ඇසෝසියේටඞ් නිව්ස්පේපර්ස් ඔෆ් සිලෝන් ලිමිටඞ් සමාගම අප එදිනෙදා භාෂාවෙන් හඳුන්වන්නේ ලේක්හවුස් යන නමින්ය. දිනමිණ, සිළුමිණ, ඬේලි නිව්ස්, ඔබ්සර්වර්, රැුස ඇතුලූ පුවත්පත් ගණනාවක් මේ සමාගමෙන් මුද්රණය කරයි. ආණ්ඩුවේ පත්තර කන්තෝරුව ලෙසද හැඳින්විය හැකි මෙම පුවත්පත් ආයතනය ගැන තව තවත් අටුවා ටීකා ඉදිරිපත් කළ යුතු නැත.
ආණ්ඩුවේ මාධ්ය ආයතන සම්බන්ධ අවනඩුව ගැනත් අලූතෙන් ලියන්නට ඕනෑ නැත. මහජනතාවට අයත් දේපළ වන මේ ආයතන තම තමන්ගේ පෞද්ගලික දේපළ ලෙස සලකමින්, ඒ ඒ ආණ්ඩුවල දේශපාලන න්යායපත්රවලට වුවමනා ලෙස මේ ආයතන හසුරවමින් සිටියි. ඒ තත්වය වෙනස් කළ යුතු නමුත්, කිසිවෙක් ඒ ගැන උනන්දුවක් දක්වන්නේ නැත. විගණකාධිපති දෙපාර්තමේන්තුව රාජ්ය ආයතවලට අදාලව වාර්ෂිකව කරන විගණන වාර්තාවල දිගුවක් ලෙස 2017 වර්ෂයට අදාල විගණන වාර්තා පසුගිය සමයේදී නිකුක් කර තිබුණු අතර මේ සමාගම පිළිබඳවද විගණන වාර්තාවක් නිකුත් කර තිබේ. ඒ විගණන වාර්තාවලදී හෙළිවී තිබුණු කරුණු කිහිපයක් ගැන අපි අවධානය යොමු කළෙමු.
ලේක්හවුස් පුවත්පත් සමාගමේ අරමුණ පුවත්පත් අලෙවි කර ආදායමක් ඉපැයීමය. සාමාන්ය ජනතාවගේ අයිතියක් වන නිවැරදි තොරතුරු දැනගැනීමේ අයිතිය සම්පූර්ණ කිරීම ගැන මේ පුවත්පත් ආයතනය සතපහක තැකීමක් නොකර ආණ්ඩුවේ වුවමනාවට ලියන බව ඇත්තය. මිත්යාව, අවිද්යාව, අසත්යය, ජාතිවාදය, ප්රජාතන්ත්ර විරෝධී ආකල්ප පරාජය කිරීමට මේ ආයතනයට නිර්මාණශීලී සැලසුම් නැති බවත් ඇත්තය. අඩු තරමේ ඒ ලියන දේවල් අලෙවි කොට වාර්ෂිකව මහජනතාවට සතුටු විය හැකි අන්දමේ ලාභයක් උපයාදෙන්නටවත් මේ ආයතනවලින් උනන්දුවක් නැත.
2015 ට සාපේක්ෂව මේ සමාගම මුද්රණය කළ පුවත්පත් අලෙවි කිරීමෙන් ලැබූ සමස්ථ විකුණුම් ආදායම 2016 වෙද්දී 47,582,000කින් අඩුවී තිබුණි. ඒ අඩුවීම එතැනින් නැවතී තිබුණේ නැත. 2016ට සාපේක්ෂව 2017 දී ලද ආදායම විකුණුම් ආදායම රුපියල් 22,596,000කින් අඩුවී තිබේ. ඒ පුවත්පත්වලින් අඩුවී ඇති ආදායමයි. සඟරාවලින්ද සැලකිය යුතු තරම් ආදායම් අඩුවී තිබේ. තරුණි සඟරාවෙන් 7,489,000 ක ආදායමක් අඩුවී තිබුණි. සරසවිය සඟරාවෙන් රුපියල් 276,000 ක ආදායමක් අඩුවී තිබේ. බුදුසරණ සඟරාවෙන් රුපියල් 309,000ක ආදායමක් අඩුවී තිබේ. මේ සඟරා හා පුවත්පත්වල වාර්ෂිකව මුද්රණය කරන පිටපත් සංඛ්යාවද 2017 දී විශාල වශයෙන් අඩුවී ඇත.
ඊට අමතරව වාණිජ මුද්රණ අංශයේ ආදායම රුපියල් 6,454,000කින් අඩුවී තිබේ. විශේෂ ප්රකාශනවල ආදායම රුපියල් 1,354,000කින් අඩුවී තිබේ. ඩිජිටල් මුද්රණයන්ගේ ආදායම රුපියල් 1,583,000කින් අඩුවී තිබේ.ෙ ඊට අමතරව සමස්ථ දැන්වීම් ආදායම රුපියල් මිලියන 45.56කින් අඩුවී තිබේ. ඉහතින් සඳහන් කළ ගණන් හිලව් එකතු කළ විට 2017 වර්ෂයේදී මිලියන 85කින් ක්ෂේත්ර කිහිපයක ආදායම පහත වැටී ඇතැයි පෙනෙන්නට ඇත. මේ කලින් වසරේදී ලද ආදායම්වල අඩුවීම පමණි. ඇත්තෙන්ම හරියාකාරව පවත්වාගෙන යන පුවත්පත් ආයතනයකින් ලැබිය හැකි ආදායම මීට වඩා බොහෝ වැඩි බව අමුතුවෙන් කිව යුතු නැත.
මේ පුවත්පත්වලින් බොහෝ ඒවාට සාමාන්ය ජනතාවගේ තොරතුරු දැනගැනීමේ අයිතිය සම්පූර්ණ කිරීමේ වුවමනාවක් නැති බව අපි කීවෙමු. බාහිර පාර්ශ්වයන් මෙම සමාගමට අයත් පුවත්පත් වෙද අපහාස නඩු 05ක් විභාගයට ගෙන ඇත. උසාවි වලින් පැමිණිලිකරුවන්ට ගෙවන ලෙස නියම කළ වන්දි වල එකතුව රුපියල් මිලියන 519කි. සත්ය තොරතුරු ප්රචාරය කිරීමට ඇති වුවමනාව ඒ අපහාස නඩු ප්රමාණයෙන් පැහැදිළි වනු ඇත.
මේ ආයතනයේ සිටින අතිරික්ත සේවකයන් සංඛ්යාව මොහොතකට අනුමාන කරන ලෙස අපි ඉල්ලා සිටිමු. අතිරික්ත සේවකයන් දහයක් විස්සක් නොව, සීයක් දෙසීයක් නොව, 522ක් මේ ආයතනයේ සිටියි. මාධ්යවේදීන් අතර ප්රකටව ඇත්තේ රාජකාරියක් නොකර ප්ලේන්ටි බොමින් කාලය කා දැමිය හැකි තැනක් ලෙසය.
2017 වර්ෂයේදී මාධ්යවේදීන් 4 දෙනෙකු, සහකාර කර්තෘවරයෙකු, කළමණාකරණ කර්තෘවරයෙකු, සහකාර සාමාන්යාධිකාරී – කාර්මික, ඡුායාරූප ශිල්පියෙකු, සෝදුපත් කියවන්නෙකු, සහකාර කළමණාකාරවයෙකු හා සාමාන්ය සහකාරවරයෙකු ඇතුලූ නිලධාරීන් 11 දෙනෙකු වෙනත් රජයේ ආයතනවල සේවය සඳහා මුදාහැර තිබී ඇත. මෙය සම්පූර්ණයෙන්ම නීතිවිරෝධී ක්රියාවකි. ඔවුන් වෙනුවෙන් වැටුප්, වේතන හා දීමනා ලෙස රුපියල් 9,751,458ක මුදලක් 2017 වර්ෂයේදී පමණක් වියදම් කර තිබුණි. එසේ මාධ්යවේදීන් වැඩි බව කියමින් මුදාහැර ඇති මේ ආයතනය මාධ්යවේදීන් 13 දෙනෙකු ඒ වර්ෂයේදී කොන්ත්රාත් පදනම මත බඳවාගෙන තිබේ.
මේ වාර්ෂික විගණකාධිපති වාර්තාවෙන් කියැවුණු ඉහත කී තොරතුරු ස්වල්පය දෙස බලද්දීත් පෙනෙන්නේ රටේ මහජනතාවට අයත් මාධ්ය ආයතනයෙහි කෙරුවාවයි. ආණ්ඩු මාරුවෙද්දී කණ්ඩායම් පිටින් මේ මාධ්ය ආයතන වටලා, චණ්ඩි බලයෙන් පත්තර මුල්පිටු වෙනස් කරන අන්දමත් අපි දනිමු. ඒ ඒ ආණ්ඩුවලින් මාධ්යවේදීන්ව බඳවාගෙන ගොටගසන අන්දමත් දනිමු. මේ ආයතන කවදා වෙනස්වේදැයි නොදනිමු.
අනුරංග ජයසිංහ
