ශක්තික සත්කුමාර, සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පනත හෙවත් අයිසීසීපීආර් පනත යටතේ අත්අඩංගුවට ගෙන රිමාන්ඞ් බන්ධනාගාරගත කොට මේ වන විට දින සීයක්ද ඉක්ම ගොස්ය. ඒ කියන්නේ මාස තුනකටත් වැඩිය. ලංකාවේදී මිනීමැරුම් චෝදනා ලබන සැකකරුවන්ටද මාස තුනකින් පසු ඇප ලැබෙන තත්ත්වයක් පවතියි. පසුගිය කාලයේ මුස්ලිම් මිනිසුන්ගේ ගෙවල්වලට, කඩවලට කඩා පැන ඒවා ගිනි තැබූ පුද්ගලයන්ටද අධිකරණවලින් වහා ඇප ලැබුණි. එහෙත් ශක්තික තවමත් රිමාන්ඞ් භාරයේය. ඔහු කළ වරද නම් ‘අර්ධ’ නමින් ෆේස්බුක්හි ඉතාමත් කෙටි, පිටුවලින් නම් තුනක් පමණ වන, කෙටිකතාවක් ලිවීමය.
නීතිපතිගේ අකාර්යක්‍ෂමතාව
මේ තරම් කාලයක් ශක්තික රිමාන්ඞ් බන්ධනාගාරගතව සිටින්නේ නීතිපති දෙපාර්තමේන්තුවේ අවලස්සන අකාර්යක්‍ෂමතාවත්, අගතිගාමී ක‍්‍රියා පිළිවෙතත් නිසාය. ඊට අමතරව පොලිසියේ අන්තවාදී හැසිරීම නිසාය.
ශක්තිකගේ කෙටිකතාව ගැන පොල්ගහවෙල ප‍්‍රදේශයේ භික්‍ෂූන් පිරිසක් කළ පැමිණිල්ල අනුව, මාර්තු 6 වැනිදා පොල්ගහවෙල පොලිසියට පැමිණෙන ලෙස ඔහුට කැඳවීමක් ලැබේ. පොලිසියට යන ඔහු වටකරගන්නේ වෛරයෙන් හා ද්වේෂයෙන් ප‍්‍රලය වී සිටි භික්‍ෂූන් පිරිසකි. ‘තොගේ ආගම මොකක්ද? තොපි බෞද්ධාගම්කාරයෝද? තොපි එන්ජීඒකාරයෝද? මිථ්‍යා දෘෂ්ටිකයෝද? මේකා කුණුගොඩක්. මේ වගේ ඔවුන් පොල්ගහවෙලින් පන්නලා කෙළවලා දාන්න ඕනෑ.’ පොලිසිය ඇතුළේදීම මේ හඬ නික්මෙන්නේ ඒ භික්‍ෂූන්ගේ ශ‍්‍රී මුඛවලිනි. පොලිස් ස්ථානාධිපතිවරයාද මේ වෛරී දේශනා වළක්වන්නේ නැත්තේ, ඔහුද ඉන්නේ ඒ පැත්තේ නිසාය. ‘තවත් මේ වගේ වැඩ කරන්න ඉඩ තියන්නේ නෑ. අපිට ඉහළින් උපදෙස් ලැබී තියෙන්නේ මොකක්ද කළ යුත්තේ කියලා.’ යනාදි වශයෙන් ශක්තිකගේ නීතිඥයන්ටත්, පවුලේ උදවියටත් කී පොල්ගහවෙල පොලිස් ස්ථානාධිපතිවරයා, අවසානයේ අයිසීසීපීආර් පනත යටතේ ශක්තික උසාවියට ඉදිරිපත් කරන්නේය.
ඊට පෙර ඔහු ශක්තිකගේ නීතිඥයන්ට කීවේ, දණ්ඩ නීති සංග‍්‍රහය යටතේ චෝදනා ගොනුකරන බවයි. ඒ අදහස වෙනස්වී අයිසීසීපීආර් පනතට ගියේ, එක පැත්තකින් අන්තවාදී භික්‍ෂූන් ඇතුළු ඉහළින් එන නියෝගවලට යටත්වුණු නිසාය. අනෙක් අතට ශක්තික බියපත් කරන්නට වුවමනා වුණු නිසාය. සාමාන්‍ය නීතිය යටතේ උසාවියට දැමී නම්, ශක්තික අද ඉන්නේ ඇප පිටය.
පොල්ගහවෙල මහේස්ත‍්‍රාත්වරිය, පොලිසිය ඉල්ලූ දේට එකහෙළාම අනුගත වෙමින් ශක්තික රිමාන්ඞ් කෙළේ, අයිසීසීපීආර් යටතේ ඇප දෙන්නට මහේස්ත‍්‍රාත්ට බැරි බවත්, මහාධිකරණයට ගොස් ඇප ලබාගන්නා ලෙසත් දැනුම් දෙමිනි. එහෙත් පොලිසියේ ක‍්‍රියාකලාපය ප‍්‍රශ්න කරන පිළිවෙතක් ඇය අනුගමනය කළා නම් ශක්තික අද ඉන්නේ ඇප පිටය.
ඇප අයැදුම්පත
මහේස්ත‍්‍රාත් උසාවියෙන් ඇප ලබාගත නොහැකි තැන ශක්තික වෙනුවෙන් කුරුණෑගල මහාධිකරණය ඉදිරියේ ඇප අයැදුම්පතක් ගොනුකරන ලදි. මුලික දැනුම්දීම්වලින් පසුව ජුනි 26වැනිදා එම ඇප අයැදුම්පත මහාධිකරණ විනිසුරුවරිය ඉදිරියේ කැඳවූ විට, නීතිපති දෙපාර්තමේන්තුව වෙනුවෙන් පෙනී සිටි රජයේ නීතිඥවරිය කීවේ, ශක්තික මේ කතාව ඇතුළත් කර පොතක් පළකර ඇති බවත්, ඒ පොතද තවදුරටත් විමර්ශනය කිරීමට කාලය අවශ්‍ය බවයි. මීට පෙර නීතිපති දෙපාර්තමේන්තුව සිටි ස්ථාවරයට වෙනස් තත්ත්වයකි ඒ. ඒ අනුව, අගෝස්තු මුල් සතියට නැවත කැඳවීම නියම විය. ශක්තිකගේ නීතිඥ චමින්ද අතුකෝරළ, එවැනි පොතක් නැති බවත්, ඇත්තේ ෆේස්බුක් කෙටිකතාවක් පමණක් බවත් කීවද එය නොසලකා හැරිණි. පොත ‘කියවන්නට’ මාසයකට අධික කාලයක් ලැබිණි.
ඒ අතර ශක්තික ගොනුකළ මූලික අයිතිවාසිකම් පෙත්සම මැයි 21 වැනිදා ශ්‍රේෂ්ඨාධිකරණය ඉදිරියේ කැඳවිණ. ඒ වන විටත් ශක්තික මාස 1ක් දවස් 21ක් රිමාන්ඞ් ගතවී හිඳ තිබිණ. රටේ ප‍්‍රමුඛ පෙළේ නීතිඥවරුන් ශක්තික වෙනුවෙන් පෙනීසිටි මූලික අයිතිවාසිකම් පෙත්සම සලකා බැලූ ශ්‍රේෂ්ඨාධිකරණය, එය විභාගයට ගැනීමට නියම කෙළේය. පුද්ගලයකු අත්අඩංගුවේ දිගින් දිගටම තබාගැනීම සරල කාරණයක් නොවන බව අවධාරණය කළ ශ්‍රේෂ්ඨාධිකරණ විනිසුරුතුමන්ලා, රාජ්‍යය මීට වඩා මිනිසුන් කෙරෙහි සැලකිලිමත් විය යුතු බවද අවධාරණය කෙළේය.
ඒ අතර ශක්තිකගේ නීතිඥවරුන්, නීතිපති හමුවී ඔහුට මේ චෝදනා අදාළ නොවන බව පැහැදිලි කර දෙන ලදි. ඒ අවස්ථාවලදි නීතිපතිගෙන් ලද ප‍්‍රතිචාර යහපත් බවද කිව යුතුය. ඒ අනුව, ශක්තිකගේ ඉරණම දැන් තිබෙන්නේ නීතිපතිවරයා අතේය. ඔහුට ඇප දීමට කැමැත්ත පළකිරීමට හෝ සම්පූර්ණයෙන්ම අයිසීසීපීආර් යටතේ එන චෝදනාවලින් නිදහස් කිරීමට හෝ බලය ඇත්තේද නීතිපතිවරයාටය.
මහේස්ත‍්‍රාත් උසාවියේ නඩුගොනුව මේ වන විට නීතිපතිට එවා ඇති අතර, එය කියවා, අයිසීසීපීආර් යටතේ ශක්තිකට එරෙහිව ඉදිරි පියවර ගන්නවාද නැද්ද යන්න තීරණය කළ යුත්තේ නීතිපතිය. නීතිපති දෙපාර්තමේන්තුව තුළ එම නඩුගොනුව පිළිබඳ කටයුතු කරන්නේ රජයේ නීතිඥ ගංගා වාකිෂ්ටආරච්චි නමැති නිලධාරිනියකි. කවර වූ හෝ හේතුවකින් මේ නඩුවට අදාළ නීතිපතිගේ කාර්යය නිසි වේගයෙන් නොකෙරේ. ඒ අතර තරුණයෙක් දිගින් දිගටම රිමාන්ඞ් බන්ධනාගාරගතව දුක සේ ජීවත්වෙයි. ඔහු හොරෙක් මිනීමරුවෙක් නොවේ. ඔහු නැති ශෝකයෙන් කුඩා දරුවන් දෙදෙනා ඉන්නේ මානසික අවපීඩනතාවට ඔන්න මෙන්න තත්ත්වයකය. බිරිඳ හැඬූ කඳුළෙනි. ඒවා සාමාන්‍ය තත්ත්වයන් බව හැබෑ නමුත්, ශක්තික රිමාන්ඞ් බන්ධනාගාරගතව සිටින්නේ අසාධාරණවය යන්න පැහැදිලිය.
මිනිසකු බන්ධනාගාරගතව සිටියදී, ඔහු ගැන තීරණයක් ගැනීමට තමන් ඉදිරියට නඩුගොනුව පැමිණි විට ඒ ගැන ඉහළ කාර්යක්‍ෂමතාවකින් කටයුතු කිරීම නීතිපති දෙපාර්තමේන්තුවේ වගකීමක් නොවේද? ඒ ඒ රජයේ නීීතිඥවරයාගේ අකාර්යක්‍ෂමතාව හෝ නඩුගොනුව බැ?රුම් ලෙස ගණන් නොගැනීම නිසා හෝ වෙනත් අගතියක් නිසා වුවමනාවෙන්ම ප‍්‍රමාද කිරීම නිසා හෝ අවසානයේ සිදුවන්නේ පුද්ගලයන් අනිවාරතේ රිමාන්ඞ් බන්ධනාගාරගතව සිටීමය. එවිට, නීතිපති දෙපාර්තමේන්තුවත් කටයුතු කරන්නේ ශක්තිකට එරෙහිව පැමිණිලි කළ අන්තවාදී භික්‍ෂූන්ගේ මානසික තත්ත්වයෙන්මද යන සාධාරණ ප‍්‍රශ්නය නැගේ. දෙපාර්තමේන්තුවේ කටයුතු සිදුවන්නේද සිංහල බෞද්ධ අගතිගාමිත්වයක් ඇතිව මිස, සාධාරණව හා යුක්තිය ඉටුකිරීමේ අධ්‍යාශයෙන් නොවේද? අලූත් නීතිපති දප්පුල ද ලිවේරාගේ ප‍්‍රතිපත්තිය, එසේ මිනිසුන් අපහසුවට, වධයට ලක්කිරීමද?x
x අරුණ ජයවර්ධන
