සිංහල බෞද්ධ මව්වරුන් 4000කට අධික පිරිසක් වඳභාවයට පත් කළ බව කියන තවුහිත් ජමාත් සංවිධානයේ සාමාජික වෛද්‍යවරයෙකු පිළිබඳව පොලීසිය පුළුල් විමර්ශන ආරම්භ කර ඇති බව සඳහන් කරමින් මැයි 23 වැනිදා දිවයින පුවත්පතේ පළවූ ප‍්‍රධාන පුවත ව්‍යාජ එකක් බව වාර්තා වෙයි.
දිවයින ප‍්‍රධාන පුවතෙහි සඳහන්ව තිබුණේ එලෙස සැත්කම් 4000ක් කළ වෛද්‍යවරයා පිළිබඳ සාක්ෂි සහිත තොරතුරු හෙළිවී තිබෙන බවත්, වෛද්‍යවරයා අල්ලන්නට පොලිසියෙන් පුළුල් පරීක්ෂණ සිදුකරමින් පවතින බවත්ය. සිසේරියන් සැත්කම කරන අතරේ සූක්ෂ්ම ලෙස පැලෝපීය නාලය ගැටගසා කාන්තාවන් වඳභාවයට පත්කර ඇති බව එම පුවතේ සඳහන්ව තිබේ. වෛද්‍යවරයා වසර කිහිපයක් තුළ සිසේරියන් සැත්කම් 7000කට අධික පිරිසක් කර ඇති බවද එහි සඳහන්ය. මෙම පුවත පිළිබඳව අනිද්දාකළ විමසීමකදී පොලිස් මාධ්‍ය ප‍්‍රකාශක රුවන් ගුණසේකර ප‍්‍රකාශ කළේ මෙම පුවත බැලූ බැල්මට ව්‍යාජ එකක් බවය. කිසිදු පොලිස් ස්ථානයකින් හෝ අපරාධ පරීක්ෂණ දෙපාර්තමේන්තුවෙන් හෝ වෙනත් පොලිස් අංශයකින් ඒ පිළිබඳව විමර්ශනයක් නොකරන බවද ඔහු කීය. කෙසේ වෙතත් දිවයින මේ පිළිබඳව ප‍්‍රවෘත්තියක් පළ කර ඇති නිසා එම පුවත පිළිබඳව පොලිස්පතිවරයාගේ උපදෙස් පරිදි විශේෂ පරීක්ෂණයක් අපරාධ පරීක්ෂණ දෙපාර්තමේන්තුව ආරම්භ කරන බව ඔහු කීය. වාර්තාවේ පැවසෙන පුළුල් පරීක්ෂණය කුමන පොලිස් අංශයෙන් සිදු කරන එකක්දැයි දිවයින පුවත්පතෙන් විමසන බව පොලිස් මාධ්‍ය ප‍්‍රකාශකවරයා කීය. ව්‍යාජ පුවතක් පළ කර ඇති බව තහවුරු වුණොත් එය පැහැදිලිවම රටේ පවතින නීතිය කඩකිරීමක් වන නිසා ඒ සම්බන්ධයෙන් නීතිය ක‍්‍රියාත්මක කරන බවද ඔහු පැවසීය.
සිසේරියන් සැත්කම්වලට සම්බන්ධ වී ඇති වෛරද්‍යවරයෙකු වන වෛද්‍ය දයානාත් රණතුංගගෙන් කාන්තාවන් 4000ක් රහසින් වඳභාවයට පත්කළ හැකිදැයි කළ විමසීමකදී ඔහු ප‍්‍රකාශ කළේ, සිසේරියන් සැත්කමකදී පැලෝපීය නාලය කපා අවහිර කළ හැකි බවය. සෞඛ්‍ය අවශ්‍යතා මත මවගේ අවසරය ඇතිව එලෙස පැලෝපීය නාලය අවහිර කරන අවස්ථාද ඇති බව ඔහු කීය. එහෙත් වෛද්‍යවරයෙකු වසර කිහිපයක් තුළ සිසේරියන් සැත්කම් 7000ක් කර ඇති බවත්, ඉන් 4000කදී රහසින් කාන්තාවන් වඳභාවයට පත්කර ඇති බවත් දිවයින පුවතෙහි සඳහන් කරුණු විශ්වාස කළ නොහැකි බව ඔහු කීය. එමෙන්ම සිසේරියන් සැත්කමක් වෛද්‍යවරයෙකු තනිවම නොකරන බවත්, අඩුම තරමේ එක් සහායක වෛද්‍යවරයෙකු හා හෙදියක ශල්‍යාගාරය තුළ සිටිය යුතු බවත් ඔහු කීය. ඒ දෙදෙනාම වෛද්‍යවරයා කරන සියලූ දේම සමීපව නිරීක්ෂණය කරමින් සහාය දක්වන නිසා ඔවුන් නොදැක පැලෝපීය නාලය අවහිර කළ නොහැකි බවද ඔහු කීය. අනෙක් අතට ඒ සඳහා සහායක වෛද්‍යවරයාගේ සහායද, හෙදිය භාරයේ පවතින උපකරණද අවශ්‍ය වන බව ඔහු කීය.
ඊට අමතරව වෛද්‍යවරයා පෙන්වාදුන්නේ එක් වෛද්‍යවරයෙකු වසර කිහිපයක් තුළ එතරම් සිසේරියන් සැත්කම් ප‍්‍රමාණයක් සිදු කිරීමට ඉඩ නොමැති බවය. වෛද්‍යවරයෙකු සතියට දින දෙකක් සිසේරියන් සැත්කම් කරන අතර, එක් දිනකට සිසේරියන් සැත්කම් තුනක් උපරිමයෙන් කළ හැකි බවද පැවසීය. ඒ අනුව සැත්කම් 4000ක් සිදු කිරීමට සති 700කට ආසන්න කාලයක් හෙවත් වසර 13ක් පමණ ගතවෙන බව ඔහු කීය. ඔහු පෙන්වාදුන් ආකාරයට සැත්කම් 7000ක් කිරීමට වසර 22ක් පමණ ගතවනු ඇත. x
