අපේ‍්‍රල් 21 පාස්කු ඉරුදින ප‍්‍රහාරය සම්බන්ධයෙන් පුද්ගලයන් අත්අඩංගුවට ගැනීමේදී පිළිගත හැකි හේතු මත සැකකරුවන් අත්අඩංගුවට ගන්නා ලෙස ශ‍්‍රී ලංකා මානව හිමිකම් කොමිෂන් සභාව වැඩබලන පොලිස්පති චන්දන වික‍්‍රමරත්නට ලිඛිතව දන්වා ඇත.
ජුලි 2 දිනැතිව මානව හිමිකම් කොමිෂන් සභාවේ සභාපතිනි දීපිකා උඩගමගේ අත්සනින් එම ලිපිය නිකුත් කර ඇත.
මානව හිමිකම් කොමිසමට නීති විරෝධී අත්අඩංගුවට ගැනීම් ගැන පැමිණිලි රාශියක් ලැබී ඇති බවත්, සංස්කෘතික කාරණා වරදවා වටහාගැනීම නිසා හා මහජනතාව කරන බලපෑම් නිසා මෙම අත්අඩංගුවට ගැනීම් සිදුවී ඇති බවත් එහි දැක්වේ. එලෙස අත්අඩංගුවට ගැනීමෙන් පසුව පොලීසිය පරීක්ෂණ ආරම්භ කළ අවස්ථා ගැනද පැමිණිලි ලැබී ඇති බව එහි සඳහන්ය.
පවතින තත්වය යටතේ පොලීසිය ආරක්ෂක වැඩපිළිවෙල් ක‍්‍රියාත්මක කිරීම සම්පූර්ණයෙන්ම සාධාරණ බව එහි දක්වා ඇති අතර එසේ අත්අඩංගුවට ගැනීම් සාධාරණ සැකයන් මත විය යුතු බවද සඳහන් කර ඇත.
ඒ අනුව අත්අඩංගුවට ගැනීමක් කරද්දී විධිමත් පරීක්ෂණයකින් පසු පිළිගත හැකි සාක්ෂි හා සාධාරණ සැකයක් මත සිදුකළ යුතු බව කොමිසම සඳහන් කරයි. ආගමික සංකේත, ආගමික ලියකියවිලි වැනි සංස්කෘතික කාරණාවලට අදාළව කටයුතු කිරීමේදී ඒවා හඳුනාගැනීම සඳහා විද්වත් සහාය ලබාගත යුතු බවද පෙන්වාදෙයි. රසායනික ද්‍රව්‍යයක්, පරිගණක දත්ත, වීඩියෝ දත්ත ආදියට අදාළ පරීක්ෂණවලදී එයට විද්වත් සහාය ලබාගත යුතු බව පෙන්වාදෙයි. පිළිගත හැකි සාක්ෂි විද්වත් විශ්ලේෂකයන්ගේ විශ්ලේෂණයට ලක්කිරීමට පෙර නොව, එයින් පසුව අත්අඩංගුවට ගැනීම් කිරීම ඉතා වැදගත් බවද පෙන්වාදෙයි.
අනුරංග ජයසිංහ
