ජනාධිපතිවරයා යටතේ පවතින ශ‍්‍රී ලංකා පදනම් ආයතනය පවත්වාගෙන යන පියෝ ටීවී රූපවාහිනී චැනලයේ සේවකයන්ට නිසියාකාරව වැටුප් ගෙවා නැතැයි වාර්තා වේ.
වැටුප් නොගෙවීම හේතුවෙන් එහි සේවයට බඳවාගත් බොහෝ දෙනෙකු එය අතහැර ගොස් ඇති අතර මේ වනවිට සේවකයන් කිහිපදෙනෙකු පමණක් එහි කටයුතුවලට සහභාගි වන බව වාර්තාවේ.
අපේ‍්‍රල් මාසයේදී මාර්තු වැටුපෙන් භාගයක කොටසක් ලබාදී ඇති අතර මැයි මාසයේදී ලබාදී ඇත්තේ වැටුපෙන් භාගයකටත් අඩු කොටසකි. මාස තුනක කොන්ත‍්‍රාත්තුවක් මත සේවකයන් බඳවාගෙන ඇති අතර එය අවසන් වීමට නියමිතය.
මේ නිසාම පියෝටීවී සීටීවී 128 යටතේ විකාශය වන එම රූපවාහිනී චැනලයේ අලූත් වැඩසටහන් කිසිවක් විකාශය නොවන අතර පැරණි වැඩසටහන් නැවත විකාශය කරමින් පවතී.
ජනාධිපතිවරයා මාර්තු 28 වැනිදා එම රූපවාහිනී චැනලය විවෘත කර ඇති අතර ශ‍්‍රී ලංකා රූපවාහිනී අභ්‍යාස විද්‍යාලය වසා දැමීමෙන් පසු එහි තිබූ උපකරණ යොදාගැනීමෙන් මෙය ආරම්භ කර ඇත.
මෙම වැටුප් අර්බුදය සමයේ සිදුවී ඇති විශේෂම සිදුවීම වී ඇත්තේ රාජපක්ෂවරුන්ගේ සීඑස්එන් නාලිකාවේ භාරකරු වශයෙන් කටයුතු කළ රොහාන් වැලිවිට හා එහි සිටි තවත් පුද්ගලයෙකු මෙම නාලිකාව පවත්වාගෙන යෑම සඳහා බඳවා ගැනීමය.
ඉඳුවර බණ්ඩාර
