ලංකාව චීනයේ බලපෑමට යටත් කෙරෙන එකඟතා කිහිපයකටත් අත්සන්
ජනාධිපති මෛත‍්‍රීපාල සිරිසේන මැයි 13 වැනිදා සිට 16 දක්වා චීනයේ යෙදුණු සංචාරයේදී, ලංකාවේ තිබෙන චීන ව්‍යාපෘතිවල ආරක්‍ෂාව සඳහා චීන ජාතික සන්නද්ධ ආරක්‍ෂක භටයන් සමග ආරක්‍ෂක උපකරණ යෙදවීමට චීන ජනාධිපතිවරයාට කැමැත්ත ලබාදී ඇති බව අනිද්දා වෙත වාර්තා වෙයි.
කොළඹ පෝට් සිටි, කොළඹ ෂැංග‍්‍රිල්ලා හෝටලය සහ හම්බන්තොට වරායේ ආරක්‍ෂාව සඳහා චීන ආරක්‍ෂක භටයන් 750 දෙනකු යෙදවීමට අවශ්‍යව ඇතැ’යි චීන බලධාරීන් ජනාධිපති සිරිසේන වෙත දැනුම් දී ඇති අතර, අවසානයේ ආරක්‍ෂක භටයන් 500 දෙනෙකු ඒ සඳහා යොදාගැනීමට අවකාශ ලබාදීමට සිරිසේන ජනාධිපතිවරයා, චීන ජනාධිපතිවරයා වෙත පොරොන්දු වී ඇත.
ඒ අතර, ශ‍්‍රී ලංකාවේ සමාජ මාධ්‍ය ජාලා නිරීක්‍ෂණය කිරීමට අවශ්‍ය උපකරණ හා විශේෂඥවරුන් ලබා දෙන ලෙස මෛත‍්‍රීපාල සිරිසේන ජනාධිපතිවරයා චීන ජනාධිපතිවරයාගෙන් ඉල්ලා ඇති අතර, එම සහාය ලබාදීමටද චීනය එකඟ වී තිබේ. සමාජ මාධ්‍ය ජාලා නිරීක්‍ෂණය කිරීමට හා අවශ්‍ය අවස්ථාවලදී ඒවා වාරණය කිරීමට විශේෂ දක්‍ෂතාවක් දක්වන චීනයේ විශේෂඥවරුන්ගේ සහාය ලංකාවේ සමාජ මාධ්‍ය ජාලා නිරීක්‍ෂණය කිරීමටද ලබාගතහොත්, ලංකාවේ සියලූ සමාජ මාධ්‍ය පරිහරණය කරන්නන් බලවත් අවදානමකට විවෘත කෙරෙන බව, මේ පිළිබඳ සිය අදහස් අනිද්දා වෙත දැක්වූ, නිර්නාමිකව සිටීමට කැමති විදුලි සංදේශ විශේෂඥයෙක් පැවසීය. විශේෂයෙන් ටෙලිකොම් ඇතුළු ලංකාවේ විදුලි සංදේශ පද්ධතිය චීනයට නිරාවරණය වීමෙන් තොරතුරු පිළිබඳ විශාල අවදානමක් ඇතිවන බව ඔහුගේ මතයයි.
පුද්ගලයකුගේ මුහුණ මත පදනම්ව ඔහුගේ අනන්‍යතාව හඳුනාගැනීමේ facial recognition * තාක්‍ෂණයද ලංකාවට ලබාදීමට මෙහිදී චීන බලධාරීන් හා ජනාධිපති සිරිසේන එකඟ වී තිබෙන බව අපේ රාජ්‍ය තාන්ත‍්‍රික ආරංචි මාර්ග කියයි. මේ තාක්‍ෂණය ලබාගතහොත් යම් පුද්ගලයකු ලංකාවේ ඕනෑම තැනක සිටිනු නිසැකව හඳුනාගත හැකි බවත්, එම තාක්‍ෂණය නිසා ජනතාවගේ පෞද්ගලිකත්වය සම්පූර්ණයෙන්ම රජයට නිරාවරණය වන බවත්, විශේෂයෙන් චීනයට මේ තොරතුරු ලැබීම ඉතාම අවදානම් සහගත බවත් ඉහත කී විදුලි සංදේශ විශේෂඥයා පැවසීය.
ජනාධිපති සිරිසේන චීනයට ගියේ ජාත්‍යන්තර සමුළුවකට සහභාගිවීමේ මුවාවෙන් හුදෙක් චීන ජනාධිපතිවරයා ඇතුළු චීනයේ ඉහළ රාජ්‍ය නායකයන් හමුවී ඉහත කී එකඟතාවලට පැමිණීම සඳහා බවත්, ලංකාවේ චීන තානාපතිවරයාගේ බලවත් පෙරැුත්තය මත එය සති දෙකක් වැනි කාලයක් තුළ හදිසියේ යොදාගත් සංචාරයක් බවත් අනිද්දා වෙත වාර්තා වෙයි.
අරුණ ජයවර්ධන
