පිස්සෙක් ඉන්නවා. ඊලෝන් මස්ක්. ‘ටෙස්ලා මෝටර්ස්’ ආයතනයේ හා ‘ස්පේස් එක්ස්’ නම් අභ්‍යවකාශ ආයතනයේ ප‍්‍රධාන විධායක නිලධාරියා. අපේ මිනිසුන් ලංකාව එක් ජනවර්ගයකට අයිති කරගෙන වෙනත් ජනවර්ග එළවා දමන්නට උත්සාහ කරද්දී, තවත් මිනිසුන් අනෙක් ආගම් අදහන අය ඝාතනය කරන්නට උත්සාහ කරද්දී එවැනි වැදගත් ප‍්‍රශ්න අමතක කොට අඟහරු ලෝකයට යන හැටි ගැන ඊලෝන් මස්ක් අවුරුදු ගාණක් තිස්සේ කියෙව්වා.
කාලයක් යනතුරුම ඔහුගේ අඟහරු පිස්සුව ප‍්‍රකෝටිපති ව්‍යාපාරිකයෙකුගේ තවත් කයිවාරු ගැසීමක් ලෙස සැලකූ පිරිසක් සිටියා. ඒත් 2018 වෙද්දී ඊලෝන් මස්ක් වත්මන් ලෝකයේ පවතින බලවත්ම රොකට්ටුව වන ‘ෆැල්කන් හෙවි’ රොකට්ටුව සාර්ථකව අත්හදා බැලූවා. අඟහරු දක්වා යන ගමනෙහි වැදගත්ම පිම්මක්. ෆැල්කන් හෙවි ව්‍යාපෘතිය සාර්ථක වීමෙන් සංඥා කෙරුණේ මනුෂ්‍ය වර්ගයා අඟහරු දක්වා යන්නට ගමන සූදානම් බවයි.
ෆැල්කන් හෙවි වැදගත්ද?
හැත්තෑව දශකය වෙද්දී හඳට ගිය මනුෂ්‍ය වර්ගයා අඟහරුවලට තවම නොගියේ මන්දැයි කෙනෙකුට විමසිය හැකියි. එයට පැහැදිලි හේතුවක් තිබෙනවා. අඟහරු තිබෙන්නේ චන්ද්‍රයාට වඩා බොහොම ඈතින්. අඟහරු ලෝකයට දැනටමත් රෝවර් යානා යවා ඇති අපට අඟහරුවලට මිනිසුන් කණ්ඩායමක් යැවීම කජ්ජක් නොවෙයි. මනුෂ්‍ය වර්ගයාට ඒ තාක්ෂණය තිබෙනවා. එහෙත් අඟහරුවලින් පෘථිවියට නැවත එන්නට තරම් තාක්ෂණයක් නැහැ. ඒ නිසා අඟහරු යා යුත්තේ නැවත එන්නට බලාගෙන නොවෙයි. පදිංචි වෙන්නම බලාගෙනයි. ඒ නිසා රෝවර් යානා මිසක අඟහරු වෙත මිනිසුන් යැවීම මෙතෙක් කෙරුණේ නැහැ.
අනෙක් ප‍්‍රශ්නය වුණේ අඟහරුවලට යන්නට නම් එයට අවශ්‍ය ශක්තියෙන් යුතු රොකට්ටුවක් අවශ්‍ය වීමයි. ලෝකයේ තිබුණු බලවත්ම රොකට්ටුව වුණේ ‘සැටර්න් 5’. ඇපලෝ ව්‍යාපෘතියෙන් හඳට යන්නට පාවිච්චි කළේ එයයි. එහෙත් අභ්‍යවකාශ මධ්‍යස්ථානය කක්ෂගත කිරීමෙන් පසුව සැටර්න් 5 ව්‍යාපෘතිය නතර වුණා. රොකට්ටුව නිෂ්පාදනය කළේ නැහැ. ඉන්පසුව සාමාන්‍ය චන්ද්‍රිකා අභ්‍යවකාශගත කිරීම, අභ්‍යවකාශ මධ්‍යස්ථානයට පහසුකම් සැපයීම වගේ කටයුතු වෙනුවෙන් පාවිච්චි කළේ සාපේක්ෂව කුඩා රොකට්ටුයි. ඒ නිසා අඟහරු යන්නට තරම් ලොකු රොකට්ටුවක් මනුෂ්‍ය වර්ගයාට තිබුණේ නැහැ. ෆැල්කන් හෙවි රොකට්ටුව මනුෂ්‍ය වර්ගයාට නොතිබුණු ඒ අඩුව සම්පූර්ණ කිරීමක්. දැන් අපට බලවත් රොකට්ටුවක් තියෙනවා. ෆැල්කන් හෙවි රොකට්ටුව සැබෑම මෘගයෙක්. එයට එන්ජින් 27ක් තිබෙනවා. ජම්බෝ ජෙට් 747ක බලයක් තිබෙනවා.
රසවත් අතුරු කාරණයක් කීවොත්, ඊලෝන් මස්ක් රොකට්ටුව නිකන්ම අභ්‍යවකාශගත කළේ නැහැ. ඒ වෙනුවට ඔහු තමන්ගේ ටෙස්ලා සමාගමෙන් නිෂ්පාදනය කළ ‘ටෙස්ලා රෝඞ්ස්ටාර්’ මෝටර් රියක්ද ඒ රොකට්ටුවෙන් අභ්‍යවකාශගත කළා. ඒ තමන්ගේ පෞද්ගලික මෝටර් රථය. එසේ අභවකාශගත කළ රෝඞ්ස්ටාර් මෝටර් රිය මේ වෙද්දී වර්ෂයක් තිස්සේ සෞරග‍්‍රහ මණ්ඩලය වටා ගමන් කර තිබෙනවා. එය අඟහරු ලෝකය ආසන්නයට යනු ඇතැයි බලාපොරොත්තු වෙනවා.
අඟහරු මොන වගේද?
අඟහරු පෘථිවියේ ප‍්‍රමාණයෙන් අඩකටත් වඩා අඩු විශාලත්වයකින් යුතු ලෝකයක්. අඟහරු ලෝකයේ මනුෂ්‍යයන්ට පදිංචි විය හැකි භූමි ප‍්‍රමාණය පෘථිවියට යම් සමානකමක් දක්වන්නේ පෘථිවිය වැඩි වශයෙන් ජලයෙන් යටවී තිබෙන නිසායි. අඟහරුවල එවැනි ජල පෘෂ්ඨයක් නැහැ. සීයට අනූහයක් කාබන් ඩයොක්සයිඞ්වලින් පිරුණු අඟහරු ලෝකයේ වායුගෝලය පෘථිවියට වඩා සියගුණයක් ඝනත්වයෙන් වැඩියි.
අඟහරු වායුගෝලය දැවැන්ත සීතලකින් යුතුයි. මනුෂ්‍යයන්ට දරාගත නොහැකියි. එහි එක් දිනයක් පෘථිවියේ දිනයකට මඳක් සමානයි. එහෙත් එහි වර්ෂයක් පෘථිවිය වගේ දෙගුණයක් පමණ දීර්ඝයි. මේ සියලූ කාරණා නිසා අඟහරු ලෝකය පෘථිවියට සමාන නැහැ. එහෙත් අපගේ සෞරග‍්‍රහ මණ්ඩලයේ තිබෙන මිනිසුන්ට ජීවත්විය හැකි අනෙක් එකම ග‍්‍රහලෝකය අඟහරු ලෝකයයි. පෘථිවියේදී මෙන් වායුගෝලයට නිරාවරණය වී නිදහසේ අඟහරුවල ජීවත්වෙන්න බැහැ. එහෙත් අඟහරු ලෝකයේ පරිසරය ආවරණයක් යට ජීවිතයක් ගතකරන්නට තරම් පහසු ලෙස සකසාගත හැකියි.
යන්නේ කවදදාද?
ඔව්, මනුෂ්‍ය වර්ගයා අඟහරු බලා යනවා. එක්කෙනෙක් හෝ දෙදෙනෙක් නොවෙයි. දහස් ගණනක් මිනිසුන් අඟහරු බලා ගොස් අඟහරුවල ජනපදයක් නිර්මාණය කරන්නට සූදානම් වෙනවා. එයට අවශ්‍ය සියලූ තාක්ෂණය මේ වෙද්දී මනුෂ්‍ය වර්ගයා සතුව තිබෙනවා. අවශ්‍ය වී තිබුණු එකම දේ ඒ සඳහා ආයෝජනය කරන්නට කෙනෙක් නොමැති වීමයි. ඊලෝන් මස්ක් නමැති ප‍්‍රකෝටිපතියා වැදගත් වන්නේ එතැනදීයි. ඔහු දැනටමත් ඒ වෙනුවෙන් දැවැන්ත ආයෝජන සිදුකර තිබෙනවා.
නාසා ආයතනය කියා තිබුණේ ඔවුන් 2040 වෙද්දී අඟහරු ලෝකයේ මනුෂ්‍ය ජනාවාසයක් ආරම්භ කරන්නට බලාපොරොත්තු වන බවයි. විද්‍යාඥයන් කීවේ 2050 වෙද්දී ඒ ව්‍යාපෘතිය ආරම්භ කළහොත් එය දැවැන්ත ජයග‍්‍රහණයක් බවයි. එහෙත් අපට 2050 දී අඟහරුවලට මනුෂ්‍යයන් යැවීම ගැන හිතන්න බැරිවේවි. මොකද ඒ වෙද්දීත් අපි අඟහරුවල පදිංචි වී සිටීවි. ඒ ඊලෝන් මස්ක් නම් නුදුරු සිහින දකින්නා නිසායි. තවදුරටත් අභ්‍යවකාශ ව්‍යාපෘති රජයන්ගේ ඒකාධිකාරයට යටත් නැහැ. පෞද්ගලික සමාගම් රජයන්ට වඩා ඉක්මනින් මෙවැනි ව්‍යාපෘතිවලට ආයෝජනය කරනවා. ඒ වෙනුවෙන් පෞද්ගලික සමාගම් අතර තරගයක්ද තිබෙනවා.
2022දී ෆැල්කන් හෙවි රොකට්ටුවෙන් අඟහරු බලා දැවැන්ත භාණ්ඩ තොගයක් රැුගත් යානා දෙකක් අභ්‍යවකාශගත කරන බව මස්ක් කියනවා. එයට සැලසුම් සකස් කරමින් සිටිනවා. 2024 වෙද්දී මුලින්ම මිනිසුන් රැුගත් යානා දෙකක් හා භාණ්ඩ රැුගත් යානා දෙකක් අභ්‍යවකාශගත කරන බව කියනවා. ඉන්පසුව පළමු අඟහරු මිනිස් කොලනිය ආරම්භ කරන බව ඔහු කියනවා. ඇත්ත. ලංකාවට තවම ජාතිය ගොඩනඟාගන්න බැරිවුණත්, මනුෂ්‍ය වර්ගයා 2024දී අඟහරු යන්නට සැලසුම් කරනවා. ඔහුගේ මේ තරම් නුදුරු සිහිනය සැබෑවක් නොවනු ඇතැයි කෙනෙකු පුදුමයෙන් මෙන් කියනු ඇති. එහෙත් ඊලෝන් මස්ක්ගේ ඉතිහාසය නිසාම මේ ගැන බලාපොරොත්තු තැබීමේ ගැටලූවක් නෑ.
2005 පමණ කාලයේදී මෝටර් කර්මාන්ත ලෝකයේ ප‍්‍රවීණයන් කීවේ අපට හොඳ ඉලෙක්ටි‍්‍රක් මෝටර් රියක් නිර්මාණය කරන්නට අවුරුදු 50ක්වත් ගතවේවි කියායි. එහෙත් ඊලෝන් මස්ක්ගේ ටෙස්ලා සමාගම වසර කිහිපයක් තුළ එය සිදුකළා. මේ වෙද්දී ඉලෙක්ටි‍්‍රක් කාර් යනු ලංකාවේ මහපාරවලත් සාමාන්‍ය වාහනයක්. වසර දහයක් තුළ රොකට් සමාගමක් නිර්මාණය කළ ඊලෝන් මස්ක්, 2018 වෙද්දී ලොව බලවත්ම රොකට්ටුව නිර්මාණය කළා. ඉතින්, ඔහුට 2024 වෙද්දී ඒ රොකට්ටුවෙන් මිනිසුන් අඟහරු යැවීම කළ නොහැකිද? ඕනෑ නම්, තව ටික කාලයක් ගතවී 2026 පමණ දක්වා එය ප‍්‍රමාද වේවි. 2030 වෙද්දී නම් ඊලෝන් මස්ක්ගේ මෙම ව්‍යාපෘතිය සාර්ථක වනු ඇති.
වසර දෙකකට වතාවක් ඇයි?
අඟහරු ලෝකය පිහිටා තිබෙන්නේ අපගේ හඳට වඩා දහස් ගුණයක් ඈතින්. හඳ පිහිටා තිබෙන්නේ සැතපුම් 250,000ක් ඈතින්. ඇපලෝ යානාව දින තුනකින් හඳට ළඟා වුණා. අඟහරු තිබෙන්නේ සැතපුම් 250,000,000ක් ඈතින්. අඟහරුවලට ළඟා වෙන්නට මාස ගණනාවක් ගතවෙනවා. දින වශයෙන් කීවොත් 240ක් පමණ. එසේ මාස ගණනාවකින් ළඟාවිය හැක්කේත් එක් නිශ්චිත දිනයක එක් නිශ්චිත වෙලාවකදී යානාව පිටත් කළොත් පමණයි. වසර දෙකකට වතාවක් අඟහරු සහ පෘථිවිය සමීපයෙන් ගමන් කරනවා.
තවත් අතුරු කාරණයක් කිව යුතුයි. මේ ව්‍යාපෘතිය තිතටම ගණන් බලා කළ යුත්තක්. අඟහරු බලා යානා යැවූ ජාතීන් ගණනාවක් සිටිනවා. ඇමෙරිකාව, යුරෝපය, රුසියාව, ජපානය, චීනය හා ඉන්දියාව යැවූ යානා ගණන 44ක්. ඒත් ඒවායින් බහුතරය අසාර්ථක වුණා. සාර්ථක වුණේ ඒ ගමන්වලින් 3න් 1ක් පමණයි. ඒ නිසා මේ ව්‍යාපෘතිය සිතන තරම් පහසු එකක් නොවෙයි. එමෙන්ම අවදානම් ව්‍යාපෘතියක්. එහෙත් අපට වාසි සහගත තැන් ගොඩක් තියෙනවා. මෙතෙක් අගඟහරුවලට ගිය ව්‍යාපෘතිවලින් තුනෙන් එකක් අසාර්ථක වුවද, ඒ හැම අසාර්ථක වීමකින්ම පාඩමක් ඉගෙනගෙන තිබෙනවා. ඒ අසාර්ථකත්වයන්ගෙන් ලබපු විශාල දැනුම් පද්ධතියක් තිබෙනවා. ඒ දැනුම ඉදිරි ගමන් සාර්ථක වීමේ ප‍්‍රතිශතය වැඩිකරනවා.
ඉන්පස්සේ?
පෙර කී ලෙස 2022 හා 2024 වෙද්දී අඟහරු බලා යන යානා හයෙන් මූලික ව්‍යාපෘති කඳවුරු ආරම්භ කරන්නට ඔහු බලාපොරොත්තු වෙනවා. මුලින්ම අඟහරු ලෝකයේ ජනවාස ඇති කිරීම සඳහා දැවැන්ත ඉදිකිරීම් රැුසක් කරන්නට සිද්ධවෙනවා. කාලයක් ගතවෙන තුරුම අඟහරුවලට යනු ඇත්තේ තෝරාගත් තාක්ෂණික ශිල්පීන් පමණයි. ඔවුන්ට අවශ්‍ය සේවා සපයන්නටද පිරිසක් යවනු ඇති. ඔවුන් කුඩා නගරයක් මුලින් ඉදිකරනු ඇති. වසර දෙකකට වතාවක් අඟහරු බලා යානා යැවිය හැකියි. ක‍්‍රමයෙන් අඟහරුවල නගරය විශාල කරන්නට ඔවුන් බලාපොරොත්තු වෙනවා.
නාසා සමාගමට පෙර ඊලෝන් මස්ක් අඟහරුවලට පළවැනි කණ්ඩායම යැවූ බව සැබෑවක්. එහෙත් එයින් නාසා අවතක්සේරු කළ නොහැකියි. මනුෂ්‍ය වර්ගයාට අඟහරුවල ජීවත්වීම සඳහා අවශ්‍ය තාක්ෂණය හා දැනුම ලබාගන්නට නාසා සමාගම නොතිබුණා නම් නොහැකියි. මීට පෙර ව්‍යාපෘති නිසා අඟහරු ගැනත් අප බොහෝ දේ දන්නවා. අඟහරුවල තිබෙන රෝවර් යානාවලින් ලබාගෙන තිබෙන දත්ත අනුව අඟහරු ලෝකයේ පවතින වායුගෝලය, දේශගුණය ආදි බොහෝ කාරණා ගැන දැනුමක් තියෙනවා.
මනුෂ්‍යයන්ට ජීවත්වෙන්නට ආහාර, ජලය, නවතින්නට තැනක්, ඇඳුම් යන හතර අවශ්‍යයි. ඊට අමතරව ඔක්සිජන් අඟහරු ලෝකයට අවශ්‍යයි. මේ සියලූ කාරණා විසඳන්නට අවශ්‍ය තාක්ෂණය දැනටමත් අප සතුව තිබෙනවා. අඟහරුවල ජීවත්වෙන්නේ කෙසේද යන්න ගැන ඉදිරි සතියේ අප කතාකරන්නට බලාපොරොත්තු වෙනවා.
අපි යන්න ඕනෑ ඇයි?
මනුෂ්‍ය වර්ගයා දැවැන්ත ජයග‍්‍රහණ රැුසක් ලබා තිබෙනවා. විශාල දැනුමක් මෙන්ම හැඟීම් ලෝකයක්ද අපට තිබෙනවා. අප ඉතිහාසයක් තිස්සේ නිර්මාණය කළ සංස්කෘතියම කෙතරම් වටිනවාද? මේ සියල්ල එකම එක උල්කාවක් පෘථිවියට කඩා වැටුණොත් විනාශ වේවි. මනුෂ්‍ය වර්ගයා අවසාන වේවි. මනුෂ්‍ය වර්ගයා තව තවත් ග‍්‍රහලෝකවල පදිංචි වන තරමට ඒ විනාශය අවම කරගත හැකියි. අපගේ ග‍්‍රහ මණ්ඩලයේ තවත් ලොවක පදිංචිවීම මනුෂ්‍ය වර්ගයා සෞරග‍්‍රහ මණ්ඩලයේ පිට ග‍්‍රහලෝකවල පදිංචි වීම දක්වා යන ගමනේ පළමු පියවර වේවි.
‘සොයායෑම’ අපගේ ඞීඑන්ඒවලම තිබෙනවා. අවුරුදු මිලියන දෙකකට පෙර අප‍්‍රිකාව ආශ‍්‍රිතව බිහිවූ මනුෂ්‍ය වර්ගයා ක‍්‍රමයෙන් ලොව වටා ජනපද පිහිටුවාගත්තේ අපගේ ඞීඑන්ඒවල සොයායෑම තිබෙන නිසායි. මේ තරම් දියුණු තාක්ෂණයක් අප බිහිකරගත්තේ ඒ කුතුහලය හා සොයායෑම නිසායි.
වසර 50කට පමණ පෙර මනුෂ්‍ය වර්ගයා හඳට ගිය බවට පුවත් වාර්තා වෙද්දී ලංකාවේ ඈත ගම්දනව්වල උදවියට පවා එය ශ්‍රේෂ්ඨ ආකාරයෙන් දැනුණු බව කියනවා. එකල ඉපදී නොසිටි ලියුම්කරු වගේ කෙනෙකුට ඒ ආශ්චර්යවත් හැඟීම ගැන වැඩිහිටියන්ගෙන් අසා දැනගත හැකියි. අප හඳට ගියා නම්, අපට ඕනෑම දෙයක් කළ හැකි බව මනුෂ්‍ය වර්ගයා එදා විශ්වාස කළා. එය දහස් ගණනක් මිනිසුන්ගේ ජීවිත සාර්ථක කරන්නට හේතු වුණා. අප අඟහරු ලෝකයේ පදිංචියට ගියා නම්, මනුෂ්‍ය වර්ගයා ලෙස අපට එය ශ්‍රේෂ්ඨ හැඟීමක් බවට පත්වේවි.
අපට සමීපතම සහෝදර ලෝකයේ පදිංචි වීම මනුෂ්‍ය වර්ගයාගේ ඉතිහාසයෙහි මීළඟ දැවැන්ත පිම්ම බවට පත්වේවි. ලොව ඕනෑම ජීවීන් වර්ගයකට තනි ග‍්‍රහලෝකයක සිට බහු ග‍්‍රහලෝකවාසී ජීවීන් බවට පත්වීම දැවැන්ත පිම්මක්. බෙදී වෙන්ව ගිය මනුෂ්‍ය වර්ගයාට එක් වර්ගයක් ලෙස සිතන්නට අවශ්‍ය උත්තේජනය සපයන්නටත් අඟහරු ලෝකයේ පදිංචි වුණොත් අපට හැකිවේවි. අඟහරු යෑම ප‍්‍රමාද වෙන්නට වෙන්නට මනුෂ්‍ය වර්ගයා එකිනෙකා යුද වැදී පෘථිවිය විනාශ කරගන්නා දවස ළංවේවි. ඒ නිසා අප අඟහරු යා යුතුමයි. ඇතැම් විට මේ ලිපිය කියවන අයෙකුගේ දරුවන් අඟහරුවල පදිංචි වේවි. කවුරු මොනවා දන්නවාද? අප කවුරුන් හෝ ජීවිතයේ සැඳෑසමය අඟහරුවල ගත කරන්නත් ඉඩ තියෙනවා.x
