ඉල්ලා අස්වූ මුස්ලිම් අමාත්‍යවරුන්ගෙන් පුරප්පාඩු වූ කැබිනට් අමාත්‍යධුර තුනට වැඩබලන අමාත්‍යවරුන් පත්කිරීම ව්‍යවස්ථා විරෝධී බව අගමැති රනිල් වික‍්‍රමසිංහ ජුනි 12 වැනිදා ජනාධිපති මෛත‍්‍රීපාල සිරිසේන වෙත දැනුම් දී ඇති ලිපියට ජනාධිපතිවරයා ප‍්‍රතිචාර නොදැක්වුවහොත් ඉදිරියේදී දැඩි පියවර ගැනීමට ඉඩකඩ ඇතැයි වාර්තා වෙයි.
ජනාධිපතිවරයා එම වැඩබලන අමාත්‍යවරුන් පත්කර තිබුණේ තමාගේ උපදෙස් නොවිමසා බවත්, නිත්‍ය අමාත්‍යවරුන් නැතිව වැඩබලන අමාත්‍යවරුන් පත්කිරීම ව්‍යවස්ථා විරෝධී බවත් එහිදී අගමැතිවරයා ජනාධිපතිවරයාට දන්වා යවා ඇත. මෙම ව්‍යවස්ථා උල්ලංඝනය නිවැරදි කිරීමට ජනාධිපතිවරයා කටයුතු නොකළහොත් ශ්‍රේෂ්ඨාධිකරණය ඉදිරියට යෑම ගැනද එජාප මන්ත්රීවරුන් සාකච්ඡුා කර ඇත.
රිෂාඞ් බදියුදීන්, කබීර් හෂීම් හා රවුෆ් හකීම් යන කැබිනට් අමාත්‍යවරුන් ඉල්ලා අස්වූ පසුව එම අමාත්‍යධුර පුරප්පාඩු වී තිබුණු අතර ආණ්ඩුව වෙනුවෙන් අගමැති රනිල් වික‍්‍රමසිංහ පුරප්පාඩු වූ අමාත්‍යධුර තුනට පත්කිරීම සඳහා නම් තුනක් යවා තිබුණි. ජනාධිපතිවරයා එම නම් තුන සලකා බලා නොතිබුණු අතර වෙනත් පුද්ගලයන් පත්කොට පුරප්පාඩුු වූ අමාත්‍යධුර සම්පූර්ණ කර තිබුණේද නැත. ඒ වෙනුවට ජනාධිපතිවරයා ජුනි 10 වැනිදා ඒ ඒ අමාත්‍යාංශවල කටයුතු කළ රාජ්‍ය හා නියෝජ්‍ය අමාත්‍යවරුන් තිදෙනෙකු අමාත්‍යධුරවල වැඩ බැලීම සඳහා පත්කර තිබුණි. නගර සැලසුම් හා ජලසම්පාදන රාජ්‍ය අමාත්‍ය ලකී ජයවර්ධන එම අමාත්‍යාංශයේ වැඩබලන අමාත්‍යවරයා ලෙසත්, කර්මාන්ත හා වාණිජ කටයුතු නියෝජ්‍ය අමාත්‍ය බුද්ධික පතිරණ එම අමාත්‍යාංශයේ වැඩබලන අමාත්‍යවරයා ලෙසත්, ඛණිජ තෙල් සම්පත් සංවර්ධන නියෝජ්‍ය අමාත්‍ය අනෝමා ගමගේ එම අමාත්‍යාංශයේ වැඩබලන අමාත්‍යවරිය ලෙසත් පත්කර තිබේ.
කෙසේ වෙතත් එම පත්කිරීම් ව්‍යවස්ථා විරෝධී බව ආණ්ඩුක‍්‍රම ව්‍යවස්ථා විශේෂඥයෝ පෙන්වාදෙති. අනිද්දා සමඟ අදහස් දැක්වූ පාර්ලිමේන්තු මන්ත්රී ආචාර්ය ජයම්පති වික‍්‍රමරත්න ප‍්‍රකාශ කළේ, වැඩබලන අමාත්‍යවරුන් පත් කළ හැකි ආකාරය ආණ්ඩුක‍්‍රම ව්‍යවස්ථාවේ 49 වැනි ව්‍යවස්ථාවෙන් පැහැදිලිව දක්වා තිබෙන බවය.
ආණ්ඩුක‍්‍රම ව්‍යවස්ථාවේ 49 වැනි ව්‍යවස්ථාව මෙසේය. ‘අමාත්‍ය මණ්ඩලයේ යම් අමාත්‍යවරයෙකුට හෝ යම් නියෝජ්‍ය අමාත්‍යවරයෙකුට හෝ ඔහුගේ ධුරයේ කාර්ය ඉටුකිරීමට නොහැකි වුවහොත් එවිට එකී අමාත්‍ය මණ්ඩලයේ අමාත්‍යවරයාගේ හෝ අමාත්‍ය මණ්ඩලයේ සාමාජිකයෙකු නොවන අමාත්‍යවරයාගේ හෝ නියෝජ්‍ය අමාත්‍යවරයාගේ ධුරයේ වැඩබැලීම සඳහා ජනාධිපතිවරයා විසින් අග‍්‍රාමාත්‍යවරයාගේ උපදෙස් මත පාර්ලිමේන්තුවේ කවර වූ හෝ මන්ත‍්‍රීවරයෙකු පත් කිරීම කළ හැකි වන්නේය.’
ආචාර්ය වික‍්‍රමරත්න පෙන්වාදෙන්නේ මෙම ව්‍යවස්ථාවෙහි පැහැදිලිවම දැක්වෙන පරිදි නිත්‍ය අමාත්‍යවරයෙකු සිටියදී, ඔහුට තනතුරේ කටයුතු ආවරණය කළ නොහැකි නම් පමණක් වැඩබලන ඇමතිවරයෙකු පත් කළ හැකි බවය. එනම් නිත්‍ය අමාත්‍යවරයා විදෙස්ගත වීමක්, රෝගාතුර වීමක් හෝ වෙනත් පෞද්ගලික හේතුවකට රාජකාරී කටයුතු කළ නොහැකි අවස්ථාවක වැඩබලන අමාත්‍යවරයෙකු පත්කළ හැකි බවය. එසේ නොමැතිව යම් අමාත්‍යවරයෙකු ඉල්ලා අස්වීමෙන් පසුව පුරප්පාඩු වූ අමාත්‍යධුරයක් වැඩබලන අමාත්‍යධුරයකින් පුරවන්නට ව්‍යවස්ථාවේ ප‍්‍රතිපාදන නොමැති බව ආචාර්ය වික‍්‍රමරත්න පෙන්වාදෙයි. යම් නිත්‍ය අමාත්‍යවරයෙකු සිටියදී වැඩබලන අමාත්‍යවරයෙකු පත් කළත් එම පත් කිරීමේදී අග‍්‍රාමාත්‍යවරයාගේ උපදෙස් ලබානොගෙන පත් කළ නොහැකි බවද ඔහු පෙන්වාදුන්නේය. x
