සිනමාවක පැවැත්මට සිනමා උළෙල අත්‍යවශ්‍ය බව ලියුම්කරුගේ විශ්වාසයයි. සිනමා උළෙලවලටද ආවේණික කලාත්මක ගතිලක්ෂණ ඇත. හොඳ සිනමා උළෙලක් සංවිධානය කිරීමද හොඳ කලාකෘතියක් සංවිධානය කිරීමට සමානය. එතැනට එන්නේ කලාකරුවන්ය. ඇගයෙන්නේ කලාවය. ඒ සියල්ල නිසි පරිදි පෙළගස්වමින් සිනමා උළෙල නැරඹීමට පේ‍්‍රක්ෂකයන් වැඩි පිරිසක් ඇදගන්නා අන්දමේ රසයක් ලබාදීම සිනමා උළෙලක අරමුණ වෙයි. ඒ අතින් දෙරණ සිනමා සම්මාන උළෙල ඉතා අගය කළ යුතු කටයුත්තකි. පසුගිය සතියකදී පැවති දෙරණ සිනමා සම්මාන උළෙලේදී දකින්නට ලැබුණු සුන්දර අවස්ථා බොහෝය. ගෙවුණු සතියේදී එම සම්මාන උළෙලේ සම්පූර්ණ වීඩියෝපටය යූටියුබ් වෙබ් අඩවියට එකතු කර තිබුණු අතර එය බොහෝදෙනෙකු නරඹා තිබුණි.
බන්දු සමරසිංහ හොඳම විකට නළුවාට එහිදී සම්මානය ලැබීය. ඔහු පැවසූ අන්දමට වසර 50ක් සිනමාවේ රැුඳෙමින් පේ‍්‍රක්ෂකයන්ව හිනැස්සූ තමාට හොඳම විකට නළුවාට හිමි සම්මානය ලැබී ඇත්තේ පළවැනි වතාවටය. ඔහු ඉතා සංවේදී ලෙස ඒ සම්මානය භාරගත්තේය. එය ඉතා වැදගත් අවස්ථාවකි. එමෙන්ම සුන්දර අවස්ථාවකි.
සංජීව පුෂ්පකුමාර හොඳම අධ්‍යක්ෂවරයාට හිමි සම්මානය ලැබීමෙන් පසුව කළ කතාවද ඉතා හෘදයංගම එකකි. ඔහු තමා සමග නිර්දේශ වූ අනෙකුත් අධ්‍යක්ෂවරුන් වන ජයන්ත චන්ද්‍රසිරි හා සුමිත‍්‍රා පීරිස් ගැන කෙටියෙන් අදහස් දැක්වීම් කළේය. පුංචි කාලයේ දඬුබස්නාමානය බලන්නට ගොස් තමන්ට සිදුවූ අකරතැබ්බයක් ගැන කියමින් ජයන්ත චන්ද්‍රසිරි ගැන කී ඔහු, සුමිත‍්‍රා පීරිස් සරලවම විශිෂ්ටතමයා ලෙස හැඳින්වීය. ඉන්පසුව තමන් අතට සම්මානය දුන් එම්ඞී මහින්දපාල, තමාව නිවසට ගෙන්වා, තමා නැරඹීමට කැමති චිත‍්‍රපටි නරඹන්නට සියලූ පහසුකම් සපයා ආහාරද දුන් අන්දම සිහිපත් කළේය. ත‍්‍රිකුණාමලයෙන් පැමිණි තමා සිනමාකරුවෙකු වීමේ කතාව ගැන හෘදයංගම ලෙස කතාකළේය. එය මෑත කාලයේ සිනමා උළෙලක දකින්නට ලැබුණු සුන්දරම අදහස් බෙදාගැනීමකි.
එපමණක් නොව, ඇතැම් නළුනිළියන් හා අධ්‍යක්ෂවරුන් දෙරණ සිනමා සම්මාන උළෙලේදී දකින්නට ලැබුණේ ඉතා රාජකීය පෙනුමක් සමඟය. ඔවුන්ව දකිද්දී ඔවුන් ලාංකේය සිනමා වපසරිය තුළ කළ කී දේවල් ඉතා සුන්දර ලෙස සිහිපත් විය.
ස්වර්ණා මල්ලවආරච්චි සම්මානයක් ප‍්‍රදානය කිරීම සඳහා වේදිකාව පසුපසින් වේදිකාවට ආ අයුරු දකිද්දී වචනවලින් විස්තර කළ නොහැකි අන්දමේ හැඟීමක් ඇතිවිය. ස්වර්ණා තමා දරාගෙන වේදිකාව මතට ආවේ සැබෑ රැුජිණක ලෙස රාජකීය ලීලාවෙනි. මහේන්ද්‍ර පෙරේරා සම්මානය ලැබූ මොහොතේ වේදිකාවට පැමිණි අන්දමද මතකයේ රැුඳෙයි. ඔහුද වේදිකාවට ආවේ රංගනයෙහි විශිෂ්ටයෙකුට හිමි රාජකීය ලීලාවකිනි. එතැනින් එහාට දර්ශන් ධර්මරාජ් සම්මානය ලැබූ මොහොතද ඉතා හෘදයංගමය. මෙවැනි සුන්දර අවස්ථා ගණනාවක් දෙරණ සම්මාන උළෙලේදී දකින්නට ලැබුණි.
ගෙවුණු වසරේදී චිත‍්‍රපටි 25ක් පමණක් තිරගත වූ කුඩා සිනමා කර්මාන්තයක් අපට තිබුණත්, හොඳ සම්මාන උළෙලක් වර්ණවත් කරන්නට තරම් පොහොසත් සම්පත් රැුසක් අපේ සිනමාවට තිබෙන බව ඒ සම්මාන උළෙල දකිද්දී අවබෝධ විය.
එහෙත් මේ සම්මාන උළෙලේ නැටුම් ගැයුම් ආදි ප‍්‍රාසංගික පාර්ශ්වය ඉතා දුර්වල බව පැහැදිලිි කාරණයකි. නර්තන ඉදිරිපත් කළ නළුනිළියන්ගේ සිට ඒ පාර්ශ්වය දුර්වලය. යූටියුබ් වෙබ් අඩවියේ දෙරණ සිනමා සම්මාන උළෙලේ වීඩියෝවට පහළින් ඇති පේ‍්‍රක්ෂක අදහස්වලදීද ඒ කොටස ගැන විවේචන එල්ලවී තිබුණි.
අප මුලින්ම කී පරිදිම සිනමා උලෙළ යනු වාණිජමය සිනමා කර්මාන්තයකට අත්‍යවශ්‍ය අංගයකි. නැටුම් ගැයුම් ආදිය එවැනි සම්මාන උළෙලකට වැදගත්ය. පේ‍්‍රක්ෂක ආකර්ෂණය ඇදගන්නා අංගෝපාංග එවැනි සම්මාන උළෙලක තිබිය යුතුය. එහෙත් පේ‍්‍රක්ෂක අවධානය ලැබෙන්නේ නැටුම් ගැයුම්වලට පමණක් නොවේ. අප ඉහත කී වර්ගයේ හෘදයංගම අවස්ථාවලටද පේ‍්‍රක්ෂක අවධානය ඉහළින්ම යොමුවෙයි.
අපේ කලාපයේ සිනමා සම්මාන උළෙල සංවිධානය කිරීමේදී ආදර්ශයක් ලෙස වැඩි අවධානයක් යොමුවෙන්නේ ඉන්දියාවේ ෆිල්ම්ෆෙයා, අයිෆා වැනි සම්මාන උළෙලවලටය. දකුණු ඉන්දියාවේ විජේ සම්මාන උළෙලත් එයින් ආභාසය ලැබූවකි. ලංකාවේද මීට පෙර පැවැත්වූ හිරු ටීවී සම්මාන උළෙලේදී හා දෙරණ ටීවී සිය සම්මාන උළෙලවලදී ඒ සම්මාන උළෙලවලින් යම් ආභාසයක් ලැබීමට උත්සාහ කර ඇති බව පෙනෙයි. (දෙරණ සිනමා සම්මාන උළෙලේදී ෆිල්ම්ෆෙයා හො අයිෆා සම්පූර්ණයෙන්ම අනුකරණය කිරීමට උත්සාහ කර නැත. හෙට දවසේ සිනමාව වැනි නවාංගයන් රැුසක් දෙරණ සිනමා සම්මාන උළෙලේදී දකින්නට ලැබුණි.*
ෆිල්ම්ෆෙයා, අයිෆා වැනි සම්මාන උළෙලවල වැඩි අවධානයක් යොමු කරන්නේ ජනප‍්‍රිය හා තරුණ නළුනිළියන්ගේ සුපිරි තරු මට්ටමේ ජනප‍්‍රියත්වයටයි. තරු ගුණයටයි. ඒ නළුනිළියන්ගේ නර්තනයන්, විහිළු තහළු, රතුපළස, නළුනිළියන් සම්මාන උළෙලට අඳින ඇඳුම් පැළඳුම් ආදියට වැඩි අවධානයක් යොමුවෙයි. ඇත්තෙන්ම වර්ණවත් සිනමා උළෙලකට වාණිජමය වටිනාකමක් ලැබෙන්නේ ඒවා නිසාය. ඒ නිසා ඒ විහිළු තහළු, නැටුම් ගැයුම්, රතුපලස්, සුපිරිතරු කතාබස් ආදිය සිනමා උළෙලක දකින්නට ලැබේ. වැඩි පේ‍්‍රක්ෂක ආකර්ෂණයක් හිමිවන ජනප‍්‍රිය සිනමා සම්මාන උළෙලක් සංවිධානය කිරීමේදී ඒවා ගැන කල්පනා කළ යුතු බව ඇත්තය. එහෙත් සිනමා උළෙලකදී අවධානය යොමු කළ හැකි තවත් පාර්ශ්වයක් වන්නේ හෘදයංගම පාර්ශ්වයයි. සිනමාවේ දැවැන්තයන් එක තැනකට එක්ව, අතීතය සිහිපත් කරමින් වඩා හෘදයංගම සංවාදයකට එකතුවෙන අයුරු දකින්නට ලැබීම සිනමා උළෙලකදී ස්පර්ශ කළ යුතු වටිනාම පැත්තයි.
හොලිවුඩයේ ඔස්කාර් වැනි සම්මාන උළෙලවලින් එයට ආභාස ලැබිය හැකිය. අපේ කලාපයේ මේ සඳහා හොඳම ආදර්ශයක් වන්නේ ඉන්දියාවේ ‘ආනන්ද විකටන්’ සම්මාන උළෙලයි.
විකටන් නම් දෙමළ සඟරාව දෙමළ සිනමාව හා කලාවට අදාලව වැඩිම මාධ්‍ය මෙහෙවරක් කළ මාධ්‍ය ආයතනයකි. ඔවුහු ආනන්ද විකටන් සම්මාන උළෙල නමින් වාර්ෂික සිනමා සම්මාන උළෙලක් පවත්වතිි. ඇත්තෙන්ම දකුණු ඉන්දියානු ෆිල්ම්ෆෙයා සම්මාන උළෙලටත් වඩා වැඩි වටිනාකමක් මෑත කාලයේදී ආනන්ද විකටන් සම්මාන උළෙලේදී දකින්නට ලැබුණි. ආනන්ද විකටන් සම්මාන උළෙලේදී නළුනිළියන්ගේ නැටුම්, හාස්‍යමය අවස්ථා ආදියට වඩා වැඩි අවධානයක් යොමු කර ඇත්තේ අදහස් දැක්වීම් හා සංවාදවලටය.
වසර දෙකකට පෙර ආනන්ද විකටන් සම්මාන උළෙලේදී කමල් හසන් හා රැුජිණිකාන්ත් එකම වේදිකාවේ එකට මුණගැසුණෝය. ඒ දෙදෙනා සිය අතීතය ගැන අදහස් හුවමාරු කරගත්තේ ඉතා සිත්ගන්නා අවස්ථාවක් මවමින්ය. ඒ දෙදෙනා එක වේදිකාවක මෙලෙස මුණගැහෙන්නේ නැති තරම්ය. ඒ නිසා මිලියන ගණනක් ඒ දෙදෙනා මුණගැසෙන වීඩියෝව නරඹා ඇත. ආනන්ද විකටන් සම්මාන උළෙලට පේ‍්‍රක්ෂකයන් ඇදෙන්නේ ඒ වටිනාකම නිසාය. තවත් එවැනි හෘදයංගම අවස්ථා ගණනක් ආනන්ද විකටන්හි ඇත.
මෙරක්කු තොඩච්චි මලෙයි නම් චිත‍්‍රපටිය වෘත්තිමය නළුනිළියන් නොව, සැබෑ ගම්මානයක ගැහැනුන් හා මිනිසුන් යොදා නිර්මාණය කළ එකකි. ඒ චිත‍්‍රපටියේ සිටි පුංචි කොල්ලෝ සුපිරි නළු ධනුෂ්ගේ රසිකයෝය. පසුගිය වසරේ විකටන් සම්මාන උළෙලේදී ඒ කොල්ලන් වේදිකාවක සිටි මොහොතක ධනුෂ්ද වේදිකාවට ගෙන්වීය. ගැමි තරුණයන් පිරිසක් තමන්ගේ සිහින තරුව මුණගැසුණු ඒ අවස්ථාව ඉතා සුන්දර අවස්ථාවක් විය.
ඊට අමතරව ධනුෂ් හොඳම නළුවාට හිමි සම්මානය ලැබූ මොහොතේ, ධනුෂ්ට හොරෙන්ම ඔහුට පසුපසින් ඔහුගේ පියා, මව හා සහෝදරියන් දෙදෙනා වේදිකාවට ගෙන්වීමටද සිනමා උළෙලේ සංවිධායකයන් කටයුතු කර තිබුණි. ධනුෂ්ගේ සාර්ථකත්වය ගැන ධනුෂ්ගේ පවුලේ සාමාජිකයෝ එතැනදී ඉතා සංවේදී අදහස් දැක්වීමක් කළෝය. එය අවසන් වරට පැවති ආනන්ද විකටන් සම්මාන උළෙලේ සුන්දරම අවස්ථාවක් වූ අතර ඒ වීඩියෝවද මිලියන ගණනක් නරඹා තිබුණි. මෙවැනි සුන්දර අවස්ථා ගණනාවක් ආනන්ද විකටන් සම්මාන උළෙලේදී නිර්මාණය වෙයි. ප‍්‍රවීණයන්ගේ අතීත අත්දැකීම් සිහිපත් කරන අවස්ථාවලටත්, නවීනයන් තමන් ලැබූ ජයග‍්‍රහණ ගැන කතාකරන අවස්ථාවලටත් වැඩි කාලයක් වෙන්වෙයි. සම්මානය ලබා කෙටි කතාවක් පැවැත්වීමෙන් එහාට, සම්මාන උළෙල මෙහෙයවන අය සම්මානලාභීන් සමඟ කතා කරමින් සුන්දර අවස්ථා නිර්මාණය කරනු ලබයි. එමෙන්ම සම්මානයක් නැතත්, ඇතැම්විට ප‍්‍රවීණයෙකුට වේදිකාවට ආරාධනය කොට ඔවුන්ගේ අත්දැකීම් ගැන කතාකරනු ලබයි. ආනන්ද විකටන් සම්මාන උළෙලේ සංවිධායකයන් සිය මූලිකම අවධානය යොමුකර ඇත්තේ එවැනි හෘදයංගම අවස්ථා නිර්මාණය කරමින් සිය සිනමාවේ සුන්දරත්වය සැමරීම වෙනුවෙනි. අදහස් දැක්වීම්, කතාබස්වලින් දෙමළ සිනමාවේ සුන්දරම සිනමා උළෙල ඔවුන් වාර්ෂිකව සංවිධානය කරයි.
මෙවැනි සිනමා උළෙලක් සංවිධානය කිරීමේදී හැකිතරම් පේ‍්‍රක්ෂකයන් පිරිසක් ඒ සම්මාන උළෙල නැරඹීම වැදගත්ම කාරණයකි. ශ‍්‍රී ලංකාවේ සුපිරි තරු ගැන පේ‍්‍රක්ෂකයන්ගේ වැඩි අවධානයක් නැත. ඒ නළුනිළියන්ගේ නැටුම් ගැයුම් ගැනත් අපේ පේ‍්‍රක්ෂකයන්ගේ අවධානයක් නැත. නැටුම් ගැයුම් අත්‍යවශ්‍ය නිසා ලංකාවේ වෘත්තීයමය ගායකයන් හා නර්තන ශිල්පීන්ගෙන් එවනි ප‍්‍රාසංගික අංගෝපාංගයක් දෙකක් සිනමා උළෙලට එකතු කළ හැකිය. එහෙත් හෘදයංගම අවස්ථා නිර්මාණය කිරීම කෙරෙහි වැඩි අවධානය යොමු කළ යුතුය. නැටුම්, රතුපළස් හා විහිළු තහළුවලට අඩු අවධානයක් යොමු කළ යුතුය. ඒ දෙරණට අප කරන යෝජනාවයි.
නිවේදකයන්ට සම්මානලාභීන් විනාඩි කිහිපයක් සම්මුඛ සාකච්ඡුාවට ලක්කිරීමට ඉඩ දිය හැකිය. සිනමා ඉතිහාසයේ විශිෂ්ටතම ප‍්‍රවීණයන් වේදිකාවට ගෙන්වා ඔවුන් සමඟ කෙටි අදහස් හුවමාරුවකින් අතීතානුස්මරණයකට යෑම වටී. ලංකාවේ සිනමාවේ ඇති අර්බුද ගැනත් ඒ අදහස් හුවමාරු කිරීම්වලදී අවධානය යොමුකිරීම වටී. දෙරණ සිනමා සම්මාන උළෙල තව තවත් තියුණු, සුන්දර හා පේ‍්‍රක්ෂක අවධානය ලද සම්මාන උළෙලක් කිරීමට එමගින් අවස්ථාව ලැබෙනු ඇත.
