ බැංකු අධිපතිවරයා ය. නඩුවේ සාක්‍ෂි ලැයිස්තුවේ ද ඊට ඉහළ පුද්ගලයකු ගැන සඳහන් වන්නේ නැත. දැන් මතු වන ප‍්‍රශ්නය වන්නේ, ජනාධිපතිවරයා කියන මේ විශේෂ අය කවුරුද කියා ය. එවැනි විශේෂ අය වෙත් නම් ඔවුන් නඩුවේ විත්තිකරුවන් හෝ සාක්‍ෂිකරුවන් ලෙස ඇතුළත් ව ඇත්තෝ ද?
ජනාධිපතිවරයාට එක්සත් ජාතික පක්‍ෂ නායකයාගෙන් දේශපාලන වශයෙන් පළි ගන්නට වුවමනාවක් තිබෙන බවත්, ඒ මත විවිධ අවලාද නගන බවත් රට ම දනියි. එහෙත්, ඒ විරසකය නිසා රටේ නීතියට බලපාන මෙවැනි බරපතළ ප‍්‍රකාශයක් ජනාධිපතිවරයා කරන විට එය බැ?රුම් ලෙස සැලකිය යුතු ය.
දැන් මහාධිකරණයේ නඩු පවරනු ලැබ ඇත්තේ, ජනාධිපතිවරයා විසින් මීට පෙර මහ බැංකු බැඳුම්කර කොල්ලය සම්බන්ධයෙන් පත් කරන ලද ජනාධිපති කොමිෂන් සභාවේ ඉතා ම දීර්ඝ වාර්තාව අධ්‍යයනය කිරීමෙන් පසු නීතිපතිවරයා විසිනි. එම ජනාධිපති කොමිෂන් සභාවේ කීර්තිධර ශ්‍රේෂ්ඨාධිකරණ විනිසුරුවරුන්ද අසුන්ගෙන සිටි නිසා, එහි ස්වාධීනතාවත්, කාර්යක්‍ෂමතාවත්, අපක්‍ෂපාතිභාවයත් ගැන කිසිදු ප‍්‍රශ්නයක් පැන නොනැංගේ ය.
ඒ කොමිෂන් සභාවේ අවසාන වාර්තාවේ ද කිසිදු දේශපාලකයකු මේ කොල්ලයට වග කිව යුතු යැයි නොකියැවේ. එවැන්නක් තිබෙන බව පාර්ලිමේන්තුවේ දී වත්, ජනමාධ්‍ය ඔස්සේ දී වත් මෙතෙක් ප‍්‍රකාශයට පත් වී ද නැත. එවැනි තත්ත්වයක් යටතේ, ඒ තොරතුරුවලට පිටින් යන කරුණු ජනාධිපතිවරයා හෙළිදරව් කරන්නේ කුමන දැනුමකින් ද? නැති නම් එවැන්නක් කිරීමට ඉදිරි සැලැස්මක් ඇතිව ද?
එවැන්නක් ඉදිරියේ සැලසුම් වේ නම්, නීතිපතිවරයාගේ ස්වාධීනත්වය යනු ඇත්තේ දරුණු අගාධයකට ය. එවිට නීතිපති අපට සලකන්නට වන්නේ, ජනාධිපතිවරයා සමග එකට කමින් බොමින් හිඳිමින් ඔහුගේ වුවමනාවන් සංතර්පණයේහි ලා සිය බලතල උපයෝගී කර ගන්නා කෙනෙකු හැටියට ය. දැනටමත් ජනාධිපතිවරයාට පක්‍ෂපාතියැ’යි නීතිපතිවරයාට එල්ල වී ඇති චෝදනාව එවිට තහවුරු වනු ඇත. එහෙත්, නීතිපතිවරයා එවැනි අගාධයකට නොවැටෙනු ඇතැ’යි අපි කල්පනා කරමු. කිසියම් සැකයක් වේ නම් එය ද දුරු කරනු පිණිස, සිය මාධ්‍ය ප‍්‍රකාශිකාව ලවා, අනාගතයේ එවැනි කිසිවකු අධිකරණයට ගෙන එන්නට පියවරක් ඇත්තේ ද යන්න පැහැදිලි කිරීමට නීතිපතිවරයාට හැකි ය.x
