ගෝඨාභය රාජපක්ෂ නම් වූ ජනාධිපතිවරණ අපේක්ෂකයාගේ මැතිවරණ ව්‍යාපාරය සාර්ථක කරගන්නට නම් එක් අමුද්‍රව්‍යයක් යහමට අවැසි වෙයි. ඒ මහජනතාව අතර වැඩුණු ත්‍රස්ත බියයි. ඒ අතින් බලද්දී ඉස්ලාම් මූලධර්මවාදී ත්‍රස්ත කල්ලියක් අප්‍රේල් 21 වැනිදා බෝම්බයක් පිපිරවීම රටට ඛේදවාචකයක් වුව ගෝඨාභය රාජපක්ෂගේ දේශපාලනයට වාසනාවක් විය හැකිය. එහෙත් ඒ ත්‍රස්ත බිය දැන් යටපත් වෙමින් පවතී.
ඒ ත්‍රස්ත කල්ලියේ නායකයන් ත්‍රස්ත ප්‍රහාරයේදී තමන්වද ඝාතනය කරගත්තේය. ඒ කල්ලියේ ඉතිරි බිතිරි අත්අඩංගුවට ගැනීමට පොලීසිය සමත්විය. මහා ඝාතන සංස්කෘතියක් ලංකාවේ මුස්ලිම් ජනතාව අතර තිබී නැත. ත්‍රස්තවාදීන් අල්ලාගැනීමට මුස්ලිම් සමාජයේද උදව් ලැබුණි.
සයින්දමරුදුවලදී ත්‍රස්තවාදීන් මුදල් විසිකරද්දී මුස්ලිම් ජනතාව ආරක්ෂක අංශවලට සහාය දෙමින් ත්‍රස්තයන්ව කොටු කරගැනීමට උදව් විය. ත්‍රස්ත බිය ක්‍රමයෙන් යටපත්වීම ජනාධිපති අපේක්ෂක ගෝඨාභය රාජපක්ෂට අවාසියකි. ඒ නිසා ඔහුට හිතවත් උදවියට දැන් ඕනෑ වී තිබෙන්නේ ත්‍රස්ත බිය නැවත මතු කිරීමටය. එය පණපිටින් පවත්වාගෙන යෑමටය. විශේෂයෙන්ම ගෝඨාභය බලයට පත්කරන්නට සිහින දකින මාධ්‍යවලට අවැසි වී තිබෙන්නේ ඒ බිය හැකිතරම් වර්ධනය කිරීමටය.
ඒ වෙනුවෙන් ඔවුන් සිය මාධ්‍ය ආයතන හැකිතරම් නින්දිත, අධම ආකාරයට හසුරවමින් සිටියි. මීට පෙර ඔවුන් ගැහැණුන්ව වඳකරන සැත්කම් කළ වෛද්‍යවරයෙකු ගැන පට්ටපල් බොරුවක් ලියා තිබුණි. ඒ පුවත ලියා ඒ බොරුව ඇත්ත කරන්නට කෙස් පැලෙන තර්ක පත්තර පිටු පුරා ලිවීය. දැන් ඒ බොරුව හෙළිවී හමාරය. දැන් ඔවුන්ට ඕනෑ අලුත් කතාවක් සමග අලුත් බියක් සමාජගත කරන්නටය.
අගෝස්තු 19 වැනිදා අත්අඩංගුවට ගත් යාපනයේ පලෙයිහි අධිකරණ වෛද්‍ය නිලධාරියා පිළිබඳ කතාව ඔවුන්ගේ වවාගෙන කෑ හැකි සිදුවීමක් විය.
දිවයින පුවත්පතේ කුප්‍රකට හිතලු ලියන්නන් තිදෙනාගෙන් කෙනෙකු වන සමන් ගමගේ ( කීර්ති වර්ණකුලසූරිය හා හේමන්ත රන්දුණු අනෙක් දෙදෙනාය. ) ඒ අත්අඩංගුවට ගැනීම පමණක් පාවිච්චි කරමින් සම්පූර්ණ එල්ටීටීඊ සංවිධානයට යළි පණදුන්නේය. දිවයින පමණක් කියවන වැඩි විචාර බුද්ධියක් නැති පාඨකයන්ගේ බිය අවුස්සන්නට එය ප්‍රමාණවත්ය.
‘ඉලක්කය මෛත්‍රී සහ ගෝඨා.. කොටි දොස්තර සියල්ල වමාරයි.. ප්‍රහාරවලට ස්නයිපර්කරුවනුත් සොයලා..!‘ සමන් ගමගේ අගෝස්තු 25 වැනි ඉරිදා දිවයින පුවත්පතට ලියා තිබුණු ලිපියේ සිරත්ලය වුණේ එයයි. ‘මොසාඞ් ක්‍රමයට හමුදා ප්‍රධානීන් ඝාතනයටත් සැලසුමක්, කොටි පුහුණුව ගත්තේ මඩකලපුවේදී‘ යනුවෙන් උප සිරස්තල දෙකකුත් එම ලිපියෙහි ඇත. ඒ සිරස්තලවලින් පාඨකයෙකුගේ හිසෙහි මැවෙන චිත්‍ර භයානක එකකි. නැවතත් එල්ටීටීඊය හිස ඔසවා ඇතැයි කීමට ඔහු තනි තනි සිදුවීම් කිහිපයක් ඒ ලිපියේදී එකට යා කරයි.
ඇත්තෙන්ම සමන් ගමගේ ඒ ලිපියේදී කළ අයුරින් කොළඹ පාතාලයේ ආයුධ දකුණේදී හමුවීමේ සිදුවීම් එකිනෙකට යා කළානම් සිංහල ත්‍රස්තවාදයකුත් පහසුවෙන්ම මැවිය හැකිය. අසූනවයේ භීෂණය යළි මතුවෙනවායැයි පතරංග ලිවිය හැකිය. එහෙත් එවැනි සටන්කාමී ව්‍යාපාර මතුවන්නේ දේශපාලන පසුබිමක, දේශපාලන ව්‍යාපාර ලෙසය. මේ වෙද්දී යාපනයේ එකදු දේශපාලන සංවිධානයක්වත් ආයුධ සන්නද්ධ අරගලයක් යෝජනා කරන්නේ නැත. ඒ නිසා එල්ටීටීඊය නැවත මතුවීම යනු හිතලුවක් පමණි.
ඔහු කතාව ගෙනයන්නේ අගෝස්තු 19 වැනිදා යාපනයේදී හමුදාවෙන් සිදුකළ අත්අඩංගුවට ගැනීමක් වෙතය. එලෙස අත්අඩංගුවට ගත්තේ පලෙයි රෝහලේ අධිකරණ වෛද්‍ය නිලධාරියා වන සින්නයියා සිවරූබන්වය. ඔහු ඒ ලිපියේ කියන අන්දමට එම වෛද්‍යවරයාව කොටු කරගැනීමට කාලයක් තිස්සේ හමුදා බුද්ධි අංශ සැලසුම් කරමින් සිට ඇත. රෝහලේදී වෛද්‍යවරයාව කොටු කරගන්නට උත්සාහ කළද එයත් අසමත් වූ බව ඔහු කියා ඇත. ඒ කියන අන්දමින් අපට මැවී පෙනෙන්නේ යටිබිම්ගත ලෙස ක්‍රියාකාරී වූ සැඟවුණු ත්‍රස්තවාදියෙකි.
එතැනින් පසුව සමන් ගමගේ ලියා ඇත්තේ වෛද්‍ය සින්නයියා සිවරූබන් පිළිබඳ පරීක්ෂණවලදී ගෝඨාභය රාජපක්ෂ ඝාතන කුමන්ත්‍රණයක් ගැනත් කරුණු හෙළිවූ බවයි.
‘මේ වන විට එල්ටීටීඊයේ ප්‍රධාන ඝාතන ඉලක්කය බවට පත්ව තිබී ඇත්තේ හිටපු ආරක්ෂක ලේකම් ගෝඨාභය රාජපක්ෂ මහතා සහ ජනාධිපති මෛත්‍රිපාල සිරිසේන මහතා බව එහිදී සින්නයියා සිවරූබන් හෙළි කරනු ලබන්නේ පොලිස් හා බුද්ධි නිලධාරීන් ද අන්දමන්ද කරමිනි.‘ මේ කාරණය ඉතා බරපතලය. එය වහා විමසිය යුතු කාරණාවකි. ඒ වෛද්‍යවරයාව ප්‍රශ්න කිරීමේදී ඝාතන කුමන්ත්‍රණයක් ගැන හෙලිවුණාදැයි සොයාබැලිය යුතුය. අප අගෝස්තු 28 වැනිදා පොලිස් මාධ්‍ය ප්‍රකාශක රුවන් ගුණසේකරගෙන් කළ විමසීමකදී ඔහු ඒ ගැන කීවේ මෙසේය.
‘ඒ කතාව සම්පූර්ණයෙන්ම වැරදියි. තවමත් එවැනි කාරණයක් හෙළිවෙලා නැහැ.‘ ඒ සම්බන්ධයෙන් අප කළ විමසීමකදී පොලිස් මාධ්‍ය ප්‍රකාශකවරයා කීය.
‘ඔහුව අත්අඩංගුවට ගෙන තිබුණේ හමුදාවෙන්. ඉන්පසුව පොලීසිය කළ පරීක්ෂණවලදී තමයි ආයුධ හමුවුණේ.‘ පොලිස් මාධ්‍ය ප්‍රකාශකවරයා වැඩිදුරටත් කීය.
ඊට පෙර දිනයේ මෙම වෛද්‍යවරයාව අත්අඩංගුවට ගැනීම ගැන මාධ්‍ය සාකච්ඡාවකදී පොලිස් මාධ්‍ය ප්‍රකාශක රුවන් ගුණසේකර අත්අඩංගුවට ගැනීම සිදුවූ හැටි කියා තිබුණි. අත්අඩංගුවට ගෙන තිබුණේ හමුදා මාර්ග බාධකයකදී සැකපිටය. ඒ අනුව එම වෛද්‍යවරයා යටිබිම්ගතව සැඟවී සිටි අයෙකු නොවේ. මෝටර් රිය පැදගෙන හමුදා මාර්ග බාධකයක් ඉදිරියෙන් යන අන්දමේ කෙනෙකි.
ඉන්පසුව එම වෛද්‍යවරයාව ත්‍රස්ත විමර්ශන කොට්ඨාශයේ යාපනය ප්‍රදේශයේ නිලධාරීන්ට බාරදී තිබේ. එම නිලධාරීන් ප්‍රශ්න කිරීමේදී ඔහුගේ අනන්‍යතාවය හෙළි කරගෙන ඇත. ඊට අමතරව තමන් එල්ටීටීඊය ක්‍රියාත්මකව සිටි යුධ සමයේදී ආයුධ ප්‍රවාහනයට සම්බන්ධව සිටි බව ඔහු පිළිගෙන ඇත. එලෙස ප්‍රවාහනයට සඳහා බාරදුන් අවිආයුධ යුද්ධාවසානයෙන් පසුව වළලා සඟවා තැබූ බව ඔහු ප්‍රකාශ කර ඇත. ඒ අනුව එලෙස අවිආයුධ වැළලූ ස්ථාන පිළිබඳවත් එම වෛද්‍යවරයා තොරතුරු දී තිබේ.
පලෙයිහි කරන්ඩිය නම් ප්‍රදේහයේ ආයුධ වළලා ඇති ස්ථානයක් පිළිබඳව ඔහු කියා ඇත. අගෝස්තු 26 වැනිදා එම ස්ථානය හාරා සිදුකළ සෝදියකදී අදාළ පුපුරනද්‍රව්‍ය හා ගිනිඅවි හමුවී තිබේ. ඒකේ 47 ගිනිඅවියක්, මැගසින් දෙකක්, අත්බෝම්බ 11ක්, පීඊ වර්ගයේ බවට සැකකෙරෙන පුපුරනද්‍රව්‍ය කිලෝ 10ක්, පතොරම් 120ක්, දුරදක්නයක් මෙලෙස හමුවී ඇත.
යුධ සමයේදී වළදැමූ අවිආයුධ මෙලෙස හමුවූ පළවැනි අවස්ථාව මෙය නොවේ. මෙලෙස අත්අඩංගුවට ගැනීම්ද, ආයුධ හමුවීම්ද ගණනාවක් සිදුවී තිබේ. එහෙත් ඒවා පැරණි ආයුධය. ඒ ආයුධ නැවත පාවිච්චි කරන්නට උත්සාහ ගත් බවක් මේ සටහන ලියන මොහොත වනවිටත් හෙලිවී නැත. ඉදිරියේදී මොනවා හෙලිවේදැයි අපට නිශ්චිතව කිව නොහැකිය. එහෙත් සමන් ගමගේ ලියා ඇති කරුණු හිතලු මිස සැබෑ ලෙසම හෙළිවූ කරුණු නොවේ. එය සමාජය බියගැන්වීමේ නින්දිත උත්සාහයක කොටසක් පමණි.
ඇත්තෙන්ම රටේ ආරක්ෂාව ගැන අවංක හැඟීමකින් යුද්ධය කාලයේ වැළලූ ආයුධ තවමත් හමුවීම බරපතළ තත්වයක් බව කියමින් සමන් ගමගේ ලිපියක් ලීවානම් අපට පුදුම වෙන්නට දෙයක් නැත. ඔහු බරපතළ ලෙස ඉස්මතු කරන්නේ සැබෑ ලෙසම සිදුවූ සිදුවීමකි. එහෙත් ඒ සිදුවීමට ගෝඨාභය රාජපක්ෂ කෙනෙක්ව ගාවාගනිමින් බොරු ලිවීමෙන් පෙනෙන්නේ ඔහුගේ සැබෑ අරමුණ රටේ ආරක්ෂාව නොව, රාජපක්ෂ ආණ්ඩුව යළි බලයට පත්කිරීම බවය.
කෙසේ වෙතත් එක් කාරණයක් පැහැදිළිව පෙනෙන්නට ඇත. පලෛයි සිදුවීම කොහාට ඇදගෙන යනු ඇතිදැයි දැන්ව කිව නොහැකිය. එමෙන්ම සාමාන්‍ය ජනතාවගේ බිය අවුස්සන්නට ඉදිරියේදී කෙබඳු කතා මතුවනු ඇතිදැයි දැන්ම කිව නොහැකිය. ගෝඨාභයගේ ව්‍යාපාරයට සමගාමීව මහජනතාව බියගැන්වීමේ කටයුත්ත යහමින් කිරීමට දිවයින, මව්බිම, අරුණ ආදී පුවත්පත් කිහිපයක් හා අද දෙරණ, හිරු ටීවී ආදී රූපවාහිනී නාලිකා කිහිපයක් සැදී පැහැදී සිටී.■
