ගෝඨාභය රාජපක්ෂ ඇතුලු රාජපක්ෂ පවුලේ සාමාජිකයන් කිහිපදෙනෙකු ශ්‍රී ලංකාවේ ද්විත්ව පුරවැසිභාවය ලැබීමට පෙර, ඇමෙරිකන් පුරවැසිභාවය පමණක් තිබියදී ශ්‍රී ලංකාවේ ඡන්දහිමි නාමලේඛණයට ලියාපදිංචිව සිට ඇත. ඒ පිළිබඳව සන්ඬේ ඔබ්සර්වර් පුවත්පත මුලින් හෙළිදරව් කළේය. ඉන්පසුව අනිද්දා පුවත්පතේ නියෝජ්‍ය කර්තෘ ලසන්ත රුහුණගේ ඒ පිළිබඳව මැතිවරණ කොමිෂන් සභාවට පැමිණිලි කළේය. මැතිවරණ කොමිෂන් සභාව ඒ පිළිබඳව කරුණු සොයා තිබුණි. එහෙත් ඒ සම්බන්ධයෙන් ගතයුතු ක්‍රියාමාර්ග මොනවාදැයි ඔවුන් පසුගිය සතියේදී සොයාබලා තිබුණි.
කෙසේවෙතත් මේ වෙද්දී මැතිවරණ කොමිෂන් සභාව එම පැමිණිල්ල පිළිබඳව තීන්දුවක් ගෙන ඇත. ඒ එය හම්බන්තොට දිස්ත්‍රික් ලේකම්වරයාට යොමු කළ යුතු බවටයි. ඒ අනුව මැතිවරණ කොමිෂන් සභාව එම පැමිණිල්ල හා එයට අදාලව දැනට ඇති තොරතුරු හම්බන්තොට දිස්ත්‍රික් ලේකම්වරයාට යවා ඇත. ඒ අනුව මැතිවරණ කොමිෂන් සභාව අනිද්දා නියෝජ්‍ය කර්තෘවරයාගේ පැමිණිල්ල පිළිබඳ බෝලය හම්බන්තොට දිස්ත්‍රික් ලේකම්වරයාට බෝලය පාස් කර ඇත.
මැතිවරණ කොමිෂන් සභාවේ අභ්‍යන්තර ආරංචිමාර්ග පවසන්නේ වසර ගණනාවක් තිස්සේ ගෝඨාභය රාජපක්ෂගේ නම ඔහු පුරවැසිභාවය නොමැතිව සිටියදී ඡන්දහිමි නාමලේඛනයට ඇතුලත් කර ඇති බවයි. වීරකැටිය මැදමුලන ප්‍රදේශයේ ඡන්දහිමි නාමලේඛණය 2000 සිට ඔවුන් පරීක්ෂා කර ඇත. 2000 සිට 2015 දක්වාම ගෝඨාභය රාජපක්ෂගේ නම මැදමුලන රාජපක්ෂලාගේ නිවෙසේ ඡන්දහිමි නාමලේඛනයේ තිබී ඇත. 2015න් පසුව ගෝඨාභය රාජපක්ෂ කොළඹ ලිපිනයකට මාරු වී ඇත.
ගෝඨාභය රාජපක්ෂගේ නම එම ඡන්දහිමි නාමලේඛණයට ඇතුලත් කර ඇත්තේද වැරදි ආකාරයටය. ගෝඨාභය නන්දසේන රාජපක්ෂ වෙනුවට ගෝඨාභය නන්දිමිත්‍ර රාජපක්ෂ යනුවෙන් එම නම ඡන්දහිමි නාමලේඛණයට ඇතුලත් කර ඇත. නන්දසේන වෙනුවට නන්දිමිත්‍ර යනුවෙන් යොදා ඇත. එහෙත් ඒ වෙනත් පුද්ගලයෙකු නොව ගෝඨාභය රාජපක්ෂම බව තහවුරු වෙන්නේ 2006න් පසුව ඡන්දහිමි නාමලේඛනයට ඡන්දහිමියාගේ ජාතික හැඳුනුම්පත් අංකයද ඇතුලත් කළ යුතු නිසාය. ඒ අනුව ගෝඨාභය නන්දසේන රාජපක්ෂගේ ජාතික හැඳුනුම්පත් අංකය ගෝඨාභය නන්දිමිත්‍ර රාජපක්ෂ යන වැරදි නම ඉදිරියේ සටහන් කර ඇත. ඊට අමතරව ගෝඨාභය නන්දිමිත්‍ර රාජපක්ෂ යන නම ඡන්දහිමි නාමලේඛණයේ තිබියදී ඔහු ඡන්දය භාවිත කළ අවස්ථාද තිබේ. එහෙත් ඒ පිළිබඳව ඡන්ද පොළේදී ප්‍රශ්නයක් මතුවී නැත. සාමාන්‍යයෙන් ඡන්ද පොළට පැමිණෙන ප්‍රසිද්ධ පුද්ගලයන් හැඳුනුම්පතේ ඇති නම හා ඡන්දහිමි නාමලේඛණයේ ඇති නම සසඳා අනන්‍යතාවය තහවුරු නොකර, ඡන්දය භාවිතා කරන අවස්ථා ඇත.
කෙසේවෙතත් ගෝඨාභය රාජපක්ෂගේ නම ඡන්ද ලේඛනයේ තිබීම ඔහු විනයගරුක පුද්ගලයෙක් බව තහවුරු කරන අවස්ථාවක් බව කියන්නට පාර්ලිමේන්තු මන්ත්‍රී, පිවිතුරු හෙළ උරුමයේ නායක උදය ගම්මන්පිළ මහතා උත්සාහ කර තිබුණි. ඔහු කියන්නේ 2005 ජනාධිපතිවරණයේදී ඔහුගේ නම ඡන්දහිමි නාමලේඛනයට ඇතුලත් වී තිබුණේ වැරදීමකින් බවයි. ඊට පෙර ලංකාවේ පුරවැසියෙකුව සිටියදී ගෝඨාභය රාජපක්ෂගේ නම ඡන්දහිමි නාමලේඛනයට ඇතුලත් කර තිබුණු බවත්, ඔහුගේ ලාංකික පුරවැසිභාවය අහිමිවීමෙන් පසුවද එය දිගින් දිගටම ඇතුලත් කර ඇති බවත් ඔහු කියයි. මැදමුලන නිවෙසේ ගෘහමූලිකයා වන චමල් රාජපක්ෂ මහතා ඔවුන්ගේ නම් ඇතුලත් කළේ ඒ අනුව බව ඔහු කියයි. එලෙස වැරදීමකින් ගෝඨාභය රාජපක්ෂගේ නම ඡන්දහිමි නාමලේඛනයට ඇතුලත් වුණත්, ගෝඨාභය රාජපක්ෂ ඇමෙරිකන් පුරවැසියෙක්ව සිටියදී ඡන්දය පාවිච්චි නොකළ බව ඔහු පවසයි. ඕනෑනම් තමන්ගේ පවුලේ සාමාජිකයන් ඉදිරිපත් වූ මැතිවරණවලදී ඡන්දය පාවිච්චි කරන්නට වුව ගෝඨාභය රාජපක්ෂට හැකියාව තිබුණු බව ඔහු කියයි.
ගෝඨාභය රාජපක්ෂ ඡන්දය පාවිච්චි කළ බව කියමින් කිසිවෙකු චෝදනා නොකරන්නේ ඔහු ඡන්දය පාවිච්චි නොකළ නිසා බව උදය ගම්මන්පිල මහතාගේ අදහසය. ගෝඨාභය රාජපක්ෂ ඡන්දය පාවිච්චි නොකළේ ඔහු විනයගරුක පුද්ගලයෙකු නිසා බව ගම්මන්පිල මන්ත්‍රීවරයා අපට යෝජනා කරයි.
එහෙත් ඇත්තෙන්ම එකල ගෝඨාභය රාජපක්ෂ මහතා ඡන්දය පාවිච්චි කළාද නැද්ද යන්න කියමින් කිසිවෙකු චෝදනා නොකරන්නේ එක් හේතුවක් නිසාය. ගෝඨාභය රාජපක්ෂ ඡන්දය දැම්මාද නැද්ද යන්න නිශ්චිතව සොයාගැනීම හා එය ඔප්පු කිරීම පහසු කටයුත්තක් නොවේ. ඔහු ඡන්දය දැමූ බව සඳහන් කරමින් ඡන්දහිමි නම් ලැයිස්තුවේ ඔහුගේ නම සලකුණු කර තිබුණත්, තමන් ඡන්දය දැම්මේ නැතැයි ඔහුට කිව හැකිය. එසේනම් ඔහු ඡන්දය දැමූ වතාවේ සිටි නිලධාරීන්ව නැවත සොයාගෙන ඔවුන්ව ප්‍රශ්න කළ යුතුය. එහෙත් ඔවුන්ට පවා වසර 10කට පෙර පැවති ඡන්දයක් ගැන මතකය පැහැදිළි නොවිය හැකිය.
අයියා ජනාධිපති වූ පසුව ලංකාවේ දේශපාලනයේ කරණම් ගසන්නට පටන්ගත්තා මිස ඊට පෙර ගෝඨාභය රාජපක්ෂලාව කිසිවෙක් පයිසෙකට ගණන් ගත්තේ නැත. අයියාගේ ජනාධිපතිකමට පිංසිද්ධවෙන්නට ආරක්ෂක අමාත්‍යාංශයේ ලේකම් වූවා මිසෙක යුද්ධයට බයේ ලංකාවෙන් පලාගිය ගෝඨාභය රාජපක්ෂ ලංකාවේ කිසිදු වැදගත් තනතුරකට සුදුසු වැදගතෙක් ලෙස 2005 දී සැලකුවේ නැත. ඒ නිසා ගෝඨාභය රාජපක්ෂ ඡන්දය දැම්මත් නැතත් කිසිම මාධ්‍ය ආයතනයක් එකල එය වාර්තා කරන්නේ නැත. නැතිනම් මාධ්‍ය වාර්තාවලින් ගෝඨාභය රාජපක්ෂ ඡන්දය දැම්මාද නැද්ද යන්න කිව හැකිය. ඒ නිසා මෙහිදී තමන් ඡන්දය දැම්මේ නැතැයි ගෝඨාභය රාජපක්ෂට කීමට ඇති හැකියාව පිළිගැනීමට සිදුවෙයි.
එහෙත් ගෝඨාභය රාජපක්ෂ ඇතුලු ඇමෙරිකානු පුරවැසියන්ගේ නම් ඡන්දහිමි නාමලේඛනයට ඇතුලත් කොට, එයට අත්සන් කළ චමල් රාජපක්ෂට අපරාධ වරදින් මිදිය නොහැකිය. ඒ නිසා මෙතැන වරද කර ඇත්තේ චමල් රාජපක්ෂය. චමල් රාජපක්ෂට එරෙහිව නීතිය ක්‍රියාත්මක කිරීමට දැනටමත් තොරතුරු ලැබී හමාරය.
මෙම ක්ෂේත්‍රයට අදාල එක්තරා ආයතනයක ප්‍රධානත්වය දරන ඉහළ නිලධාරියෙකු කීවේ සාමාන්‍ය පුරවැසියෙකු මෙම වැරැද්ද කළානම් එය අපරාධ වරදක් ලෙස සලකමින් ඔහුට එරෙහිව නීතිය ක්‍රියාත්මක කළ හැකි බවය. ඔහු එයින් අදහස් කළේ අනෙකුත් පුරවැසියන්ට මෙන් රාජපක්ෂ පවුලට නීතිය සමානව ක්‍රියාත්මක නොවන බවය. රාජපක්ෂ පවුල අසාමාන්‍ය ලෙස නීතියට ඉහළින් සිටින බවය. පොලීසියට පැමිණිල්ල යොමු කළොත් මේ පිළිබඳව නීතිය ක්‍රියාත්මක කළ හැකි බව එම නිලධාරියා කීය.
ජනතාවගේ ඡන්ද අයිතිය පැත්තෙන් සාධාරණය ඉටු කළ යුත්තේ මැතිවරණ කොමිෂන් සභාවය. ලංකාවේ බලවත්ම පවුලක ගෘහමූලිකයා වන චමල් රාජපක්ෂ ඡන්දහිමි නාමලේඛනයට හොරෙන් විදේශිකයන්ගේ නම් ඇතුලත් කර ඇත. මැතිවරණ කොමිෂන් සභාව එවැනි බරපතල කාරණයක් ගැන ක්‍රියාත්මක නොවුණොත් වෙනත් අයට ඡන්දහිමි නාමලේඛනයට ඇතුලට හොරෙන් නම් ඇතුලත් කිරීමට එය දිරිමත් කිරීමකි. නීතිය ක්‍රියාත්මක නොවුණොත් ලක්ෂ ගණනක් වුව චමල් රාජපක්ෂව ආදර්ශයට ගත හැකිය.
ගෝඨාභය රාජපක්ෂ ‘විනයගරුක‘ නිසා තමන්ට ඡන්දය දාන්නට පුලුවන්කම තිබියදී ඡන්දය නොදැම්ම බව ගම්මන්පිල මන්ත්‍රීවරයා ආඩම්බරයෙන් හිස වනමින් කියයි. එහි අනෙක් පැත්තේ තේරුම ඕනෑනම් ඡන්දය දාන්නටත් හැකියාව තිබුණු බව නොවේද. එය, හොරඡන්ද දැමීමට උනන්දුවන අයට අපූරු පාඩමක් විය හැකිය. පූර්වාදර්ශයක් විය හැකිය. ඒ නිසා නීතිය ක්‍රියාත්මක කොට, එලෙස හොරඡන්ද දැමීම කළ නොහැකි බව තහවුරු කිරීම ස්වාධීන මැතිවරණ කොමිෂන් සභාවේ වගකීමකි. බෝලය පාස් කොට, අපි පැමිණිල්ල අහවලාට යොමු කළායැයි කීම කොමිසමේ වගකීම ලෙස අපි නොසලකමු.
මේ ගැන පරීක්ෂණ කළ යුත්තේ පොලීසිය නම් පැමිණිල්ලෙහි පිටපතක් පොලීසියට යොමුකිරීමද මැතිවරණ කොමිෂමට කළ හැකිය. සාධාරණ ඡන්ද අයිති වෙනුවෙන් ක්‍රියාත්මක විය යුතු රටේ ප්‍රධාන ස්වාධීන ආයතනය වන මැතිවරණ කොමිෂන් සභාවට අප පැමිණිලි කළේ ගත යුතු සුදුසු පියවර ගෙන, සෑහීමට පත්විය හැකි අවසානයකට එම පැමිණිල්ල ගමන් කරනු දැකීමේ බලාපොරොත්තුවෙනි. අප බලාපොරොත්තු තබන්නේ කොමිෂම මතය. අප හෝ වෙනත් පාර්ශ්වයක් ඒ ගැන පොලීසියට පැමිණිලි කරනු ඇතැයි කොමිසම බලා ඉන්නවානම් එය ස්වාධීන කොමිෂන් සභාවලින් අපේක්ෂිත කාර්යභාරය ඉටු කිරීමක් නොවේ.
මේ ගැන වාර්තා කිරිමෙන් එහාට ගොස් අපි පුවත්පතක් ලෙස කොමිසමට පැමිණිලි කිරීමද කළේ ඇයිදැයි කෙනෙකු විමසිය හැකිය. එයට හේතුව වුණේ මේ සිදුවීම මුලින්ම ඔබ්සර්වර් පුවත්පතනේ වාර්තා කළ මොහොතේ කොමිෂන් සභාවෙන් අපට ලැබුණු ප්‍රතිචාරයයි. ඒ සිදුවීම ගැන පියවර ගන්නේදැයි අප කළ විමසීම්වලදී කොමිෂන් සභාවෙන් ප්‍රතිචාර දක්වා තිබුණේ තමන්ට පැමිණිල්ලක් නොමැතිව පියවර ගත නොහැකි බවයි. අප පැමිණිලි කොට, දැන් ගන්නා පියවර කුමක්දැයි විමසුවේ ඒ අනුවය. දැන් අපේ පැත්තට හැරී, ඒ ගැන පොලීසියට පැමිණිලි කරන්නැයි අපටම කීම වෙනුවට අප කළ පැමිණිල්ල සම්බන්ධයෙන් පියවර ගෙන, රටට පූර්වාදර්ශයක් සැපයීම කොමිසම කළ යුත්තකි.
තවත් කාරණාවක් කිව යුතුය. ගෝඨාභය රාජපක්ෂ මැතිවරණයකදී නීතිවිරෝධීව හැසිරී, ඒ ගැන විමසූ අවස්ථාවක පැමිණිල්ලක් නැතිව පියවර ගත නොහැකි බව ප්‍රතිචාර ලැබුණු පළවැනි අවස්ථාව මෙය නොවේ. මැතිවරණ කොමිෂන් සභාව පත් කරන්නට පෙර, මැතිවරණ කොමසාරිස්වරයා ලෙස මහින්ද දේශප්‍රිය මහතා කටයුතු කළ 2014 දීත් එවැන්නක් සිදුවිය. එදා මැතිවරණ කොමසාරිස්වරයා කළේත් බෝලය පාස් කිරීමය.
බස්නාහිර පළාත් සභා මැතිවරණය පැවති 2014 වර්ෂයේදී එවකට ආරක්ෂක අමාත්‍යාංශයේ ලේකම්වරයා වූ ගෝඨාභය රාජපක්ෂ මැතිවරණ වේදිකාවකට ගොඩවිය. ඒ එම පළාත් සභා මැතිවරණයට අපේක්ෂකයෙකු ලෙස ඉදිරිපත් වූ උදය ගම්මන්පිල මහතාගේ වේදිකාවටය. අමාත්‍යාංශ ලේකම්වරයෙකු ලෙස රාජ්‍ය සේවයට අදාල නීතිවලට එදා ගෝඨාභය රාජපක්ෂ බැඳී සිටියේය. රජයේ මාණ්ඩලික නිලධාරීන් කිසිවෙකුට ප්‍රසිද්ධ දේශපාලන අයිතිවාසිකම් නැත. එනම්, ඡන්දය පාවිච්චි කිරීම හෝ පෞද්ගලිකව දේශපාලන අදහස් දැරීම කළ හැකිය. ප්‍රසිද්ධ රැස්වීම්වලදී දේශපාලන පක්ෂපාතීත්වයක් ප්‍රකාශ නොකළ යුතුය. ඒ නිසා පැහැදිළිවම අමාත්‍යාංශ ලේකම්වරයෙකු ලෙස ගෝඨාභය රාජපක්ෂ නීතිය කඩා තිබුණි. ඒ ගැන පියවර ගන්නේදැයි විමසූ විට මැතිවරණ කොමසාරිස් මහින්ද දේශප්‍රිය කියා තිබුණේ පැමිණිල්ලක් තිබුණොත් පියවර ගත හැකි බවයි. ඒ අනුව මාධ්‍යවේදී ලසන්ත රුහුණගේ ඒ ගැන පැමිණිලි කර තිබුණි. එහෙත් එම පැමිණිල්ල ගැන පියවර ගෙන තිබුණේ නැත.
පැමිණිල්ල ගැන ගත් පියවර මොනවාදැයි පසුව විමසූ විට දේශප්‍රිය මහතා කියා තිබුණේ ඒ ගැන කියන්නට නම් ලිඛිතව ඒ ගැන විමසන ලෙසයි. පසුව විමසූ විට ඔහු ලිඛිතව දැනුම් දුන්නේ පැමිණිල්ල අමාත්‍යාංශ ලේකම්වරුන්ගේ ප්‍රධානියා වන ජනාධිපති ලේකම්වරයාට යොමු කළ බවයි. ජනාධිපති ලේකම් ලලිත් වීරතුංගගෙන් විමසුවද එයට ප්‍රතිචාර ලැබී තිබුණේ නැත.
එදා මැතිවරණ කොමසාරිස් මහින්ද දේශප්‍රිය මහතා ස්වාධීන කොමිෂන් සභාවක ප්‍රධානියෙකු නොවීය. එදා ඔහු රාජපක්ෂලාගේ ආණ්ඩුවකට බැඳී ඉන්නට ඇත. රටේම මාණ්ඩලික නිලධාරීන් දේශපාලන වේදිකාවලට ගොඩවෙන්නට ඉඩ ඇති අන්දමේ නරක පූර්වාදර්ශයක් විය හැකි ක්‍රියාවකට එරෙහිව එදා පියවර ගන්නට ඔහුට නොහැකි වන්නට ඇත. එහෙත් අද එසේ නොවේ. කොමිෂන් සභාවක් ලෙස ඔහු ඇතුලු කණ්ඩායමට පියවර ගත හැකිය. අපි ඒ දෙස බලාසිටිමු.■
