කුඩු ජාවාරම්කාරයන් එල්ලා මැරිය යුතුයැයි රටපුරා මහත් ප්‍රචාරයක් ගෙනයන ජනාධිපතිවරයා වෙනත් අපරාධකරුවන් හෝ අපරාධ චෝදනා ලැබූවන් පිළිබඳව කටයුතු කරන්නේ හාත්පසින්ම වෙනස් ආකාරයකටය. එම වෙනස් ආකාරය හොඳින්ම පෙනෙන්නට තිබෙන්නේ ත්‍රිවිධ හමුදාවලට අයත් අපරාධ සැකකරුවන් සම්බන්ධයෙන් ජනාධිපතිවරයා කටයුතු කිරීමේදීය.
සාමාන්‍ය ක්‍රමවේදය අනුව යම් ත්‍රිවිධ හමුදා සාමාජිකයෙකු අපරාධයක් සම්බන්ධයෙන් චෝදනා ලබන විට, සැකකරුවෙකු ලෙස අත්අඩංගුවට ගන්නා විට එම ත්‍රිවිධ හමුදා සාමාජිකයා වැඩ තහනමට ලක්වීම, ඔහුට හෝ ඇයට උසස්වීම් නොලැබීම හෝ සේවා දිගු නොලැබීම ආදිය සිදුවෙයි.
පසුගිය රාජපක්ෂ පාලන කාලයට අදාල ත්‍රිවිධ හමුදා සාමාජිකයන්ට චෝදනා එල්ලවූ අපරාධ සම්බන්ධයෙන් මේ සාමාන්‍ය පටිපාටිය සිදුනොවන බව පෙනෙන්නට තිබෙන කරුණය.
වෙනස් අපරාධ සම්බන්ධයෙන් බන්ධනාගාරගතවෙන හමුදා අපරාධකරුවන්ට අධිකරණයෙන් ඇප ලබාදුන්නද එම නඩු කටයුතු අවසන් වනතෙක් ඔවුන්ට යළි රැකියාව ලැබෙන්නේ නැත. එහෙත් ලසන්ත වික්‍රමතුංග ඝාතනය, ප්‍රගීත් එක්නැළිගොඩ අතුරුදන් කිරිම, කීත් නොයාර් පැහැරගෙන යෑම, වසීම් තාජුඩීන් ඝාතනය, උපාලි තෙන්නකෝන්ට පහරදීම, මුතූර්හි සහන සේවකයන් 17 දෙනෙකු ඝාතනය හා තරුණයන් 5 දෙනෙකු ඇතුළු පුද්ගලයන් 11 දෙනෙකු අතුරුදන් කිරීම ආදි අපරාධවලදී එම අපරාධ සැකකරුවන්ට අධිකරණයෙන් ඇප ලැබුණ සැණින් යළි සේවයේ පිහිටුවීම් ලබාදී තිබේ.
ඒ ආකාරයේ විශේෂ කොට සැලකීමේ ජනාධිපතිවරයාගේ අලුත්ම තීරණ දෙකක් පසුගිය දිනවල සිදුවුණි. එකක් ත්‍රිවිධ හමුදා මාණ්ඩලික ප්‍රධානී අද්මිරාල් රවීන්ද්‍ර විජේගුණරත්නගේ එකී ධුරකාලය 2019 දෙසැම්බර් 31 දක්වා දීර්ඝ කිරීමය. ඔහුගේ වසර දෙකක ත්‍රිවිධ හමුදා මාණ්ඩලික ප්‍රධානී ධුරය අවසන්වීමට නියමිතව තිබුණේ පසුගිය අගෝස්තු 22 වන දාය. සාමාන්‍යයෙන් මෙම ධුරය විශ්‍රාම යන ත්‍රිවිධ හමුදාපතිවරයෙකුට හිමිවීම සිදුවේ. ආසන්නයේම විශ්‍රාම ගියේ හිටපු යුද හමුදාපති ජෙනරාල් මහේෂ් සේනානායකය. ඔහුට පෙර හිටපු නාවික හමුදාපතිවරුන් වූ සිරිමෙවන් රණසිංහ හා ට්‍රැවිස් සින්නයියාද හිටපු ගුවන් හමුදාපති කපිල ජයම්පතිද විශ්‍රාම ගියෝය. එහෙත් ඒ කිසිවෙකුට ත්‍රිවිධ හමුදා මාණ්ඩලික ප්‍රධානී පුටුවේ ඉඳගන්නට ඉඩ ලැබුණේ නැත. අද්මිරාල් රවීන්ද්‍ර විජේගුණරත්නට දුන් මෙම සේවා දිගුවත් සමඟ එහි හිඳගැනීම විශ්‍රාම යන හමුදාපතිවරයෙකුට තවදුරටත් පමාවනු ඇත.
අද්මිරාල් රවීන්ද්‍ර විජේගුණරත්නගේ එම සේවා දිගුව මේ අවස්ථාවේ කථාකළ යුතු එකක් බවට පත්වන්නේ ඔහු තරුණයන් 5 දෙනෙකු ඇතුළු පුද්ගලයන් 11 දෙනෙකු කප්පම් ලබාගැනීම සඳහා පැහැරගෙන ගොස් අතුරුදන් කිරීමේ සිද්ධියේ නාවික හමුදා අපරාධකරුවන්ට රැකවරණ ලබාදීම සම්බන්ධයෙන් චෝදනා ලැබූවකු නිසාය. ඔහු ත්‍රිවිධ හමුදා මාණ්ඩලික ප්‍රධානී ධුරයේ තබාගෙන සිටීමම ප්‍රශ්නයක් වී තිබියදී තවදුරටත් සේවා දිගුවක් ලබාදීම යනු හමුදා අපරාධ සැකකරුවන් ආරක්ෂා කිරීමේ ජනාධිපතිවරයාගේ පිළිවෙත හොඳටම පෙන්නුම් කරන්නකි.
අනෙක් තීරණය වන්නේ තරුණයන් 5 දෙනෙකු ඇතුළු 11 දෙනෙකු කප්පම් ලබාගැනීම සඳහා පැහැරගෙන ගොස් අතුරුදන් කිරීමේ නඩුවේම තවත් ප්‍රධාන සැකකරුවෙකු වන නාවික හමුදා තාවකාලික කොමදෝරු, හිටපු නාවික හමුදා මාධ්‍ය ප්‍රකාශකවරයෙකු වූ ඩී.කේ.පී. දසනායකට යළි සේවා දිගුවක් ලබාදීමය. ඔහුට 2019 ජුලි 01 වැනිදා සිට වසරක කාලයකට ජනාධිපතිවරයා සේවා දිගුවක් ලබාදී ඇත. මේ සේවා දිගුවත් සමඟ තවදුරටත් නාවික හමුදාව තුළ රැඳී සිටීමේ හැකියාව ඔහුට ලැබී ඇත.
නාවික හමුදා ක්‍රියා පටිපාටිය අනුව එහි යම් නිලධාරියෙකු යම් නිලයකට තාවකාලිකව උසස්වුවහොත් ඔහු එම නිලයේ වසරක කාලයක් තුළ ස්ථීරත්වයට පත්විය යුතුය. ඩී.කේ.පී. දසනායක තාවකාලික කොමදෝරු නිලයට උසස්වී ඇත්තේ 2015 වර්ෂයේදීය. ඒ අනුව ඔහුට 2016 වර්ෂයේදී ස්ථීර කොමදෝරු තනතුරට පත්වීමට හැකිවී නැත.
එම ස්ථීරත්වයට පත්වීම සඳහා ඉන්පසු වසරක සේවා දිගුවක් සෑම තාවකාලික නිලධාරියෙකුටම ලැබේ. එම වසරක සේවා දිගු කාලයේදීත් ඔහුට හෝ ඇයට ස්ථීර නිලයට පත්වීමට නොහැකි වුවහොත් විශ්‍රාම යා යුතුය. තාවකාලික කොමදෝරු ඩී.කේ.පී. දසනායකට 2016 සිට 2017 දක්වා ලබාදුන් සේවා දිගුවේදීත් ස්ථීරත්වයට පත්වීමට හැකිවී නැත. ඒ අනුව සේනාධිනායක, ආරක්ෂක අමාත්‍ය ජනාධිපතිවරයා 2017 දීත් 2018දීත් ඔහුට වැඩිපුර සේවා දිගු දෙකක් ලබාදී ඇත. වත්මන් සේවා දිගුවත් සමග එය වැඩිපුර සේවා දිගු 3කි. අපරාධ සැකකරුවන් සම්බන්ධයෙන් ජනාධිපතිවරයාගේ ඇති ආලය එයාකාරය.
ජනාධිපතිවරයාගේ මේ ආලයේ තරම දන්නා නිසාම නාවික හමුදාපතිවරයාද ඔහුගේ යුතුකම් ඉටුකිරීම අත්හැර දමා නැත. තාවකාලික කොමදෝරු ඩී.කේ.පී. දසනායක ශ්‍රී ලංකා නාවික හමුදාවේ සැපයුම් අධ්‍යක්ෂ ලෙස 2019 ජුලි 01 දින සිට පත්කර තිබේ.
තරුණයන් පැහැරගැනීමේ සිද්ධියේම තවත් සැකකරුවෙකු වන නාවික හමුදාවේ ස
