පුරවැසිභාවය සඳහා ගෝඨාභය ගැසූ ගැට

ද්විත්ව පුරවැසිභාවය ලැබීමත්, එය අත්හැරීමත්,
ලංකාවේ පුරවැසිභාවය ලැබීමත් අවුල ජාලයක්

ගෝඨාභය රාජපක්‍ෂ ලොස් ඇන්ජලීස් සිට ලංකාවට ආවේ 2005 සැප්තැම්බර් 4 වැනිදාය. ඒ වන විට ඔහු ශ‍්‍රී ලංකාවේ පුරවැසියෙක් නොවේ. 2003 ජනවාරි 31 වැනිදා, ඔහු උපතින්ම ගෙනා ශ‍්‍රී ලංකාවේ පුරවැසිකම අත්හැර තිබුණු නිසාය. ඒ ඔහු අමෙරිකානු පුරවැසියකු බවට පත්වීමෙනි. යම් පුද්ගලයකු වෙනත් රටක පුරවැසිකම ලබා ගත් විට ඔහුගේ මුල් රටේ පුරවැසිකම ස්වයංක‍්‍රීයවම අවලංගු වේ. එකී වෙනත් රටේ පුරවැසියකු බවට පත් වේ. නැවතත් මුල් රටේ පුරවැසිකම ලැබෙන්නේ, එකී මුල් රටේ ද්විත්ව පුරවැසිකම විශේෂයෙන් ඉල්ලා ලබාගත හොත් පමණකි. නැතහොත්, දෙවැනි රටේ පුරවැසිකම අතහැර, ඒ බව මුල් රටට දන්වා නැවතත් මුල් රටේ පුරවැසිකම ඉල්ලා සිටියහොත් පමණි.
2003 අමෙරිකානු පුරවැසියකු බවට පත්වීමෙන් පසු ගෝඨාභය රාජපක්‍ෂ කිහිප වරක් ලංකාවට පැමිණ තිබේ. එහෙත් ඒ කිසි අවස්ථාවක ඔහු ද්විත්ව පුරවැසිභාවය සඳහා ඉල්ලූම් කළේ නැත. අමෙරිකානු පුරවැසිභාවයද තබාගෙන ලංකාවේ පුරවැසියකුටත් හිමි අයිතිවාසිකම් හා වරප‍්‍රසාද භුක්ති විඳීමට නම්, ඔහු ද්විත්ව පුරවැසිභාවය ලබාගෙන තිබිය යුතුය.

ඒ අතර, රාජපක්‍ෂ අමෙරිකානු පුරවැසියන් සඳහා ශ‍්‍රී ලංකාවෙන් පිරිනැමෙන ‘ඔන් අරයිවල් හොලිඬේ වීසා’ හෙවත් රටට පැමිණි විට වීසා ලබාගැනීමේ අවස්ථාව සඳහා වරප‍්‍රසාදලාභියෙක් වූයේය. ඔන් අරයිවල් වීසා පිරිනැමෙන්නේ සංචාරකයන් සඳහාය. එනම්, හුදෙක් සංචාරය කිරීම සඳහා පමණක්ම ලංකාවට පැමිණෙන පිරිසය. එවැනි වීසා එකක් ලබාගෙන වෙනත් කිසිම කටයුත්තක ලංකාව තුළදී නියැලීම නීතියෙන් වරදකි. ඒ වීසා ලැබෙන්නේද දින 30ක කාලයකට පමණකි.

2005 සැප්තැම්බර් 4 වැනිදාත් ඔහු ලංකාවට ආවේ දින 30ක් සඳහා සංචාරකයන්ට පමණක් ලැබෙන සංචාරක වීසාවක් ලබාගෙනය. ඒ අනුව ඔහුට ලංකාව තුළ කළ හැක්කේ සංචාරය පමණකි.
එහෙත්, තමා අත්අඩංගුවට ගැනීමෙන් වළක්වාලන නියෝගයක් ඉල්ලමින් ඔහු 2005දී ශ්‍රේෂ්ඨාධිකරණයට ඉදිරිපත් කළ පෙත්සමට අමුණා තිබූ දිවුරුම් ප‍්‍රකාශයේ, තමා ඇත්ත වශයෙන්ම 2005 සැප්තැම්බර් 4 වැනිදා ලංකාවට ආවේ ඇයිදැයි සඳහන් කර තිබේ. ඒ මෙසේය.

‘මා (දිවුරා* කියා සිටින්නේ, මගේ සහෝදරයා 2005 ජනාධිපතිවරණයට අපේක්‍ෂකයකු ලෙස ඉදිරිපත්වී සිටීම නිසා, ඔහුගේ මැතිවරණ ව්‍යාපාරයට සහාය දීමට මම අමෙරිකාවේ සිට ලංකාවට පැමිණි බවය.’
තමාගේ වචනවලටම අනුව, දින 30ක් සඳහා ගෝඨාභය රාජපක්‍ෂ වෙත ලැබී තිබෙන වීසා බලපත‍්‍රයේ කොන්දේසි ඔහු කඩකර තිබේ. සැක හැර ගැනීම සඳහා කියතොත්, වීසා නීතිවල දැක්වෙන්නේ, ‘නිවාඩුවක් ගතකිරීම සඳහා නොවන වෙනත් කාර්යයක් සඳහා ශ‍්‍රී ලංකාවට පැමිණෙන්නකු පූර්ව අයැදුමක් කර වීසා ලබාගත යුතු බව’ය. ඒ ශ‍්‍රී ලංකා තානාපති කාර්යාලයෙන් හෝ කොන්සියුලේට් කාර්යාලයෙනි.

යම් පුද්ගලයකු වීසා කොන්දේසි කඩකරමින් ශ‍්‍රී ලංකාවට ඇතුළුවන්නේ නම් හෝ නැවතී සිටින්නේ නම් ඔහු ආගමන හා විගමන පනතේ 45(1* (ඒ* වගන්තිය උල්ලංඝනය කරන අතර, වරදකරුවකු වන විට අවුරුදු 1 සිට 5 දක්වා කාලයක් සඳහා සිරදඬුවම් නියම කළ හැකිය.
ඒ අතර, 2005 ජනාධිපතිවරණයේදී භාවිත කළ ඡුන්දදායක ලැයිස්තුව සඳහා ශ‍්‍රී ලාංකික පුරවැසියකු නොවන ඔහුගේ නම ඇතුළත්වූූයේ කෙසේද යන්නද ප‍්‍රශ්නයකි.

2005 ඡුන්දදායක ලැයිස්තුව නිරීක්‍ෂණය කරන විට පෙනීයන්නේ, මුල්කිරිගල ආසනයේ මැදමුලන ඡුන්ද කොට්ඨාසයේ ඔවුන්ගේ ලිපිනයෙහි එක් ඡුන්දදායකයකු වශයෙන් ඔහු ලියාපදිංචි වී ඇති බවයි. එහෙත්, ඔහු ඒ වන විට ශ‍්‍රී ලංකාවේ පුරවැසියෙක් නොවේ. ඡුන්දදායකයකු වීමට නම් අනිවාර්යයෙන්ම ඔහු හෝ ඇය ශ‍්‍රී ලංකාවේ පුරවැසියකු විය යුතු බවට ආණ්ඩුක‍්‍රම ව්‍යවස්ථාව නියම කරයි.

මැදමූලන නිවසේ ඡුන්දදායකයකු ලෙස ලියාපදිංචි වී ඇති තවත් කෙනකු නම් අයෝමා උදේනි රාජපක්‍ෂ (අංක 130* හෙවත් ගෝඨාභය රාජපක්‍ෂගේ බිරිඳයි. ඇයට ශ‍්‍රී ලංකාවේ ද්විත්ව පුරවැසිභාවය ලැබෙන්නේ 2006 පෙබරවාරි 09 වැනිදාය. ඒ වින විට ඇගේ ස්වාමි පුරුෂයා වන ගෝඨාභය රාජපක්‍ෂ ආරක්‍ෂක අමාත්‍යාංශයේ ලේකම්වරයාය. ඇගේ ද්විත්ව පුරවැසිභාවය පිළිබඳ සහතිකයට අත්සන් කර තිබෙන්නේ ගෝඨාභය රාජපක්‍ෂය.

දැන් ප‍්‍රශ්නය මෙයයි. 2006 පෙබරවාරි 9 වැනිදා, ද්විත්ව පුරවැසිභාවය ලබාගත් අයෝමා රාජපක්‍ෂ, 2005 මුල්කිරිගල ආසනයේ ඡුන්ද ලැයිස්තුවේ ඉන්නේ කොහොමද යන්නයි. ඒ වන විට ඇය ශ‍්‍රී ලංකාවේ පුරවැසියෙක් නොවේ.
මේ අනුව බලන කල එම නිවසේ ගෘහ මූලිකයා ලෙස පෙනෙන චමල් ජයන්ත රාජපක්‍ෂ, සිය නිවසේ සිටින, ඡුන්දය පාවිච්චි කිරීමට හැකියාව ඇති අය ලෙසට, එවැනි හැකියාවක් නැති අයද ලැයිස්තුගත කිරීමෙන් ලංකාවේ ඡුන්ද නීතිය උල්ලංඝනය කර තිබේ. සාමාන්‍යයෙන් ගෘහ මූලිකයා විසින් පුරවන ඡුන්දදායක ලැයිස්තුවේ අවසානයේ ගෘහමූලිකයා අත්සන් කරන්නේ, අසත්‍ය හා වැරදි කිසිවක් තමා මේ පෝරමය පිරවීමේදී නොකී බවට සහතික කරමිනි. දැන් රාජපක්‍ෂවරුන් සිය නිවසේ සිටම ඡුන්ද නීති කඩකර ඇති බව පෙනෙයි.
රට හදන්නට බලය ඉල්ලන්නේ තමන් වසන නිවසේ සිටම නීතිය කඩමින්, එය බල්ලාට දමමින් ජීවත්වන පිරිසක් බව පෙනේ.

වීසා කොන්දේසි ඒ වන විටත් කඩකර තිබුණත්, තමා ලංකාවට පැමිණ සිටින්නේ සංචාරක වීසා ලබාගෙන දින 30ක කාලයකට පමණක් අවසර ඇතිව බව හොඳින්ම දන්නා ගෝඨාභය රාජපක්‍ෂ, සහෝදරයාගේ ජනාධිපතිවරණ ප‍්‍රචාරක ව්‍යාපාරයේ නොනැවතී නියැලී සිටියත්, එම දින 30 ඉක්මයෑමට පෙර, එනම් හරියටම 30 වැනි දිනයේ, එනම් 2005 ඔක්තෝබර් 4වැනිදා, ලංකාවෙන් ඉන්දියාවට පිටත්ව යන්නේය. ඒ දිගු කාලයකට නොවේ.

ඉන්දියාවට ගොස් දිනකට පසු, එනම් ඔක්තෝබර් 6 වැනිදා ඔහු නැවතත් ලංකාවට එයි. ඔක්තෝබර් 7 වැනිදා, ජනාධිපතිවරණය සඳහා මහින්ද රාජපක්‍ෂ නාමයෝජනා භාරදුන් දිනයයි. කාලය අපතේ නොයවාම ඔහු යළිත් (වීසා කොන්දේසි කඩකරමින්* සිය වැඩිමහල් සහෝදරයාගේ මැතිවරණ ව්‍යාපාරයට එක්වන්නේය. මේ සමග පළවෙන, 2005 ඔක්තෝබර් 7 වැනිදා, මහින්ද රාජපක්‍ෂ නාමයෝජනා දුන් පසු පැවැත්වුණු දේශපාලන රැුලියක ගෝඨාභය රාජපක්‍ෂ මහතාද සිටිනු පෙනෙයි.

නොවැම්බර් 17 වැනිදා පැවැති ජනාධිපතිවරණයෙන් මහින්ද රාජපක්‍ෂ මහතා ජයගත්තේය. 18 වැනිදා ඔහු ජනාධිපති ධුරයේ දිවුරුම් දුන්නේය. ඒ වන තුරුම ගෝඨාභය රාජපක්‍ෂ මහතා ද්විත්ව පුරවැසිභාවය සඳහා ඉල්ලූම් කළේ නැත. ‘සන්ඬේ ඔබ්සර්වර්’ පුවත්පත විමර්ශනය කළ පරිදි, ආගම විගමන දෙපාර්තමේන්තුවේ ‘ද්විත්ව පුරවැසියන්ගේ ලියාපදිංචි ලේඛනය’ අනුව හා ඊට අදාළ පරිගණක දත්ත අනුව, ඔහු ද්විත්ව පුරවැසිභාවය සඳහා ඉල්ලූම් කරන්නේ නොවැම්බර් 18 වැනිදාය. එදින සිකුරාදා දවසකි. 19, 20 සති අන්තයයි. 21වැනි සඳුදාම ද්විත්ව පුරවැසිභාවය සඳහා අවශ්‍ය මුදල් ඔහු තැන්පත් කරයි.

2005 වන විට, ද්විත්ව පුරවැසිභාවය සඳහා කළ ඉල්ලීම් හා ලිපිගොනු තිබුණේ, බම්බලපිටියේ ආගමන විගමන දෙපාර්තමේන්තු කාර්යාලයේය. ඒ ඉල්ලීම් සමග විවිධ ලේඛන ඉදිරිපත් කළ යුතුය. එනම්, අධ්‍යාපන සුදුසුකම් සනාථ කළ හැකි ලියවිලි, උපත් හා විවාහ ලියාපදිංචි කිරීමේ සහතික, ලංකාව තුළ යම් දේපළක් අයිති බවට වූ සහතික හෝ විදේශ මුදල් හා දිවුරුම් සහතිකයකි. මේ ලේඛන සලකා බැලීමෙන් පසු පොලිසියෙන් හා බුද්ධි අංශ වෙතින් නිෂ්කාෂණ වාර්තා ලබාගැනේ. එම නිෂ්කාෂණ වාර්තා අමාත්‍යාංශ නිලධාරීන් විසින් විමර්ශනය කෙරෙන අතර, දීර්ඝ ක‍්‍රියාවලියකට පසුව, අමාත්‍යාංශය විසින්, ද්විත්ව පුරවැසිභාවය ලබාදිය යුතුද නැද්ද යන්න ගැන තීරණය කෙරේ.
එහෙත් ගෝඨාභය රාජපක්‍ෂ ද්විත්ව පුරවැසිභාවය ලබාගැනීමේ අත්දැකීම මේ සාමාන්‍ය ක‍්‍රියාවලියෙන් සම්පූර්ණයෙන්ම පිට පැන සිදුවුණකි. සන්ඬේ ඔබ්සර්වර්, ආගමන හා විගමන දෙපාර්තමේන්තුවෙන් තොරතුරු දැනගැනීමේ අයිතිය යටතේ කරන ලද ඉල්ලීමකින් දැනගන්නට ලැබුණේ, ගෝඨාභය රාජපපක්‍ෂගේ ද්විත්ව පුරවැසිභාවය අයැදුම් කිරීමට අදාළ ලිපිගොනු දෙපාර්තමේන්තුව භාරයේ නොපවතින බවයි.

දෙපාර්තමේන්තු නිලධාරියකු ඊට හේතුව හැටියට පැවසුවේ, ද්විත්ව පුරවැරසිභාවය පිළිබඳ කටයුතු අමාත්‍යාංශ මට්ටමෙන් සිදුවීමයි. එහෙත්, සන්ඬේ ඔබ්සර්වර් ස්වාධීනව කළ සොයාබැලීමකින් තහවුරු කරගෙන ඇත්තේ, බොහෝ ද්විත්ව පුරවැසියන්ගේ ලිපිගොනු, ආගමන විගමන දෙපාර්තමේන්තුවේ සුරක්‍ෂිතව තිබෙන බවයි. කොච්චර ද කියනවා නම්, ගෝඨාභය රාජපක්‍ෂගේ බිරිඳ අයෝමා රාජපක්‍ෂගේ ද්විත්ව පුරවැසිභාවය පිළිබඳ ලිපිගොනුවද එහි සුරක්‍ෂිතව තිබුණි.

නිසි ලෙස අදාළ ලිපිගොනු නඩත්තු නොකරන තත්ත්වයක් යටතේ, මේ ගැන සොයාබැලීමට ඇත්තේ මූලාශ‍්‍ර දෙකකි. එකක් නම්, ආගමන විගමන දෙපාර්තමේන්තුව පවත්වාගෙන යන ද්විත්ව පුරවැසියන් ලියාපදිංචි කිරීමේ ලේඛනයයි. දෙවැන්න ආගමන විගමන දෙපාර්තමේන්තුවේ පරිගණක දත්තයි. මේ මූලාශ‍්‍ර දෙකටම අනුව, ගෝඨාභය රාජපක්‍ෂගේ ද්විත්ව පුරවැසි අයැදුම එක වැඩකරන දිනයකට පසුව, එනම් නොවැම්බර් 21වැනිදා, සඳුදා පිළිගෙන තිබේ. එහෙත්, ඒ, ඊට පෙර 2005 ජුනි මාසයේ සිට ද්විත්ව පුරවැසිභාවය සඳහා කර තිබුණු ඉල්ලීම් පෝලිමේ පස්සට දමමිනි.

සන්ඬේ ඔබ්සර්වර් පුවත්පතට ද්විත්ව පුරවැසියන් ලියාපදිංචි කිරිමේ ලේඛනය දකින්නට ලැබිණ. එහි ගෝඨාභය රාජපක්‍ෂ මහතාගේ අයැදුමට අදාළ කොටසේ යම් වෙනස්කම් කළ බවට සලකුණු දකින්නට ලැබිණ. ඔහුගේ උපන් දිනයට අදාළ කොටුව තිබුණේ හිස්ව ය. ඒ වගේම බොඳවුණු සලකුණු සහිතවය. ඔහුගේ ‘අයැදුම් පත‍්‍රයේ අංකයට’ අදාළ කොටුව තුළ, වෙනත් පෑනකින් යළිත් උඩින් ලියා තිබිණ. ඒ වාගේම කෙටි අත්සන හා නිලධාරියාගේ සටහන් සඳහා ඇති කොටු ද වෙනස්කම්වලට භාජනය කොට තිබිණ.
ද්විත්ව පුරවැසිභාවය සඳහා ඉල්ලූම් පත‍්‍රය, සහායක ලිපි ලේඛන, ආරක්‍ෂක නිෂ්කාෂණ වාර්තා, සහතිකවල පිටපත් ඇතුළත් ලිපිගොනුව අතුරුදහන්ව ඇති තත්ත්වයක් යටතේ, ගෝඨාභය රාජපක්‍ෂට ද්විත්ව පුරවැසිභාවය ප‍්‍රදානය කළ බවට ඇති එකම සාක්‍ෂිය වන ලියාපදිංචි ලේඛනයේ මේ සැකසහිත සටහන් සහ පරිගණක දත්ත පැහැදිලි කරන්නේ, ද්විත්ව පුරවැසිභාවය සඳහා වූ අයැදුම්පත පිළිගෙන ඇත්තේ, 2005 නොවැම්බර් 30 වැනිදා බවයි.

ගෝඨාභය රාජපක්‍ෂ මහතාට ද්විත්ව පුරවැසිභාවය ප‍්‍රදානය කැරුණු 2005 නොවැම්බර් 24 වැනිදා වන විටත් ඔහු ආරක්‍ෂක, මහජන ආරක්‍ෂාව, නීතිය හා සාමය පිළිබඳ අමාත්‍යාංශය සඳහා ලේකම්වරයා ලෙස පත්කර තිබිණි. එනම් 2005 නොවැම්බර් 4 වැනිදා, ජනාධිපති මහින්ද රාජපක්‍ෂ සින් නිකුත්කරන ලද අති විශේෂ ගැසට් පත‍්‍රයට අනුව ගෝඨාභය රාජපක්‍ෂ ඉහත කී අමාත්‍යාංශයේ ලේකම් ධුරයට පත්කෙරිණ. ආගමන විගමන දෙපාර්තමේන්තුව සහ ‘විදේශිකයන් ඇතුළුවීම පාලනය කිරීම හා නිති විරෝධී ආගමනයන් පාලනය කිරීම’ද ඇතුළත් පුරවැසිභාවය පිළිබඳ විෂය ඔහුගේ අමාත්‍යාංශය යටතට පත්කර තිබිණි.

නොවැම්බර් 24 වැනිදා, ඒ වන විටත් අමෙරිකානු පුරවැසියකු පමණක් වූ ගෝඨාභය අමාත්‍යාංශ ලේකම් ධුරයට පත්වී දින 6කට පසුවය, ඔහුට අමෙරිකාවේ සහ ශ‍්‍රී ලංකාවේ ද්විත්ව පුරවැසි තත්ත්වය ලැබෙන්නේ. ඒ ඔහුගේ අමාත්‍යාංශය යටතේම වූ දෙපාර්තමේන්තුවක් විසිනි. එය, 2005 දෙසැම්බර් 20 වැනි දින ඔහු ආරක්‍ෂක අමාත්‍යාංශ ලේකම්වරයා හැටියට ශ‍්‍රී ලංකා රාජ්‍ය තාන්ත‍්‍රික ගුවන් ගමන් බලපත‍්‍රය ලබාගන්නා විට, ‘දරන්නා ද්විත්ව පුරවැසියෙකි’ යන සටහන ලැබීමට උදව් වෙයි.

ද්විත්ව පුරවැසියන් ගමන් බලපත‍්‍රයක් අයැදුම් කරන විට, අයැදුම්කරු සිය ද්විත්ව පුරවැසිභාවය පිළිබඳ සහතිකය ඉදිරිපත් කිරීම අවශ්‍ය වෙයි. එහෙත්, ගෝඨාභය රාජපක්‍ෂ මහතා ගමන් බලපත‍්‍ර 5ක්ම ලබාගනිද්දීත් (ඉන් තුනක් රාජ්‍යතාන්ත‍්‍රික ගමන් බලපත‍්‍ර වන අතර දෙකක් සාමාන්‍ය ගමන් බලපත‍්‍රය.* කිසිම අවස්ථාවක ඔහු ද්විත්ව පුරවැසිභාවය පිළිබඳ සහතිකය ඉදිරිපත් කළ බවට දෙපාර්තමේන්තුව සතු ලිපිගොනුවල කිසිම සාක්‍ෂියක් නැත. ඒ හැම අවස්ථාවකම ජ්‍යෙෂ්ඨ ආගමන නිලධාරියකු ඔහුගේ අයැදුම්පතේ ඒ වන විටත් ඔහු ද්විත්ව පුරවැසියකු බවට සටහන් යොදා ඇත.

ඔහුගේ 2009 රාජ්‍යතාන්ත‍්‍රික ගුවන්ගමන් බලපත‍්‍රය පෙන්වන්නේ, ආගමන විගමන දෙපාර්තමේන්තුවේ සියලූම නීති ගෝඨාභය රාජපක්‍ෂට වාසි වන ආකාරයට කෙතරම් හැසිරවීද යන්නයි. ඒ වන විට, ගමන් බලපත‍්‍රවල ඉල්ලූම්කරුවන්, ජේ්‍යෂ්ඨ රජයේ නිලධාරියකුගෙන් චරිත සහතිකයක් ලබාගෙන ආගමන විගමන පාලක ජෙනරාල් වෙත ඉදිරිපත් කළ යුතුව තිබුණු අතර, ඔහු ඉදිරියේ තමාගේ අයැදුම්පත අත්සන් කළ යුතුවද තිබුණි.

2009 රාජපක්‍ෂ සිය දෙවැනි රාජ්‍යතාන්ත‍්‍රික ගමන් බලපත‍්‍රය ඉල්ලූම් කරන විට ආගමන විගමන පාලක ජෙනරාල් වූයේ පීබී අබේකෝන් මහතාය. (ජනාධිපති සිරිසේන පත්වුණු විගස ජනාධිපති ලේකම් වුණේ ඔහුය.* ගෝඨාභය චරිත සහතිකයක් නැතිවම තම ඉල්ලූම්පත‍්‍රය ඉදිරිපත් කළ අතර, ඊට අදාළ අයැදුම්පතේ කොටස, ‘රාජපක්‍ෂ මහතා තමා අවුරුදු හයක් තිස්සේ පටන් අඳුනන බව’ට සටහන් කරමින් පුරවන ලද්දේ අබේකෝන් මහතා විසින්මය.
මේ ආකාරයට බලන විට, ඔහුගේ ගුවන්ගමන් බලපත‍්‍ර ඉල්ලීම්, ඔහුගේම සුවිශේස වරප‍්‍රසාදිත පවුලේ අනෙක් සාමාජිකයන්ට පවා වෙනස් බව පෙනේ. ඔහුගේ බිරිඳ, අයෝමා උදේනි රාජපක්‍ෂ සිය ද්විත්ව පුරවැසිභාවය ලබාගත්තේ සාමාන්‍ය නීතිය යටතේය. 2006දී ඉදිරිපත් කරන ලද ඇගේ ඉල්ලූම්පත‍්‍රය, ඊට සහායක ලේඛන සහ ඇගේ ද්විත්ව පුරවැසිභාවය පිළිබඳ සහතිකයේ පිටපතක් අදාල ලිපි ගොනුවේ සුරැුකිව තිබේ.

ඇය ශ‍්‍රී ලංකා ගමන් බලපත‍්‍රයක් ලබාගැනීමට අයැදුම් කළ සෑම අවස්ථාවකදීම, සිය ද්විත්ව පුරවැසිභාවය පිළිබඳ සහතිකය ඉදිරිපත් කර තිබේ. පසු දිනයකදී ද්විත්ව පුරවැසිභාවය ලබාගත් බැසිල් රාජපක්‍ෂද එසේය. ද්විත්ව පුරවැසිභාවය පිළිබඳ අයැදුම්පත‍්‍රය අතුරුදන් වී ඇත්තේ ගෝඨාභය රාජපක්‍ෂගේ පමණකි.
පසුගිය දිනවල තම පුරවැසිභාවය අත්හැරීම ගැන විවිධ සහතික ඉදිරිපත් වුණු අවස්ථාවෙහි, ගෝඨාභය රාජපක්‍ෂ මාධ්‍යවලට කීවේ, තමා තවදුරටත් ද්විත්ව පුරවැසියකු නොවන බවටත්, මේ අවුරුද්දේ මැයි මාසයේ අලූත් ශ‍්‍රී ලංකා ගමන් බලපත‍්‍රයක් ලබාගත් බවත්ය. මේ ප‍්‍රකාශය ආගමන විගමන දෙපාර්තමේන්තුව තුළත්, ස්වදේශ කටයුතු අමාත්‍යාංශය තුළත් විමතියක් ඇතිකිරීමට හේතුවී තිබේ. ද්විත්ව පුරවැසියකු හැටියට සිටියදී එවැනි ගමන් බලපත‍්‍රයක් තමන්ගේ නහය යටින් රිංගා ගොස් ලබාගෙන ඇත්තේ කෙසේදැයි ආගමන දෙපාර්තමේන්තුවේ නිලධාරීහු කල්පනා කරති.

ආගමන නිලධාරීන්ට අනුව, ලංකාවේ සාමාන්‍ය පුරවැසියන් බවට පත්වීමට බලාපොරොත්තු වන ද්විත්ව පුරවැසියන්, ඒ සම්බන්ධයෙන් ස්වදේශ කටයුතු භාර ඇමතිවරයාට (දැන් වජිර අබේවර්ධන* ඉල්ලීමක් ඉදිරිපත් කළ යුතුය. පිටරටක පුරවැසිභාවය අත්හළ යම් ඉල්ලූම්කරුවකුට ලංකාවේ පුරවැසිභාවය ප‍්‍රදානය කරනවාදැයි යන්න පිළිබඳ ඇමති විසින් සලකා බැලෙන්නේ පැහැදිලි මහජන ප‍්‍රතිපත්තියක් මතය.

එහෙත්, ඇමතිවරයාට එවැනි ඉල්ලීමක් ගෝඨාභය විසින් තවමත් කර ඇති බවට කිසිම සාක්‍ෂියක් නැත.
මේ සම්බ්න්ධයෙන්ද ෂෝට්කට් එකක් සොයාගැනීමට ගෝඨාභය රාජපක්‍ෂ සමත්වී තිබේ. තමාගේ පැරණි ජාතික හැඳුනුම්පතෙන් ඔහු එම ගමන් බලපත‍්‍රය සඳහා ඉල්ලීම කළේ නම්, ගමන් බලපත‍්‍ර පාලක පරිගණක පද්ධතිය ඔහු ද්විත්ව පුරවැසියකුු බව හඳුනාගන්නවා ඇත. ඒ වාගේම ඔහුගේ ගමන් බලපත‍්‍රය ත‍්‍රිපුද්ගල විශේෂ මහාධිකරණය විසින් සිය භාරයට ගෙන ඇති බවද එහි දැක්වෙනවා ඇත. (ඞීඒ රාජපක්‍ෂ කෞතුකාගාරය ඉදිකිරීමට මහජන මුදල් භාවිත කළේය යන චෝදනාව මත එම විශේෂ මහාධිකරණය ඔහුට විරුද්ධව නඩුවක් විභාග කරන අතර, ගමන් බලපත‍්‍රය එම අධිකරණය භාරයේ පවතියි.*

ගෝඨාභය රාජපක්‍ෂ අලූත් ජාතික හැඳුනුම්පතක් ලබාගත්තේය. එහි ඇත්තේ අලූත් අංකයකි. ඒ නිසා, එම හැඳුනුම්පත් අංකය සමග ඔහුගේ පරණ ඉතිහාසය ඈඳෙන්නේ නැත. එම ජාතික හැඳුනුම්පත යොදා ලබාගත් ගමන් බලපත‍්‍රයෙනි ඔහු බයිපාස් සැත්කමක් සඳහා සිංගප්පූරුවට යන්නේ.
ආගමන විමර්ශකයන් සැකකරන්නේ, ගෝඨාභය රාජපක්‍ෂ නීතියට පිටින් ගත් ගමන් බලපත‍්‍රය ලබාගෙන ඇත්තේ දේශපාලන බලපෑමකින් විය හැකි බවයි. සිය අමෙරිකානු පුරවැසිභාවය අත්හැරීමට ප‍්‍රථම ඔහුට ශ‍්‍රී ලංකා පුරවැසිභාවය ලබාගත හැකි වන්නේ ඒ ක‍්‍රියාවලිය සම්පූර්ණයෙන්ම ඇමතිවරයාගේ තීරණය මත රඳාපවතින නිසාය.

ඇමතිවරයාගේ අභිමතය අවශ්‍ය වන අනෙක් අවස්ථාවලදී මෙන් නොව, මේ අවස්ථාවේදී ද්විත්ව පුරවැසිභාවය ලබාදීම හෝ ඉවත්කිරීම, හෝ පුරවැසිභාවය ආරම්භ කිරීම සම්බන්ධයෙන් විෂය භාර ඇමතිවරයාගේ අභිමතය ගැන අධිකරණය ඉදිරියේ අභියෝග කිරීම ඉතාම දුෂ්කර කාර්යයකි. හේතුව, පුරවැසිභාවය පිළිබඳ පනතෙන්, ඇමතිවරයාගේ මේ තීරණය, අවසානාත්මක හා කිසිම අධිකරණයකදී ප‍්‍රශ්න කළ නොහැකියැයි සඳහන් වන නිසාය.

මේ විස්තර අපට පැහැදිලි කරන්නේ තමන්ට වුවමනා විදියට නීතිය නවමින් පුරවැසිභාවය පිළිබඳ ජිමික් දමමින් ගෝඨාභය රාජපක්‍ෂ රට රවටන බව නොවේද?x

2019 අගෝස්තු 11 වැනිදා,
සන්ඬේ ඔබ්සර්වර් පුවත්පතේ
‘හෙල්පින් ගෝඨාභය’ නමින් පළවූ
මනෝජ් කොළඹගේගේ
හෙළිදරව්ව පදනම් කරගෙන ලියූවකි.

x අරුණ ජයවර්ධන