පාර්ලිමේන්තු මන්ත්‍රී කුමාර වෙල්ගම
ගෝඨාභය රාජපක්ෂව ජනාධිපතිවරණ අපේක්ෂකයා ලෙස නම් කිරීමට එරෙහිව පාර්ලිමේන්තු මන්ත්‍රී කුමාර වෙල්ගම මුල සිටම විරෝධය දැක්වීය. ගෝඨාභය රාජපක්ෂ පොදුජන පෙරමුණේ අපේක්ෂකයා ලෙස නම් කිරීමෙන් පසුව කුමාර වෙල්ගම මන්ත්‍රීවරයා විශේෂ තීන්දුවක් ගැනීමට බලාපොරොත්තු වෙයි. මේ ඒ පිළිබඳව ඔහු අනිද්දා වෙත ලබාදුන් විශේෂ සාකච්ඡාවකි.
ඔබ දිගටම කීවා ගෝඨාභය රාජපක්ෂට සහයෝගය දෙන්නේ නැති බව. ගෝඨාභය අපේක්ෂකයා විදියට නම් කළාට පස්සේ ඔබ කරන්නේ මොකක්ද?
මගේ මතය වෙනස් වෙලා නැහැ. මම දැනුත් ඉන්නේ එතැනමයි. කලින් කියපු දේවල්ම මම දැනුත් කියනවා. මම ඔහුට සහාය දෙන්නේ නැහැ. මම ගෝඨාභය රාජපක්ෂ විවේචනය කළේ ඇයිද කියලා තවදුරටත් කියන්නේ නැහැ. ඒක මුළු ලංකාවම දන්නවා. අවුරුද්දක් තිස්සේ මම හැමදාම කිව්වා. එතුමා ආවොත් මම ගන්න තීන්දුව කිව්වා. එතුමාගෙන් රටට විශාල පාඩුවක් වෙන බව මම කිව්වා. ඒ පාඩුව මොකක්ද කියලා මුළු රටම දන්නවානේ.
පොදුජන පෙරමුණේ ඔබත් එක්ක හිටපු වාසුදේව නානායක්කාර ඇතුළු නායකයන් ගෝඨාභය රාජක්ෂ ගැන අකැමැත්තක් පෙන්නුවා. ඒත් දැන් ඔවුන් ගෝඨාභයට සහාය දෙනවා නේද?
ඔවුන් ගැන දන්නේ නැහැ. මට කියන්න පුළුවන් මා ගැන. මම අවස්ථාවාදී දේශපාලනයක යෙදෙන්නේ නැහැ. යම් ප්‍රතිපත්තියක් උඩ තමයි මම වැඩ කරන්නේ. යම් ප්‍රතිපත්තියක් කීවාම ඒක වෙනස් කරන්නේ නැහැ. අනෙක් අය මුලින් දොස් කියලා පස්සේ කැමැත්ත දක්වලා තියෙයි. මම කෙළින් කතාකරනවා. මහජනතාව මට කැමති ඒකයි.
ගෝඨාභය රාජපක්ෂගේ ඉතිහාසය අනුව ඔහුව විවේචනය කරලා තවදුරටත් පොදුජන පෙරමුණේ ඉන්න ඔබට පුළුවන්ද?
මම පොදුජන පෙරමුණේ කවදාවත් හිටියේ නැහැ. මම ඉන්නේ ශ්‍රී ලංකා නිදහස් පක්ෂයේ. මම ඒකාබද්ධ විපක්ෂ පාර්ලිමේන්තු කණ්ඩායමේ හිටිය බව ඇත්ත. ඒත් මම ශ්‍රී ලංකා නිදහස් පක්ෂයේ සාමාජිකත්වය අහෝසි කරගත්තේ නැහැ. පොදුජන පෙරමුණ හදන වැඬේට මම සම්බන්ධ වුණේත් නැහැ. මගේ සාමාජිකත්වය එහෙමම තියාගත්තා. මම අවුරුදු අටක් තිස්සේ ශ්‍රීලනිපයේ ඉන්නවා. මම කවදාවත් ශ්‍රී ලංකා පොදුජන පෙරමුණේ සාමාජිකත්වය ගත්තේ නැහැ.
ගෝඨාභයට අකැමති නිසා ඔහුගේ පැත්තෙන් ඔබට තර්ජන එල්ලවූ බවත් මාධ්‍ය වාර්තා පළවුණා නේද?
එහෙම තර්ජනයක් දැනට නැහැ. ඒත් ඒවා අනිවාර්යයෙන්ම ඒවි. වැරදිලාවත් ඔවුන්ට ආණ්ඩුවක් ආවොත් ඒක සිද්ධවේවි. ඒක පුදුමවෙන්න දෙයක් නැහැ. ඔහුගේ ඉතිහාසය ගැන අපි දන්නවානේ. එක්නැළිගොඩලාට, ලසන්තලාට වෙච්ච මටත් ඉදිරියේදී සිද්ධවෙයි.
ඔබ ශ්‍රීලනිප මධ්‍යම කාරක සභාවේ තවමත් ඉන්නවාද?
මෛත්‍රීපාල සිරිසේන මහතාව විවේචනය කරද්දී එතුමාගේ මැදිහත්වීමෙන් මාව අයින් කළා. ඒ නිසා මම මධ්‍යම කාරක සභාවේ නැහැ. ඒත් මම සාමාජිකයෙක් හැටියට ඉන්නවා. මගේ සාමාජික මුදල් හැම මාසෙකම මගේ පඩියෙන් කැපෙනවා.
එතකොට ඔබ මින් ඉදිරියට ඒකාබද්ධ විපක්ෂ කණ්ඩායම වෙනුවට ශ්‍රීලනිප කණ්ඩායමේ කටයුතු කරනවාද?
ඔව්. මම හුඟක් කල් ඉඳලා එහෙමයි. මම හැමදාම ශ්‍රීලනිප කණ්ඩායමේ තමයි කටයුතු කරන්නේ.
ජනාධිපති මෛත්‍රීපාල සිරිසේනව විවේචනය කළ නිසා ඔහු ඔබත් එක්ක අමනාපද?
මම විවේචනය කළා. ඒත් ඒ එක්සත් ජාතික පක්ෂයත් එක්ක එකතු වූ නිසා. මම ඒ තීන්දුව විවේචනය කළා. මම විවේචනය කළේ තීන්දුවක් මිසක් පුද්ගලයෙකු නෙවෙයිනේ. අනෙක මම විවේචනය කළේ පක්ෂය නෙවෙයිනේ. දැන් සිරිසේන මහත්තයා යූඇන්පී එකත් එක්ක නැහැ. ඒ නිසා මට දැන් බය නැතිව කටයුතු කරන්න පුළුවන්. මම 2015 ජනවාරි මාසයේ 09 වැනිදා තමයි ඒක ප්‍රසිද්ධියේ කියලා එළියට බැස්සේ. ඒක මුළු රටම දන්නවානේ.
මේ වෙද්දී ශ්‍රීලනිපය ඇතුළේ ඔබේ ඉදිරි සැලසුම් මොනවාද?
මට තියෙන්නේ ශ්‍රීලනිපය ආරක්ෂා කිරීම සහ ශ්‍රීලනිප සාමාජිකයන්ව ආරක්ෂා කිරීම සහ පක්ෂයේ සාමාජිකයන්ව ආරක්ෂා කිරීම. සාමාජිකයන්ට නව පණක් ලබාදීම. සාමාජිකයන්ට බය නැතිව ඉස්සරහට එන්න පුළුවන් වාතාවරණයක් ලබාදීම. ශ්‍රීලනිපය මොනවගේ තීන්දු ගත්තත් මම මගේ පක්ෂයේ සාමාජිකත්වය නැති කරගන්නේ නැහැ. අනෙක රට පුරා ඉන්න සාමාජිකයන්ව ආරක්ෂා කරන්නත් මම බැඳිලා ඉන්නවා.
ඔබ ශ්‍රී ලංකා නිදහස් පක්ෂය එක්ක හිටගන්නවා. ඒත් ඒ පක්ෂය පොදුජන පෙරමුණත් එක්ක එකතුවෙලා සන්ධානයක් හැදුවොත් මොකද කරන්නේ?
එහෙම ගියොත් මම ඔවුන් එක්ක යන්නේ නැහැ. මම සහාය දෙන්නේ නැහැ. ඒ නිසයි මම කිව්වේ ශ්‍රීලනිපයට ගරු කරන යම් පිරිසක් ඉන්නවා, ඒ අයව ආරක්ෂා කරගෙන හොඳ තීන්දුවක් ගන්නවා. ඉදිරිගාමී තීන්දුවක් ගන්නවා. ශ්‍රීලනිපය ආරක්ෂා කරන තීන්දුවක් මම ගන්නවා.
මීළඟ ජනාධිපතිවරණයට ඉදිරිපත්වීමේ බලාපොරොත්තුවක් තිබුණු බව ඔබ කීවා. තවමත් ඒ බලාපොරොත්තුව තියෙනවාද?
ශ්‍රීලනිපය මා ඉදිරිපත් විය යුතු බවට තීන්දු කළොත් ඉදිරිපත් වෙනවා. ශ්‍රීලනිපය මට ආරාධනා කළොත් ඉදිරිපත් වෙනවා. ඕනෑම දේශපාලනඥයෙක් ජනාධිපතිවරණ අපේක්ෂකයෙක් වෙන්නට බලාපොරොත්තු වෙනවා. ඒත් ඒකට වෙලාව එන්න ඕනෑ. මහජනතාවගේ කැමැත්ත තියෙන්න ඕනෑ. සහයෝගයක් ඕනෑ. ඉතින්, ඒ සහයෝගය ලැබුණොත් මම එනවා. මම කලින් කීවානේ ශ්‍රීලනිපය ගෝඨාභය මහත්තයා එක්ක යන්න තීන්දු කළත් මම ඒකට එකඟ වෙන්නේ නැති බව. ශ්‍රී ලංකා නිදහස් පක්ෂයේ මධ්‍යම කාරක සභාව තීන්දු කරලා පොදුජන පෙරමුණ සමඟ සන්ධානයකට ගියත් ශ්‍රී ලංකාකාරයන් වෙනුවෙන් මම වෙනම ජනාධිපතිවරණයට ඉදිරිපත් වෙන්නත් ඉඩ තියෙනවා. මොකද ශ්‍රීලංකාකාරයෝ පොහොට්ටුවට යන්න කැමති නැහැ. මම එයාලා වෙනුවෙන් ඉදිරිපත් වෙන්න ඕනෑ.
සමහරු කියන්නේ දැන් ශ්‍රීලනිපය කියලා එකක් නැති බවයි. පක්ෂ ලකුණත්, කාර්යාලයත් හැර සියලු දේ පොදුජන පෙරමුණ පැත්තට ගිය බවයි. ඒ ගැන අදහස මොකක්ද?
මම අහන්නේ එක ප්‍රශ්නයක්. පොහොට්ටුව අතිවිශාල ජයග්‍රහණයක් කරනකොට ශ්‍රීලනිපය දුර්වලම වෙලා තිබුණු වෙලාවක පළාත් පාලන මැතිවරණයේදී ශ්‍රීලනිපයට ලක්ෂ 14ක් විතර ඡන්ද ලැබුණේ කොහොමද. ඒ අය කොහේද ඉන්නේ. ශ්‍රීලනිපයේ නෙවෙයිද. ඒ අය තමයි ශ්‍රීලංකාකාරයෝ.
ශ්‍රීලංකාකාරයන් හා පොහොට්ටු හිතවාදීන් අතර වෙනස මොකක්ද?
ශ්‍රී ලංකා නිදහස් පක්ෂය කියන්නේ නිදහසේ හැදුණු පක්ෂයක්. ශ්‍රීලංකාකාරයෝ කියන්නේ ඒ නිදහසට පුරුදුවෙච්ච උදවිය. මුලින්ම බණ්ඩාරනායක මහත්තයා මේ පක්ෂය හැදුවේ එතුමාට ඩී.එස්. සේනානායක මහත්තයා මැරිච්ච වෙලාවේ තමන්ට හිමි ජ්‍යෙෂ්ඨත්වයට නොසලකපු හින්දයි. මහින්ද මහත්තයාගේ තාත්තාත් එදා ගියා. පස්සේ බණ්ඩාරනායක පවුලෙන් මහින්ද රාජපක්ෂ මහත්තයා ශ්‍රීලනිපය ගලවාගත්තා. ඊට පස්සෙ එතුමාගෙන් සිරිසේන මහත්තයා පක්ෂය ගලවාගත්තා.
පොහොට්ටුව කියන්නේ ශ්‍රීලනිපය වගේ ප්‍රජාතන්ත්‍රවාදී, පොඩි මිනිහාට ඉදිරියට යන්න පුළුවන් පක්ෂයක් නෙවෙයි. ශ්‍රීලනිපයේ වගේ නිදහස් ප්‍රතිපත්ති එතැන නැහැ. ඒකේ තියෙන්නේ පවුලක්. තියෙන්නේ පවුල්වාදය. පවුල තමයි පක්ෂය ඉදිරියට ගෙනියන්නේ. පවුලේ ජනප්‍රියත්වය මත තමයි පක්ෂයේ ජනප්‍රියත්වයත් පවතින්නේ. ඒකේ මහින්ද මහත්තයා ඉන්නවා. එතුමාගේ පුතාලා තුන්දෙනෙක් ඉන්නවා. චමල් මහත්තයා ඉන්නවා. එතුමාගේ පුතා ඉන්නවා. ගෝඨාභය මහත්තයා ඉන්නවා. බැසිල් මහත්තයා ඉන්නවා. ශිරන්ති රාජපක්ෂ මැතිනිය ඉන්නවා. ඉතින්, පොහොට්ටුව කියන්නේ සම්පූර්ණයෙන්ම පවුලක්. පවුලට පිට කෙනෙක් පොහොට්ටුවේ දේශපාලනය කළොත් උපරිම යන්න පුළුවන් ඇමතිකමකට විතරයි. එතැනින් එහාට යන්න බැහැ.
රාජපක්ෂලාව අබිබවා පොහොට්ටුවේ කිසි කෙනෙකුට යන්න බැහැ. ඒක නිසා ඒ පක්ෂය ප්‍රජාතන්ත්‍රවාදී එකක් නෙවෙයි. පවුලක පක්ෂයක්. පවුල වටා රාජපක්ෂ මහත්තයාට සම්බන්ධ කණ්ඩායමක් ඉන්නවා. ඒ අය ඉන්නේ රාජපක්ෂ මහත්තයා ගැන විශ්වාසයක් තියාගෙන වෙන්න ඇති.
ශ්‍රීලනිපය ඒ වගේ නැහැ. නිර්ධන පන්තියෙන් කෙනෙකුට වුණත් ඉහළට එන්න පුළුවන්. අපේ සිරිසේන මහත්තයාත් නිර්ධන පන්තියෙන් ආපු කෙනෙක්නේ. එතුමා ශ්‍රීලනිපයේ අවස්ථාවක් නොලැබෙද්දී එතැනින් ගිහින් යූඇන්පීයත් එක්ක තරග කරලාත් නැවත ශ්‍රීලනිපයට ආවා. එතුමා ගියේ නිසි තැන නොලැබුණාමයි. ඒත් එතුමා ජීවිත කාලයම ශ්‍රීලනිපය එක්කයි හිටියේ. මහින්ද මහත්තයාත් හිමි තැන නොලැබෙද්දී සටන් කරලා නායකත්වය ගත්තා. ඒත් දැන් රාජපක්ෂලාගෙන් පිට නායකත්වය දෙන්න කැමති නැහැ.
පවුලක පක්ෂයක් වන නිසා පොහොට්ටුවටත් අනාගතයක් නැතිවේවි නේද?
මම හිතන්නෑ අනාගතයක් තියේවි කියලා. ඒක බිහිකරපු බැසිල් මහත්තයා ඇවිල්ලා ඇමෙරිකන් පුරවැසියෙක්. එතුමා ද්විත්ව පුරවැසිභාවය තියෙන කෙනෙක්. එතුමාගේ වැඩි කැමැත්තක් තියෙන්නේ එහාටනේ. අපි ආණ්ඩුව පැරදුණ වෙලාවේත් බෑග් අරගෙන නෝනා එක්ක ඔහු ගියේ ඇමෙරිකාවටනේ.
ගෝඨාභය මහත්තයාත් තවම ඇමෙරිකන් පුරවැසියෙක්. ගෝඨාභය රාජපක්ෂ මහත්තයා යුද්ධය තිබුණු කාලයේ මොකද කළේ. විජය විමලරත්න, ඩෙන්සිල් කොබ්බෑකඩුව, සරත් ෆොන්සේකා වගේ අය යුද්ධය කරගෙන ලංකාවේ ඉන්නකොට ගෝඨාභය මහත්තයා ඇමෙරිකාවට ගිහින් පුරවැසිභාවය ගත්තා. මම කියපු අනෙක් නායකයොත් යුද්ධය අස්සේ ඇමෙරිකාවට ගිහින් පුරවැසිභාවය ගත්තා නම් යුද්ධ කරන්න කවුද ඉතිරිවෙන්නේ. එයාත් ඇමෙරිකන් පුරවැසියෙක්. ඔහු පුරවැසිභාවය අයින් කරගත්ත දවසක වුණත්, තවම අයින් කරගෙන නෑ, අයින් කරගත්තත් නෝනයි පුතයි ඉන්නේ ඇමෙරිකාවේ. ඉතින් එක කකුලක් එහේ. එක කකුලක් මෙහේ. ඇමෙරිකාවට ගැතිකම් කරන අය තමයි ඔය ඉන්නේ. බලන්න, ඇමෙරිකාවට විරුද්ධව එයාලා කතාකරන්නේ නැහැනේ. පහුගිය දවසක ශවේන්ද්‍ර සිල්වා මහත්තයාව හමුදාපති ධුරයට පත්කළාම ඇමෙරිකන් තානාපතිනිය ඒකට විරුද්ධව කතාකළා. ඉන්පස්සේ ඇමෙරිකන් තානාපතිට විරුද්ධව විවිධ අය අදහස් දැක්වුවා. ඒත් රාජපක්ෂ පවුලේ අය ඒකට විරුද්ධව කතාකළේ නැහැනේ. රනිල් වික්‍රමසිංහ මහත්තයා වගේම ඒ ඔක්කෝම ඇමෙරිකන්වාදියෝ. නැත්නම් ප්‍රසිද්ධියේ ඇමෙරිකාවට බැනලා ශවේන්ද්‍ර වෙනුවෙන් පෙනී සිටින්න තිබුණානේ.
ශ්‍රීලනිප පොහොට්ටු එකතුව ගැන ජනාධිපති මෛත්‍රීපාල සිරිසේන හා මහින්ද රාජපක්ෂ අතර සාකච්ඡා පැවැත්වෙන බව කියනවා. ජනාධිපතිවරයා සන්ධානගත වෙන්න තීන්දු කළොත්, ශ්‍රීලනිපයේ අනෙක් නායකයෝ ඒකට එකඟ වේවිද?
අපේ දුමින්ද දිසානායක මහත්තයා වගේ අය වැරදි තීන්දුවකට යාවි කියලා මම හිතන්නේ නැහැ. මේක ජනාධිපතිතුමාගේ අවසන් කාලසීමාවනේ. දැන් සිරිසේන මහත්තයාගේ කාලේ ඉවරයි. දැන් එතුමා තමන්ගේ ආරක්ෂාව වගේ දේවල් ගැන හිතනවා ඇති. ඒ නිසා එතුමා පක්ෂයට වැඩිය තමන්ගේ ඉදිරි පැවැත්ම හා ආරක්ෂාව ගැන බලනවා වෙන්න පුළුවන්. ඒත් මම එහෙම නෙවෙයි. මම බලන්නේ පක්ෂය ගැන. මම තනතුරු අත්හරින ජාතියේ මිනිහෙක්. නැත්නම් මට 2015 දී පක්ෂයේ උපසභාපතිවරයෙක් විදියට ඇමතිකමක් බාරගන්න තිබුණා. ගිය අවුරුද්දේ දින 50 ආණ්ඩුව වෙලාවේ මම ඒකට විරුද්ධ වුණා. ආණ්ඩුව ගන්න එපා කියලා කිව්වා. ඒත් ආණ්ඩුව බාරගත්ත නිසා මම කිව්වා එහෙනම් මම ඇමතිකම් ගන්නේ නැති විත්තිය. අද වුණත් මම කට වහගෙන පක්ෂය ඇතුළේ හිටියා නම් හොඳ ජ්‍යෙෂ්ඨ ඇමතිකමක් ගන්න තිබුණා. මම ඒකට යන්නේත් නැහැ. මට තනතුරුවලට වැඩිය අවුරුදු ගාණක් නියෝජනය කරපු පක්ෂය වටිනවා. 1981 දී මගේ අතට පක්ෂ සාමාජිකත්වය දුන්නේ සිරිමාවෝ මැතිනිය. ඒ නිසා මම කල්පනා කරන්නේ පක්ෂය ආරක්ෂා කරගෙන මේක ජයග්‍රහණ කණුව දක්වා ගෙනියන්නේ කොහොමද කියලා.
ශ්‍රීලනිපය ඇතුළේ වෙනත් ජනාධිපතිවරණ අපේක්ෂකයෙක්ව ඉදිරිපත් කිරීමේ සාකච්ඡාවක් තියෙන බව ආරංචියි. ඒ සාකච්ඡාවල තත්වය ගැන දන්නවාද?
තවම මම ඒ ගැන දැනුවත් වෙලා නැහැ. ඒ නිසයි මම කිව්වේ පක්ෂයක් ඉල්ලීමක් කළොත් මම ඉදිරිපත් වෙන බව. එහෙම නැතිව ඔවුන් ගෝඨාභය රාජපක්ෂ එක්ක එකතුවුණොත් පක්ෂයේ ඉතිරි ශ්‍රී ලංකාකාරයන්ව ඉදිරියට ගෙනියන්න වැඩසටහනක් ගෙනියන බව මම කීවේ ඔවුන් කරන්නට යන දේ දන්නේ නැති හින්දයි.■
